يَشُوع 15 - الكتاب المقدس بالعربي الدارجي هنا تشاد

قِسِم الأرْض هنا قبيلة يَهُوذَا

¹ وَ دَاهُو قِسِمْ الْأَرْض هَنَا قَبِيلَةْ يَهُوذَا حَسَبْ خُشُومْ بُيُوتْهُمْ مِنْ حُدُودْ أَدَوْم لِصَحَرَاء سِينْ وَ لَحَدِّي صَحَرَاء نَقَبْ فِي آخِرْ الْجُنُوبْ.

² وَ حُدُودْهُمْ فِي الْجُنُوبْ مِنْ خَشُمْ الْبَحَرْ الْمَيِّتْ الْمُقَابِلْ الْجُنُوبْ.

³ وَ مِنْ هِنَاكْ، الْحُدُودْ يِحَوُّقُوا جُنُوبْ لِقِيزَانْ الْعَقَارِبْ وَ يِعَدُّوا بِصَحَرَاء سِينْ. وَ الْحُدُودْ دَوْل يَطْلَعَوْا جُنُوبْ لِقَادِشْ بَرْنِيعَ وَ يَمْشُوا لِتُرَابْ حَصْرُونْ وَ يَطْلَعَوْا عَلَيْ أَدَّارْ وَ يِقَبُّلُوا عَلَيْ تُرَابْ قَرْقَعْ.

⁴ وَ مِنْ الْبَكَانْ دَا، يِعَدُّوا بِعَصْمُونْ لَحَدِّي وَادِي مَصِرْ وَ مِنَّهْ لَحَدِّي الْبَحَرْ الْأَبْيَضْ. وَ دَوْل بَسْ حُدُودْهُمْ مِنْ جِيهَةْ الْجُنُوبْ.

⁵ وَ حُدُودْهُمْ فِي الصَّبَاحْ يَمْشُوا مِنْ الْبَحَرْ الْمَيِّتْ لَحَدِّي خَشُمْ بَحَرْ الْأُرْدُنْ. وَ مِنْ الْمُنْشَاقْ، الْحُدُودْ يَبْدَوْا مِنْ نَفْس الْبَكَانْ فِي خَشُمْ بَحَرْ الْأُرْدُنْ

⁶ وَ يَطْلَعَوْا لَحَدِّي بَيْت حُقْلَةْ وَ يِعَدُّوا مُنْشَاقْ لِبَيْت عَرَبَةْ وَ يَطْلَعَوْا لَحَدِّي الْحَجَرْ الْبِنَادُوهْ بُوهَنْ أُسُمْ هَنَا وِلَيْد رَأُوبِينْ.

⁷ وَ الْحُدُودْ يَمْشُوا عَلَيْ دَبِيرْ بِوَادِي عَكُورْ وَ يِقَبُّلُوا مُنْشَاقْ عَلَيْ قِلْقَالْ الْمُقَابِلَةْ الْقَوْز هَنَا أَدُومِيمْ الْقَاعِدْ وَطِي لِلْوَادِي. الْحُدُودْ دَوْل يِعَدُّوا قَرِيبْ لِأَلْمِي هَنَا عَيْن شَمْس وَ يَمْشُوا لَحَدِّي عَيْن رُوقِلْ.

⁸ وَ الْحُدُودْ يِعَدُّوا بِوَادِي بَنِي هِنُّومْ وَ الدِّلَّيَّةْ الْوَطِي لِجَبَلْ الْيَبُوسِيِّينْ يَعْنِي أُورُشَلِيمْ. وَ مِنْهَا يَطْلَعَوْا لَحَدِّي رَاسْ الْجَبَلْ الْمُقَابِلْ وَادِي بَنِي هِنُّومْ فِي الْغَرِبْ فِي خَشُمْ وَادِي رَفَايِينْ فِي الْمُنْشَاقْ.

⁹ وَ الْحُدُودْ يِقَبُّلُوا مِنْ رَاسْ الْجَبَلْ لَحَدِّي عَيْن نِفْتُوحْ وَ يَمْشُوا عَلَيْ الْحِلَّالْ الْفِي جَبَلْ عَفْرُونْ وَ يِقَبُّلُوا عَلَيْ بَعْلَةْ يَعْنِي قَرْيَةْ يَعَرِيمْ.

¹⁰ وَ مِنْ بَعْلَةْ، الْحُدُودْ يِقَبُّلُوا غَرِبْ عَلَيْ جَبَلْ سَعِيرْ وَ يَطْلَعَوْا فِي الدِّلَّيَّةْ هَنَا جَبَلْ الْغَابَاتْ فِي الْمُنْشَاقْ يَعْنِي جَبَلْ كَسَالُونْ. وَ يِدَّلَّوْا بِبَيْت شَمْس وَ يِعَدُّوا بِتِمْنَةْ.

¹¹ وَ الْحُدُودْ يَمْشُوا لَحَدِّي الدِّلَّيَّةْ هَنَا حِلَّةْ عَقْرُونْ فِي الْمُنْشَاقْ وَ يِقَبُّلُوا عَلَيْ شِكَارُونْ وَ يِعَدُّوا بِجَبَلْ بَعْلَةْ وَ يَمْشُوا لَحَدِّي يَبْنِيِيلْ وَ يَقِيفُوا فِي الْبَحَرْ الْأَبْيَضْ.

¹² وَ خَلَاصْ الْبَحَرْ الْأَبْيَضْ يَبْقَى حُدُودْهُمْ فِي الْغَرِيبْ. وَ دَوْل بَسْ الْحُدُودْ مِنْ كُلِّ جِيهَةْ هَنَا أَرْض قَبِيلَةْ يَهُوذَا حَسَبْ خُشُومْ بُيُوتْهُمْ.

¹³ وَ كَالِبْ وِلَيْد يَفُونَى لِقِي قِسْمَهْ مِنْ قَبِيلَةْ يَهُوذَا وَ دَا حَسَبْ كَلَامْ اللّٰهْ لِيَشُوعْ. وَ أَنْطَوْه قَرْيَةْ أَرْبَعَةْ يَعْنِي حِبْرُونْ. وَ أَرْبَعَةْ دَا هُو جِدّ هَنَا بَنِي عَنَقْ.

¹⁴ وَ كَالِبْ طَرَدْ تَلَاتَةْ خُشُومْ بُيُوتْ مِنْ بَنِي عَنَقْ وَ شَالْ مِنْهُمْ أَرْضُهُمْ وَ هُمَّنْ شِيشَايْ وَ أَخِمَانْ وَ تَلْمَايْ.

¹⁵ وَ مِنْ الْبَكَانْ دَا، هُو قَمَّ ضِدّ سُكَّانْ دَبِيرْ الْأَوَّلْ أُسُمْهَا قَرْيَةْ سِيفَرْ.

¹⁶ وَ كَالِبْ قَالْ: «النَّادُمْ الْهَجَمْ قَرْيَةْ سِيفَرْ وَ شَالْهَا، أَنَا نَنْطِيهْ بِنَيِّتِي عَكْسَةْ يَاخُدْهَا.»

¹⁷ وَ عُتْنِيِيلْ وِلَيْد قِنَازْ أَخُو كَالِبْ هَجَمْ قَرْيَةْ سِيفَرْ وَ شَالْهَا. وَ كَالِبْ أَنْطَاهْ بِنَيِّتَهْ عَكْسَةْ لِيَاخُدْهَا.

¹⁸ وَ لَاكِنْ مِنْ جَاتْ لَيَّهْ، هِي حَرَّشَتَهْ وَ قَالَتْ: «أَسْأَلْ أَبُويِ يَنْطِيكْ زَرَعْ.» وَ بَعَدْ هِي أَدَّلَّتْ مِنْ حُمَارْهَا، كَالِبْ قَالْ لَيْهَا: «تِدَوْرِي شُنُو؟»

¹⁹ وَ هِي رَدَّتْ لَيَّهْ وَ قَالَتْ: «هَسَّعْ دَا، بَارِكْنِي. إِنْتَ أَنْطَيْتنِي تُرَابْ فِي صَحَرَاء نَقَبْ وَ هَسَّعْ دَا، أَنْطِينِي عُيُونْ أَلْمِي كُلَ.» وَ هُو أَنْطَاهَا عُيُونْ أَلْمِي الْفَوْق وَ التِّحِتْ كُلَ.

²⁰ وَ دِي بَسْ الْأَرْض الْأَنْطَوْهَا وَرَثَةْ لِقَبِيلَةْ يَهُوذَا حَسَبْ خُشُومْ بُيُوتْهُمْ.

²¹ وَ الْمُدُنْ هَنَا قَبِيلَةْ يَهُوذَا الْفِي حُدُودْ أَدَوْم فِي الْجُنُوبْ، هُمَّنْ قَبْصِيلْ وَ عِدَرْ وَ يَقُورْ

²² وَ قِيْنَةْ وَ دِيمُونَةْ وَ عَدْعَادَةْ

²³ وَ قَدَشْ وَ حَاصُورْ وَ يِتْنَانْ

²⁴ وَ زِيفْ وَ طَلَمْ وَ بَعَلُوتْ

²⁵ وَ حَاصُورْ حَدَتَّةْ وَ قَرْيُوتْ حَصْرُونْ الْبِنَادُوهَا حَاصُورْ

²⁶ وَ أَمَامْ وَ شَمَعْ وَ مُلَادَةْ

²⁷ وَ حَصَرْ قَدَّ وَ حَشْمُونْ وَ بَيْت فَالَطْ

²⁸ وَ حَصَرْ شُوعَلْ وَ بِيرْ سَبْعَةْ وَ الْحِلَّالْ التَّابْعِينْ لَيْهَا

²⁹ وَ بَعْلَةْ وَ عِيِّيمْ وَ عَصَمْ

³⁰ وَ أَلِتُولَدْ وَ كَسِيلْ وَ حُرْمَةْ

³¹ وَ صِقْلَاقْ وَ مَدْمَنَّا وَ سَنْسَنَّةْ

³² وَ لَبَوُوتْ وَ شِلْحِيمْ وَ عَيْن رِمُّونْ. وَ بِالْجُمْلَةْ 29 مَدِينَةْ وَ حِلَّالْهُمْ التَّابْعِينْ لَيْهُمْ.

³³ وَ مُدُنْهُمْ الْفِي سَهَلَةْ شَفِيلَةْ هُمَّنْ أَشْتَوُولْ وَ صَرْعَةْ وَ أَشْنَةْ

³⁴ وَ زَنُوحْ وَ عَيْن قَنِّيمْ وَ تَفُوحْ وَ عِنَامْ

³⁵ وَ يَرْمُوتْ وَ عَدُلَّامْ وَ سُوكُو وَ عَزِيقَةْ

³⁶ وَ شَعَرَايِمْ وَ عَدِتَايِمْ وَ قَدِيرَةْ وَ قَدِيرُوتَايِمْ. وَ بِالْجُمْلَةْ 14 مَدِينَةْ وَ حِلَّالْهُمْ التَّابْعِينْ لَيْهُمْ.

³⁷ وَ وَرَثَوْا بَتَّانْ صِنَانْ وَ حَدَاشَةْ وَ مِقْدَلْ قَادْ

³⁸ وَ دِلْعَانْ وَ مِصْفَةْ وَ يَقْتِيلْ

³⁹ وَ لَكِيشْ وَ بُصْقَتْ وَ عَقْلُونْ

⁴⁰ وَ كَبُّونْ وَ لَحْمَاسْ وَ كِتْلِيشْ

⁴¹ وَ قَدِيرُوتْ وَ بَيْت دَقُون وَ نَعْمَةْ وَ مَقِيدَةْ. وَ بِالْجُمْلَةْ 16 مَدِينَةْ وَ حِلَّالْهُمْ التَّابْعِينْ لَيْهُمْ.

⁴² وَ وَرَثَوْا بَتَّانْ لِبْنَةْ وَ عَاتَرْ وَ عَشَنْ

⁴³ وَ يِفْتَاحْ وَ أَشْنَةْ وَ نَصِيبْ

⁴⁴ وَ قَعِيلَةْ وَ أَكْزِيبْ وَ مَرِيشَةْ. وَ بِالْجُمْلَةْ 9 مَدِينَةْ وَ حِلَّالْهُمْ التَّابْعِينْ لَيْهُمْ.

⁴⁵ وَ وَرَثَوْا عَقْرُونْ وَ الْحِلَّالْ التَّابْعِينْ لَيْهَا.

⁴⁶ وَ مِنْ عَقْرُونْ حُدُودْهُمْ يَمْشُوا غَرِبْ لِأَشْدُودْ وَ حِلَّالْهَا.

⁴⁷ وَرَثَوْا أَشْدُودْ وَ الْحِلَّالْ التَّابْعِينْ لَيْهَا وَ غَزَّةْ وَ الْحِلَّالْ التَّابْعِينْ لَيْهَا وَ لَحَدِّي وَادِي مَصِرْ فِي خَشُمْ الْبَحَرْ الْأَبْيَضْ.

⁴⁸ وَ وَرَثَوْا بَتَّانْ مُدُنْ الْقَاعِدِينْ فِي الْجِبَالْ وَ هُمَّنْ شَمِيرْ وَ يَتِّيرْ وَ سُوكُو

⁴⁹ وَ دَنَّةْ وَ قَرْيَةْ سَنَّةْ يَعْنِي دَبِيرْ

⁵⁰ وَ عَنَابْ وَ أَشْتِمُو وَ عَنِيمْ

⁵¹ وَ قَوْشَنْ وَ حُلُونْ وَ قِيلُو. وَ بِالْجُمْلَةْ 11 مَدِينَةْ وَ حِلَّالْهُمْ التَّابْعِينْ لَيْهُمْ.

⁵² وَ وَرَثَوْا بَتَّانْ فِي أَرَابْ وَ رُومَةْ وَ إِشْعَانْ

⁵³ وَ يَانُومْ وَ بَيْت تَفُوحْ وَ أَفِيقَةْ

⁵⁴ وَ حُمْطَةْ وَ قَرْيَةْ أَرْبَعَةْ يَعْنِي حِبْرُونْ وَ صِيعُورْ. وَ بِالْجُمْلَةْ 9 مَدِينَةْ وَ حِلَّالْهُمْ التَّابْعِينْ لَيْهُمْ.

⁵⁵ وَ وَرَثَوْا بَتَّانْ فِي مَاعَوْن وَ كَرْمَلْ وَ زِيفْ وَ يُطَّةْ

⁵⁶ وَ يَزْرَعِيلْ وَ يَقْدَعَامْ وَ زَنُوحْ

⁵⁷ وَ قَيِينْ وَ قِبَيْعَةْ وَ تِمْنَةْ. وَ بِالْجُمْلَةْ 10 مَدِينَةْ وَ حِلَّالْهُمْ التَّابْعِينْ لَيْهُمْ.

⁵⁸ وَ وَرَثَوْا بَتَّانْ لِقَوْا حَلْحُولْ وَ بَيْت صُورْ وَ قَدُورْ

⁵⁹ وَ مَعَارَتْ وَ بَيْت عَنُوتْ وَ أَلِتَقُونْ. وَ بِالْجُمْلَةْ 6 مَدِينَةْ وَ حِلَّالْهُمْ التَّابْعِينْ لَيْهُمْ.

⁶⁰ وَ وَرَثَوْا بَتَّانْ قَرْيَةْ بَعَلْ يَعْنِي قَرْيَةْ يَعَرِيمْ وَ رَبَّةْ. بِالْجُمْلَةْ 2 مَدِينَةْ وَ حِلَّالْهُمْ التَّابْعِينْ لَيْهُمْ.

⁶¹ وَ فِي الصَّحَرَاء، وَرَثَوْا بَيْت عَرَبَةْ وَ مِدِّينْ وَ سِكَاكَةْ

⁶² وَ نِبْشَانْ وَ مَدِينَةْ الْمِلِحْ وَ عَيْن جِدِي. بِالْجُمْلَةْ 6 مَدِينَةْ وَ حِلَّالْهُمْ التَّابْعِينْ لَيْهُمْ.

⁶³ وَ لَاكِنْ قَبِيلَةْ يَهُوذَا مَا قِدْرَوْا شَالَوْا أَرْض الْيَبُوسِيِّينْ السَّاكْنِينْ فِي أُورُشَلِيمْ. وَ الْيَبُوسِيِّينْ قَاعِدِينْ يَسْكُنُوا فِي أُورُشَلِيمْ فِي أُسُطْ قَبِيلَةْ يَهُوذَا لَحَدِّي الْيَوْم.