إشَعْيا 61 - الكتاب المقدس بالعربي الدارجي هنا تشاد

سنِة نِعْمة اللّه

¹ رُوحْ اللّٰهْ الرَّبّ قَاعِدْ فَوْقِي أَشَانْ اللّٰهْ مَسَحَانِي وَ خَصَّصَانِي لِنِبَشِّرْ الْمَسَاكِينْ. هُو رَسَّلَانِي لِنِدَاوِي النَّاسْ الْقَلِبْهُمْ مُنْكَسِرْ وَ نَعْلِنْ بِالْحُرِّيَّةْ لِلْمَكْرُوبِينْ وَ بِالطَّلَقَانْ لِلْمَسَاجِينْ.

² أَنَا نَعْلِنْ سَنِةْ نِعْمَةْ اللّٰهْ وَ يَوْم التَّارْ هَنَا إِلٰـهْنَا. وَ دَا، لِنِصَبِّرْ كُلَّ الْحَزْنَانِينْ.

³ هُو رَسَّلَانِي لِنَاسْ صَهْيُون الْقَاعِدِينْ فِي الْحِزِنْ أَشَانْ نَنْطِيهُمْ كَدْمُولْ جَمِيلْ بَدَلْ الرُّمَادْ الْفِي رَاسْهُمْ وَ دِهِنْ السُّرُورْ بَدَلْ الْحِزِنْ وَ لُبَاسْ الشُّكُرْ بَدَلْ الرُّوحْ الضَّعِيفَةْ. وَ يِسَمُّوهُمْ شَدَرْ الْعَدَالَةْ الْاللّٰهْ مَقَنَهْ لِيِوَصِّفْ مَجْدَهْ.

⁴ هُمَّنْ يَبْنُوا الْمُهَدَّمْ مِنْ زَمَانْ وَ يِقَوُّمُوا الْخِرِبْ مِنْ أَوَّلْ وَ يِجَدُّدُوا بُنَى الْمُدُنْ الْمُهَدَّمِينْ وَ خَرْبَانِينْ مِنْ ذُرِّيَّةْ لِذُرِّيَّةْ.

⁵ يَا شَعَبِي، الْأَجَانِبْ يَجُوا وَ يَسْرَحَوْا لَيْكُو بِغَنَمْكُو أَيْوَى، عِيَالْهُمْ يَحَرْتُوا زِرَاعِتْكُو وَ يَخْدُمُوا لَيْكُو فِي جِنَيْنَاتْ عِنَبْكُو.

⁶ وَ كَنْ لَيْكُو إِنْتُو، يِنَادُوكُو رُجَالْ الدِّينْ هَنَا اللّٰهْ وَ خَدَّامِينْ إِلٰـهْنَا. تَاكُلُوا غُنَى الْأُمَمْ وَ تِفَاشُرُوا بِقُدْرِتْهُمْ.

⁷ وَ اللّٰهْ قَالْ: «بَدَلْ الْعَيْب، تَلْقَوْا قِسِمْكُو مَرَّتَيْن وَ بَدَلْ الْإِهَانَةْ، الْفَرَحْ يَبْقَى قِسِمْكُو. أَشَانْ دَا، تَوْرُثُوا مَرَّتَيْن مِنْ بَلَدْكُو وَ فَرْحِتْكُو تَقْعُدْ إِلَى الْأَبَدْ.

⁸ أَشَانْ أَنَا اللّٰهْ نِحِبّ الْعَدَالَةْ وَ نَكْرَهْ السِّرْقَةْ وَ الْجَرِيمَةْ. نَنْطِيهُمْ مُكَافَاتْهُمْ بِصِدِقْ وَ نِسَوِّي مَعَاهُمْ مُعَاهَدَةْ دَايْمَةْ.

⁹ ذُرِّيِّتْهُمْ تُكُونْ مَعْرُوفَةْ بَيْن الْأُمَمْ وَ عِيَالْهُمْ مَعْرُوفِينْ أُسْط الشُّعُوبْ. كُلَّ الْيِشِيفُوهُمْ يَعَرْفُوا كَدَرْ هُمَّنْ ذُرِّيَّةْ الْبَارَكَاهَا اللّٰهْ.»

¹⁰ أَيْوَى، أَنَا نَفْرَحْ زِيَادَةْ بِاللّٰهْ وَ نَفْسِي تَفْرَحْ بِإِلٰـهِي. أَشَانْ هُو لَبَّسَانِي خُلْقَانْ النَّجَاةْ وَ كَسَانِي بِجَلَّابِيَّةْ الْعَدَالَةْ. هُو جَمَّلَانِي بِكَدْمُولْ مِثِلْ عَرِيسْ أَيْوَى، مِثِلْ كَدْمُولْ رَاجِلْ الدِّينْ وَ مِثِلْ الْعَرُوسْ الْمُجَمَّلَةْ بِزِينِتْهَا.

¹¹ أَيْوَى، مِثِلْ الْأَرْض تَمْرُقْ بِذْرِتْهَا وَ مِثِلْ الْجِنَيْنَةْ تَمْرُقْ تَيْرَابْهَا، مِثِلْ دَا، اللّٰهْ الرَّبّ كُلَ يِبَيِّنْ عَدَالْتَهْ وَ كُلَّ الْأُمَمْ يَشْكُرُوهْ.