هُوشَع 8 - الكتاب المقدس بالعربي الدارجي هنا تشاد

غضب اللّه ينْزِل في شعبه

¹ «أَضُرْبُوا الْبُوقْ وَ جَهُّزُوا نُفُوسْكُو! الْعَدُو يَنْزِلْ مِثِلْ الصَّقُرْ فِي شَعَبِي أَنَا اللّٰهْ. أَشَانْ هُمَّنْ نَقَضَوْا مُعَاهَدَتِي وَ عِصَوْا شُرُوطِي هَنَا التَّوْرَاةْ.

² هُمَّنْ يَصْرَخَوْا لَيِّ وَ يُقُولُوا: ‹إِلٰـهْنَا، أَنِحْنَ نَعَرْفُوكْ أَشَانْ أَنِحْنَ شَعَبَكْ بَنِي إِسْرَائِيلْ!›

³ وَ لَاكِنْ بَنِي إِسْرَائِيلْ أَبَوْا الْخَيْر وَ هَسَّعْ عَدُوهُمْ يِطَارِدْهُمْ.

⁴ هُمَّنْ دَرَّجَوْا مُلُوكْ بَلَا إِذْنِي وَ كُبَارَاتْ بَلَا مُوَافَقَتِي. بِفُضِّتْهُمْ وَ دَهَبْهُمْ، هُمَّنْ صَنَعَوْا لَيْهُمْ أَصْنَامْ وَ دَا يِسَبِّبْ دَمَارْهُمْ.

⁵ يَا نَاسْ مَدِينَةْ السَّامِرَةْ، خَلُّوا صَنَمْكُو الْهُو عِجِلْ هَنَا دَهَبْ! أَنَا غِضِبْت زِيَادَةْ ضِدُّكُو. إِنْتُو مَا بَرِيِّينْ! وَ تَقْعُدُوا مِثِلْ كَيْ لَحَدِّي مَتَى؟

⁶ عِجِلْكُو دَا مِنْكُو إِنْتُو بَنِي إِسْرَائِيلْ بَسْ وَ إِنْسَانْ بَسْ صَنَعَهْ. هُو مَا إِلٰـهْ! وَ فِي شَانْ دَا، عِجِلْ السَّامِرَةْ يِلْكَسَّرْ.

⁷ إِنْتُو زَرَعْتُوا الرِّيحْ وَ خَلَاصْ، تَقْطَعَوْا أَمْ زَوْبَعَانَةْ. الْقَمَحْ بَلَا قَنْدُولْ مَا يَنْطِي دَقِيقْ وَ كَنْ أَنْطَى دَقِيقْ كُلَ، الْأَجَانِبْ بَسْ يَاكُلُوهْ.

⁸ «بَنِي إِسْرَائِيلْ أَكَلَوْهُمْ. وَ هَسَّعْ قَاعِدِينْ فِي أُسْط الْأُمَمْ مِثِلْ مَاعُونْ الْمَا يَنْفَعْ.

⁹ وَ وَكِتْ مَشَوْا عَلَيْ أَشُورْ، بِقَوْا مِثِلْ حُمَارْ الْكَدَادَةْ الْعَايِشْ وِحَيْدَهْ. أَيْوَى، قَبِيلَةْ أَفْرَايِمْ قَاعِدَةْ وِحَيْدهَا حَتَّى كَانْ كَفَّتْ أُجْرَةْ لِصُدْقَانْهَا كُلَ.

¹⁰ كَنْ أَجَّرَتْ الْأُمَمْ لِيِدَافُعُوا لَيْهَا كُلَ، أَنَا نِلِمُّهُمْ كُلُّهُمْ. وَ بَعَدْ وَكِتْ شِيَّةْ، هُمَّنْ يَتْعَبَوْا تِحِتْ ظُلُمْ هَنَا أَكْبَرْ مَلِكْ.

¹¹ نَاسْ أَفْرَايِمْ كَتَّرَوْا الْمَدَابِحْ لِضَحَايَا هَنَا كَفَّارَةْ الذَّنِبْ. وَ لَاكِنْ الْمَدَابِحْ دَوْل سَبَّبَوْا لَيْهُمْ الذَّنِبْ.

¹² وَ كَنْ نَكْتِبْ لَيْهُمْ شُرُوطِي هَنَا التَّوْرَاةْ أَلِفْ مَرَّةْ كُلَ، هُمَّنْ يِشِيفُوهُمْ مِثِلْ شَيّءْ أَجْنَبِي.

¹³ هُمَّنْ يِقَدُّمُوهُمْ لَيِّ ضَحَايَا وَ يَاكُلُوا اللَّحَمْ وَ لَاكِنْ أَنَا اللّٰهْ مَا نَقْبَلْ ضَحَايَاهُمْ. نِذَّكَّرْ خَطَاهُمْ وَ نِعَاقِبْهُمْ بِسَبَبْ ذُنُوبْهُمْ. خَلِّي يِقَبُّلُوا مَصِرْ!

¹⁴ بَنِي إِسْرَائِيلْ نِسَوْا خَالِقْهُمْ وَ بَنَوْا لَيْهُمْ قُصُورْ. وَ بَنِي يَهُوذَا كَتَّرَوْا الْمُدُنْ الْقَوِيِّينْ. لَاكِنْ أَنَا نِرَسِّلْ نَارْ فِي مُدُنْهُمْ وَ هِي تَاكُلْ قُصُورْهُمْ.»