هُوشَع 6 - الكتاب المقدس بالعربي الدارجي هنا تشاد

الشعب قالوا يقبُّلوا للّه

¹ «تَعَالُوا نِقَبُّلُوا لِلّٰهْ أَشَانْ هُو بَسْ الْجَرَحْنَا وَ هُو بَسْ الْيَشْفِينَا. هُو بَسْ الضَّرَبَانَا وَ هُو بَسْ الْيِدَاوِي عُوَارْنَا.

² بَعَدْ يَوْمَيْن، هُو يَنْطِينَا الْحَيَاةْ. أَيْوَى، فِي الْيَوْم التَّالِتْ، يِقَوِّمْنَا وَ نِعِيشُوا قِدَّامَهْ.

³ خَلِّي نِتَابُعُوا اللّٰهْ لِنَعَرْفُوهْ. جَيْتَهْ مُؤَكَّدَةْ مِثِلْ نُورْ الصَّبَاحْ وَ هُو يَجِينَا مِثِلْ مَطَرْ، مِثِلْ مَطَرْ الرِّشَاشْ الْيَزْقِي الْأَرْض.»

اللّه يريد المحبّة من الضحايا

⁴ «يَا نَاسْ قَبِيلَةْ أَفْرَايِمْ، نِسَوِّي لَيْكُو شُنُو؟ يَا بَنِي يَهُوذَا، نِسَوِّي لَيْكُو شُنُو؟ مَحَبِّتْكُو مِثِلْ سَحَابْ الْفَجُرْ الْيُفُوتْ وَ مِثِلْ كَرَنْج الصَّبَاحْ الْمَا يِطَوِّلْ.

⁵ أَشَانْ دَا، أَنَا ضَرَبْتُكُو بِالْأَنْبِيَاء وَ كَتَلْتُكُو بِكَلَامِي وَ نُورْ شَرِيعْتِي نَوَّرْكُو مِثِلْ نُورْ الصَّبَاحْ.

⁶ وَ مَحَبِّتْكُو نِدَوْرهَا زِيَادَةْ مِنْ الضَّحَايَا. وَ كَنْ تَعَرْفُونِي، دَا أَخَيْر لَيِّ مِنْ الضَّحَايَا الْمُحَرَّقِينْ.

⁷ «نَقَضَوْا الْمُعَاهَدَةْ فِي حِلَّةْ آدَمْ أَشَانْ فِي الْبَكَانْ دَا، خَانَوْنِي.

⁸ وَ قِلْعَادْ حِلَّةْ الْفَسْلِينْ مُلَطَّخَةْ بِالدَّمّ.

⁹ وَ مَجْمُوعَةْ رُجَالْ الدِّينْ بِقَوْا مِثِلْ رَبَّاطِينْ الدُّرُوبْ. يَكْتُلُوا نَاسْ فِي دَرِبْ حِلَّةْ شَكِيمْ. أَيْوَى، قَاعِدِينْ يِسَوُّوا فِعِلْ شَيْن.

¹⁰ «فِي أُسُطْ بَنِي إِسْرَائِيلْ، أَنَا شِفْت فَضِيحَةْ. فِي لُبُّهُمْ، نَاسْ أَفْرَايِمْ أَشَّرْمَطَوْا أَيْوَى، بَنِي إِسْرَائِيلْ أَنَّجَّسَوْا.

¹¹ وَ إِنْتُو كُلَ، يَا بَنِي يَهُوذَا، تَلْقَوْا عِقَابِي مِثِلْ إِنْتَاجْ زِرَاعِتْكُو!» «وَكِتْ نِقَبِّلْ شَعَبِي مِنْ الْغُرْبَةْ