هُوشَع 12 - الكتاب المقدس بالعربي الدارجي هنا تشاد

¹ قَبِيلَةْ أَفْرَايِمْ تَرْوَى بِرِيحْ وَ تَجْرِي وَرَاءْ رِيحْ الصَّبَاحْ. كُلَّ يَوْم هِي تِكَتِّرْ الْكِدِبْ وَ الدَّمَارْ. تِسَوِّي عَلَاقَةْ مَعَ أَشُورْ وَ تَنْطِيهْ دِهِنْ لِمَصِرْ فِي بَدَلْ السَّلَامْ.

يَعْقُوب الجِدّ الغشّاش

² اللّٰهْ يِجِيبْ بَنِي يَهُوذَا فِي الشَّرِيعَةْ أَشَانْ يِعَاقِبْ ذُرِّيَّةْ يَعْقُوبْ حَسَبْ دَرِبْهُمْ وَ يِكَافِيهُمْ حَسَبْ عَمَلْهُمْ.

³ حَتَّى فِي بَطُنْ أَمَّهْ كُلَ، يَعْقُوبْ غَشَّ شِقْ تَوْمَهْ. وَ وَكِتْ بِقِي رَاجِلْ، هُو صَارَعْ مَعَ الرَّبّ.

⁴ أَيْوَى، يَعْقُوبْ صَارَعْ مَعَ مَلَكْ الرَّبّ وَ قِدِرْ فَوْقَهْ. وَ بَعَدْ دَا، هُو بَكَى وَ شَحَدْ الْمَلَكْ لِيِحِنّ فَوْقَهْ. أَيْوَى، فِي بَيْت إِيلْ هُو لِقِي اللّٰهْ وَ فِي الْبَكَانْ دَا بَسْ، اللّٰهْ حَجَّى لَيَّهْ.

⁵ وَ دَا اللّٰهْ الْإِلٰـهْ الْقَادِرْ، اللّٰهْ هُو أُسْمَهْ الْبَيَّهْ نَذْكُرُوهْ!

⁶ وَ إِنْتُو ذُرِّيَّةْ يَعْقُوبْ، وَاجِبْ تِقَبُّلُوا لِإِلٰـهْكُو وَ تَحْفَضَوْا الرَّحْمَةْ وَ الْعَدَالَةْ وَ دَايْماً تُخُطُّوا عَشَمْكُو فِي إِلٰـهْكُو.

⁷ وَ قَبِيلَةْ أَفْرَايِمْ مِثِلْ التَّاجِرْ الْعِنْدَهْ فِي إِيدَهْ مِيزَانْ مَغْشُوشْ وَ يِحِبّ يَظْلُمْ الْآخَرِينْ.

⁸ وَ نَاسْ أَفْرَايِمْ قَالَوْا: «بِصَحِيحْ، أَنِحْنَ بِقِينَا غَنِيِّينْ وَ لِقِينَا مَالْ كَتِيرْ بِخِدْمَةْ دُرَاعْنَا بَسْ. وَ مَا يَلْقَوْا فَوْقنَا أَيِّ خَطَا الْيَبْقَى ذَنِبْ.»

⁹ «وَ أَنَا اللّٰهْ إِلٰـهْكُو مِنْ مَرَقْتُكُو مِنْ بَلَدْ مَصِرْ. نِسَكِّنْكُو بَتَّانْ فِي خِيَمْ مِثِلْ فِي أَيَّامْ خَيْمَةْ الْإِجْتِمَاعْ.

¹⁰ وَ فِي الْوَكِتْ دَاكْ، أَنَا كَلَّمْت لِلْأَنْبِيَاء وَ كَتَّرْت لَيْهُمْ الرُّؤْيَةْ. وَ هَسَّعْ بِوَاسِطَةْ الْأَنْبِيَاء، نِكَلِّمْ لَيْهُمْ بِمَثَلْ.»

¹¹ أَكِيدْ، شَعَبْ قِلْعَادْ فَسْلِينْ وَ مَا عِنْدُهُمْ فَايْدَةْ أَشَانْ يِقَدُّمُوا تِيرَانْ ضَحَايَا فِي قِلْقَالْ. وَ بَيْدَا، مَدَابِحْهُمْ يِلْهَدَّمَوْا وَ يَبْقَوْا كَوْم هَنَا تُرَابْ فِي الزَّرَعْ الْمَحْرُوتْ.

¹² زَمَانْ، جِدِّنَا يَعْقُوبْ عَرَّدْ لِبَلَدْ أَرَامْ. أَيْوَى، جِدِّنَا إِسْرَائِيلْ بِقِي خَدَّامْ لِيَلْقَى مَرَةْ. لِيَلْقَى مَرَةْ، بِقِي رَاعِي هَنَا غَنَمْ.

¹³ وَ بَعَدَيْن بِوَاسِطَةْ نَبِي، اللّٰهْ مَرَقْ بَنِي إِسْرَائِيلْ مِنْ مَصِرْ. وَ بِوَاسِطَةْ نَبِي، هُو حَفَضَاهُمْ.

¹⁴ وَ لَاكِنْ نَاسْ أَفْرَايِمْ غَضَّبَوْا اللّٰهْ غَضَبْ شَدِيدْ. وَ خَلَاصْ، إِلٰـهُّمْ يَرْمِي فِي رَاسْهُمْ الدَّمّ الْهُمَّنْ دَفَّقَوْه وَ يِقَبِّلْ فَوْقهُمْ كُلَّ عَيْبهُمْ.