إشَعْيا 1 - الكتاب المقدس بالعربي الدارجي هنا تشاد

رُؤية النبي إشَعْيا

¹ دَاهُو رُؤْيَةْ إِشَعْيَا وِلَيْد أَمُّوصْ التُّخُصّ بَلَدْ يَهُوذَا وَ مَدِينَةْ الْقُدُسْ. وَ الرُّؤْيَةْ دِي كَانَتْ فِي أَيَّامْ حُكُمْ عُزِّيَّا وَ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا.

الأُمّة المُذْنِبة

² يَا السَّمَاءْ، أَسْمَعَيْ! وَ يَا أَرْض، أَفْتَحَيْ أَدَانْكِ! دَاهُو كَلَامْ اللّٰهْ الْهُو قَالَهْ: «أَنَا أَدَّبْت وَ رَبَّيْت عِيَالْ وَ لَاكِنْ هُمَّنْ أَتْمَرَّدَوْا ضِدِّي.

³ التَّوْر يَعَرِفْ سِيدَهْ وَ الْحُمَارْ يَعَرِفْ النَّادُمْ الْيَنْطِيهْ أَكِلْ. لَاكِنْ بَنِي إِسْرَائِيلْ مَا يَعَرْفُونِي وَ شَعَبِي مَا يَفْهَمَوْا.»

ناس يَهُوذَا بِقوا مِثِل ناس سَدُوم

⁴ الْعَذَابْ لِلْأُمَّةْ الْمُذْنِبَةْ أَيْوَى، لِلْأُمَّةْ الشَّايْلَةْ الْخَطَا! إِنْتُو ذُرِّيَّةْ النَّاسْ الْفَسْلِينْ، عِيَالْ الْمُدَمَّرِينْ! إِنْتُو أَبَيْتُوا اللّٰهْ أَيْوَى، أَبَيْتُوا قُدُّوسْ إِسْرَائِيلْ وَ قَبَّلْتُوا وَرَاءْ.

⁵ اللّٰهْ يَضْرُبْكُو وَيْن بَتَّانْ؟ أَشَانْ إِنْتُو قَاعِدِينْ تِزِيدُوا فِي عِصْيَانْكُو. رَاسْكُو كُلَّ مَلَانْ عَوَاوِيرْ وَ قَلِبْكُو كُلَّ تَعْبَانْ.

⁶ مِنْ رَاسْكُو لِرِجْلَيْكُو مَا فِي شَيّءْ عَدِيلْ. كُلَّ كَيْ جُرُوحْ وَ حَلَابِيبْ وَ عَوَاوِيرْ جَدِيدِينْ. وَ لَا مُنَضَّفِينْ وَ لَا مَلْفُوفِينْ وَ لَا مَسَحَوْهُمْ بِدِهِنْ.

⁷ بَلَدْكُو خِرْبَتْ وَ مُدُنْكُو حِرْقَوْا. الْأَجَانِبْ يَاكُلُوا إِنْتَاجْ أَرْضُكُو قِدَّامْكُو. هِي خِرْبَتْ وَ الْأَجَانِبْ دَمَّرَوْهَا.

⁸ مَدِينَةْ صَهْيُون الْمِثِلْ بِنَيَّةْ، أَبَوْهَا وَ بِقَتْ مِثِلْ لِقْدَابَةْ فِي جِنَيْنَةْ عِنَبْ بَعَدْ الْقَطِعْ. أَبَوْهَا مِثِلْ عِلِّيَّةْ فِي أُسُطْ زَرَعْ الْفَقُّوسْ وَ مِثِلْ حِلَّةْ مُحَاصَرَةْ.

⁹ وَ كَنْ اللّٰهْ الْقَادِرْ مَا خَلَّى لَيْنَا نَاسْ شِيَّةْ النِّجَوْا، أَنِحْنَ نِدَّمَّرَوْا مِثِلْ نَاسْ سَدُومْ وَ نَهْلَكَوْا مِثِلْ نَاسْ عَمُورَةْ.

اللّه أبى ضحايا الكدّابين

¹⁰ يَا بَنِي يَهُوذَا، قُيَّادْكُو فَسْلِينْ مِثِلْ قُيَّادْ سَدُومْ. أَسْمَعَوْا كَلَامْ اللّٰهْ الْيُقُولَهْ لَيْكُو! يَا بَنِي يَهُوذَا، شَعَبْكُو فَسْلِينْ مِثِلْ نَاسْ عَمُورَةْ. خُطُّوا أَدَانْكُو لِوَصَايَا إِلٰـهْنَا!

¹¹ اللّٰهْ قَالْ: «ضَحَايَاكُو الْكَتِيرِينْ دَوْل، نِسَوِّي بَيْهُمْ شُنُو؟ كَفَانِي مِنْ الضَّحَايَا الْمُحَرَّقِينْ هَنَا كُبْشَانْكُو وَ شَحَمْ عَجَّالْكُو. أَيْوَى، دَمّ تِيرَانْكُو وَ حُمْلَانْكُو وَ تُيُوسْكُو كُلَ، مَا نَرْضَى بَيَّهْ.

¹² وَكِتْ تَجُوا وَ تَقِيفُوا قِدَّامِي، يَاتُو قَالْ لَيْكُو تِفَجُّقُوا فَضَايْتِي؟

¹³ وَقُّفُوا مَا تِجِيبُوا لَيِّ بَتَّانْ ضَحَايَاكُو الْمَكْرُوهِينْ وَ بَخُورْكُو دَا مُحَرَّمْ لَيِّ! وَقُّفُوا ضَحَايَاكُو هَنَا أَوَّلْ يَوْم فِي كُلِّ شَهَرْ وَ هَنَا كُلِّ يَوْم سَبْت وَ مَلَمَّاتْكُو أَشَانْ أَنَا مَا نَقْبَلْ الْفَسَالَةْ فِي مَلَمَّاتْكُو الْخَاصِّينْ.

¹⁴ أَنَا نَكْرَهْ ضَحَايَاكُو هَنَا أَوَّلْ يَوْم فِي كُلِّ شَهَرْ. وَ أَعْيَادْكُو، مَا نَحْمَلْهُمْ! بِقِي لَيِّ كَتِيرْ.

¹⁵ وَكِتْ تِمِدُّوا إِيدَيْكُو لَيِّ بِدُعَاكُو، أَنَا مَا نِوَجِّهْ عَلَيْكُو. وَ وَكِتْ تِكَتُّرُوا صَلَاوَاتْكُو كُلَ، مَا نَسْمَعْكُو أَشَانْ إِيدَيْكُو مَلَانِينْ بِدَمّ.

¹⁶ أَلْبَرَّدَوْا وَ طَهُّرُوا نُفُوسْكُو وَ بَعُّدُوا مِنْ قِدَّامِي عَمَلْكُو الْفَسِلْ وَ خَلُّوا مِنْكُو الْفَسَالَةْ.

¹⁷ أَلْعَلَّمَوْا الْعَدِيلْ وَ فَتُّشُوا الْعَدَالَةْ قَبُّلُوا الظَّالِمْ مِنْ دَرْبَهْ هَنَا الظُّلُمْ. سَوُّوا الْعَدِلْ لِلْأَتِيمْ وَ دَافُعُوا لِلْأَرْمَلَةْ.»

¹⁸ اللّٰهْ قَالْ: «تَعَالُوا نِنَاقُشُوا. كَنْ ذُنُوبْكُو حُمُرْ كُلَ، يَبْقَوْا بُيُضْ كَرّ مِثِلْ اللَّبَنْ. وَ كَنْ حُمُرْ تُشْو مِثِلْ الدَّمّ كُلَ، يَبْقَوْا بُيُضْ كَرّ مِثِلْ الْقُطُنْ.

¹⁹ وَ كَنْ قَصَّدْتُوا وَ سِمِعْتُوا كَلَامِي، تَاكُلُوا مِنْ أَحْسَنْ إِنْتَاجْ الْأَرْض.

²⁰ لَاكِنْ كَنْ أَبَيْتُوا وَ عِصِيتُونِي، السَّيْف يَبْقَى مِثِلْ نَارْ يَاكُلْكُو!» أَيْوَى، دَا كَلَامْ اللّٰهْ الْقَالَهْ.

اللّه يطهِّر مدينة القدس

²¹ كِكَّيْف الْمَدِينَةْ الْأَمِينَةْ بِقَتْ شَرْمُوطَةْ؟ أَوَّلْ هِي مَلَانَةْ بِالْعَدَالَةْ. أَيْوَى، أَوَّلْ الْعَدَالَةْ سَاكْنَةْ فَوْقهَا لَاكِنْ هَسَّعْ سَاكْنِينْ فَوْقهَا كَتَّالِينْ دِمَمْ.

²² يَا مَدِينَةْ الْقُدُسْ! فُضِّتْكِ مَلَانَةْ بِالْوَسَخْ وَ خَمَرْكِ السَّمَحْ مُخَلْبَطْ بِأَلْمِي.

²³ مَسَائِيلْكِ بِقَوْا حَرَامِيِّينْ وَ مُنْرَبِطِينْ مَعَ السَّرَارِيقْ. وَ يِحِبُّوا الرَّشْوَةْ وَ يَجْرُوا وَرَاءْ الْفَايْدَةْ. هُمَّنْ مَا يِدَافُعُوا لِحُقُوقْ الْأَتِيمْ وَ مَا لَمَّاهُمْ بِشَكْوَةْ الْأَرْمَلَةْ.

²⁴ فِي شَانْ كُلَّ الشَّيّءْ دَا، دَاهُو كَلَامْ اللّٰهْ الرَّبّ الْقَادِرْ، جَبَّارْ إِسْرَائِيلْ. هُو قَالْ: «الْعَذَابْ لَيْكِ، يَا مَدِينَةْ الْقُدُسْ! نِشِيلْ التَّارْ فَوْقكِ، إِنْتِ خَصِيمْتِي أَيْوَى نِكَمِّلْكِ، إِنْتِ عَدُويِ.

²⁵ بَتَّانْ نُقُمّ ضِدِّكِ وَ نَقْطَعْكِ فِي النَّارْ. وَ نِصَفِّيكِ وَ نَمْرُقْ وَسَخْكِ مِثِلْ غَسَّلَوْكِ بِصَابُونْ.

²⁶ نِجِيبْ لَيْكِ قُضْيَاءْ مِثِلْ أَوَّلْ وَ مُسْتَشَارِينْ مِثِلْ فِي الْبِدَايَةْ. وَ بَعَدْ دَا، يِنَادُوكِ مَدِينَةْ الْعَدَالَةْ وَ حِلَّةْ الْأَمَانْ.

²⁷ صَهْيُون تَنْجَى بِالْعَدَالَةْ وَ سُكَّانْهَا الْيِقَبُّلُوا يَنْجَوْا بِالْحَقّ.

²⁸ الْعَاصِيِينْ وَ الْمُذْنِبِينْ يِدَّمَّرَوْا سَوَا وَ الْأَبَوْا اللّٰهْ، يِكَمُّلُوا.

²⁹ أَيْوَى، إِنْتُو تَلْقَوْا عَيْب مِنْ شَدَرْكُو الْكُبَارْ الْقَاعِدِينْ تِتْمَنَّوْه. وَ تَبْقَوْا خَجْلَانِينْ فِي شَانْ الْجِنَيْنَاتْ الْعَزَلْتُوهُمْ لِعِبَادَةْ أَصْنَامْكُو.

³⁰ خَلَاصْ، إِنْتُو تَبْقَوْا مِثِلْ شَدَرَةْ الْوَرَقْهَا يِبِسْ وَ جِنَيْنَةْ الْأَلْمِيهَا كَمَّلْ.

³¹ الرَّاجِلْ الشَّدِيدْ يَبْقَى مِثِلْ قَشّ وَ عَمَلَهْ يَبْقَى مِثِلْ شَرَارَةْ. هُو وَ عَمَلَهْ يَحْرَقَوْا سَوَا وَ مَا فِي نَادُمْ الْيَكْتُلْ النَّارْ مِنْهُمْ.»