إشَعْيا 40 - الكتاب المقدس بالعربي الدارجي هنا تشادخبر جيّة الربّ 1 إِلٰـهْكُو بُقُولْ: «حَنُّسُوا! حَنُّسُوا شَعَبِي! 2 رَقُّدُوا قَلِبْ مَدِينَةْ الْقُدُسْ وَ قُولُوا لَيْهَا كَدَرْ خِدْمِتْهَا الْإِجْبَارِيَّةْ كَمَّلَتْ وَ خَطَاهَا أَنْمَحَى وَ هِي لِقَتْ مِنْ إِيدْ اللّٰهْ مَرَّتَيْن جَزَا هَنَا كُلَّ ذُنُوبْهَا.» 3 فِي حِسّ قَاعِدْ يِعِيطْ وَ يُقُولْ: «فِي الْخَلَاءْ، جَهُّزُوا دَرِبْ لِلّٰهْ وَ فِي الصَّحَرَاء، عَدُّلُوا طَرِيقْ لِإِلٰـهْنَا. 4 خَلِّي أَيِّ وَادِي يِنْدَفِنْ وَ كُلِّ جَبَلْ وَ حَجَرْ يَبْقَى قِصَيِّرْ. وَ خَلِّي كُلَّ الْقِيزَانْ يِسْتَوُوا وَ الدَّرِبْ الْوَعَرْ يَبْقَى سَاهِلْ. 5 خَلَاصْ، مَجْد اللّٰهْ يِبِينْ وَ كُلَّ النَّاسْ يِشِيفُوهْ سَوَا!» وَ دَا كَلَامْ اللّٰهْ الْقَالَهْ. 6 فِي حِسّ بُقُولْ: «عِيطْ!» وَ أَنَا قُلْت: «نِعِيطْ نُقُولْ شُنُو؟» «قُولْ كَدَرْ كُلَّ النَّاسْ مِثِلْ الْقَشّ وَ شَرَفْهُمْ مِثِلْ نُوَّارْ الْقَشّ. 7 وَ الْقَشّ يَيْبَسْ وَ نُوَّارَهْ يِدَفِّقْ أَشَانْ نَفْخَةْ اللّٰهْ هَجَّتْ فَوْقهُمْ. أَيْوَى! الشَّعَبْ مِثِلْ قَشّ. 8 الْقَشّ يَيْبَسْ وَ نُوَّارَهْ يِدَفِّقْ لَاكِنْ كَلَامْ اللّٰهْ يَقْعُدْ إِلَى الْأَبَدْ.» 9 أَطْلَعَيْ فِي الْجَبَلْ الْعَالِي، يَا صَهْيُون، إِنْتِ الْعِنْدِكِ خَبَرْ حَلُو! بِشِدَّةْ أَرْفَعَيْ صَوْتكِ، يَا مَدِينَةْ الْقُدُسْ، إِنْتِ الْعِنْدِكِ خَبَرْ حَلُو! أَرْفَعَيْ صَوْتكِ بَلَا خَوْف وَ قُولِي لِحِلَّالْ بَلَدْ يَهُوذَا: «دَاهُو إِلٰـهْكُو! 10 دَاهُو اللّٰهْ الرَّبّ جَايِ بِشِدَّةْ وَ بِقُدْرَةْ إِيدَهْ، قَاعِدْ يَمْلُكْ. وَ دَاهُو يِجِيبْ مَاحِيّتَهْ مَعَايَهْ وَ مُكَافَاتَهْ قِدَّامَهْ. 11 مِثِلْ الرَّاعِي، يَرْعَا غَنَمَهْ وَ بِإِيدَهْ، يِلِمّ حُمْلَانَهْ. وَ يِشِيلْهُمْ فِي حُضْنَهْ وَ يِوَدِّي الشَّوَايِلْ بِهُدُوءْ.» اللّه يشجِّع شعبه 12 يَاتُو الْقَاوَسْ كُلَّ الْأَلْمِي بِكَفَّهْ وَ قَاوَسْ عُرْض السَّمَاوَاتْ بِشِبْرَهْ؟ يَاتُو الْقِدِرْ كَالْ عَجَاجْ الْأَرْض بِمِكْيَالْ وَ وَزَنْ الْحُجَارْ وَ الْجِبَالْ فِي الْمِيزَانْ؟ 13 يَاتُو عِرِفْ أَفْكَارْ اللّٰهْ وَ بِقِي لَيَّهْ سِيدْ شَوْرتَهْ لِيِوَصِّيهْ؟ 14 مِنْ يَاتُو لِقِي الْوَصِيَّةْ وَ الْفِهِمْ وَ يَاتُو عَلَّمَهْ طَرِيقْ الْعَدَالَةْ؟ يَاتُو الْعَلَّمَهْ الْمَعْرَفَةْ وَ عَرَّفَهْ دَرِبْ الْفِهِمْ؟ 15 دَاهُو الْأُمَمْ دُقَاقْ مِثِلْ نُقْطَةْ الْوَقَعَتْ مِنْ الدَّلُو وَ مِثِلْ عَجَاجْ فِي الْمِيزَانْ. دَاهُو الْجَزَايِرْ فِي الْبَحَرْ خُفَافْ مِثِلْ عَجَاجْ الشَّايْلَةْ الرِّيحْ. 16 غَابَةْ لُبْنَانْ مَا تِتِمّ لِتِقَبِّضْ نَارْ الْمَدْبَحْ وَ حَيْوَانَاتْهَا مَا يِتِمُّوا ضَحِيَّةْ مُحَرَّقَةْ لِلرَّبّ. 17 كُلَّ الْأُمَمْ مَا يِسَاوُوا شَيّءْ قِدَّامَهْ وَ لَا عِنْدُهُمْ قِيمَةْ وَ هُو مَا يَجْعَلْهُمْ. ما في شيّء مِثِل الربّ 18 بِيَاتُو تِسَاوُوا الرَّبّ؟ وَ بِصُورَةْ الْوَيْنِي تِشَبُّهُوهْ؟ 19 الصَّنَمْ، الْحَدَّادِي بَسْ دَقَّهْ وَ الصَّيَّاغِي مَسَحَهْ بِدَهَبْ وَ سَوَّى لَيَّهْ سَلَاسِلْ هَنَا فُضَّةْ. 20 لَاكِنْ الْفَقْرِي الْمَا يَقْدَرْ يِقَدِّمْ الْهَدِيَّةْ دِي يِشِيلْ حَطَبْ الْمَا يِسَوِّسْ وَ يِفَتِّشْ نَجَّارْ الْعِنْدَهْ خِبْرَةْ أَشَانْ يِسَوِّي صَنَمْ الْمَا يِنْهَزَّ. 21 إِنْتُو مَا تَعَرْفُوا وَلَّا؟ وَ مَا سِمِعْتُوا وَلَّا؟ مَا أَوْرَوْكُو بَيَّهْ مِنْ الْبِدَايَةْ وَلَّا؟ وَ مَا فِهِمْتُوا خَلِيقَةْ الْأَرْض وَلَّا؟ 22 اللّٰهْ بَسْ سَاكِنْ مِنْ فَوْق لِلْأَرْض وَ سُكَّانْهَا، هُو بِشِيفْهُمْ مِثِلْ جَرَادْ. وَ هُو يِفِلّ السَّمَاوَاتْ مِثِلْ سِتَارَةْ وَ يُمُطُّهُمْ مِثِلْ خَيْمِتَهْ لِيَسْكُنْهَا. 23 هُو يِسَوِّي الْحُكَّامْ مَا فِيهُمْ وَ قُضْيَاءْ الْأَرْض، يِوَدِّرْهُمْ. 24 قُبَّالْ مَا مَقَّنَوْهُمْ وَ لَا زَرَعَوْهُمْ وَ لَا عُرُوقْهُمْ لِحْقَوْا الْأَرْض، خَلَاصْ هُو يَنْفُخْ فَوْقهُمْ وَ هُمَّنْ يَيْبَسَوْا وَ الزَّوْبَعَانَةْ تِشِيلْهُمْ مِثِلْ قَشّ. 25 الْقُدُّوسْ قَالْ: «بِيَاتُو تِشَبُّهُونِي؟ وَ مَعَ يَاتُو تِسَاوُونِي؟» 26 أَرْفَعَوْا رُوسَيْكُو فَوْق وَ شِيفُوا فِي السَّمَاءْ! يَاتُو الْخَلَقْ الْأَشْيَاءْ دَوْل؟ الرَّبّ بَسْ يَمْرُقْ قُوَّاتْهُمْ كُلُّهُمْ وَ يِنَادِيهُمْ كُلُّهُمْ بِأَسَامَيْهُمْ! أَشَانْ هُو قَادِرْ وَ عَظِيمْ وَ شَدِيدْ، وَاحِدْ مِنْهُمْ مَا يِنْفَقِدْ! اللّه ينْطي قُدْرة للعِنْدُهم عشم 27 يَا بَنِي إِسْرَائِيلْ! يَا ذُرِّيَّةْ يَعْقُوبْ! مَالَا تُقُولُوا: «دَرِبْنَا مُلَبَّدْ مِنْ اللّٰهْ وَ حُقُوقْنَا مَا يِنْشَافَوْا لِإِلٰـهْنَا.» 28 إِنْتَ مَا عِرِفْت وَ لَا سِمِعْت؟ اللّٰهْ بَسْ هُو الْإِلٰـهْ الدَّايِمْ وَ هُو بَسْ الْخَلَقْ حُدُودْ الْأَرْض. هُو وَ لَا يَكْسَلْ وَ لَا يَعْيَى وَ عِلْمَهْ أَبَداً مَا عِنْدَهْ حَدّ. 29 هُو يَنْطِي قُدْرَةْ لِلْعَيَّانْ وَ لِلْمَا عِنْدَهْ قُوَّةْ، يِزِيدَهْ. 30 الصُّبْيَانْ يَكْسَلَوْا وَ يَعْيَوْا، حَتَّى الشَّبَابْ يِتَّرْتَعَوْا وَ يَقَعَوْا. 31 وَ لَاكِنْ الْيُخُطُّوا عَشَمْهُمْ فِي اللّٰهْ، قُدْرِتْهُمْ تِلْجَدَّدْ. يِطِيرُوا مِثِلْ الصُّقُورَةْ وَ يَجْرُوا وَ مَا يَكْسَلَوْا وَ يُرُوغُوا وَ مَا يَعْيَوْا. |
La Bible en arabe tchadien © Alliance biblique du Tchad, 2019
Bible Society of Chad