إرْمِيا 12 - الكتاب المقدس بالعربي الدارجي هنا تشاد

إرْمِيا يشْكي من نجاح الفسْلين

¹ يَا اللّٰهْ، إِنْتَ عَادِلْ! وَ لَاكِنْ نِدَوْر نَشْكِي لَيْك. أَيْوَى، نِدَوْر نِحَجِّي مَعَاكْ فِي شَيّءْ بُخُصّ الشَّرِيعَةْ. مَالَا الْفَسْلِينْ يَنْجَحَوْا فِي خَطْوَاتْهُمْ؟ مَالَا الْخَايْنِينْ يَقْعُدُوا فِي الرَّاحَةْ بِخِيَانِتْهُمْ؟

² إِنْتَ بَسْ مَقَّنْتُهُمْ مِثِلْ شَدَرَةْ وَ دَسَّوْا عُرُوقْهُمْ فِي التُّرَابْ وَ كِبْرَوْا لَحَدِّي سَوَّوْا عِيَالْ. خُشُومْهُمْ يِنَادُوا أُسْمَكْ وَ لَاكِنْ قُلُوبْهُمْ مَا مَعَاكْ.

³ يَا اللّٰهْ! إِنْتَ تِشِيفْنِي وَ تَكْشِفْ الْفِي قَلْبِي وَ تَعَرِفْنِي كَدَرْ أَنَا مَعَاكْ. وَ لَاكِنْ لِلْفَسْلِينْ دَوْل، سُوقْهُمْ مِثِلْ غَنَمْ الْجُزُرْ الْمُخَصَّصِينْ لِيَوْم الدَّبِحْ.

⁴ لَحَدِّي مَتَى الْأَرْض تَحْزَنْ وَ يَيْبَسْ كُلَّ قَشّ الْكَدَادَةْ؟ وَ الْحَيْوَانَاتْ وَ الطُّيُورْ يَبْقَوْا مَا فِيهُمْ وَ دَا بِسَبَبْ فَسَالَةْ سُكَّانْهَا الْيُقُولُوا: «هُو مَا يَعَرِفْ مُسْتَقْبَلْنَا.»

⁵ وَ اللّٰهْ قَالْ لَيِّ أَنَا إِرْمِيَا: «كَنْ تَجْرِي مَعَ نَاسْ بِرِجِلَيْنَكْ وَ تَعَيَى، كِكَّيْف تَقْدَرْ تِسَابِقْ مَعَ الْخَيْل؟ وَ كَنْ وَاجِبْ لَيْك بَلَدْ سَلَامْ لِتِعِيشْ بِأَمَانْ، كِكَّيْف تَقْدَرْ تِعِيشْ فِي غَابَةْ الْأُرْدُنْ؟

⁶ «دَاهُو أَخْوَانَكْ عِيَالْ أَبُوكْ ذَاتْهُمْ يُخُونُوكْ. أَيْوَى، هُمَّنْ يِجْتَمُعُوا مَعَ نَاسْ آخَرِينْ وَرَاكْ. أَنْقَرِعْ، مَا تِآمِنْهُمْ حَتَّى كَنْ يِحَجُّوا لَيْك كَلَامْ حَلُو كُلَ.»

اللّه سلّم شعبه للعدو

⁷ وَ اللّٰهْ قَالْ: «أَنَا نِخَلِّي بَيْتِي وَ نَابَى شَعَبِي الْمِثِلْ وَرَثَتِي. وَ أُمَّتِي الْمَحْبُوبَةْ، أَنَا نِسَلِّمْهَا لِلْعَدُو.

⁸ وَ شَعَبِي بِقِي لَيِّ مِثِلْ دُودْ فِي لُبّ الْغَابَةْ. هُو يِكِرّ ضِدِّي وَ بَيْدَا، أَنَا مَا نِحِبَّهْ.

⁹ وَ شَعَبِي مِثِلْ الصَّقُرْ الْأَرْقَطْ الْيَهْجُمُوهْ الصُّقُورَةْ. يَلَّا لِمُّوا كُلَّ حَيْوَانَاتْ الْكَدَادَةْ وَ أَعَزُمُوهُمْ فِي الْغَدَاءْ!

¹⁰ وَ كُبَارَاتْ الْعَدُو جَوْا دَمَّرَوْا بَلَدِي مِثِلْ رُعْيَانْ بِمَالْهُمْ يِدَمُّرُوا جِنَيْنِتِي هَنَا الْعِنَبْ. وَ فَجَّقَوْهَا وَ سَوَّوْهَا صَحَرَاء خَرَابْ، هِي الْأَوَّلْ مِثِلْ زَرْعِي الْجَمِيلْ.

¹¹ هُمَّنْ سَوَّوْهَا خَرَابْ وَ دَاهُو هِي قِدَّامِي يَابْسَةْ وَ خَرْبَانَةْ. أَيْوَى، الْبَلَدْ كُلَّهَا كَيْ خَرْبَانَةْ وَ مَا فِي نَادُمْ الْيِحِنّ فَوْقهَا.»

¹² وَ فِي كُلَّ رُوسَيْ الْجِبَالْ الْمُخَرِّبِينْ جَايِينْ مِنْ الصَّحَرَاء. سَيْف اللّٰهْ يَضْرُبْ الْأَرْض مِنْ طَرَفْهَا لِطَرَفْهَا وَ مَا فِي سَلَامْ لِأَيِّ إِنْسَانْ.

¹³ إِنْتُو تَيْرَبْتُوا الْقَمَحْ وَ لِقِيتُوا الْحَسْكَنِيتْ بَسْ وَ عَيَّيْتُوا نُفُوسْكُو بَلَا فَايْدَةْ. وَ الْعَيْب كَرَبْكُو مِنْ نَتِيجَةْ خِدْمِتْكُو وَ دَا بِسَبَبْ غَضَبْ اللّٰهْ الْمُحْرِقْ.

اللّه يهدِّد جيران شعبه

¹⁴ وَ دَاهُو اللّٰهْ قَالْ: «كُلَّ الْجِيرَانْ الْفَسْلِينْ الْيِلَمُّسُوا الْأَرْض الْأَنَا أَنْطَيْتهَا وَرَثَةْ لِشَعَبِي بَنِي إِسْرَائِيلْ، أَنَا نِمَلِّطْهُمْ مِثِلْ شَدَرَةْ مِنْ أَرْضُهُمْ. وَ بَنِي يَهُوذَا كُلَ نِمَلِّطْهُمْ مِنْ أُسُطْهُمْ.

¹⁵ وَ لَاكِنْ بَعَدْ مَلَّطْتُهُمْ، بَتَّانْ أَنَا نَرْحَمْهُمْ وَ نِقَبِّلْهُمْ أَيِّ وَاحِدْ فِي أَرْض وَرَثَتَهْ وَ أَيِّ وَاحِدْ فِي بَلَدَهْ.

¹⁶ أَوَّلْ الْأُمَمْ دَوْل عَلَّمَوْا شَعَبِي يَحَلْفُوا بِبَعَلْ. وَ لَاكِنْ هَسَّعْ، كَنْ هُمَّنْ يِتَابُعُوا دَرِبْ شَعَبِي وَ يَحَلْفُوا بِأُسْمِي أَنَا اللّٰهْ الْحَيّ، خَلَاصْ يَسْكُنُوا بِأَمَانْ فِي أُسُطْ شَعَبِي.

¹⁷ وَ لَاكِنْ الْأُمَّةْ الْمَا تَسْمَعْ كَلَامِي دَا، أَنَا نِمَلِّطْهَا مَرَّةْ وَاحِدْ وَ نِوَدِّرْهَا.» وَ دَا كَلَامْ اللّٰهْ.