إشَعْيا 13 - الكتاب المقدس بالعربي الدارجي هنا تشاد

نِهاية بَابِل قرّبت

¹ مُحَاكَمَةْ بَابِلْ الشَّافْهَا إِشَعْيَا وِلَيْد أَمُّوصْ فِي رُؤْيَةْ.

² الرَّبّ قَالْ: «غُزُّوا رَايَةْ فِي الْجَبَلْ الْأَمْلَسْ وَ نَادُوا لِلْعَسْكَرْ. وَ وَصُّفُوهُمْ بِإِيدَيْكُو لِيَدْخُلُوا الْمَدِينَةْ بِبِيبَانْ الْحُكَّامْ.

³ أَنَا أَنْطَيْت أَمُرْ لِمُخَصَّصِينْ هِنَيّ وَ بَتَّانْ نَادَيْت فُرَّاسِي الْيِنَفُّذُوا غَضَبِي، الْيَفْرَحَوْا بِعَظَمَتِي.»

⁴ أَسْمَعَوْا الْحَرَكَةْ الْكَتِيرَةْ فِي الْجِبَالْ مِثِلْ شَعَبْ كَتِيرِينْ! وَ دَا حِسّ حَرَكَةْ الْمَمَالِكْ أَيْوَى، حَرَكَةْ مَلَمَّةْ الْأُمَمْ! اللّٰهْ الْقَادِرْ يِجَهِّزْ دَيْشَهْ الْيِحَارِبْ.

⁵ هُمَّنْ يَجُوا مِنْ بَلَدْ بَعِيدَةْ مِنْ آخِرْ الْأَرْض. اللّٰهْ وَ سِلَاحْ غَضَبَهْ يِسَبُّبُوا دَمَارْ هَنَا كُلَّ الْبَلَدْ.

⁶ أَبْكُوا بِحِزِنْ أَشَانْ يَوْم اللّٰهْ قَرَّبْ وَ دَا يَوْم هَنَا دَمَارْ شَدِيدْ الْجَايِ مِنْ الْقَادِرْ.

⁷ وَ بِسَبَبْ دَا، كُلَّ الْإِيدَيْن يِنْرَخُوا وَ أَيِّ نَادُمْ قَلْبَهْ يِنْقَطِعْ.

⁸ هُمَّنْ يِنْبَهْتُوا وَ يَكْرُبْهُمْ وَجَعْ وَ طَلَقَةْ وَ يِتَّنَّوْا مِثِلْ مَرَةْ الْقَاعِدَةْ تِطَالِقْ. وَ الْوَاحِدْ يِشِيفْ الْآخَرْ كُلُّهُمْ مُنْبَهِتِينْ وَ يِسَلُّلُوا عُيُونْهُمْ مِنْ الْخَوْف.

⁹ دَاهُو يَوْم اللّٰهْ جَايِ، يَوْم هَنَا غَضَبْ مُخِيفْ وَ زَعَلْ شَدِيدْ الْفَوْقَهْ اللّٰهْ يَخْرِبْ الْأَرْض وَ يُقُشّ مِنْهَا الْمُذْنِبِينْ.

¹⁰ وَ بَيْدَا، نُجُومْ السَّمَاءْ وَ الصَّبِي الْمَغْمِي نُورْهُمْ مَا يِبِينْ. وَ مِنْ طَلُوعْهَا، الْحَرَّايْ تَبْقَى ضَلْمَةْ وَ الْقَمَرْ كُلَ، نُورَهْ مَا يِضَوِّي.

¹¹ وَ الرَّبّ قَالْ: «أَنَا نِعَاقِبْ الدُّنْيَا فِي شَانْ فَسَالِتْهَا وَ الْعَاصِيِينْ فِي شَانْ خَطَاهُمْ. وَ نِوَقِّفْ إِسْتِكْبَارْ الْمُسْتَكْبِرِينْ وَ نِنَزِّلْ فَشَارْ سِيَادْ الْعُنُفْ.

¹² وَ نِسَوِّي الْإِنْسَانْ غَالِي مَا يِنْلَقِي مِثِلْ الدَّهَبْ الصَّافِي. أَيْوَى، بَنِي آدَم يَبْقَى غَالِي مَا يِنْلَقِي مِثِلْ دَهَبْ بَلَدْ أُفِيرْ.

¹³ «وَ بِسَبَبْ دَا، نِهِزّ السَّمَاءْ وَ نِرَجِّفْ الْأَرْض مِنْ أَسَاسْهَا. وَ دَا مِنْ شِدَّةْ زَعَلِي أَنَا اللّٰهْ الْقَادِرْ فِي يَوْم غَضَبِي الْمُحْرِقْ.

¹⁴ خَلَاصْ، مِثِلْ الْغَزَالَةْ الْمَطْرُودَةْ وَ مِثِلْ الْغَنَمْ الْمَا عِنْدُهُمْ رَاعِي، أَيِّ وَاحِدْ يِقَبِّلْ لِشَعَبَهْ وَ أَيِّ وَاحِدْ يِعَرِّدْ لِبَلَدَهْ.

¹⁵ وَ أَيِّ وَاحِدْ الْيَلْقَوْه، يَطْعَنَوْه وَ أَيِّ وَاحِدْ الْيَكُرْبُوهْ، يَكْتُلُوهْ بِالْسَّيْف.

¹⁶ وَ أَطْفَالْهُمْ يَرْحَكَوْهُمْ قِدَّامْهُمْ وَ يَنْهَبَوْا خُمَامْ بُيُوتْهُمْ وَ يَرُقْدُوا مَعَ عَوِينْهُمْ بِقُوءْ.»

¹⁷ وَ الرَّبّ قَالْ: «دَاهُو نِقَوِّمْ الْمَادِيِّينْ ضِدُّهُمْ الْمَا يِفَكُّرُوا فِي الْفُضَّةْ وَ الدَّهَبْ كُلَ مَا يَعَجِبْهُمْ.

¹⁸ وَ بِنُشَّابْهُمْ، يَكْتُلُوا الشَّبَابْ وَ مَا يَرْحَمَوْا الطِّفِلْ وَ مَا يِحِنُّوا فِي الْعِيَالْ الدُّقَاقْ.»

¹⁹ زَمَانْ، مَدِينَةْ بَابِلْ جَمَالْ الْمَمَالِكْ وَ زِينَةْ الْبَابِلِيِّينْ. وَ هَسَّعْ، هِي تَبْقَى مِثِلْ سَدُومْ وَ عَمُورَةْ الدَّمَّرَاهُمْ الرَّبّ.

²⁰ هِي مَا يَسْكُنُوهَا إِلَى الْأَبَدْ وَ مِنْ ذُرِّيَّةْ لِذُرِّيَّةْ كُلَ، مَا يَسْكُنُوهَا. الْعَرَبْ الْيِسِيرُوا مَا يَبْنُوا خِيَمْهُمْ هِنَاكْ وَ الرُّعْيَانْ مَا يِسَوُّوا زَرَايِبْهُمْ هِنَاكْ.

²¹ حَيْوَانَاتْ الْكَدَادَةْ يَسْكُنُوهَا وَ طُيُورْ أَمْ قُقُّمْ يَمْلَوْا بُيُوتْهَا. وَ النَّعَامْ يَسْكُنْهَا وَ تُيُوسْ الْحَجَرْ يَلْعَبَوْا فَوْقهَا.

²² الْمَرَافْعِينْ يَبْكُوا فِي بُيُوتْهَا السَّمْحِينْ وَ الْبَعَاشِيمْ فِي قُصُورْهَا الْكُبَارْ. وَكِتْهَا قَرِيبْ يَجِي وَ أَيَّامْهَا مَحْسُوبِينْ.