إشَعْيا 31 - الكتاب المقدس بالعربي الدارجي هنا تشاد

العذاب لليدَوْروا فزع من مَصِر

¹ الْعَذَابْ لِلنَّاسْ الْيَنْزُلُوا فِي مَصِرْ لِلْفَزَعْ وَ يِنْتَكْلُوا عَلَيْ الْخَيْل وَ يِتْوَكَّلَوْا عَلَيْ عَرَبَاتْ الْحَرِبْ أَشَانْ هُمَّنْ كَتِيرِينْ وَ يِتْوَكَّلَوْا عَلَيْ سِيَادْ الْخَيْل أَشَانْ هُمَّنْ عِنْدُهُمْ قُدْرَةْ. وَ لَاكِنْ النَّاسْ دَوْل مَا عِنْدُهُمْ فِكِرْ فِي قُدُّوسْ إِسْرَائِيلْ وَ هُمَّنْ مَا يِفَتُّشُوا اللّٰهْ.

² أَكِيدْ، هُو حَكِيمْ! يَقْدَرْ يِجِيبْ الشَّرّ وَ مَا يَنْقُضْ كَلَامَهْ. وَ هُو يُقُمّ ضِدّ الْيِسَوُّوا الْفَسَالَةْ وَ ضِدّ الْفَزَعَوْا وَ الظُّلُمْ.

³ الْمَصْرِيِّينْ هُمَّنْ إِنْسَانْ، مَا إِلٰـهْ وَ خَيْلهُمْ لَحَمْ، مَا رُوحْ. وَكِتْ اللّٰهْ يَرْفَعْ إِيدَهْ، الْمَصْرِيِّينْ الْيَجُوا فَزَعْ، يِتَّرْتَعَوْا وَ الدَّوَّرَوْا فَزَعْهُمْ، يَقَعَوْا وَ كُلُّهُمْ يِدَّمَّرَوْا سَوَا.

اللّه يحْمي مدينة القدس

⁴ وَ دَاهُو اللّٰهْ قَالْ لَيِّ: «وَكِتْ الدُّودْ أَوْ فَرْخ الدُّودْ يِكِرّ فِي رِمِّتَهْ، حَتَّى كَنْ نَادَوْا رُعْيَانْ كَتِيرِينْ ضِدَّهْ كُلَ، هُو مَا يِبَرْجِلْ مِنْ كُرَوْرَاكْهُمْ وَ لَا يَخَافْ مِنْ كَتَرَتْهُمْ. وَ بِمِثِلْ دَا، اللّٰهْ الْقَادِرْ يَنْزِلْ فِي جَبَلْ صَهْيُون، فِي حَجَرَهْ لِيِحَارِبْ.

⁵ وَ مِثِلْ الطُّيُورْ يِمَطُّطُوا جَنَاحَيْهُمْ، اللّٰهْ الْقَادِرْ كُلَ يَحْمِي مَدِينَةْ الْقُدُسْ. أَيْوَى، هُو يَحْمِيهَا وَ يِنَجِّيهَا وَ يَفْزَعْهَا وَ يِخَلِّصْهَا.

⁶ يَا بَنِي إِسْرَائِيلْ، قَبُّلُوا عَلَيْ الْأَبَيْتُوهْ مَرَّةْ وَاحِدْ!

⁷ وَ فِي الْيَوْم دَا، أَيِّ وَاحِدْ يَابَى إِلٰـهَاتَهْ هَنَا الْفُضَّةْ وَ إِلٰـهَاتَهْ هَنَا الدَّهَبْ. أَيْوَى، دَوْل السَّوَّوْهُمْ لَيْكُو إِيدَيْكُو الْمُذْنِبِينْ.

⁸ «وَ بَلَدْ أَشُورْ تَقَعْ تِحِتْ سَيْف الْمَا هَنَا نَادُمْ وَ دَا مَا سَيْف إِنْسَانْ الْيَكْتُلْهَا. هِي تَجْرِي قِدَّامْ السَّيْف دَا وَ صُبْيَانْهَا يِخَدُّمُوهُمْ مِثِلْ عَبِيدْ.

⁹ وَ عَسْكَرْهَا الْفَحَلِينْ يَجْرُوا مِنْ الْخَوْف وَ كُبَارَاتْهَا يِنْبَهْتُوا قِدَّامْ الرَّايَةْ.» وَ دَا كَلَامْ اللّٰهْ الْعِنْدَهْ نَارْ فِي جَبَلْ صَهْيُون وَ عِنْدَهْ فُرُنْ فِي مَدِينَةْ الْقُدُسْ.