يَشُوع 3 - الكتاب المقدس بالعربي الدارجي هنا تشاد

بني إسرائيل قطعوا بحر الأُرْدُن

¹ وَ بِفَجُرْ بَدْرِي، يَشُوعْ وَ كُلَّ بَنِي إِسْرَائِيلْ قَمَّوْا مِنْ فَرِيقْهُمْ فِي شِطِّيمْ وَ نَزَلَوْا فِي خَشُمْ بَحَرْ الْأُرْدُنْ. وَ هُمَّنْ قَعَدَوْا فِي الْبَكَانْ دَا قُبَّالْ مَا يَقْطَعَوْا.

² وَ فِي مُدَّةْ تَلَاتَةْ يَوْم، شُيُوخْ الشَّعَبْ قَاعِدِينْ يُرُوغُوا فِي الْفَرِيقْ

³ وَ أَنْطَوْا أَمُرْ وَ قَالَوْا: «وَكِتْ تِشِيفُوا صَنْدُوقْ مُعَاهَدَةْ اللّٰهْ إِلٰـهْكُو وَ رُجَالْ الدِّينْ اللَّاوِيِّينْ الْيِشِيلُوهْ، خَلَاصْ قُمُّوا مِنْ بَكَانْكُو الْقَاعِدِينْ فَوْقَهْ وَ تَابُعُوهْ.

⁴ وَ بَيْدَا، تَعَرْفُوا الدَّرِبْ التِّشِيلُوهْ أَشَانْ أَوَّلْ إِنْتُو مَا عَدَّيْتُوا بِالدَّرِبْ دَا. وَ وَاجِبْ تِخَلُّوا بَيْنكُو وَ بَيْن الصَّنْدُوقْ فَرَقَةْ تِسَاوِي وَاحِدْ كِيلَوْمِتِرْ وَ أَبَداً مَا تِقَرُّبُوا لَيَّهْ.»

⁵ وَ يَشُوعْ قَالْ لِلشَّعَبْ: «خَصُّصُوا نُفُوسْكُو أَشَانْ أَمْبَاكِرْ اللّٰهْ يِسَوِّي عَجَايِبْ فِي أُسُطْكُو.»

⁶ وَ يَشُوعْ قَالْ لِرُجَالْ الدِّينْ: «شِيلُوا صَنْدُوقْ مُعَاهَدَةْ اللّٰهْ وَ أَمْشُوا قِدَّامْ الشَّعَبْ.» وَ خَلَاصْ هُمَّنْ شَالَوْا صَنْدُوقْ الْمُعَاهَدَةْ وَ مَشَوْا قِدَّامْ الشَّعَبْ.

⁷ وَ اللّٰهْ قَالْ لِيَشُوعْ: «الْيَوْم، أَنَا نِسَوِّيكْ كَبِيرْ فِي عُيُونْ كُلَّ بَنِي إِسْرَائِيلْ أَشَانْ يَعَرْفُوا كَدَرْ أَنَا نُكُونْ مَعَاكْ مِثِلْ كُنْت مَعَ مُوسَى.

⁸ وَ أَنْطِي الْأَمُرْ دَا لِرُجَالْ الدِّينْ الشَّايْلِينْ صَنْدُوقْ الْمُعَاهَدَةْ وَ قُولْ لَيْهُمْ: ‹كَنْ وَصَّلْتُوا خَشُمْ بَحَرْ الْأُرْدُنْ وَ دَسَّيْتُوا رِجْلَيْكُو فِي أَلْمِيهْ، أَقِيفُوا.›»

⁹ وَ يَشُوعْ قَالْ لِبَنِي إِسْرَائِيلْ: «تَعَالُوا قَرِيبْ هِنِي وَ أَسْمَعَوْا كَلَامْ اللّٰهْ إِلٰـهْكُو.»

^10-11 وَ بَتَّانْ يَشُوعْ قَالْ: «وَكِتْ تِشِيفُوا صَنْدُوقْ مُعَاهَدَةْ اللّٰهْ رَبّ كُلَّ الْأَرْض يَقْطَعْ بَحَرْ الْأُرْدُنْ، خَلَاصْ فِي الْوَكِتْ دَا، تَعَرْفُوا كَدَرْ اللّٰهْ الْحَيّ قَاعِدْ فِي أُسُطْكُو. وَ تَعَرْفُوا كَدَرْ هُو يَقْلَعْ قِدَّامْكُو أَرْض الْكَنْعَانِيِّينْ وَ الْحِتِّيِّينْ وَ الْحِوِّيِّينْ وَ الْفِرِزِّيِّينْ وَ الْقِرْقَاشِيِّينْ وَ الْأَمُورِيِّينْ وَ الْيَبُوسِيِّينْ.

¹² وَ هَسَّعْ، أَعَزُلُوا رَاجِلْ وَاحِدْ مِنْ أَيِّ قَبِيلَةْ مِنْ قَبَايِلْ بَنِي إِسْرَائِيلْ الْأَتْنَا عَشَرْ.

¹³ وَ رُجَالْ الدِّينْ يِشِيلُوا صَنْدُوقْ اللّٰهْ رَبّ كُلَّ الْأَرْض يَدْخُلُوا فِي الْبَحَرْ. وَ وَكِتْ بُطُونْ رِجْلَيْهُمْ يَدْخُلُوا فِي أَلْمِي بَحَرْ الْأُرْدُنْ، خَلَاصْ أَلْمِي الْبَحَرْ دَا يِنْحَجِزْ مِنْ أَلْمِي الْجَارِي مِنْ الْعَيْن وَ يَقِيفْ مِثِلْ الدُّرْدُرْ.»

¹⁴ وَ وَكِتْ الشَّعَبْ قَمَّوْا مِنْ خِيَمْهُمْ لِيَقْطَعَوْا بَحَرْ الْأُرْدُنْ، رُجَالْ الدِّينْ الشَّايْلِينْ صَنْدُوقْ الْمُعَاهَدَةْ مَشَوْا قِدَّامْهُمْ.

¹⁵ وَ دَا فِي وَكْت الْقَطِعْ الْفَوْقَهْ بَحَرْ الْأُرْدُنْ مَلَانْ مَرَّةْ وَاحِدْ لَحَدِّي فَاتْ حُدُودَهْ. وَ لَاكِنْ وَكِتْ رُجَالْ الدِّينْ الشَّايْلِينْ صَنْدُوقْ مُعَاهَدَةْ اللّٰهْ وَصَّلَوْا فِي خَشُمْ بَحَرْ الْأُرْدُنْ وَ دَسَّوْا رِجْلَيْهُمْ فِي الْأَلْمِي،

¹⁶ طَوَّالِي الْأَلْمِي الْجَارِي مِنْ الْعَيْن وَقَفْ وَ بِقِي مِثِلْ دُرْدُرْ فِي مَسَافَةْ طَوِيلَةْ فِي حِلَّةْ آدَمْ الْقَاعِدَةْ جَنْب صَرْتَانْ. وَ الْأَلْمِي النَّازِلْ عَلَيْ الْبَحَرْ الْمَيِّتْ وَقَفْ مَرَّةْ وَاحِدْ. وَ الشَّعَبْ قَطَعَوْا الْبَحَرْ مُقَابِلْ حِلَّةْ أَرِيحَا.

¹⁷ وَ رُجَالْ الدِّينْ الشَّايْلِينْ صَنْدُوقْ مُعَاهَدَةْ اللّٰهْ وَقَفَوْا ثَابْتِينْ فِي التُّرَابْ الْيَابِسْ فِي أُسُطْ بَحَرْ الْأُرْدُنْ. وَ كُلَّ بَنِي إِسْرَائِيلْ قَاعِدِينْ يَقْطَعَوْا فِي التُّرَابْ الْيَابِسْ دَا، لَحَدِّي كُلَّ الْأُمَّةْ قَطَعَتْ بَحَرْ الْأُرْدُنْ.