إشَعْيا 11 - الكتاب المقدس بالعربي الدارجي هنا تشاد

يجي ملك عادِل من ذُرّية دَاوُد

¹ وَ يَجِي وَاحِدْ مِنْ ذُرِّيَّةْ يَسَّى مِثِلْ فِرِعْ الْيَبْذُرْ مِنْ دُنْبُرْ وَ مِنْ قَعَرَهْ تُقُمّ بِذْرَةْ التِّسَوِّي عِيَالْ.

² وَ فِي النَّادُمْ دَا، يَنْزِلْ رُوحْ اللّٰهْ وَ دَا رُوحْ الْحِكْمَةْ وَ الْمَعْرَفَةْ وَ الشَّوْرَةْ وَ الْفَحَالِيَّةْ وَ الْعِلِمْ وَ الْخَوْف مِنْ اللّٰهْ.

³ وَ هُو يَفْرَحْ بِالْخَوْف مِنْ اللّٰهْ وَ مَا يَحْكِمْ بِالشَّافَتَهْ عَيْنَهْ وَ مَا يِقَرِّرْ بِالسِّمْعَتَهْ أَدَانَهْ.

⁴ وَ يَحْكِمْ لِلْفَقْرَانِينْ بِالْعَدَالَةْ وَ يِقَرِّرْ بِالْعَدِلْ لِمَسَاكِينْ الْبَلَدْ. وَ كَلَامَهْ، مِثِلْ بِعَصَاةْ يَضْرُبْ الْبَلَدْ وَ بِكِلْمَةْ وَاحِدَةْ، يَكْتُلْ الْعَاصِي.

⁵ وَ الْعَدَالَةْ مِثِلْ حِزَامْ صُلْبَهْ وَ الصَّحِيحْ مِثِلْ حِزَامْ بَطْنَهْ.

ما في دمار في جبل اللّه

⁶ وَ الْبَعَشَوْم يَسْكُنْ مَعَ الْحَمَلْ وَ النِّمِرْ يَرْقُدْ جَنْب السَّخَلْ. وَ الْعِجِلْ وَ فَرْخ الدُّودْ يَاكُلُوا سَوَا وَ وِلَيْد صَغَيَّرْ يُقُودْهُمْ.

⁷ وَ الْبَقَرَةْ وَ الدُّبّ يَسْرَحَوْا سَوَا وَ عِيَالْهُمْ يَرُقْدُوا بَكَانْ وَاحِدْ. وَ الدُّودْ يَبْقَى مِثِلْ التَّوْر، يَاكُلْ الْقَشّ.

⁸ الطِّفِلْ يَلْعَبْ بِعُشّ أَبُنْ دَرَقْ أَيْوَى، الصَّغِيرْ يِدِسّ إِيدَهْ فِي نُقْرَةْ الدَّابِي.

⁹ وَ مَا تُكُونْ فَسَالَةْ وَ لَا دَمَارْ فِي كُلَّ جَبَلِي الْمُقَدَّسْ أَشَانْ الْأَرْض تِنْمَلِي بِمَعْرَفَةْ اللّٰهْ مِثِلْ الْبَحَرْ يِنْمَلِي بِأَلْمِي.

قبِّلين كل بني إسرائيل

¹⁰ وَ فِي الْيَوْم دَا، عِرِقْ يَسَّى يَبْقَى مِثِلْ رَايَةْ لِلشُّعُوبْ. وَ الْأُمَمْ يِفَتُّشُوهْ وَ بَكَانَهْ الْيِنْجَمَّ فَوْقَهْ عَظِيمْ.

¹¹ وَ فِي الْيَوْم دَا، الرَّبّ يِمِدّ إِيدَهْ لِتَانِي مَرَّةْ لِيَفْدَى الْفَضَّلَوْا مِنْ شَعَبَهْ الْقَاعِدِينْ فِي بُلْدَانْ أَشُورْ وَ مَصِرْ وَ فَتْرُوسْ وَ الْحَبَشَةْ وَ عِلَامْ وَ شِنْعَارْ وَ حَمَاتْ وَ فِي جَزَايِرْ الْبَحَرْ.

¹² هُو يَرْفَعْ رَايَةْ لِلْأُمَمْ وَ يِلِمّ بَنِي إِسْرَائِيلْ الْمَطْرُودِينْ وَ يَجْمَعْ بَنِي يَهُوذَا الْمُشَتَّتِينْ فِي الْأَرْبَعَةْ جِيهَاتْ هَنَا الْأَرْض.

¹³ وَ حُسُدْ أَفْرَايِمْ يَبْقَى مَا فِيهْ وَ خُصْمَانْ يَهُوذَا يِكَمُّلُوا. وَ أَفْرَايِمْ مَا يَحْسِدْ يَهُوذَا بَتَّانْ وَ يَهُوذَا مَا يَبْقَى أَبَداً خَصِيمْ أَفْرَايِمْ.

¹⁴ وَ هُمَّنْ يِنْصَبَّوْا فِي الْفِلِسْطِيِّينْ فِي الْغَرِبْ وَ سَوَا يَنْهَبَوْا الْقَاعِدِينْ فِي الصَّبَاحْ. وَ فِي بُلْدَانْ أَدَوْم وَ مُوَابْ، يَحْكُمُوا وَ لِبَنِي عَمُّونْ، يَمُلْكُوهُمْ.

¹⁵ وَ اللّٰهْ يِيَبِّسْ رِجِلْ بَحَرْ مَصِرْ وَ يَرْفَعْ إِيدَهْ لِيَضْرُبْ بَحَرْ الْفُرَاتْ بِشِدَّةْ نَفْخَتَهْ. وَ يِقَسِّمَهْ سَبْعَةْ وُدْيَانْ دُقَاقْ الْيَقْدَرَوْا يَقْطَعَوْهُمْ بِرِجْلَيْهُمْ.

¹⁶ وَ هِنَاكْ، هُو يِسَوِّي دَرِبْ لِلْفَضَّلَوْا مِنْ شَعَبَهْ فِي بَلَدْ أَشُورْ مِثِلْ زَمَانْ سَوَّى دَرِبْ لِبَنِي إِسْرَائِيلْ يَوْم مَرَقَوْا مِنْ بَلَدْ مَصِرْ.