إرْمِيا 11 - الكتاب المقدس بالعربي الدارجي هنا تشادبني إسرائيل قطعوا المُعاهدة 1 وَ دَاهُو كَلَامْ اللّٰهْ الْقَالَهْ لِإِرْمِيَا: 2 أَسْمَعْ كَلَامْ الْمُعَاهَدَةْ وَ حَجِّي بَيَّهْ لِنَاسْ يَهُوذَا وَ سُكَّانْ مَدِينَةْ الْقُدُسْ. 3 وَ قُولْ لَيْهُمْ: «دَاهُو اللّٰهْ إِلٰـهْ بَنِي إِسْرَائِيلْ قَالْ: ‹مَلْعُونْ النَّادُمْ الْمَا يَسْمَعْ كَلَامْ الْمُعَاهَدَةْ دِي. 4 وَ دِي الْمُعَاهَدَةْ الْأَنَا سَوَّيْتهَا مَعَ جُدُودْكُو وَكِتْ أَنَا مَرَقْتُهُمْ مِنْ بَلَدْ مَصِرْ الْهِي مِثِلْ جَهَنَّمْ التَّقْطَعْ الْحَدِيدْ. وَ فِي الْمُعَاهَدَةْ دِي، أَنَا قُلْت: ”أَسْمَعَوْا كَلَامِي وَ طَبُّقُوا كُلَّ أَوَامِرِي وَ بَيْدَا، إِنْتُو تَبْقَوْا شَعَبِي وَ أَنَا نَبْقَى إِلٰـهْكُو.“ 5 وَ خَلَاصْ بَيْدَا، أَنَا طَبَّقْت الْكَلَامْ الْحَلَفْت بَيَّهْ لِجُدُودْكُو وَ قُلْت نَنْطِيهُمْ الْبَلَدْ الْمَلَانَةْ بِاللَّبَنْ وَ الْعَسَلْ. دَاهُو إِنْتُو عَايْشِينْ فَوْقهَا الْيَوْم!›» وَ أَنَا إِرْمِيَا رَدَّيْت وَ قُلْت: «آمِينْ، يَا اللّٰهْ.» 6 وَ بَعَدْ دَا، اللّٰهْ قَالْ لَيِّ: «أَمْشِي فِي حِلَّالْ بَلَدْ يَهُوذَا وَ فِي شَوَارِعْ مَدِينَةْ الْقُدُسْ وَ قُولْ الْكَلَامْ دَا: ‹أَسْمَعَوْا كَلَامْ الْمُعَاهَدَةْ وَ طَبُّقُوهَا. 7 أَنَا اللّٰهْ حَذَّرْت جُدُودْكُو دَايْماً وَ دَا مِنْ يَوْم مَرَقْتُهُمْ مِنْ بَلَدْ مَصِرْ لَحَدِّي الْيَوْم. وَ قُلْت لَيْهُمْ: ”أَسْمَعَوْا كَلَامِي!“ 8 وَ لَاكِنْ هُمَّنْ مَا خَطَّوْا أَدَانْهُمْ لِيَسْمَعَوْا كَلَامِي. أَيِّ وَاحِدْ يِقَوِّي رَاسَهْ فِي الْفَسَالَةْ وَ مَا طَبَّقَوْا كَلَامْ الْمُعَاهَدَةْ دِي. وَ بَيْدَا، أَنَا عَاقَبْتُهُمْ أَشَانْ مَا طَبَّقَوْهَا.›» 9 وَ اللّٰهْ قَالْ لَيِّ: «نَاسْ يَهُوذَا وَ سُكَّانْ مَدِينَةْ الْقُدُسْ قَمَّوْا بِخِيَانَةْ ضِدِّي. 10 أَشَانْ هُمَّنْ قَبَّلَوْا فِي خَطَا جُدُودْهُمْ الْأَبَوْا مَا يَسْمَعَوْا كَلَامِي وَ هُمَّنْ جَرَوْا وَرَاءْ إِلٰـهَاتْ آخَرِينْ لِيَعَبُدُوهُمْ. وَ بَيْدَا، بَنِي إِسْرَائِيلْ وَ بَنِي يَهُوذَا قَطَعَوْا الْمُعَاهَدَةْ الْأَنَا سَوَّيْتهَا مَعَ جُدُودْهُمْ.» 11 وَ فِي شَانْ دَا، دَاهُو اللّٰهْ قَالْ: «أَنَا نِنَزِّلْ فَوْقهُمْ الْفَسَالَةْ وَ مَا يَقْدَرَوْا يَمُرْقُوا مِنْهَا. هُمَّنْ يِكَوْرُكُوا لِنَفْزَعْهُمْ وَ لَاكِنْ أَنَا مَا نَسْمَعْهُمْ. 12 نَاسْ حِلَّالْ بَلَدْ يَهُوذَا وَ سُكَّانْ مَدِينَةْ الْقُدُسْ يَمْشُوا يِكَوْرُكُوا يِدَوْرُوا الْفَزَعْ مِنْ الْإِلٰـهَاتْ الْهُمَّنْ يِحَرُّقُوا لَيْهُمْ الْبَخُورْ. وَ لَاكِنْ الْإِلٰـهَاتْ دَوْل مَا يَقْدَرَوْا يِنَجُّوهُمْ مِنْ الْفَسَالَةْ دِي. 13 «يَا بَنِي يَهُوذَا، إِلٰـهَاتْكُو أَكْتَرْ مِنْ حِلَّالْكُو. يَا سُكَّانْ مَدِينَةْ الْقُدُسْ، مَدَابِحْكُو أَكْتَرْ مِنْ شَوَارِعْكُو. وَ دَوْل الْمَدَابِحْ الْبَنَيْتُوهُمْ لِلْعَيْب وَ هُو إِلٰـهْ بَعَلْ التِّحَرُّقُوا لَيَّهْ الْبَخُورْ. 14 وَ إِنْتَ، يَا إِرْمِيَا، مَا تِصَلِّي فِي شَانْ الشَّعَبْ دَا وَ لَا تَشْكِي وَ لَا تَشْحَدْ لَيْهُمْ. أَشَانْ أَنَا مَا نَسْمَعْ وَكِتْ يِنَادُونِي فِي يَوْم الْفَسَالَةْ.» 15 «وَ شَعَبِي الْمَحْبُوبِينْ، نِيِّتْهُمْ فَسْلَةْ وَ يَجُوا فِي بَيْتِي دَا يِدَوْرُوا شُنُو؟ هَلْ النَّذِرْ الْوَاعَدَوْنِي بَيَّهْ أَوْ اللَّحَمْ الْخَصَّصَوْه دَا، يَقْدَرْ يِنَجِّيهُمْ مِنْ الْفَسَالَةْ الْجَايَةْ لَيْهُمْ وَلَّا؟ وَ بَيْدَا، يَقْدَرَوْا يَنْجَوْا وَلَّا؟ 16 وَ أَنَا اللّٰهْ جَعَلْتُهُمْ مِثِلْ شَدَرَةْ زَيْتُونْ خَضْرَةْ سَمْحَةْ وَ مُجَمَّلَةْ بِعِيَالْهَا. وَ لَاكِنْ هَسَّعْ، نِنَزِّلْ نَارْ التَّحْرِقْ وَرَقْهَا وَ تَاكُلْ فُرُوعْهَا لَحَدِّي يِسَوُّوا حَرَكَةْ شَدِيدَةْ.» 17 «وَ أَنَا اللّٰهْ الْقَادِرْ بَسْ مَقَّنْتَهَا وَ قَرَّرْت نِسَوِّي لَيْهَا الْفَسَالَةْ، بِسَبَبْ الْفَسَالَةْ السَّوَّوْهَا بَنِي إِسْرَائِيلْ وَ بَنِي يَهُوذَا. وَ هُمَّنْ غَضَّبَوْنِي وَكِتْ حَرَّقَوْا بَخُورْ لِإِلٰـهْ بَعَلْ.» ناس عَنَتُوت دوّروا يكْتُلوا إرْمِيا 18 اللّٰهْ خَبَّرَانِي بِالنِّيَّةْ الْفَسْلَةْ الْقَمَّوْا بَيْهَا ضِدِّي أَنَا إِرْمِيَا. وَ خَلَاصْ بَيْدَا، أَنَا عِرِفْتَهَا. 19 وَ أَنَا مِثِلْ حَمَلْ مِسْكِينْ الْيِوَدُّوا لِلْجَزَّارَةْ. وَ أَنَا مَا عِرِفْت كَدَرْ نِيِّتْهُمْ الْفَسْلَةْ دِي تُخُصِّنِي وَ هُمَّنْ بُقُولُوا: «خَلِّي نِدَمُّرُوهْ مِثِلْ شَدَرَةْ خَضْرَةْ وَ نُقُشُّوهْ مِنْ أَرْض الْحَيِّينْ! وَ بَتَّانْ أُسْمَهْ كُلَ مَا يِنَادُوهْ.» 20 يَا اللّٰهْ الْقَادِرْ، إِنْتَ التَّحْكِمْ بِالْعَدِلْ وَ تَكْشِفْ الْفِي الْقُلُوبْ وَ تَعَرِفْ الْفِي الْأَفْكَارْ! أَنَا نِدَوْر إِنْتَ تِشِيلْ فَوْقهُمْ التَّارْ وَ فِي شَانْ دَا، أَنَا شَكَيْت لَيْك. 21 وَ فِي شَانْ دَا، دَاهُو كَلَامْ اللّٰهْ ضِدّ نَاسْ عَنَتُوتْ الْيِدَوْرُوا يَكْتُلُونِي. هُمَّنْ قَالَوْا: «مَا تِتْنَبَّأْ بِأُسُمْ اللّٰهْ! كَنْ أَتْنَبَّأْت، نَكْتُلُوكْ.» 22 وَ فِي شَانْ دَا، دَاهُو اللّٰهْ الْقَادِرْ قَالْ: «أَنَا نِعَاقِبْهُمْ. صُبْيَانْهُمْ يُمُوتُوا فِي الْحَرِبْ وَ أَوْلَادْهُمْ وَ بَنَاتْهُمْ يُمُوتُوا بِالْجُوعْ. 23 وَ وَكِتْ نِعَاقِبْهُمْ نَاسْ عَنَتُوتْ، مِنْهُمْ نِجِيبْ فَوْقهُمْ الْفَسَالَةْ. وَ مِنْهُمْ نَادُمْ وَاحِدْ كُلَ مَا يِفَضِّلْ حَيّ.» |
La Bible en arabe tchadien © Alliance biblique du Tchad, 2019
Bible Society of Chad