عِبْرَانِيِّين 12 - الكتاب المقدس بالعربي الدارجي هنا تشاد

مَثَل هنا جُهُد عِيسَى

¹ وَ فِي الْكَلَامْ دَا، عِنْدِنَا شُهُودْ كَتِيرِينْ بِلْحَيْن الْيَشْهَدَوْا لَيْنَا مِنْ أَيِّ جِيهَةْ. أَشَانْ دَا، خَلِّي نِخَلُّوا مِنِّنَا كُلَّ شَيّءْ الْيِوَقِّفْنَا وَ كُلَّ ذَنِبْ الْيِدَوْر يَكْرُبْنَا. وَ خَلِّي نَمْشُوا قِدَّامْ بِجُهُدْ مِثِلْ نَاسْ فِي مُسَابَقَةْ وَ نَجْرُوا لَحَدِّي نِكَمُّلُوا الْمُسَابَقَةْ الْأَنِحْنَ قَاعِدِينْ فَوْقهَا.

² خَلِّي نُخُطُّوا عُيُونَّا فِي عِيسَى الْفَتَحْ لَيْنَا دَرِبْ الْإِيمَانْ وَ كَمَّلَهْ. مِنْ بَعِيدْ، هُو شَافْ الْفَرَحْ الْقَاعِدْ قِدَّامَهْ وَ حِمِلْ تَعَبْ الصَّلِيبْ وَ مَا فَكَّرْ فِي الْعَيْب الْخَطَّوْه فَوْقَهْ. وَ هَسَّعْ، هُو قَاعِدْ جَنْب عَرْش اللّٰهْ فِي نُصَّهْ الزَّيْنَايْ.

³ فَكُّرُوا فَوْقَهْ هُو، الْحِمِلْ الْبُغُضْ الشَّدِيدْ هَنَا الْمُذْنِبِينْ. فَكُّرُوا فَوْقَهْ أَشَانْ إِنْتُو مَا تَبْقَوْا كَسْلَانِينْ وَ لَا خَوَّافِينْ.

⁴ إِنْتُو قَمَّيْتُوا ضِدّ الذَّنِبْ لَاكِنْ مَا صَبَرْتُوا لَحَدِّي الْمَوْت.

الأدب اليجي من اللّه

⁵ إِنْتُو نِسِيتُوا كَلَامْ الشَّجَاعَةْ الْاللّٰهْ قَالَهْ لَيْكُو إِنْتُو أَوْلَادَهْ؟ قَالْ: <يَا وِلَيْدِي، مَا تَابَى أَدَبْ اللّٰهْ وَ مَا تَكْسَلْ كَنْ يِعَاقِبَكْ

⁶ أَشَانْ اللّٰهْ يِأَدِّبْ الْيِحِبَّهْ وَ يُدُقّ أَيِّ وِلَيْد الْهُو قِبِلَهْ.>

⁷ التَّعَبْ الْإِنْتُو تَصْبُرُوا فَوْقَهْ، وَاجِبْ لَيْكُو فِي شَانْ الْأَدَبْ. اللّٰهْ يِعَامِلْكُو مِثِلْ رَاجِلْ يِعَامِلْ عِيَالَهْ. وَيْن الْوِلَيْد الْأَبُوهْ مَا يِأَدِّبَهْ؟

⁸ كَنْ الْأَدَبْ الْيَجِي فَوْق كُلَّ الْعِيَالْ مِنْ أَبَّهَاتْهُمْ مَا يَجِي فَوْقكُو، خَلَاصْ إِنْتُو مَا أَوْلَادْ أَبُوكُو دَا، إِنْتُو فُرُوخْ.

⁹ فَكُّرُوا بَتَّانْ. أَيِّ نَادُمْ مِنِّنَا عِنْدَهْ أَبُو إِنْسَانِي الْأَدَّبَهْ وَ أَبَّهَاتْنَا دَوْل أَنِحْنَ نِكَرُّمُوهُمْ. وَ دَا يِأَكِّدْ لَيْنَا بِزِيَادَةْ كَدَرْ وَاجِبْ نَقْبَلَوْا أَدَبْ اللّٰهْ أَبُونَا السَّمَاوِي وَ نَلْقَوْا الْحَيَاةْ.

¹⁰ أَشَانْ أَبَّهَاتْنَا أَدَّبَوْنَا أَدَبْ الْهُمَّنْ يَرْضَوْا بَيَّهْ لِمُدَّةْ قِصَيْرَةْ. لَاكِنْ اللّٰهْ يِأَدِّبْنَا لِفَايْدِتْنَا أَشَانْ نِشَارُكُوا فِي قَدَاسْتَهْ.

¹¹ فِي الْوَكِتْ الْحَالِي، كُلَّ الْأَدَبْ قَاسِي لَيْنَا وَ مَا يَنْطِينَا فَرَحْ. لَاكِنْ بَعَدَيْن، النَّاسْ الضَّرَبَوْهُمْ أَشَانْ الْأَدَبْ يَلْقَوْا مِنَّهْ نَتِيجَةْ وَ هِي السَّلَامْ وَ الْعَدَالَةْ.

¹² أَشَانْ دَا، خَلُّوا مِنْكُو الْكَسَلْ. قَوُّوا إِيدَيْكُو وَ رِجْلَيْكُو الْمَا عِنْدُهُمْ قُدْرَةْ.

¹³ عَدُّلُوا الدَّرِبْ التُّرُوغُوا فَوْقَهْ أَشَانْ الرِّجِلْ الْعَرْجَةْ مَا تَمْرُقْ لَاكِنْ تَبْرَى.

مَثَل عِيسُو

¹⁴ سَوُّوا جُهُدْ أَشَانْ تِعِيشُوا بِالسَّلَامْ مَعَ كُلَّ النَّاسْ وَ عِيشُوا بِحَالْ صَالْحَةْ الْبَلَاهَا مَا فِي نَادُمْ يِشِيفْ رَبِّنَا.

¹⁵ أَنْقَرْعُوا أَشَانْ نَادُمْ مِنْكُو مَا يَدْحَرْ نَفْسَهْ مِنْ نِعْمَةْ اللّٰهْ. أَنْقَرْعُوا أَشَانْ نَادُمْ أَمْبَيْنَاتْكُو مَا يِتَلِّفْ نَفْسَهْ وَ لَا يِتَلِّفْ الْجَمَاعَةْ مِثِلْ شَدَرَةْ فِي أُسُطْكُو الْعِيَالْهَا عِنْدُهُمْ سَمّ.

¹⁶ أَنْقَرْعُوا أَشَانْ نَادُمْ مَا يَبْقَى زَنَّايْ وَلَّا كَافِرْ مِثِلْ عِيسُو الْعِصِي اللّٰهْ. هُو بَاعْ حَقّ الْبُكُورِيَّةْ فِي شَانْ أَكْلَةْ وَاحِدَةْ بَسْ.

¹⁷ وَ تَعَرْفُوا كَدَرْ بَعَدَيْن هُو دَوَّرْ يَلْقَى الْبَرَكَةْ وَ لَاكِنْ أَبُوهْ أَبَاهْ. وَ عِيسُو مَا لِقِي طَرِيقَةْ يِعَدِّلْ بَيْهَا حَالَةْ حَتَّى كَانْ هُو فَتَّشْهَا بِبَكِي كُلَ.

سِينَاء و صَهْيُون

¹⁸ خُطُّوا بَالْكُو أَشَانْ الْحَجَرْ الْإِنْتُو جِيتُوا قِدَّامَهْ، دَا مَا الْحَجَرْ النَّاسْ يَقْدَرَوْا يِلَمُّسُوهْ مِثِلْ بَنِي إِسْرَائِيلْ فِي جَبَلْ سِينَاء. هُو مَا الْحَجَرْ الْقَاعِدِينْ فَوْقَهْ نَارْ مُقَرْقِرَةْ وَ ضَلَامْ أَزْرَقْ وَ رِيحْ شَدِيدَةْ.

¹⁹ وَ الْحَجَرْ هَنَا الْوَكِتْ دَاكْ، أَنْسَمَعْ فَوْقَهْ حِسّ الْبُوقْ وَ الْحِسّ الْكَلَامَهْ خَوَّفْ الشَّعَبْ لَحَدِّي النَّاسْ السِّمْعَوْه طَلَبَوْا أَشَانْ مَا يِحَجِّي لَيْهُمْ بَتَّانْ.

²⁰ أَشَانْ الْأَمُرْ الْاللّٰهْ أَمَرَاهُمْ بَيَّهْ قَاسِي لَيْهُمْ وَ مَا حِمْلَوْه. هُو قَالْ كَدَرْ الْيِلَمِّسْ الْحَجَرْ دَا وَاجِبْ يَرْجُمُوهْ، حَتَّى كَانْ بَهِيمَةْ كُلَ.

²¹ أَيْوَى، الشَّيّءْ الشَّافَوْه خَوَّفَاهُمْ مَرَّةْ وَاحِدْ لَحَدِّي مُوسَى كُلَ قَالْ: «أَنَا قَاعِدْ نَرْجِفْ مِنْ الْخَوْف.»

²² لَاكِنْ الْحَجَرْ الْإِنْتُو جِيتُوا قِدَّامَهْ، هُو جَبَلْ صَهْيُون الْقَاعِدَةْ فَوْقَهْ مَدِينَةْ اللّٰهْ الْحَيّ. وَ هِي مَدِينَةْ الْقُدُسْ السَّمَاوِيَّةْ. جِيتُوا قِدَّامْ الْمَلَائِكَةْ الْمَا يِنْحَسْبُوا مِنْ الْكَتَرَةْ اللَّامِّينْ لِلْإِحْتِفَالْ.

²³ وَ جِيتُوا قِدَّامْ جَمَاعَةْ أَوْلَادْ الْبِكِرْ الْأَسَامَيْهُمْ مُسَجَّلِينْ فِي السَّمَاءْ. وَ جِيتُوا قِدَّامْ اللّٰهْ الْيِحَاسِبْ كُلَّ النَّاسْ. وَ جِيتُوا قِدَّامْ أَرْوَاحْ الصَّالِحِينْ الْاللّٰهْ سَوَّاهُمْ كَامِلِينْ.

²⁴ وَ جِيتُوا قِدَّامْ عِيسَى وَسِيطْ هَنَا الْمُعَاهَدَةْ الْجَدِيدَةْ وَ قِدَّامْ دَمَّهْ الْمَرْشُوشْ الْيَشْهَدْ لَيْنَا بِشَهَادَةْ أَخَيْر مِنْ شَهَادَةْ دَمّ هَابِيلْ.

²⁵ أَنْقَرْعُوا! مَا تَابَوْا الْيِكَلِّمْ لَيْكُو. أَشَانْ كَنْ نَاسْ الزَّمَانْ مَا نِجَوْا وَكِتْ أَبَوْا مَا تَابَعَوْا كَلَامْ مُوسَى الْحَذَّرْهُمْ فِي الْأَرْض، كِكَّيْف أَنِحْنَ نَنْجَوْا كَنْ نَابَوْا كَلَامْ الْيِحَذِّرْنَا مِنْ السَّمَاءْ؟

²⁶ أَوَّلْ، حِسّ اللّٰهْ رَجَّفْ الْأَرْض وَ هَسَّعْ، هُو وَاعَدَانَا وَ قَالْ: <مَرَّةْ وَاحِدَةْ بَتَّانْ، نِرَجِّفْ الْأَرْض وَ نِرَجِّفْ مَعَاهَا السَّمَاءْ كُلَ.>

²⁷ وَ الْكَلَامْ «مَرَّةْ وَاحِدَةْ بَتَّانْ» يِوَصِّفْ بِكَلَامْ وَاضِحْ الْخَلِيقَةْ تَرْجِفْ وَ تَبْقَى مَا فِيهَا. وَ بَيْدَا، الْمَا يَرْجِفْ بَسْ يِفَضِّلْ.

²⁸ وَ خَلَاصْ، خَلِّي نَشْكُرُوا اللّٰهْ أَشَانْ هُو قَاعِدْ يَنْطِينَا مَمْلَكَةْ ثَابْتَةْ الْمَا تَرْجِفْ. وَ خَلِّي نَعَبُدُوا اللّٰهْ بِالْعِبَادَةْ الْهُو يَرْضَى بَيْهَا بِتَقْوَى وَ إِحْتِرَامْ.

²⁹ أَشَانْ اللّٰهْ النَّعَبُدُوهْ دَا، هُو مِثِلْ نَارْ التَّحْرِقْ كُلَّ شَيّءْ.