هُوشَع 5 - الكتاب المقدس بالعربي الدارجي هنا تشاد

اللّه أبى الشعب الخانوه

¹ «يَا رُجَالْ الدِّينْ، أَسْمَعَوْا الْكَلَامْ دَا! يَا بَنِي إِسْرَائِيلْ، خُطُّوا بَالْكُو! يَا نَاسْ بَيْت الْمَلِكْ، خُطُّوا أَدَانْكُو! الشَّرِيعَةْ دِي مُوَجِّهَةْ لَيْكُو إِنْتُو أَشَانْ فِي مِصْفَةْ، كَجَّيْتُوا شَرَكْ لِشَعَبِي وَ فِي جَبَلْ تَابُورْ، خَطَّيْتُوا لَيْهُمْ أَمْ كَجَّامَةْ.

² أَيْوَى، إِنْتُو نَكَتُّوا نُقْرَةْ كَبِيرَةْ لِنَاسْ شِطِّيمْ وَ لَاكِنْ أَنَا نِأَدِّبْكُو كُلُّكُو.

³ أَنَا نَعَرِفْ تَمَامْ قَبِيلَةْ أَفْرَايِمْ، أَيْوَى، بَنِي إِسْرَائِيلْ مَا مُلَبَّدِينْ لَيِّ. يَا نَاسْ أَفْرَايِمْ، إِنْتُو أَشَّرْمَطْتُوا، أَيْوَى، بَنِي إِسْرَائِيلْ أَنَّجَّسَوْا.»

⁴ وَ عَمَلْهُمْ الْهَوَانْ مَا يِخَلِّيهُمْ يِقَبُّلُوا لِإِلٰـهُّمْ أَشَانْ رُوحْ الشَّرْمَطَةْ قَاعِدَةْ فِي قُلُوبْهُمْ وَ هُمَّنْ مَا يَعَرْفُوا اللّٰهْ.

⁵ إِسْتِكْبَارْ بَنِي إِسْرَائِيلْ يَشْهَدْ فَوْقهُمْ. بَنِي إِسْرَائِيلْ وَ نَاسْ أَفْرَايِمْ يِتَّرْتَعَوْا فِي شَانْ خَطَاهُمْ وَ بَنِي يَهُوذَا كُلَ يِتَّرْتَعَوْا مَعَاهُمْ.

⁶ يَمْشُوا يِقَدُّمُوا بَقَرْهُمْ وَ غَنَمْهُمْ ضَحَايَا لِيِفَتُّشُوا اللّٰهْ وَ لَاكِنْ مَا يَلْقَوْه أَشَانْ هُو خَلَّاهُمْ خَلَاصْ.

⁷ هُمَّنْ خَانَوْا اللّٰهْ أَشَانْ وِلْدَوْا عِيَالْ زِنَى. وَ فِي وَكِتْ قِصَيِّرْ بَسْ، يِدَّمَّرَوْا، هُمَّنْ وَ أَرْضُهُمْ.

اللّه يعاقِب إسرائيل و يَهُوذَا

⁸ اللّٰهْ قَالْ: «أَضُرْبُوا الْبُوقْ فِي قِبَيْعَةْ وَ أَضُرْبُوا الْبُرُنْجِي فِي الرَّامَةْ. عِيطُوا لِبَيْت إِيلْ الْفَسْلَةْ وَ شِيفُوا وَرَاكُو، يَا نَاسْ بَنْيَامِينْ!

⁹ فِي يَوْم الْعِقَابْ، نَاسْ أَفْرَايِمْ يَخْرَبَوْا. وَ الْخَبَرْ النِّبَلِّغَهْ لَيْكُو، يَا قَبَايِلْ إِسْرَائِيلْ، هُو خَبَرْ أَكِيدْ.

¹⁰ كُبَارَاتْ يَهُوذَا مِثِلْ نَاسْ الْيِحَوُّلُوا الْكَلَنْكِي. أَنَا نِنَزِّلْ غَضَبِي فَوْقهُمْ مِثِلْ أَلْمِي السَّيْل.

¹¹ ظَلَمَوْا نَاسْ أَفْرَايِمْ وَ عَوَّجَوْا شَرِيعِتْهُمْ أَشَانْ هُمَّنْ يِرِيدُوا يَجْرُوا وَرَاءْ الرِّيحْ.

¹² وَ أَنَا نَبْقَى مِثِلْ أَرْضَةْ لِنَاسْ أَفْرَايِمْ وَ مِثِلْ سُوسَةْ لِبَنِي يَهُوذَا.

¹³ نَاسْ أَفْرَايِمْ شَافَوْا مَرَضْهُمْ وَ بَنِي يَهُوذَا شَافَوْا عُوَارْهُمْ. وَ دَوَّرَوْا مُسَاعَدَةْ مِنْ بَلَدْ أَشُورْ وَ رَسَّلَوْا نَاسْ لِلْمَلِكْ الْكَبِيرْ. لَاكِنْ الْمَلِكْ دَا مَا يَقْدَرْ يَشْفِيهُمْ وَ مَا يَقْدَرْ يِدَاوِي عُوَارْهُمْ.

¹⁴ أَشَانْ أَنَا نَبْقَى مِثِلْ دُودْ ضِدّ نَاسْ أَفْرَايِمْ وَ مِثِلْ فَرْخ الدُّودْ ضِدّ بَنِي يَهُوذَا. أَنَا بَسْ نَضْرُبْهُمْ وَ نِشَرِّطْهُمْ وَ نُكُرُّهُمْ وَ نِوَدِّيهُمْ وَ مَا فِي نَادُمْ الْيِنَجِّيهُمْ مِنِّي.

¹⁵ أَنَا نَمْرُقْ وَ نِقَبِّلْ فِي بَكَانِي لَحَدِّي يِعْتَرُفُوا بِخَطَاهُمْ وَ يِوَجُّهُوا عَلَيِّ. وَ فِي ضِيقِتْهُمْ دِي، يِفَتُّشُونِي.»