إشَعْيا 50 - الكتاب المقدس بالعربي الدارجي هنا تشاد

اللّه ردّ للشعب في شكْواهم

¹ وَ دَاهُو اللّٰهْ قَالْ: «صَحِيحْ أَنَا طَرَدْت أَمُّكُو. وَيْن مَكْتُوبْ الطَّلَاقْ؟ وَ لِيَاتُو أَنَا بِعْتُكُو لِنِكَفِّي دَيْنِي؟ أَعَرْفُوا! بِسَبَبْ خَطَاكُو بَسْ، بَاعَوْكُو وَ بِسَبَبْ عِصْيَانْكُو، طَلَّقَوْا أَمُّكُو.

² وَكِتْ أَنَا جِيتْ، مَالَا مَا فِي نَادُمْ؟ وَكِتْ نَادَيْت، مَالَا نَادُمْ مَا رَدَّ لَيِّ؟ هَلْ إِيدِي قِصَيْرَةْ لَحَدِّي مَا تَفْدَى وَلَّا؟ وَ هَلْ مَا عِنْدِي أَيِّ قُدْرَةْ لِنِنَجِّي وَلَّا؟ أَعَرْفُوا! أَنَا نِكِشّ لِلْبَحَرْ وَ نِيَبِّسَهْ وَ لِلْوُدْيَانْ، نِسَوِّيهُمْ صَحَرَاء. مِنْ قِلَّةْ أَلْمِي الْحُوتْ يُمُوتْ أَيْوَى، مِنْ الْعَطَشْ هُو يُمُوتْ وَ يِعَفِّنْ.

³ وَ نِلَبِّسْ السَّمَاوَاتْ بِالضَّلَامْ وَ نِغَطِّيهُمْ بِخَلَقْ الْحِزِنْ.»

اللّه يفْزع عبْده

⁴ اللّٰهْ الرَّبّ أَنْطَانِي لِسَانْ التَّلَامِيذ أَشَانْ بِكَلَامِي نَقْدَرْ نِسَاعِدْ الْعَيَّانْ. كُلِّ صَبَاحْ، هُو يِقَوِّمْنِي مِنْ النَّوْم وَ يُفُكّ أَدَانِي لِنَسْمَعْ مِثِلْ التَّلَامِيذ.

⁵ اللّٰهْ الرَّبّ فَكَّ أَدَانِي وَ أَنَا وَ لَا عِصِيتْ وَ لَا قَبَّلْت وَرَاءْ.

⁶ أَنَا أَنْطَيْت ضَهَرِي لِلْيَفُرْشُونِي وَ أَنْطَيْت دِقْنِي لِلْيِمَلُّطُوهَا وَ مَا لَبَّدْت وِجْهِي مِنْ الْمُعْيَارْ وَ الْبُزَاقْ.

⁷ لَاكِنْ اللّٰهْ الرَّبّ فَزَعْنِي وَ بَيْدَا، أَنَا مَا لِقِيتْ إِهَانَةْ. وَ أَلْحَمَّلْت وَ بِقِيتْ ثَابِتْ مِثِلْ الْحَجَرْ أَشَانْ نَعَرِفْ مَا نَلْقَى الْعَيْب.

⁸ الْيِبَرِّينِي قَرِيبْ! يَاتُو الْيَشْكِينِي؟ خَلِّي نَقِيفُوا قِدَّامْ الشَّرِيعَةْ! يَاتُو الْيَتْهَمْنِي؟ خَلِّي يِقَرِّبْ لَيِّ!

⁹ دَاهُو اللّٰهْ الرَّبّ جَايِ لَيِّ فَزَعْ. يَاتُو الْيِحَاكِمْنِي؟ دَاهُو عُدْوَانِي كُلُّهُمْ مِثِلْ خَلَقْ قَدِيمْ الْأَكَلَتَهْ الْعِتَّةْ.

¹⁰ يَاتُو مِنْكُو يَخَافْ مِنْ اللّٰهْ وَ يَسْمَعْ كَلَامْ عَبْدَهْ؟ أَيِّ نَادُمْ الْيَمْشِي فِي الضَّلَامْ بَلَا ضَيّ، خَلِّي يِتْوَكَّلْ عَلَيْ اللّٰهْ وَ يِنْتَكِلْ عَلَيْ إِلٰـهَهْ.

¹¹ وَ كَنْ لَيْكُو إِنْتُو كُلُّكُو الْأَوْقَدْتُوا نَارْ وَ سَوَّيْتُوا مَشَاهِيبْ، يَلَّا أَمْشُوا فِي ضَيّ نَارْكُو وَ فِي أُسُطْ مَشَاهِيبْ الْإِنْتُو أَوْقَدْتُوهُمْ! اللّٰهْ يِسَوِّيكُو تُمُوتُوا فِي التَّعَبْ!