إرْمِيا 39 - الكتاب المقدس بالعربي الدارجي هنا تشاد

عسْكر بَابِل شالوا مدينة القدس

¹ وَ فِي الشَّهَرْ الْعَاشِرْ فِي السَّنَةْ التَّاسْعَةْ هَنَا حُكُمْ صِدْقِيَّا مَلِكْ يَهُوذَا، نَبُوخَدْنَصَرْ مَلِكْ بَابِلْ جَاءْ بِكُلَّ عَسْكَرَهْ لِمَدِينَةْ الْقُدُسْ وَ حَاصَرْهَا.

² وَ فِي الْيَوْم التَّاسِعْ هَنَا الشَّهَرْ الرَّابِعْ فِي سَنِةْ 11 هَنَا حُكُمْ صِدْقِيَّا، قَدَّوْا خُرْمَةْ فِي دُرْدُرْ الْمَدِينَةْ.

³ وَ خَلَاصْ، كُلَّ قُيَّادْ مَلِكْ بَابِلْ جَوْا وَ قَعَدَوْا فِي الْبَابْ الْأُسُطْ. وَ هُمَّنْ نِرْقَلْ شَرَاصَرْ كَبِيرْ الْقُيَّادْ وَ سَمْقَرْ نَبُو وَ سَرْ سَكِيمْ كَبِيرْ الْمَسَائِيلْ وَ كُلَّ مَسَائِيلْ مَلِكْ بَابِلْ الْآخَرِينْ.

⁴ وَ مِنْ شَافَوْا النَّاسْ دَوْل، صِدْقِيَّا مَلِكْ يَهُوذَا وَ كُلَّ عَسْكَرَهْ مَرَقَوْا وَ عَرَّدَوْا مِنْ الْمَدِينَةْ بِاللَّيْل. وَ دَا بِدَرِبْ جِنَيْنَةْ الْمَلِكْ بِالْبَابْ الْقَاعِدْ أَمْبَيْن الدَّرَادِرْ الْإِتْنَيْن هَنَا الدِّفَاعْ. وَ هُمَّنْ مَرَقَوْا بِالدَّرِبْ الْمَاشِي عَلَيْ وَادِي الْأُرْدُنْ.

⁵ وَ لَاكِنْ عَسْكَرْ بَابِلْ طَرَدَوْه لِصِدْقِيَّا وَ لِحْقَوْه وَ كَرَبَوْه فِي كَدَادَةْ أَرِيحَا. وَ هُمَّنْ جَابَوْه فِي حِلَّةْ رِبْلَةْ فِي بَلَدْ حَمَاتْ قِدَّامْ نَبُوخَدْنَصَرْ مَلِكْ بَابِلْ. وَ فِي الْبَكَانْ دَا، حَاكَمَهْ.

⁶ وَ مَلِكْ بَابِلْ دَبَحْ أَوْلَادْ صِدْقِيَّا قِدَّامَهْ فِي رِبْلَةْ وَ بَتَّانْ دَبَحْ كُلَّ شُيُوخْ يَهُوذَا.

⁷ وَ بَعَدْ دَا، هُو قَدَّدْ عُيُونْ صِدْقِيَّا وَ جَنْزَرَهْ بِجِنْزِيرْ هَنَا نَحَاسْ مَطْبُوقْ لِيِوَدِّيهْ فِي بَابِلْ.

⁸ وَ الْبَابِلِيِّينْ قَمَّوْا حَرَّقَوْا قَصِرْ الْمَلِكْ وَ بُيُوتْ الشَّعَبْ فِي مَدِينَةْ الْقُدُسْ وَ رَمَوْا دُرْدُرْهَا.

⁹ وَ الشَّعَبْ الْفَضَّلَوْا فِي الْمَدِينَةْ وَ النَّاسْ الْأَنْضَمَّوْا لِمَلِكْ بَابِلْ وَ النَّاسْ الْآخَرِينْ دَا، نَبُوزَرَدَانْ كَبِيرْ الْحُرَّاسْ هَنَا الْمَلِكْ كَرَبَاهُمْ وَ وَدَّاهُمْ فِي الْغُرْبَةْ فِي بَابِلْ.

¹⁰ وَ لَاكِنْ شَعَبْ وَاحِدِينْ مَسَاكِينْ الْمَا يَمُلْكُوا أَرْض، نَبُوزَرَدَانْ أَنْطَاهُمْ إِذِنْ أَشَانْ يِفَضُّلُوا فِي بَلَدْ يَهُوذَا. وَ فِي الْيَوْم دَا، هُو قَسَّمْ لَيْهُمْ جِنَيْنَاتْ عِنَبْ وَ زِرَاعَةْ.

اللّه نجّى إرْمِيا و عَبْدالْمَلِك

¹¹ وَ نَبُوخَدْنَصَرْ مَلِكْ بَابِلْ أَنْطَى أَمُرْ لِنَبُوزَرَدَانْ كَبِيرْ حُرَّاسَهْ فِي شَانْ إِرْمِيَا وَ قَالْ:

¹² «شِيلْ إِرْمِيَا دَا مَعَاكْ وَ فَكِّرْ فَوْقَهْ عَدِيلْ. مَا تِسَوِّي لَيَّهْ أَيِّ شَيّءْ فَسِلْ وَ سَوِّي لَيَّهْ الْيِدَوْرَهْ.»

¹³ وَ خَلَاصْ، نَبُوزَرَدَانْ كَبِيرْ الْحُرَّاسْ وَ نَبُوشَزْبَانْ كَبِيرْ الْمَسَائِيلْ وَ نِرْقَلْ شَرَاصَرْ كَبِيرْ الْقُيَّادْ وَ كُلَّ قُيَّادْ مَلِكْ بَابِلْ

¹⁴ رَسَّلَوْا جَابَوْا إِرْمِيَا مِنْ فَضَايَةْ الْحُرَّاسْ وَ أَنْطَوْه لِقَدَالْيَا وِلَيْد أَخِقَامْ وِلَيْد شَافَانْ. وَ مِثِلْ دَا، قَدَالْيَا خَلَّى إِرْمِيَا مَشَى بَيْتَهْ وَ قَعَدْ فِي أُسْط الشَّعَبْ.

¹⁵ وَ وَكِتْ إِرْمِيَا لِسَّاعْ مَكْرُوبْ فِي فَضَايَةْ الْحُرَّاسْ، اللّٰهْ حَجَّى لَيَّهْ وَ قَالْ:

¹⁶ «قُمّ وَ أَمْشِي لِعَبْدالْمَلِكْ الْحَبَشِي وَ قُولْ لَيَّهْ: ‹دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ”أَكِيدْ أَنَا نِحَقِّقْ الْكَلَامْ الْقُلْتَهْ ضِدّ الْمَدِينَةْ دِي وَ دَا لِلشَّرّ مَا لِلْخَيْر. وَ الْيَوْم دَا، إِنْتَ كُلَ تِشِيفَهْ.

¹⁷ وَ لَاكِنْ فِي الْيَوْم دَا، أَنَا نِنَجِّيكْ وَ إِنْتَ مَا يِسَلُّمُوكْ لِلنَّاسْ الْإِنْتَ تَخَافْ مِنْهُمْ. وَ دَا كَلَامْ اللّٰهْ.

¹⁸ وَ أَكِيدْ أَنَا نِنَجِّيكْ. إِنْتَ مَا تُمُوتْ فِي الْحَرِبْ وَ تِعِيشْ وَ تَبْقَى فَرْحَانْ أَشَانْ لِقِيتْ الْحَيَاةْ وَ دَا بِسَبَبْ إِنْتَ أَتْوَكَّلْت عَلَيِّ.“›» وَ دَا كَلَامْ اللّٰهْ.