إشَعْيا 57 - الكتاب المقدس بالعربي الدارجي هنا تشاد1 الصَّالِحْ يِدَّمَّرْ وَ مَا فِي نَادُمْ الْيِهِمّ بِدَمَارَهْ. نَاسْ الْخَيْر يُمُوتُوا وَ مَا فِي نَادُمْ يَفْهَمْ كَدَرْ وَكِتْ الصَّالِحْ يُمُوتْ دَا لِيِبَعِّدَهْ مِنْ الشَّرّ. 2 لَاكِنْ الْيَمْشُوا بِالْحَقّ يُمُوتُوا وَ يِنْجَمَّوْا بِالسَّلَامْ. شعب اللّه أشّرْمطوا 3 كَنْ لَيْكُو إِنْتُو، قَرُّبُوا تَعَالُوا هِنِي! يَا عِيَالْ الْمَرَةْ التِّحَجِّي بِعِلِمْ الْغَيْب! يَا إِنْتُو ذُرِّيَّةْ الزَّانِيَةْ الشَّرْمُوطَةْ! 4 تِشَّمَّتَوْا لِيَاتُو؟ ضِدّ يَاتُو تَفْتَحَوْا خُشُومْكُو وَ تَبُرْطُوا شَلَالِيفْكُو؟ إِنْتُو مَا عِيَالْ الْعَاصِيِينْ وَ ذُرِّيَّةْ الْكَدَّابِينْ وَلَّا؟ 5 شَهْوِتْكُو لِأَصْنَامْكُو تَكْرُبْكُو جَنْب شَدَرْ الْبَلُّوطْ وَ تِحِتْ أَيِّ شَدَرَةْ خَضْرَةْ. إِنْتُو تَدْبَحَوْا لَيْهُمْ عِيَالْ فِي الْوُدْيَانْ وَ فِي شُقُوقْ الْجِبَالْ. 6 وَ فِي الْأَصْنَامْ هَنَا الْحُجَارْ الْمُلُسْ فِي الْوَادِي تَلْقَيْ نَصِيبْكِ، يَا مَدِينَةْ الْقُدُسْ وَ هُمَّنْ دَوْل بَسْ قِسِمْكِ! أَشَانْ لَيْهُمْ إِنْتِ صَبَّيْتِ هَدَايَا شَرَابْ وَ قَدَّمْتِ هَدَايَا هَنَا دَقِيقْ. هَلْ نَرْضَى بِالْأَشْيَاءْ دَوْل وَلَّا؟ 7 وَ فِي جَبَلْ طَوِيلْ وَ عَالِي، إِنْتِ فَرَّشْتِ لِلشَّرْمَطَةْ. أَيْوَى، فِي الْبَكَانْ دَا بَسْ، إِنْتِ طَلَعْتِ لِتِقَدِّمِي ضَحَايَا لِأَصْنَامْكِ. 8 وَ فِي مَدَخَلْ بَيْتكِ، شَعَقْتِ سِحِرْكِ وَ أَلَّبَّدْتِ مِنِّي بَعِيدْ وَ أَسَّلَّبْتِ وَ طَلَعْتِ فِي سَرِيرْكِ وَ فَرَّشْتِيهْ. وَ كَفَّيْتِ رُجَالْ وَاحِدِينْ لِيَرُقْدُوا مَعَاكِ وَ تِشِيفِي عِرَيْهُمْ. 9 وَ إِنْتِ قَدَّمْتِ هَدِيَّةْ هَنَا دِهِنْ لِلصَّنَمْ مُولَكْ وَ صَبَّيْتِ عِطِرْ كَتِيرْ فِي جِلِدْكِ. رَسَّلْتِ سَمْسَارِيِينْكِ عَلَيْ بُلْدَانْ بَعِيدِينْ وَ رَسَّلْتِيهُمْ لَحَدِّي بَكَانْ الْمَيْتِينْ. 10 مِنْ كَتَرَةْ شَرْمَطَتْكِ، عَيَّيْتِ نَفِسْكِ وَ بَيْدَا كُلَ، مَا قُلْتِ: «أَنَا خَلَّيْتَهْ.» وَ لِقِيتِ بَتَّانْ قُدْرِتْكِ وَ عَيَاكِ بِقِي مَا فِيهْ. 11 «يَاتُو خَوَّفْكِ زِيَادَةْ لَحَدِّي تَكْدِبِي لَيِّ وَ مَا تِذَّكَّرَيْنِي وَ مَا تِفَكِّرِي فَوْقِي؟ أَنَا سَكَتّْ مُدَّةْ طَوِيلَةْ وَ فِي شَانْ دَا بَسْ، مَا تَخَافَيْ مِنِّي وَلَّا؟ 12 إِنْتِ تَحْسِبِي نَفِسْكِ عَدِيلَةْ وَ لَاكِنْ أَنَا نِخَبِّرْ بِكُلَّ أَعْمَالْكِ وَ بَيْدَا، مَا تَلْقَيْ مِنْهُمْ أَيِّ فَايْدَةْ. 13 وَكِتْ تَصْرَخَيْ، هَلْ أَصْنَامْكِ اللَّمَّيْتِيهُمْ يِنَجُّوكِ وَلَّا؟ لَا! الرِّيحْ تِشِيلْهُمْ وَ الْهَوَاءْ يِوَدِّيهُمْ! وَ لَاكِنْ لِلْيَلْجَأْ لَيِّ أَنَا كَمَانْ، نَنْطِيهْ الْأَرْض وَرَثَةْ وَ يَوْرِثْ جَبَلِي الْمُقَدَّسْ.» اللّه يشْفي شعبه 14 وَ الرَّبّ يُقُولْ: «عَدُّلُوا! عَدُّلُوا وَ جَهُّزُوا الدَّرِبْ! أَمُرْقُوا الْحَجَرْ مِنْ دَرِبْ شَعَبِي.» 15 أَشَانْ دَاهُو كَلَامْ اللّٰهْ الْعَالِي الْقَاعِدْ فَوْق، هُو الْقَاعِدْ إِلَى الْأَبَدْ وَ أُسْمَهْ الْقُدُّوسْ. هُو قَالْ: «أَنَا قَاعِدْ فِي بَكَانْ عَالِي وَ مُقَدَّسْ وَ قَاعِدْ بَتَّانْ مَعَ نَاسْ الْقُلُوبْهُمْ تَعْبَانِينْ وَ رُوحْهُمْ مُتَوَاضِعَةْ لِنَحَيِي رُوحْ الْمُتَوَاضِعِينْ وَ نَحَيِي قُلُوبْ التَّعْبَانِينْ. 16 أَشَانْ أَنَا مَا نَهْرِجْ دَايْماً وَ مَا نَغْضَبْ إِلَى الْأَبَدْ. لَا! مَا نِدَوْر يَغْمَرْ قِدَّامِي كُلِّ مَخْلُوقْ حَيّ الْأَنَا خَلَقْتَهْ. 17 «وَ بِخَطَاهُمْ هَنَا الطَّمَعْ، أَنَا غِضِبْت وَ ضَرَبْت شَعَبِي وَ مَا وَجَّهْت عَلَيْهُمْ. أَنَا غِضِبْت وَ هُمَّنْ مَشَوْا فِي عِصْيَانْهُمْ وَ تَابَعَوْا شَهْوَاتْ قُلُوبْهُمْ. 18 أَنَا شِفْت دُرُوبْهُمْ وَ نَشْفِيهُمْ وَ نُقُودْهُمْ وَ نِحَنِّسْهُمْ بَتَّانْ هُمَّنْ وَ النَّاسْ الْحِزْنَوْا فِي شَانْهُمْ. 19 وَ أَنَا نُخُطّ الْحَمْد فِي خُشُومْهُمْ. السَّلَامْ لِلْقَرِيبْ! السَّلَامْ لِلْبَعِيدْ! أَيْوَى أَنَا نَشْفِيهُمْ. وَ دَا، اللّٰهْ بَسْ قَالَهْ. 20 وَ الْعَاصِيِينْ مِثِلْ الْبَحَرْ الْهَايِجْ الْمَا يَقْدَرْ يَقْعُدْ سَاكِتْ وَ مَوْجَهْ يِلِزّ الطِّينَةْ وَ الْوَسَخْ.» 21 وَ إِلٰـهِي قَالْ: «لِلْعَاصِيِينْ، مَا فِي سَلَامْ!» |
La Bible en arabe tchadien © Alliance biblique du Tchad, 2019
Bible Society of Chad