إرْمِيا 21 - الكتاب المقدس بالعربي الدارجي هنا تشاد

اللّه قرّر دمار يَهُوذَا

¹ اللّٰهْ حَجَّى لِإِرْمِيَا كَلَامْ الْبُخُصّ الْمَلِكْ صِدْقِيَّا. وَ الْمَلِكْ دَا رَسَّلْ لِإِرْمِيَا نَاسَيْن وَ هُمَّنْ فَشْحُورْ وِلَيْد مَلْكِيَّا وَ رَاجِلْ الدِّينْ صَفَنْيَا وِلَيْد مَعَسِيَّا لِيُقُولُوا لَيَّهْ:

² «مِنْ فَضْلَكْ، أَسْأَلْ اللّٰهْ فِي شَانَّا أَشَانْ نَبُوخَدْنَصَرْ مَلِكْ بَابِلْ قَمَّ يِحَارِبْنَا. وَ أَكُونْ اللّٰهْ يِرَسِّلْ لَيْنَا وَاحِدْ مِنْ عَجَايْبَهْ وَ يِبَعِّدْ مِنِّنَا الْمَلِكْ دَا.»

³ وَ إِرْمِيَا قَالْ لَيْهُمْ: «دَاهُو الْكَلَامْ التُّقُولُوهْ لِصِدْقِيَّا:

⁴ ‹دَاهُو اللّٰهْ إِلٰـهْ بَنِي إِسْرَائِيلْ قَالْ: ”نِقَبِّلْ فَوْقكُو سِلَاحْكُو الْقَاعِدِينْ تِحَارُبُوا بَيَّهْ مَلِكْ بَابِلْ وَ عَسْكَرَهْ الْقَاعِدِينْ يِحَاصُرُوا مَدِينِتْكُو. وَ أَنَا نِجِيبْهُمْ فِي أُسْط الْمَدِينَةْ.

⁵ وَ دَا أَنَا بَسْ قَاعِدْ نِحَارِبْكُو بِإِيدْ مَرْفُوعَةْ وَ دُرَاعْ قَوِي وَ بِغَضَبْ مُحْرِقْ وَ زَعَلْ شَدِيدْ.

⁶ وَ نَضْرُبْ سُكَّانْ الْمَدِينَةْ دِي، وَ النَّاسْ وَ الْبَهَايِمْ كُلَ يُمُوتُوا بِوَبَاءْ شَدِيدْ.

⁷ وَ بَعَدْ دَا، صِدْقِيَّا مَلِكْ يَهُوذَا وَ خَدَّامِينَهْ وَ كُلَّ نَاسْ الْمَدِينَةْ دِي الْفَضَّلَوْا مِنْ الْوَبَاءْ وَ الْحَرِبْ وَ الْجُوعْ، أَنَا نِسَلِّمْهُمْ لِنَبُوخَدْنَصَرْ مَلِكْ بَابِلْ. أَيْوَى، نِسَلِّمْهُمْ لِعُدْوَانْهُمْ الْيِدَوْرُوا مَوْتهُمْ. وَ الْمَلِكْ يَكْتُلْهُمْ بِشِدَّةْ بَلَا رَحْمَةْ وَ لَا مَحَنَّةْ.“›» وَ دَا كَلَامْ اللّٰهْ.

⁸ «وَ كَنْ لِلشَّعَبْ دَوْل، إِنْتَ يَا إِرْمِيَا، قُولْ لَيْهُمْ: ‹دَاهُو اللّٰهْ قَالْ: ”أَنَا نَنْطِيكُو خِيَارْ بَيْن الْمَوْت وَ الْحَيَاةْ.

⁹ وَ دَاهُو الْخِيَارْ. النَّادُمْ الْيَقْعُدْ فِي الْمَدِينَةْ دِي يُمُوتْ بِالْحَرِبْ أَوْ بِالْجُوعْ أَوْ بِالْوَبَاءْ. وَ لَاكِنْ الْيَمْرُقْ مِنْهَا وَ يِسَلِّمْ نَفْسَهْ لِعَسْكَرْ بَابِلْ الْمُحَاصِرِينْكُو، هُو دَا يِعِيشْ وَ يَبْقَى فَرْحَانْ أَشَانْ هُو لِقِي الْحَيَاةْ.

¹⁰ أَيْوَى، أَنَا قَرَّرْت ضِدّ الْمَدِينَةْ دِي لِنِسَوِّي لَيْهَا الشَّرّ، مَا الْخَيْر. وَ نِسَلِّمْهَا لِمَلِكْ بَابِلْ وَ هُو يِحَرِّقْهَا.“›» وَ دَا كَلَامْ اللّٰهْ.

قِلّة العدالة تِنزِّل غضب اللّه

¹¹ يَا عَايِلَةْ مُلُوكْ يَهُوذَا، أَسْمَعَوْا كَلَامْ اللّٰهْ.

¹² وَ يَا ذُرِّيَّةْ دَاوُدْ، دَاهُو اللّٰهْ قَالْ: «سَوُّوا الْعَدَالَةْ كُلَّ يَوْم وَ نَجُّوا الْمَظْلُومْ مِنْ إِيدَيْن الظَّالِمْ. كَنْ مَا كَيْ دَا، غَضَبِي يَنْزِلْ مِثِلْ النَّارْ التَّحْرِقْ وَ مَا فِي نَادُمْ الْيَقْدَرْ يَكْتُلْهَا أَشَانْ دَا بِسَبَبْ عَمَلْكُو الْفَسِلْ.»

¹³ وَ دَاهُو كَلَامْ اللّٰهْ: «أَكِيدْ نُقُمّ ضِدِّكِ، يَا مَدِينَةْ الْقُدُسْ، الْقَاعِدَةْ فِي رَاسْ الْجَبَلْ وَ تِحِتْكِ الْوَادِي. إِنْتِ تُقُولِي: ‹يَاتُو يَقْدَرْ يَهْجِمْنَا؟ وَ يَاتُو يَقْدَرْ يَجِي يَدْخُلْ فِي كَرَاكِيرْنَا؟›

¹⁴ وَ لَاكِنْ أَنَا نُقُمّ نِعَاقِبْكُو حَسَبْ نَتِيجَةْ عَمَلْكُو. وَ نِقَبِّضْ نَارْ فِي الْغَابَةْ وَ النَّارْ دِي تَاكُلْ كُلَّ الْحَوَالَيْهَا.» وَ دَا كَلَامْ اللّٰهْ.