إشَعْيا 23 - الكتاب المقدس بالعربي الدارجي هنا تشاد

الكلام ضِدّ صُور و صَيْدَا

¹ مُحَاكَمَةْ بَلَدْ صُورْ. نُوحُوا، يَا الْمُسَافِرِينْ بِسُفُنْ تَرْشِيشْ! أَشَانْ مَدِينَةْ صُورْ أَدَّمَّرَتْ! مَا فِي بُيُوتْ وَ لَا مَدَخَلْ! وَ دَا خَبَرْ مِنْ جَزِيرَةْ قُبْرُصْ.

² أَسْكُتُوا مِنْ الْخَوْف، يَا سُكَّانْ خَشُمْ الْبَحَرْ. يَا تُجَّارْ صَيْدَا! تُجَّارْكُو شَقَّوْا الْبَحَرْ بِكَتَرَةْ.

³ مَعَاشْ وَادِي مَصِرْ وَ دَرَتْ النِّيلْ وَ إِنْتَاجَهْ سَافَرَوْا فِي الْبَحَرْ وَ بِقَوْا تِجَارَةْ لِلْأُمَمْ.

⁴ يَا صَيْدَا، أَخْجَلَيْ! يَا الْمَدِينَةْ الْقَوِيَّةْ الْجَنْب الْبَحَرْ! أَشَانْ الْبَحَرْ قَالْ: «أَنَا مَا طَالَقْت وَ لَا وِلِدْت وَ لَا كَبَّرْت وُلَادْ وَ لَا رَبَّيْت بَنَاتْ.»

⁵ وَكِتْ سُكَّانْ مَصِرْ يَسْمَعَوْا بِالْخَبَرْ دَا، يَرْجُفُوا مِثِلْ رَجَفَوْا وَكِتْ سِمْعَوْا خَبَرْ صُورْ.

⁶ يَا سُكَّانْ خَشُمْ الْبَحَرْ، نُوحُوا وَ أَقْطَعَوْا الْبَحَرْ لَحَدِّي تَرْشِيشْ!

⁷ هَلْ دِي بَسْ مَدِينِتْكُو صُورْ الْأَوَّلْ فَرْحَانَةْ وَلَّا؟ هَلْ دِي بَسْ هِي الْقَدِيمَةْ الْقَاعِدَةْ مِنْ زَمَانْ وَ أَسَّسَتْ حِلَّالْ آخَرِينْ وَلَّا؟

⁸ يَاتُو الْقَرَّرْ الشَّيّءْ دَا ضِدّ صُورْ، هِي التِّدَرِّجْ مُلُوكْ؟ هِي شَرَّفَتْ تُجَّارْهَا مِثِلْ مَسَائِيلْ وَ تُجَّارْهَا مُشَرَّفِينْ فِي كُلَّ الْأَرْض.

⁹ اللّٰهْ الْقَادِرْ بَسْ قَرَّرَهْ لِيِدَمِّرْ إِسْتِكْبَارْ النَّاسْ الْمُشَرَّفِينْ وَ يَحْقِرْ كُلَّ النَّاسْ الْعِنْدُهُمْ شَرَفْ الْقَاعِدِينْ فِي الْأَرْض.

¹⁰ يَا شَعَبْ تَرْشِيشْ! شِتُّوا فِي أَرْضُكُو مِثِلْ النِّيلْ يَمْلَا أَرْضَهْ أَشَانْ مَا فِي شَيّءْ الْيَدْحَرْكُو.

¹¹ أَشَانْ اللّٰهْ رَفَعْ إِيدَهْ ضِدّ الْبَحَرْ وَ رَجَّفْ الْمَمَالِكْ. وَ قَرَّرْ يِدَمِّرْ مُدُنْ كَنْعَانْ الْقَوِيِّينْ.

¹² وَ اللّٰهْ قَالْ: «يَا شَعَبْ مَدِينَةْ صَيْدَا! وَقُّفُوا فَرَحْكُو، يَا إِنْتُو الْمِثِلْ بِنَيَّةْ عُدْرِيَّةْ الْعَذَّبَوْهَا. قُمُّوا وَ أَمْشُوا جَزِيرَةْ قُبْرُصْ! وَ لَاكِنْ هِنَاكْ كُلَ، مَا تَلْقَوْا جُمَّةْ.

¹³ شِيفُوا نَاسْ بَلَدْ بَابِلْ، هُمَّنْ دَوْل بِقَوْا مَا فِيهُمْ. أَشَانْ الْأَشُورِيِّينْ أَنْطَوْهُمْ لِحَيْوَانَاتْ الْكَدَادَةْ. الْأَشُورِيِّينْ سَوَّوْا خَنَادِقْ لِيِحَاصُرُوا الْحِلَّةْ وَ هَدَّمَوْا قُصُورْ مَدِينَةْ صُورْ وَ سَوَّوْهُمْ كَوْم هَنَا تُرَابْ.»

¹⁴ يَا الْمُسَافِرِينْ بِسُفُنْ تَرْشِيشْ، نُوحُوا أَشَانْ مَلْجَئْكُو الْقَوِي خِرِبْ!

¹⁵ وَ فِي الْيَوْم دَا، صُورْ يَنْسَوْهَا لِمُدَّةْ 70 سَنَةْ مِثِلْ عَدَدْ أَيَّامْ مَلِكْ وَاحِدْ. وَ فِي نِهَايَةْ السِّنِينْ دَوْل، صُورْ تَبْقَى مِثِلْ شَرْمُوطَةْ الْغَنَّوْا بَيْهَا. وَ قَالَوْا:

¹⁶ «يَا الشَّرْمُوطَةْ النِّسَوْكِ! شِيلِي جِقِنْدِيَّةْ وَ حَوِّقِي الْمَدِينَةْ. دُقِّي الْجِقِنْدِيَّةْ عَدِيلْ وَ غَنِّي كَتِيرْ أَشَانْ يِذَّكَّرَوْكِ.»

¹⁷ وَ بَعَدْ 70 سَنَةْ، اللّٰهْ يِفَكِّرْ لِصُورْ وَ هِي تِقَبِّلْ لِرِبَاهَا الْأَوَّلْ. وَ هِي تِشَّرْمَطْ بَتَّانْ مَعَ كُلَّ مَمَالِكْ الْأَرْض.

¹⁸ لَاكِنْ رِبَاهَا وَ أُجْرِتْهَا يَبْقَوْا مُخَصَّصِينْ لِلّٰهْ. وَ لَا يُضُمُّوهُمْ وَ لَا يَخْزُنُوهُمْ. أَشَانْ بِرِبَاهَا يِأَكُّلُوا وَ يِشَبُّعُوا وَ يِلَبُّسُوا عَدِيلْ النَّاسْ الْيَسْكُنُوا قِدَّامْ اللّٰهْ.