إشَعْيا 10 - الكتاب المقدس بالعربي الدارجي هنا تشاد

العِقاب ضِدّ كُبارات يَهُوذَا

¹ الْعَذَابْ لِلْيِقَرُّرُوا شُرُوطْ هَنَا فَسَالَةْ وَ يَكْتُبُوا قَوَانِينْ هَنَا تَعَبْ!

² هُمَّنْ يَدْحَرَوْا الْمِسْكِينْ مِنْ الشَّرِيعَةْ وَ يَقْلَعَوْا الْحَقّ مِنْ فَقْرَانْ شَعَبِي. وَ يَكْسَبَوْا الْأَرَامِلْ وَ يَنْهَبَوْا الْأَتَامَا.

³ إِنْتُو تِسَوُّوا شُنُو فِي يَوْم الْعِقَابْ، وَكِتْ الْهَلَاكْ يَجِي لَيْكُو مِنْ بَعِيدْ؟ لِيَاتُو تَجْرُوا وَ مِنْ يَاتُو تَلْقَوْا الْفَزَعْ؟ وَ وَيْن تُضُمُّوا غُنَاكُو؟

⁴ مَا فَضَّلْ إِلَّا تِدَنْقُرُوا مَعَ الْمَسَاجِينْ وَ تَقَعَوْا مَعَ الْمَيْتِينْ. وَ بَيْدَا كُلَ، زَعَلْ اللّٰهْ مَا يَقِيفْ وَ إِيدَهْ قَاعِدَةْ مَرْفُوعَةْ لِلْعِقَابْ.

العذاب لبلد أَشُور

⁵ الْعَذَابْ لِمَلِكْ بَلَدْ أَشُورْ! هُو عَصَاةْ زَعَلِي وَ نِنَزِّلْ غَضَبِي بِالْعَصَاةْ الْفِي إِيدَهْ.

⁶ أَنَا نِرَسِّلْ مَلِكْ بَلَدْ أَشُورْ ضِدّ الْأُمَّةْ الْكَافْرَةْ وَ نُقُودَهْ ضِدّ الشَّعَبْ الْيِقَوُّمُوا غَضَبِي أَشَانْ مَلِكْ أَشُورْ يَنْهَبْهُمْ وَ يَكْسَبْهُمْ وَ يِفَجِّقْهُمْ تِحِتْ رِجِلَيْنَهْ مِثِلْ الطِّينَةْ فِي الشَّوَارِعْ.

⁷ وَ لَاكِنْ هُو مَا يَفْهَمْ مِثِلْ دَا وَ قَلْبَهْ كُلَ مَا يِفَكِّرْ مِثِلْ دَا. أَشَانْ فِي قَلْبَهْ إِلَّا الدَّمَارْ وَ كَتِلْ الْأُمَمْ بِكَتَرَةْ.

⁸ أَشَانْ هُو قَالْ: «قُيَّادِي مَا زِيَادَةْ مِنْ الْمُلُوكْ دَوْل وَلَّا؟

⁹ وَ دَمَّرْنَا حِلَّةْ كَلْنَةْ مِثِلْ حِلَّةْ كَرْكَمِيشْ وَ حِلَّةْ حَمَاتْ مِثِلْ حِلَّةْ أَرْفَدْ وَ مَدِينَةْ السَّامِرَةْ مِثِلْ مَدِينَةْ دِمَشْق!

¹⁰ إِيدِي كُلَ دَمَّرَتْ مَمَالِكْ الْإِلٰـهَاتْ الْأَصْنَامْهُمْ كَتِيرِينْ مِنْ أَصْنَامْ مَدِينَةْ الْقُدُسْ وَ السَّامِرَةْ.

¹¹ هَلْ أَنَا مَا نِدَمِّرْ مَدِينَةْ الْقُدُسْ وَ أَصْنَامْهَا مِثِلْ دَمَّرْت السَّامِرَةْ وَ إِلٰـهَاتْهَا وَلَّا؟»

¹² وَ وَكِتْ الرَّبّ يِكَمِّلْ كُلَّ خِدِمْتَهْ فِي جَبَلْ صَهْيُون وَ فِي مَدِينَةْ الْقُدُسْ، هُو يُقُولْ: «نُقُمّ ضِدّ أَفْكَارْ الْإِسْتِكْبَارْ هَنَا مَلِكْ بَلَدْ أَشُورْ وَ شَوْفَهْ هَنَا الْبُغُضْ.

¹³ أَشَانْ الْمَلِكْ دَا قَالْ: ‹بِقُدْرَةْ إِيدِي، أَنَا سَوَّيْت كُلَّ الشَّيّءْ دَا وَ بِحِكْمَتِي، أَنَا بِقِيتْ فَاهِمْ. أَنَا غَيَّرْت حُدُودْ الشُّعُوبْ وَ نَهَبْت مَالْهُمْ وَ بِفَرَاسِيَّةْ نَزَّلْت مُلُوكْ مِنْ كَرَاسِيهُمْ.

¹⁴ وَ مِثِلْ يِشِيلُوا بَيْض مِنْ الْعُشّ، أَنَا خَطَفْت غُنَى الشُّعُوبْ. وَ مِثِلْ يُخُمُّوا الْبَيْض الْخَلَّوْه، أَنَا خَمَّيْت كُلَّ بُلْدَانْ الْأَرْض. وَ مَا فِي وَاحِدْ حَرَّكْ جِنْحَهْ وَ لَا فَكَّ خَشْمَهْ وَ لَا صَرَخْ ضِدِّي.›»

¹⁵ وَ اللّٰهْ قَالْ: «هَلْ الْفَاسْ تِفْشُرْ فِي سِيدْهَا الْيَقْطَعْ بَيْهَا وَلَّا؟ هَلْ الْمُنْشَارْ يِلْعَلَّى فِي الْيِسْتَعْمَلَهْ وَلَّا؟ وَ دَا مِثِلْ الْعَصَاةْ تِحَرِّكْ الْإِيدْ التَّرْفَعْهَا وَلَّا مِثِلْ الدُّقُلْ يِقِلّ الْإِنْسَانْ!

¹⁶ وَ بِسَبَبْ دَا، أَنَا اللّٰهْ الرَّبّ الْقَادِرْ نِنَزِّلْ الْبَطُولْ فِي الْعَسْكَرْ السُّمَانْ هَنَا الْمَلِكْ. وَ بِعَظَمَتْهُمْ دِي كُلَ، النَّارْ تَاكُلْهُمْ وَ تَحْرِقْهُمْ.»

¹⁷ وَ الرَّبّ، نُورْ إِسْرَائِيلْ، يَبْقَى مِثِلْ نَارْ أَيْوَى، قُدُّوسْ إِسْرَائِيلْ يَبْقَى مِثِلْ أَمْ بَلْبَالَةْ الْفِي يَوْم وَاحِدْ بَسْ، تَاكُلْ وَ تَحْرِقْ الشَّوْك وَ الْحَسْكَنِيتْ.

¹⁸ بِالْكَامِلْ، الرَّبّ يِدَمِّرْ الْغَابَاتْ وَ الْجِنَيْنَاتْ الْكُبَارْ هَنَا مَلِكْ أَشُورْ. وَ هُمَّنْ يَبْقَوْا مِثِلْ مَرْضَانْ الْوَدَّرْ قُدُرْتَهْ.

¹⁹ وَ يِفَضِّلْ شِيَّةْ بَسْ مِنْ شَدَرْ غَابَاتَهْ لَحَدِّي صَغِيرْ صَغَيَّرْ كُلَ يَقْدَرْ يَحْسِبْهُمْ.

اليفضُّلوا من بني إسرائيل

²⁰ وَ فِي الْيَوْم دَا، الْيِفَضُّلُوا مِنْ بَنِي إِسْرَائِيلْ وَ الْمُعَرِّدِينْ وَ النِّجَوْا مِنْ ذُرِّيَّةْ يَعْقُوبْ مَا يِنْتَكْلُوا عَلَيْ مَلِكْ أَشُورْ الضَّرَبَاهُمْ. وَ لَاكِنْ يِنْتَكْلُوا بِأَمَانْ عَلَيْ اللّٰهْ قُدُّوسْ إِسْرَائِيلْ.

²¹ وَ الْيِفَضُّلُوا يِقَبُّلُوا. أَيْوَى، الْيِفَضُّلُوا مِنْ ذُرِّيَّةْ يَعْقُوبْ يِقَبُّلُوا لِلّٰهْ الْقَادِرْ.

²² يَا بَنِي إِسْرَائِيلْ، كَنْ شَعَبْكُو بِقَوْا كَتِيرِينْ مِثِلْ رَمْلَةْ هَنَا خَشُمْ الْبَحَرْ كُلَ، الْيِقَبُّلُوا مِنْكُو شِيَّةْ بَسْ. قَرَارْ الدَّمَارْ مَرَقْ وَ هُو قَرَارْ مَلَانْ بِالْعَدَالَةْ.

²³ وَ خَلَاصْ، قَرَارْ الدَّمَارْ دَا مَرَقْ وَ أَكِيدْ اللّٰهْ الرَّبّ الْقَادِرْ يِطَبِّقَهْ فِي كُلَّ الْبَلَدْ.

اللّه يقُمّ ضِدّ بلد أَشُور

²⁴ وَ فِي شَانْ دَا، دَاهُو اللّٰهْ الرَّبّ الْقَادِرْ قَالْ: «يَا شَعَبِي السَّاكْنِينْ فِي مَدِينَةْ صَهْيُون، مَا تَخَافَوْا مِنْ مَلِكْ بَلَدْ أَشُورْ. هُو قَاعِدْ يَضْرُبْكُو بِعَصَاتَهْ وَ يَرْفَعْ عَصَاتَهْ ضِدُّكُو مِثِلْ سَوَّوْه الْمَصْرِيِّينْ زَمَانْ.

²⁵ هَسَّعْ فَضَّلْ وَكِتْ شِيَّةْ بَسْ، غَضَبِي ضِدُّكُو يَقِيفْ وَ لَاكِنْ زَعَلِي يِدَمِّرْ عَسْكَرْ بَلَدْ أَشُورْ.»

²⁶ «وَ أَنَا اللّٰهْ الْقَادِرْ نَرْفَعْ لَيَّهْ السَّوْط وَ نَضُرْبَهْ مِثِلْ ضَرَبْت نَاسْ مِدْيَانْ فِي حَجَرْ عُرِيبْ. وَ نَرْفَعْ عَصَاتِي ضِدّ الْبَحَرْ مِثِلْ رَفَعْتَهَا ضِدّ الْمَصْرِيِّينْ زَمَانْ.

²⁷ وَ فِي الْيَوْم دَا، نَرْفَعْ تَقَلَتَهْ مِنْ كَتَافَيْكُو وَ نِشِيلْ الدَّامِي مِنْ رِقَابْكُو وَ الدَّامِي يِلْكَسَّرْ أَشَانْ تَشْبَعَوْا وَ تَبْقَوْا سُمَانْ.»

عسْكر أَشُور قرّبوا للمدينة

²⁸ وَ عَسْكَرْ أَشُورْ يَجُوا فِي حِلَّةْ عَيَّتْ وَ يُشُقُّوا حِلَّةْ مِقْرُونْ وَ فِي حِلَّةْ مِكْمَاشْ، يِخَلُّوا مُعِدَّاتْهُمْ.

²⁹ وَ يَقْطَعَوْا الْمَعَدّ وَ يُقُولُوا: «فِي اللَّيْلَةْ دِي، نَنْزُلُوا فِي حِلَّةْ قَبَعْ.» وَ بَيْدَا، حِلَّةْ الرَّامَةْ تَرْجِفْ وَ قِبَيْعَةْ حِلَّةْ شَاوُولْ سُكَّانْهَا يِعَرُّدُوا.

³⁰ أَصْرَخَوْا، يَا نَاسْ حِلَّةْ بِنْت قَلِّيمْ! وَ خُطِّي بَالْكِ، يَا حِلَّةْ لَيْشَةْ! وَ حِلَّةْ عَنَتُوتْ الْمِسْكِينَةْ!

³¹ وَ حِلَّةْ مَدْمِينَةْ تِعَرِّدْ وَ سُكَّانْ حِلَّةْ قَبِيمْ يِفَتُّشُوا مَلْجَأْ.

³² وَ فِي نَفْس الْيَوْم، عَسْكَرْ أَشُورْ يَقِيفُوا فِي حِلَّةْ نُوبْ وَ يَرْفَعَوْا إِيدَيْهُمْ ضِدّ جَبَلْ صَهْيُون الْمِثِلْ بِنَيَّةْ وَ دَا حَجَرْ الْفَوْقَهْ مَدِينَةْ الْقُدُسْ.

اللّه يدمِّر الغابة

³³ وَ شِيفُوا! دَاهُو اللّٰهْ الرَّبّ الْقَادِرْ يِدَمِّرْ عَسْكَرْ أَشُورْ مِثِلْ نَادُمْ يِكَسِّرْ الْفُرُوعْ بِشِدَّةْ. وَ مِثِلْ يَقْطَعْ الْفُرُوعْ الْمَرْفُوعِينْ فَوْق، اللّٰهْ يِكَمِّلْ كُبَارَاتْهُمْ وَ الْعَالِيِينْ كُلَ، يَرْمِيهُمْ تِحِتْ.

³⁴ وَ دَا مِثِلْ هُو يَقْطَعْ شَدَرْ الْغَابَةْ بِفَاسْ وَ خَلَاصْ، لُبْنَانْ تَقَعْ قِدَّامْ الْعَظِيمْ.