إشَعْيا 35 - الكتاب المقدس بالعربي الدارجي هنا تشاد

اللّه يسوّي درِب لشعبه

¹ خَلِّي الصَّحَرَاء وَ أَرْض الْجَفَافْ يَفْرَحَوْا وَ بَلَدْ الْيَبَاسْ تِنَوِّرْ وَ تِنْبَسِطْ.

² خَلِّي تِنْمَلِي بِنُوَّارْ الْكَدَادَةْ وَ تِنَطِّطْ وَ تَلْعَبْ وَ تِزَغْرِطْ مِنْ الْفَرَحْ. اللّٰهْ يَنْطِي الْبَلَدْ دِي غَابَةْ جَمِيلَةْ مِثِلْ غَابَةْ لُبْنَانْ وَ أَرْض الْعِنْدَهَا إِنْتَاجْ كَتِيرْ مِثِلْ جَبَلْ الْكَرْمَلْ وَ سَهَلَةْ شَارُونْ. وَ يِشِيفُوا مَجْد اللّٰهْ وَ عَظَمَةْ إِلٰـهْنَا.

³ قَوُّوا إِيدَيْكُو الْعَيَّانِينْ وَ ثَبُّتُوا رِكَبُّكُو الْيَرْجُفُوا.

⁴ وَ قُولُوا لِلْقُلُوبْهُمْ أَنْقَطَعَوْا: «أَبْقَوْا قَوِيِّينْ! مَا تَخَافَوْا. دَاهُو إِلٰـهْكُو! هُو يَجِي يِشِيلْ لَيْكُو التَّارْ وَ يِلْكَفَّى لَيْكُو فِي عُدْوَانْكُو. وَ هُو ذَاتَهْ يَجِي يِنَجِّيكُو.»

⁵ وَ خَلَاصْ، عُيُونْ الْعَمْيَانِينْ يِنْفَتْحُوا وَ أُدْنَيْ الطَّرْشَانِينْ يَسْمَعَوْا.

⁶ وَ الْأَعْرَجْ يِنَطِّطْ مِثِلْ الْغَزَالْ وَ لِسَانْ الْأَبْكَمْ يِعِيطْ بِالْفَرَحْ. أَشَانْ أَلْمِي يِسِيلْ فِي الصَّحَرَاء وَ رُجُولْ أَلْمِي يَجْرُوا فِي كَدَادَةْ الْجَفَافْ.

⁷ الْأَرْض الْحَامِيَةْ تَبْقَى رَهَدْ وَ الْأَرْض الْعَطْشَانَةْ تِسِيلْ أَلْمِي. وَ فِي بَكَانْ مَرْقَدْ الْبَعَاشِيمْ، الْقَشّ يَبْقَى تِبِنْ وَ بِرْدِي.

⁸ وَ فِي الْبَكَانْ دَا، يِسَوُّوا دَرِبْ وَ يِسَمُّوهْ الدَّرِبْ الْخَاصّ. الْمَا طَاهِرْ مَا يِعَدِّي بَيَّهْ وَ الْمُنَافِقِينْ مَا يِوَدُّرُوا فَوْقَهْ أَشَانْ الدَّرِبْ دَا لِشَعَبْ اللّٰهْ بَسْ.

⁹ وَ فِي الدَّرِبْ دَا، مَا فِي دُودْ وَ أَيِّ حَيْوَانْ خَطِيرْ مَا يُرُوغْ فَوْقَهْ وَ مَا يِنْلَقِي. إِلَّا النَّاسْ النَّجَّاهُمْ اللّٰهْ يَمْشُوا فَوْقَهْ.

¹⁰ وَ النَّاسْ الْفَدَاهُمْ اللّٰهْ يِقَبُّلُوا وَ يَجُوا فِي صَهْيُون بِزَغْرَاطْ وَ فَرْحَةْ. وَ فَرَحْ دَايِمْ يِنَوِّرْ وُجُوهُّمْ وَ سُرُورْ وَ فَرْحَةْ يِغَطُّوهُمْ وَ الْحِزِنْ وَ الْقَنِتِينْ يَبْقَوْا مَا فِيهُمْ.