هُوشَع 13 - الكتاب المقدس بالعربي الدارجي هنا تشاد

شعب اللّه عِصوا إلٰـهُّم

¹ وَكِتْ نَاسْ أَفْرَايِمْ حَجَّوْا، الْخَوْف بِقِي شَدِيدْ فِي بَلَدْ إِسْرَائِيلْ. وَ لَاكِنْ هُمَّنْ بِقَوْا خَاطِيِّينْ أَشَانْ عَبَدَوْا إِلٰـهْ بَعَلْ وَ مَاتَوْا بِسَبَبَهْ.

² وَ يَا هَسَّعْ كُلَ، قَاعِدِينْ يِزِيدُوا فِي ذُنُوبْهُمْ أَشَانْ صَنَعَوْا لَيْهُمْ صَنَمْ بِفُضِّتْهُمْ. أَيْوَى حَسَبْ عِلِمْهُمْ، سَوَّوْا لَيْهُمْ أَصْنَامْ الدَّقَّاهُمْ صِنَاعِي مَعْرُوفْ. وَ النَّاسْ يُقُولُوا: «قَدُّمُوا لَيْهُمْ ضَحَايَا!» شِيفُوا! النَّاسْ دَوْل يِحِبُّوا أَصْنَامْ الْعَجَّالْ!

³ وَ بِسَبَبْ دَا، هُمَّنْ يَبْقَوْا مِثِلْ سَحَابْ الْفَجُرْ الْيُفُوتْ وَ مِثِلْ كَرَنْج الصَّبَاحْ الْمَا يِطَوِّلْ. يَبْقَوْا مِثِلْ أُتَّابْ الْمَدَقّ التِّشِيلَهْ الرِّيحْ وَ مِثِلْ الدُّخَّانْ الْيَمْرُقْ مِنْ الشُّبَّاكْ.

⁴ «أَنَا اللّٰهْ إِلٰـهْكُو مِنْ مَرَقْتُكُو مِنْ بَلَدْ مَصِرْ. مَا وَاجِبْ تَعَرْفُوا إِلٰـهْ آخَرْ بَلَايِ أَنَا وَ مَا فِي مُنَجِّي إِلَّا أَنَا.

⁵ أَنَا عِرِفْتُكُو فِي الصَّحَرَاءْ، فِي بَلَدْ الْيَبَاسْ.

⁶ أَنَا سَرَّحْتُكُو فِي مَرْعَى عَدِيلْ وَ إِنْتُو رِوِيتُوا وَ شِبِعْتُوا. وَ مِنْ شِبِعْتُوا، الْإِسْتِكْبَارْ دَخَلْ فِي قُلُوبْكُو وَ بَيْدَا، إِنْتُو نِسِيتُونِي.

⁷ وَ خَلَاصْ، أَنَا نَبْقَى لَيْكُو مِثِلْ دُودْ وَ مِثِلْ نِمِرْ كَارِسْ فِي الدَّرِبْ.

⁸ نَهْجِمْكُو مِثِلْ مَرْفَعِينْ الْوَدَّرْ عِيَالَهْ وَ نُشُقّ صُدُورْكُو. فِي الْبَكَانْ دَا، نَاكُلْكُو مِثِلْ مَرْة الدُّودْ وَ حَيْوَانَاتْ الْكَدَادَةْ الْخَطِيرِينْ يِشَرُّطُوكُو.

⁹ «يَا بَنِي إِسْرَائِيلْ، أَدَّمَّرْتُوا أَشَانْ قَمَّيْتُوا ضِدِّي أَنَا النَّفْزَعْكُو.

¹⁰ وَ هَسَّعْ دَا، وَيْن مَلِكُّو؟ خَلِّي يَفْزَعْكُو فِي كُلَّ حِلَّالْكُو! وَ وَيْن حُكَّامْكُو الْبِسَبَبْهُمْ قُلْتُوا: ‹أَنْطِينَا مَلِكْ وَ مَسَائِيلْ.›

¹¹ فِي زَعَلِي، أَنَا دَرَّجْت لَيْكُو مَلِكْ وَ فِي غَضَبِي، أَنَا نَزَّلْتَهْ.

¹² «خَطَا نَاسْ أَفْرَايِمْ مُسَجَّلْ وَ ذُنُوبْهُمْ مَكْتُوبِينْ.

¹³ وَ وَجَعْ يَجِي لَيْهُمْ مِثِلْ وَجَعْ الطَّلَقَةْ. وَ هُمَّنْ مِثِلْ وِلَيْد الْمَا عِنْدَهْ حِكْمَةْ. فِي وَكِتْ الْوَالُودَةْ، مَا يَمْرُقْ مِنْ بَطُنْ أَمَّهْ!

¹⁴ هَلْ نِنَجِّيهُمْ مِنْ الْقَبُرْ؟ هَلْ نَفْدَاهُمْ مِنْ الْمَوْت؟ يَا الْمَوْت، وَيْن وَبَاكْ؟ يَا الْقَبُرْ، وَيْن خَرَابَكْ؟ بَتَّانْ مَا نِشِيفْهُمْ بِعَيْن الرَّحْمَةْ.

¹⁵ وَ كَنْ نَاسْ أَفْرَايِمْ زَادَوْا فِي أُسْط أَخْوَانْهُمْ، رِيحْ الصَّبَاحْ تَجِي وَ رِيحْ مِنْ اللّٰهْ تُقُمّ مِنْ الصَّحَرَاءْ. هِي تِيَبِّسْ وُدْيَانْهُمْ وَ تِجَفِّفْ عَيْن أَلْمِيهُمْ. الْمَخَازِنْ، يَنْهَبَوْهُمْ وَ خُمَامْهُمْ الْغَالِي، يِشِيلُوهْ.

¹⁶ نَاسْ مَدِينَةْ السَّامِرَةْ خَاطِيِّينْ أَشَانْ عِصَوْا إِلٰـهُّمْ. يَكْتُلُوهُمْ فِي الْحَرِبْ وَ يَرْحَكَوْا عِيَالْهُمْ وَ يُشُقُّوا بُطُونْ عَوِينْهُمْ الْغَلْبَانَاتْ.»