عِبْرَانِيِّين 2 - الكتاب المقدس بالعربي الدارجي هنا تشاد

النجاة مُهِمّة

¹ أَشَانْ دَا، وَاجِبْ نُخُطُّوا بَالْنَا وَ نِتَابُعُوا عَدِيلْ الْكَلَامْ السِّمِعْنَاهْ أَشَانْ مَا نَنْسَوْه وَ مَا نَمُرْقُوا مِنْ الدَّرِبْ الْعَدِيلْ.

² نَعَرْفُوا كَدَرْ الْكَلَامْ الْمَلَائِكَةْ اللّٰهْ بَلَّغَوْه حَقّ وَ أَيِّ نَادُمْ الْخَالَفَهْ أَوْ أَبَاهْ يِجِيبْ فِي نَفْسَهْ الْعِقَابْ الْوَاجِبْ لَيَّهْ.

³ وَ كِكَّيْف أَنِحْنَ نَنْجَوْا كَنْ مَا نِتَابُعُوا عَدِيلْ كَلَامْ هَنَا النَّجَاةْ الْمُهِمَّةْ دِي؟ الْأَوَّلْ بَلَّغَاهَا، هُو رَبِّنَا. وَ الشُّهُودْ السِّمْعَوْا كَلَامَهْ أَكَّدَوْهَا لَيْنَا.

⁴ وَ اللّٰهْ كُلَ شَهَدْ لَيْهَا بِعَلَامَاتْ وَ عَجَايِبْ وَ مُعْجِزَاتْ شِقْ شِقْ وَ بِالْقُدْرَةْ الْهُو أَنْطَاهَا لِلنَّاسْ بِالرُّوحْ الْقُدُّوسْ حَسَبْ الْهُو يِدَوْرَهْ.

عِيسَى فتح درِب النجاة

⁵ الْآخِرَةْ، اللّٰهْ مَا خَطَّاهَا تِحِتْ سُلْطَةْ الْمَلَائِكَةْ.

⁶ لَاكِنْ فِي بَكَانْ وَاحِدْ الْكِتَابْ بُقُولْ: <شُنُو الْإِنْسَانْ وَ مَالَا تِفَكِّرْ فَوْقَهْ؟ وَ بَنِي آدَم، هُو شُنُو وَ مَالَا تِهِمّ بَيَّهْ؟

⁷ لَاكِنْ إِنْتَ سَوَّيْتَهْ تِحِتْ مِنْ الْمَلَائِكَةْ وَ أَنْطَيْتَهْ عَظَمَةْ وَ شَرَفْ.

⁸ وَ خَطَّيْت كُلَّ شَيّءْ تِحِتْ رِجِلَيْنَهْ.> وَ كَنْ هُو خَطَّ كُلَّ شَيّءْ تِحِتْ سُلْطِتَهْ، بَتَّانْ مَا فَضَّلْ شَيّءْ الْمَا تِحِتْ سُلْطِتَهْ. وَ حَالِيّاً مَا نِشِيفُوا كُلَّ شَيّءْ تِحِتْ سُلْطِتَهْ.

⁹ لَاكِنْ النِّشِيفُوهْ، هُو عِيسَى. وَ عِيسَى دَا، اللّٰهْ نَزَّلَهْ تِحِتْ مِنْ الْمَلَائِكَةْ لِمُدَّةْ قِصَيْرَةْ وَ بَعَدْ دَا، اللّٰهْ أَنْطَاهْ عَظَمَةْ وَ شَرَفْ بِسَبَبْ تَعَبَهْ وَ مَوْتَهْ. أَشَانْ بِرَحْمَةْ اللّٰهْ، عِيسَى دَاقْ الْمَوْت فِي شَانْ كُلَّ النَّاسْ.

¹⁰ اللّٰهْ الْخَلَقْ كُلَّ شَيّءْ وَ فِي شَانَهْ كُلَّ شَيّءْ مَوْجُودْ، هُو دَوَّرْ نَاسْ كَتِيرِينْ يَبْقَوْا عِيَالَهْ وَ يَدْخُلُوا فِي مَجْدَهْ. وَ أَشَانْ دَا، اللّٰهْ سَوَّى شَيّءْ مُوَافِقْ لَيْهُمْ. هُو رَسَّلْ النَّادُمْ الْيَفْتَحْ لَيْهُمْ دَرِبْ النَّجَاةْ. وَ جَعَلْ لِلْمَسِيحْ التَّعَبْ وَ بِتَعَبَهْ دَا، هُو بِقِي الْمُنَجِّي الْكَامِلْ.

¹¹ أَشَانْ هُو الْيِخَصِّصْ النَّاسْ لِلّٰهْ وَ النَّاسْ الْبِقَوْا خَاصِّيْن لِلّٰهْ، هُمَّنْ كُلُّهُمْ عِنْدُهُمْ أَبُو وَاحِدْ. أَشَانْ دَا، بَلَا عَيْب عِيسَى أَكَّدْ كَدَرْ هُمَّنْ أَخْوَانَهْ.

¹² هُو بُقُولْ: <أَنَا نِبَلِّغْ بِأُسْمَكْ لِأَخْوَانِي وَ نَحْمُدَكْ فِي أُسْط الْجَمَاعَةْ.>

¹³ وَ هُو بُقُولْ لِلّٰهْ: <أَنَا نِتْوَكَّلْ عَلَيْك.> وَ بُقُولْ: <دَاهُونِي أَنَا مَعَ النَّاسْ الْاللّٰهْ جَعَلَاهُمْ عِيَالِي.>

¹⁴ الْعِيَالْ دَوْل كُلُّهُمْ إِنْسَانْ وَ أَشَانْ دَا، عِيسَى كُلَ بِقِي إِنْسَانْ مِثِلْهُمْ. وَ بِقِي مِثِلْهُمْ أَشَانْ بِمَوْتَهْ، هُو دَمَّرْ قُدْرَةْ إِبْلِيسْ الْعِنْدَهْ قُدْرَةْ فِي الْمَوْت.

¹⁵ وَ بَيْدَا، عِيسَى حَرَّرَاهُمْ لِكُلَّ النَّاسْ الْخَايْفِينْ مِنْ الْمَوْت وَ عَايْشِينْ طُولْ حَيَاتْهُمْ مِثِلْ عَبِيدْ بِسَبَبْ خَوْفهُمْ.

¹⁶ أَكِيدْ، هُو مَا جَاءْ أَشَانْ يِسَاعِدْ الْمَلَائِكَةْ لَاكِنْ أَشَانْ يِسَاعِدْ عِيَالْ إِبْرَاهِيمْ.

¹⁷ وَ بِسَبَبْ دَا، لَابُدَّ يَبْقَى مِثِلْ أَخْوَانَهْ فِي كُلَّ شَيّءْ وَ يَبْقَى لَيْهُمْ كَبِيرْ رُجَالْ الدِّينْ، الرَّحِيمْ وَ الْأَمِينْ، وَ يَخْدِمْ لِلّٰهْ وَ يِسَوِّي كَفَّارَةْ لِذُنُوبْ الشَّعَبْ.

¹⁸ هُو ذَاتَهْ تِعِبْ وَ قَعَدْ تِحِتْ التَّجْرِبَةْ. وَ أَشَانْ دَا، هُو كُلَ يَقْدَرْ يِسَاعِدْ النَّاسْ الْقَاعِدِينْ تِحِتْ التَّجْرِبَةْ.