إشَعْيا 22 - الكتاب المقدس بالعربي الدارجي هنا تشاد

التحْذير لمدينة القدس

¹ مُحَاكَمَةْ فِي وَادِي الرُّؤْيَةْ. يَا مَدِينَةْ الْقُدُسْ، مَالَا كُلَّ شَعَبْكِ طَلَعَوْا فِي رُوسَيْ الْبُيُوتْ؟

² مَالَا كُلَّ الْعَوَّةْ وَ الْحَرَكَةْ، يَا إِنْتِ حِلَّةْ الْفَرَحْ؟ مَيْتِينْكِ مَا كَتَلَوْهُمْ بِالْسَّيْف وَ مَا مَاتَوْا فِي الْحَرِبْ.

³ كُلَّ قُيَّادْكِ عَرَّدَوْا وَ سِيَادْ النُّشَّابْ كَرَبَوْهُمْ مَسَاجِينْ. وَ كُلَّ سُكَّانْكِ كَرَبَوْهُمْ مَسَاجِينْ حَتَّى كَنْ هُمَّنْ عَرَّدَوْا بَعِيدْ كُلَ.

⁴ وَ فِي شَانْ دَا، أَنَا قُلْت: «مَا تِشِيفُونِي! خَلُّونِي نَبْكِي بِحُرْقَةْ. وَ مَا تِحَاوُلُوا تِحَنُّسُونِي أَشَانْ أُمَّتِي الْمِثِلْ بِنْت أَمِّي أَدَّمَّرَتْ.»

⁵ أَشَانْ دَا يَوْم هَنَا بَرْجَالْ وَ دَمَارْ وَ شَكّ. وَ دَا جَايِ مِنْ اللّٰهْ الرَّبّ الْقَادِرْ فِي وَادِي الرُّؤْيَةْ. الدُّرْدُرْ وَقَعْ وَ الْكُرَوْرَاكْ أَنْسَمَعْ عَلَيْ الْجَبَلْ.

⁶ نَاسْ بَلَدْ عِلَامْ شَايْلِينْ كَلَوْتَاتْهُمْ وَ عَرَبَاتْ الْحَرِبْ وَ سِيَادْ الْخَيْل جَايِينْ وَ نَاسْ حِلَّةْ قِيرْ جَهَّزَوْا دُرُوعْهُمْ.

⁷ يَا مَدِينَةْ الْقُدُسْ! وُدْيَانْكِ السَّمْحِينْ أَنْمَلَوْا بِعَرَبَاتْ الْحَرِبْ. وَ سِيَادْ الْخَيْل جَوْا وَقَفَوْا فِي خُشُومْ بِيبَانْكِ

⁸ وَ دَاهُو بَلَدْ يَهُوذَا مَا عِنْدَهَا دِفَاعْ بَتَّانْ. وَ فِي الْيَوْم دَا، إِنْتُو وَجَّهْتُوا عَلَيْ بَيْت الْغَابَةْ الْفَوْقَهْ سِلَاحْكُو.

⁹ وَ شِفْتُوا كَدَرْ خُرَمْ مَدِينَةْ دَاوُدْ كَتِيرِينْ. وَ وَرَدْتُوا أَلْمِي وَ صَبَّيْتُوهْ فِي الْخَزَّانْ التِّحِتْ.

¹⁰ وَ حَسَبْتُوا عَدَدْ بُيُوتْ مَدِينَةْ الْقُدُسْ وَ هَدَّمْتُوا بُيُوتْ وَاحِدِينْ لِتِقَوُّوا الدُّرْدُرْ.

¹¹ وَ سَوَّيْتُوا خَزَّانْ أَمْبَيْنَاتْ الدَّرَادِرْ الْإِتْنَيْن لِلْأَلْمِي هَنَا الْبِرْكَةْ الْقَدِيمَةْ. وَ لَاكِنْ مَا وَجَّهْتُوا لِلّٰهْ هُو الْجَابْ الْمَصِيبَةْ دِي. وَ مَا شِفْتُوهْ عَلَيَّهْ، هُو الْجَهَّزَاهَا مِنْ زَمَنْ بَعِيدْ.

¹² وَ دَا الْيَوْم الْفَوْقَهْ اللّٰهْ الرَّبّ الْقَادِرْ نَادَاكُو لِتَبْكُوا وَ تُنُوحُوا وَ لِتِزَيُّنُوا رُوسَيْكُو وَ تَلْبَسَوْا خُلْقَانْ التَّوْبَةْ.

¹³ وَ لَاكِنْ دَاهُو بِفَرَحْ وَ سُرُورْ، إِنْتُو دَبَحْتُوا بَقَرْ وَ غَنَمْ. وَ أَكَلْتُوا لَحَمْ وَ شِرِبْتُوا خَمَرْ وَ قُلْتُوا: «يَلَّا! نَاكُلُوا وَ نَشَرْبَوْا أَشَانْ أَمْبَاكِرْ، خَلَاصْ نُمُوتُوا!»

¹⁴ وَ اللّٰهْ الْقَادِرْ بَيَّنْ لَيِّ وَ قَالْ: «خَطَاكُو دَا، أَبَداً مَا عِنْدَهْ كَفَّارَةْ لَحَدِّي تُمُوتُوا.» وَ دَا، اللّٰهْ الرَّبّ الْقَادِرْ بَسْ قَالَهْ.

تحْذير لشَبْنَا المسْؤول

¹⁵ وَ دَاهُو اللّٰهْ الرَّبّ الْقَادِرْ قَالْ: «أَمْشِي أَلْقَاهْ لِشَبْنَا الْمَسْؤُولْ فِي قَصِرْ الْمَلِكْ وَ قُولْ لَيَّهْ:

¹⁶ ‹عِنْدَكْ شُنُو هِنِي؟ وَ عِنْدَكْ يَاتُو هِنِي؟ مَالَا تَنْكُتْ لَيْك قَبُرْ فِي الْبَكَانْ دَا؟ وَ مَالَا تَحْفِرْ قَبُرْ فِي الْعَالِي وَ تِعَدِّلْ لَيْك قَبُرْ فِي الْجَبَلْ لِتِنْجَمَّ فَوْقَهْ؟

¹⁷ يَا الرَّاجِلْ الشَّدِيدْ، دَاهُو اللّٰهْ يَرْمِيكْ بَعِيدْ وَ يَكُرْبَكْ بِشِدَّةْ وَ يَطْوِيكْ.

¹⁸ وَ يِدَكْرِمَكْ مِثِلْ كُورَايْ وَ يَزْقُلَكْ فِي بَلَدْ وَسِيعَةْ. وَ هِنَاكْ تُمُوتْ مَعَ عَرَبَاتْ شَرَفَكْ، إِنْتَ الْجِبْت الْعَيْب لِبَيْت سِيدَكْ.

¹⁹ «‹أَيْوَى! أَنَا نَرْمِيكْ مِنْ بَكَانَكْ وَ نَطُرْدَكْ مِنْ مَسْؤُولِيّتَكْ.

²⁰ وَ فِي الْيَوْم دَا، نِنَادِي عَبْدِي أَلِيَاقِيمْ وِلَيْد حِلْقِيَّا.

²¹ أَنَا نِلَبِّسَهْ خَلَقَكْ وَ نَرْبُطْ صُلْبَهْ بِحِزَامَكْ وَ مَسْؤُولِيّتَكْ، نَنْطِيهَا لَيَّهْ فِي إِيدَيْنَهْ. وَ هُو يَبْقَى أَبُو لِسُكَّانْ مَدِينَةْ الْقُدُسْ وَ لِبَنِي يَهُوذَا.

²² وَ مَسْؤُولِيَّةْ مُفْتَاحْ قَصِرْ الْمَلِكْ دَاوُدْ، نُخُطَّهَا تِحِتْ سُلْطِتَهْ. وَ كَنْ هُو يَفْتَحْ الْبَابْ، مَا فِي الْيَقْدَرْ يِسِدَّهْ وَ كَنْ هُو يِسِدَّهْ، مَا فِي الْيَقْدَرْ يَفْتَحَهْ.

²³ وَ أَنَا نِمَكِّنَهْ مِثِلْ وِتِدْ فِي بَكَانْ قَوِي وَ هُو يِجِيبْ الشَّرَفْ لِبَيْت أَبُوهْ.

²⁴ وَ كُلَّ تَقَلَةْ شَرَفْ بَيْت أَبُوهْ، الْكُبَارْ وَ الصُّغَارْ كُلَ، يُخُطُّوهَا فَوْقَهْ. وَ هُو يَبْقَى مِثِلْ شِعْبَةْ الْيِعَلُّقُوا فَوْقهَا كُلَّ الْمُعِدَّاتْ الصُّغَارْ مِنْ الْغَرَارِيفْ لَحَدِّي الْقِرَبْ.›»

²⁵ وَ دَاهُو كَلَامْ اللّٰهْ الْقَادِرْ: «فِي الْيَوْم دَا، الْوِتِدْ الْمُمَكَّنْ فِي الْبَكَانْ الْقَوِي يِنْتَنِي وَ يِنْكَسِرْ وَ يَقَعْ وَ التَّقَلَةْ الشَّايِلْهَا تِدَّمَّرْ.» وَ دَا كَلَامْ اللّٰهْ الْهُو قَالَهْ.