لاوِيِّين 12 - الكتاب المقدس بالعربي الدارجي هنا تشاد

طِهارة المرة الوِلْدت

¹ وَ اللّٰهْ حَجَّى لِمُوسَى وَ قَالْ:

² حَجِّي لِبَنِي إِسْرَائِيلْ وَ قُولْ لَيْهُمْ: «كَنْ مَرَةْ غَلْبَانَةْ وَ وِلْدَتْ وِلَيْد، هِي تَبْقَى نِجْسَةْ لِمُدَّةْ سَبْعَةْ يَوْم وَ تَبْقَى نِجْسَةْ مِثِلْ فِي أَيَّامْهَا هَنَا الْحَيْض.

³ وَ فِي الْيَوْم التَّامِنْ، يِطَهُّرُوا الْوِلَيْد.

⁴ وَ بَعَدْ دَا، هِي تَقْعُدْ 33 يَوْم لِتِطَّهَّرْ مِنْ دَمَّهَا. وَ مَا تَلْمَسْ شَيّءْ مُخَصَّصْ وَ لَا تَمْشِي فِي الْبَيْت الْمُقَدَّسْ، لَحَدِّي تِتِمّ أَيَّامْ طِهَارِتْهَا.

⁵ «وَ كَنْ وِلْدَتْ بِنَيَّةْ، هِي تَبْقَى نِجْسَةْ لِمُدَّةْ سُبُوعَيْن وَ تَبْقَى نِجْسَةْ مِثِلْ فِي أَيَّامْهَا هَنَا الْحَيْض. وَ تَقْعُدْ 66 يَوْم لِتِطَّهَّرْ مِنْ دَمَّهَا.

⁶ «وَ وَكِتْ أَيَّامْ طِهَارِتْهَا هَنَا النُّفَاسْ بِالْوِلَيْد أَوْ الْبِنَيَّةْ يِكَمُّلُوا، هِي تِجِيبْ لِرَاجِلْ الدِّينْ فِي مَدَخَلْ خَيْمَةْ الْإِجْتِمَاعْ خَرُوفْ وَلْد سَنَةْ لِلضَّحِيَّةْ الْمُحَرَّقَةْ. وَ بَتَّانْ كُلَ تِجِيبْ فَرْخ حَمَامْ أَوْ قِمْرِيَّةْ لِلضَّحِيَّةْ هَنَا كَفَّارَةْ الذَّنِبْ.

⁷ وَ رَاجِلْ الدِّينْ يِقَدِّمْهُمْ قِدَّامْ اللّٰهْ وَ يِسَوِّي لَيْهَا كَفَّارَةْ. وَ خَلَاصْ، هِي تَبْقَى طَاهِرَةْ مِنْ دَمَّهَا هَنَا الْوَالُودَةْ. «وَ دَوْل قَوَانِينْ الْبُخُصُّوا الْمَرَةْ التَّلْدَ وِلَيْد أَوْ بِنَيَّةْ.

⁸ «وَ كَنْ هِي مَا تَقْدَرْ تَلْقَى خَرُوفْ، هِي تِشِيلْ قِمْرِيْ إِتْنَيْن أَوْ حَمَامْ إِتْنَيْن. وَاحِدْ تِقَدِّمَهْ لِلضَّحِيَّةْ الْمُحَرَّقَةْ وَ الْآخَرْ لِلضَّحِيَّةْ هَنَا كَفَّارَةْ الذَّنِبْ. وَ رَاجِلْ الدِّينْ يِسَوِّي لَيْهَا كَفَّارَةْ وَ هِي تَبْقَى طَاهِرَةْ.»