يُونُس 1 - الكتاب المقدس بالعربي الدارجي هنا تشاد

يُونُس يدَوْر يجْري بعيد من اللّه

¹ يَوْم وَاحِدْ، اللّٰهْ حَجَّى لِيُونُسْ وِلَيْد أَمِتَّايْ وَ قَالْ:

² «قُمّ أَمْشِي فِي نِينَوَى، الْمَدِينَةْ الْكَبِيرَةْ دِي. وَ خَبِّرْ نَاسْ الْمَدِينَةْ كَدَرْ الْفَسَالَةْ الْهُمَّنْ قَاعِدِينْ يِسَوُّوهَا دِي، أَنَا شِفْتَهَا. خَلِّي يِنْقَرْعُوا!»

³ خَلَاصْ، يُونُسْ قَمَّ عَرَّدْ وَ أَبَى مَا يِشِيلْ دَرِبْ هَنَا نِينَوَى لَاكِنْ شَالْ دَرِبْ هَنَا حِلَّةْ تَرْشِيشْ أَشَانْ يِدَوْر يَجْرِي مِنْ اللّٰهْ. وَ وِصِلْ فِي حِلَّةْ يَافَا فِي خَشُمْ الْبَحَرْ الْأَبْيَضْ الْمُتَوَسِّطْ وَ لِقِي سَفِينَةْ مَاشَةْ تَرْشِيشْ. خَلَاصْ كَفَّى أُجُرْتَهْ وَ رِكِبْ مَعَ خَدَّامِينْ السَّفِينَةْ لِيَمْشِي تَرْشِيشْ، بَعِيدْ مِنْ اللّٰهْ.

⁴ وَ وَكِتْ مَاشِينْ فِي الْبَحَرْ دَا، اللّٰهْ رَسَّلْ رِيحْ شَدِيدَةْ وَ شَلَّالْ شَدِيدْ قَمَّ لَحَدِّي يِدَوْر يِكَسِّرْ السَّفِينَةْ.

⁵ وَ خَدَّامِينْ السَّفِينَةْ خَافَوْا بِلْحَيْن وَ أَيِّ وَاحِدْ مِنْهُمْ قَمَّ يَصْرَخْ لِإِلٰـهَهْ أَشَانْ يِنَجِّيهُمْ. وَ دَفَّقَوْا الْخُمَامْ الْفِي السَّفِينَةْ فِي الْبَحَرْ أَشَانْ تَبْقَى خَفِيفَةْ. وَ يُونُسْ كَمَانْ دَلَّى تِحِتْ فِي لُبّ السَّفِينَةْ رَقَدْ وَ نَايِمْ نَوْم شَدِيدْ.

⁶ وَ مَسْؤُولْ السَّفِينَةْ جَاءْ قَالْ لَيَّهْ: «هَايْ دَا! مَالَكْ نَايِمْ؟ قُمّ أَسْأَلْ إِلٰـهَكْ! أَكُونْ يِفَكِّرْ فَوْقنَا وَ يِنَجِّينَا مِنْ الْمَوْت.»

⁷ وَ خَدَّامِينْ السَّفِينَةْ قَالَوْا أَمْبَيْنَاتْهُمْ: «تَعَالُوا نِسَوُّوا أَمْ عِيَيْدَاتْ أَشَانْ نَعَرْفُوا يَاتُو الْجَابْ لَيْنَا الْمَصِيبَةْ دِي.» خَلَاصْ سَوَّوْا أَمْ عِيَيْدَاتْ وَ وَقَعْ فِي يُونُسْ.

⁸ وَ فِي الْبَكَانْ دَا، هُمَّنْ قَالَوْا لَيَّهْ: «أَوْرِينَا شُنُو الْجَابْ لَيْنَا الْمَصِيبَةْ دِي. إِنْتَ جَايِ مِنْ وَيْن؟ وَ جِيتْ تِسَوِّي شُنُو؟ وَ بَلَدَكْ وَيْن وَ نَفَرَكْ شُنُو؟»

⁹ وَ يُونُسْ رَدَّ لَيْهُمْ وَ قَالْ: «أَنَا عِبْرَانِي وَ نَعَبُدْ اللّٰهْ رَبّ السَّمَاوَاتْ، الْخَلَقْ الْأَرْض وَ الْبَحَرْ.

¹⁰ وَ أَنَا مُعَرِّدْ مِنْ اللّٰهْ.» وَ وَكِتْ هُمَّنْ سِمْعَوْا كَلَامَهْ دَا، خَافَوْا خَوْف شَدِيدْ. وَ قَالَوْا لَيَّهْ: «مَالَا سَوَّيْت شَيّءْ مِثِلْ دَا؟»

¹¹ وَ الشَّلَّالْ قَاعِدْ يَطْلَعْ بِزِيَادَةْ. وَ قَالَوْا لَيَّهْ: «هَسَّعْ دَا، نِسَوُّوا لَيْك شُنُو أَشَانْ الشَّلَّالْ يَقِيفْ لَيْنَا؟»

¹² وَ يُونُسْ قَالْ لَيْهُمْ: «شِيلُونِي وَ أَزْقُلُونِي فِي الْبَحَرْ وَ الشَّلَّالْ يَقِيفْ لَيْكُو. أَشَانْ أَنَا نَعَرِفْ كَدَرْ الرِّيحْ الشَّدِيدَةْ دِي جَاتْ فِي شَانِي أَنَا بَسْ.»

¹³ وَ لَاكِنْ خَدَّامِينْ السَّفِينَةْ حَاوَلَوْا يِقَبُّلُوا السَّفِينَةْ فِي خَشُمْ الْبَحَرْ. وَ مَا قِدْرَوْا أَشَانْ الشَّلَّالْ قَاعِدْ يَطْلَعْ بِزِيَادَةْ.

¹⁴ وَ قَمَّوْا يَشْحَدَوْا اللّٰهْ وَ قَالَوْا: «يَا اللّٰهْ! مَا تَهْلِكْنَا فِي شَانْ الرَّاجِلْ دَا وَ مَا تُخُطّ فَوْقنَا دِمَّةْ بَرِي. يَا اللّٰهْ! إِنْتَ سَوَّيْت الشَّيّءْ التِّدَوْرَهْ.»

¹⁵ خَلَاصْ، شَالَوْا يُونُسْ وَ زَقَلَوْه فِي الْبَحَرْ وَ طَوَّالِي الشَّلَّالْ وَقَفْ.

¹⁶ وَ الْخَدَّامِينْ خَافَوْا خَوْف شَدِيدْ مِنْ اللّٰهْ وَ قَدَّمَوْا لَيَّهْ ضَحِيَّةْ وَ عَاهَدَوْا اللّٰهْ أَشَانْ يَعَبُدُوهْ بِزِيَادَةْ.

¹⁷ وَ فِي الْبَكَانْ دَا، اللّٰهْ رَسَّلْ حُوتَايْ كَبِيرَةْ زَرَطَتْ يُونُسْ. وَ خَلَاصْ، يُونُسْ قَعَدْ فِي بَطُنْ الْحُوتَايْ تَلَاتَةْ يَوْم وَ تَلَاتَةْ لَيْلَةْ.