عِبْرَانِيِّين 8 - الكتاب المقدس بالعربي الدارجي هنا تشاد

عِيسَى راجِل دين هنانا

¹ وَ دِي هِي زِبْدَةْ الْكَلَامْ. أَنِحْنَ عِنْدِنَا رَاجِلْ دِينْ كَبِيرْ مِثِلْ الْفَسَّرْنَا بَيَّهْ لَيْكُو. هُو قَعَدْ جَنْب عَرْش اللّٰهْ الْعَظِيمْ فِي نُصَّهْ الزَّيْنَايْ فَوْق فِي السَّمَاوَاتْ.

² وَ هِنَاكْ، هُو خَدَّامْ فِي الْبَكَانْ الْمُقَدَّسْ الصَّحِيحْ وَ دِي بَسْ الْخَيْمَةْ الْمَا بَنَاهَا إِنْسَانْ. رَبِّنَا بَسْ بَنَاهَا.

³ وَ كُلِّ نَادُمْ الْيِدَرُّجُوهْ رَاجِلْ دِينْ كَبِيرْ، وَاجِبْ يِقَدِّمْ لِلّٰهْ ضَحَايَا شِقْ شِقْ. أَشَانْ دَا، وَاجِبْ لِرَاجِلْ الدِّينْ هَنَانَا كُلَ يِقَدِّمْ ضَحِيَّةْ.

⁴ وَ كَنْ عِيسَى قَاعِدْ فِي الْأَرْض، هُو أَبَداً مَا يَبْقَى رَاجِلْ دِينْ أَشَانْ فِي الْأَرْض، رُجَالْ دِينْ آخَرِينْ قَاعِدِينْ الْيِقَدُّمُوا الضَّحَايَا حَسَبْ شُرُوطْ التَّوْرَاةْ.

⁵ وَ الْبَكَانْ الْهُمَّنْ يَخْدُمُوا فَوْقَهْ دَا، عَلَامَةْ بَسْ وَ هِي تِمَثِّلْ الْبَكَانْ الْمُقَدَّسْ السَّمَاوِي. وَ دَا مَعْرُوفْ أَشَانْ وَكِتْ مُوسَى يِدَوْر يَبْنِي خَيْمَةْ الْعِبَادَةْ، اللّٰهْ كَلَّمْ لَيَّهْ وَ قَالْ: <خُطّ بَالَكْ أَشَانْ تَصْنَعْ كُلَّ شَيّءْ حَسَبْ النِّظَامْ الْأَنَا وَصَّفْتَهْ لَيْك فِي الْجَبَلْ.>

⁶ لَاكِنْ هَسَّعْ عِيسَى عِنْدَهْ خِدْمَةْ أَخَيْر زِيَادَةْ مِنْ خِدْمَةْ رُجَالْ الدِّينْ الْأَوَّلَانِيِّينْ أَشَانْ هُو بِقِي وَسِيطْ هَنَا الْمُعَاهَدَةْ الْأَخَيْر زِيَادَةْ. وَ الْمُعَاهَدَةْ دِي، اللّٰهْ ثَبَّتْهَا فِي وُعُودْ أَخَيْر زِيَادَةْ مِنْ الْوُعُودْ الْأَوَّلَانِيِّينْ.

المُعاهدة الجديدة

⁷ وَ كَنْ أَوَّلْ الْمُعَاهَدَةْ الْأَوَّلْ مَا عِنْدَهَا عَيْب، مَا وَاجِبْ يِبَدُّلُوهَا بِمُعَاهَدَةْ آخَرَةْ.

⁸ وَ لَاكِنْ اللّٰهْ حَجَّى بِعَيْب النَّاسْ وَكِتْ هُو هَرَجْ لِلشَّعَبْ وَ قَالْ: <يَجِي يَوْم وَاحِدْ، نِسَوِّي مُعَاهَدَةْ جَدِيدَةْ مَعَ بَنِي إِسْرَائِيلْ وَ مَعَ بَنِي يَهُوذَا. وَ دَا كَلَامْ اللّٰهْ.

⁹ وَ الْمُعَاهَدَةْ دِي مَا تَبْقَى مِثِلْ الْمُعَاهَدَةْ الْأَنَا سَوَّيْتهَا مَعَ جُدُودْهُمْ وَكِتْ قُدْتُهُمْ وَ مَرَقْتُهُمْ مِنْ بَلَدْ مَصِرْ. الْمُعَاهَدَةْ الْجَدِيدَةْ دِي مَا تَبْقَى مِثِلْ الْأَوَّلْ. هُمَّنْ قَطَعَوْا الْمُعَاهَدَةْ دِي وَ أَشَانْ دَا، أَنَا كُلَ خَلَّيْتهُمْ. وَ دَا كَلَامْ اللّٰهْ.

¹⁰ وَ هَسَّعْ، دِي هِي الْمُعَاهَدَةْ النِّسَوِّيهَا مَعَ بَنِي إِسْرَائِيلْ بَعَدْ الْيَوْم دَا. أَنَا نُخُطّ وَصِيَّاتِي فِي فِكِرْهُمْ وَ نَكْتِبْهُمْ فِي قُلُوبْهُمْ. وَ أَنَا نَبْقَى إِلٰـهُّمْ وَ هُمَّنْ يَبْقَوْا شَعَبِي. وَ دَا كَلَامْ اللّٰهْ.

¹¹ وَ نَادُمْ مَا يِعَلِّمْ رَفِيقَهْ وَ لَا يُقُولْ لِأَخُوهْ: «أَعَرِفْ اللّٰهْ.» أَشَانْ كُلُّهُمْ يَعَرْفُونِي، مِنْ الصَّغَيَّرْ لَحَدِّي الْكَبِيرْ.

¹² وَ أَنَا نَغْفِرْ لَيْهُمْ خَطَايَاهُمْ وَ مَا نِفَكِّرْ فِي ذُنُوبْهُمْ بَتَّانْ.>

¹³ وَ فِي الْكَلَامْ دَا، هُو حَجَّى بِمُعَاهَدَةْ جَدِيدَةْ. وَ بَيْدَا، هُو جَعَلْ الْمُعَاهَدَةْ الْأَوَّلْ قَدِيمَةْ. وَ أَيِّ شَيّءْ الْيَبْقَى قَدِيمْ، وَكْتَهْ كَمَّلْ وَ قَرِيبْ يَبْقَى مَا فِيهْ.