تكوين 41 - الكتاب المقدس بالعربي الدارجي هنا تشاد

حِلِم هنا فِرْعَوْن ملك مَصِر

¹ بَعَدْ سَنْتَيْن، الْمَلِكْ فِرْعَوْن حِلِمْ. فِي حِلْمَهْ هُو قَاعِدْ فِي خَشُمْ بَحَرْ النِّيلْ.

² وَ شَافْ سَبْعَةْ بَقَرْ سُمَانْ وَ سَمْحِينْ مَرَقَوْا مِنْ الْبَحَرْ وَ قَاعِدِينْ يَاكُلُوا قَشّ فِي خَشُمْ الْبَحَرْ.

³ وَ بَعَدْ شِيَّةْ، شَافْ سَبْعَةْ بَقَرْ آخَرِينْ بَاطْلِينْ وَ شَيْنِينْ مَرَقَوْا مِنْ الْبَحَرْ وَ مَشَوْا جَنْبُهُمْ.

⁴ وَ طَوَّالِي، قَمَّوْا أَكَلَوْا الْبَقَرْ السُّمَانْ وَ سَمْحِينْ دَوْل. وَ خَلَاصْ، الْمَلِكْ قَمَّ مِنْ النَّوْم.

⁵ وَ قَبَّلْ نَامْ وَ حِلِمْ بَتَّانْ. هُو شَافْ سَبْعَةْ قَنَادِيلْ هَنَا قَمَحْ مَرَقَوْا مِنْ عَقَيْقَايْ وَاحِدَةْ. وَ هُمَّنْ تُخَانْ وَ مَلَانِينْ عِيَالْ.

⁶ وَ هُو شَافْ بَتَّانْ سَبْعَةْ قَنَادِيلْ رُقَاقْ وَ حَرْقَانِينْ مِنْ الْحَمُو مَرَقَوْا جَنْبُهُمْ.

⁷ وَ زَرَطَوْا الْقَنَادِيلْ التُّخَانْ وَ مَلَانِينْ عِيَالْ. وَ خَلَاصْ، فِرْعَوْن قَمَّ وَ عِرِفْ كَدَرْ هُو حِلِمْ.

⁸ وَ بِفَجُرْ، فِرْعَوْن بَرْجَلْ مَرَّةْ وَاحِدْ مِنْ حِلْمَهْ دَا وَ نَادَى كُلَّ الشَّدَّارَى وَ عُلَمَاءْ مَصِرْ. هُو حَجَّى لَيْهُمْ بِالْحِلِمْ وَ لَاكِنْ نَادُمْ وَاحِدْ كُلَ مَا قِدِرْ فَسَّرْ لَيَّهْ الْحِلِمْ دَا.

⁹ خَلَاصْ، مَسْؤُولْ هَنَا النَّاسْ الْبَنْطُوا شَرَابْ لِلْمَلِكْ قَالْ: «يَا سِيدِي! الْيَوْم أَنَا أَذَّكَّرْت خَطَايِ.

¹⁰ يَوْم وَاحِدْ، إِنْتَ زِعِلْت مِنِّي أَنَا وَ مِنْ مَسْؤُولْ النَّاسْ الْيِسَوُّوا خُبْزَةْ. وَ قَمَّيْت سَجَنْتِنَا فِي سِجِنْ هَنَا كَبِيرْ الْحُرَّاسْ.

¹¹ وَ يَوْم وَاحِدْ، حِلِمْنَا وَ حِلِمْ هَنَا أَيِّ وَاحِدْ مِنِّنَا عِنْدَهْ مَعَنَى.

¹² وَ فِي السِّجِنْ فِيَّهْ صَبِي وَاحِدْ، هُو عَبِدْ عِبْرَانِي هَنَا كَبِيرْ الْحُرَّاسْ. وَ أَنِحْنَ حَجَّيْنَا لَيَّهْ بِحِلِمْنَا وَ هُو أَنْطَانَا الْمَعَنَى. وَ فَسَّرْ لِأَيِّ وَاحِدْ حِلْمَهْ.

¹³ وَ الْكَلَامْ الْكَلَّمَهْ لَيْنَا دَا، جَاءْ فِي دَرْبَهْ مِثِلْ هُو قَالَهْ. وَ خَلَاصْ، لَيِّ أَنَا قَبَّلْتِنِي فِي خِدِمْتِي وَ لَاكِنْ لِمَسْؤُولْ النَّاسْ الْبِسَوُّوا خُبْزَةْ، إِنْتَ شَنَقْتَهْ.»

يُوسُف فسّر حِلِم فِرْعَوْن

¹⁴ وَ طَوَّالِي فِرْعَوْن رَسَّلْ يِجِيبُوا يُوسُفْ. وَ مَشَوْا مَرَقَوْه مِنْ السِّجِنْ. وَ هُو زَيَّنْ رَاسَهْ وَ غَيَّرْ خَلَقَهْ. وَ وَدَّوْه قِدَّامْ فِرْعَوْن.

¹⁵ وَ الْمَلِكْ قَالْ لِيُوسُفْ: «أَنَا حِلِمْت وَ نَادُمْ وَاحِدْ كُلَ مَا قِدِرْ فَسَّرْ لَيِّ حِلْمِي دَا. وَ أَنَا سِمِعْت كَدَرْ إِنْتَ تَقْدَرْ تِفَسِّرْ الْحِلِمْ كَنْ نَادُمْ حَجَّاهْ لَيْك.»

¹⁶ وَ يُوسُفْ رَدَّ لَيَّهْ: «مَا أَنَا بَسْ نَنْطِيكْ تَفْسِيرْ لَاكِنْ الرَّبّ بَسْ يَنْطِيكْ تَفْسِيرْ عَدِيلْ.»

¹⁷ وَ الْمَلِكْ قَالْ: «فِي حِلْمِي أَنَا قَاعِدْ فِي خَشُمْ بَحَرْ النِّيلْ.

¹⁸ وَ دَاهُو شِفْت سَبْعَةْ بَقَرْ سُمَانْ وَ سَمْحِينْ مَرَقَوْا مِنْ الْبَحَرْ وَ قَاعِدِينْ بَاكُلُوا قَشّ فِي خَشُمْ الْبَحَرْ.

¹⁹ وَ بَعَدْ دَا، سَبْعَةْ بَقَرْ آخَرِينْ كُلَ مَرَقَوْا وَرَاهُمْ وَ هُمَّنْ بَاطْلِينْ وَ شَيْنِينْ وَ حَرْقَانِينْ. وَ أَنَا مَا شِفْت أَبَداً فِي مَصِرْ بَقَرْ شَيْنِينْ مِثِلْ دَوْل!

²⁰ خَلَاصْ الْبَقَرْ دَوْل أَكَلَوْا السَّبْعَةْ بَقَرْ السُّمَانْ الْمَرَقَوْا أَوَّلْ.

²¹ بَعَدْ أَكَلَوْهُمْ، بَيْدَا كُلَ هُمَّنْ قَاعِدِينْ بَاطْلِينْ مِثِلْ أَوَّلْ. وَ كَنْ شِفْتُهُمْ، مَا تُقُولْ أَكَلَوْا الْبَقَرْ دَوْل. خَلَاصْ أَنَا وِعِيتْ.

²² «وَ بَتَّانْ أَنَا حِلِمْت وَ دَاهُو شِفْت سَبْعَةْ قَنَادِيلْ تُخَانْ وَ مَلَانِينْ عِيَالْ مَرَقَوْا مِنْ عَقَيْقَايْ وَاحِدَةْ.

²³ وَ بَعَدْ دَا، سَبْعَةْ قَنَادِيلْ آخَرِينْ مَرَقَوْا جَنْبُهُمْ وَ هُمَّنْ رُقَاقْ وَ يَابْسِينْ وَ حَرْقَانِينْ مِنْ الْحَمُو.

²⁴ وَ السَّبْعَةْ قَنَادِيلْ الرُّقَاقْ زَرَطَوْا الْقَنَادِيلْ الْمَلَانِينْ عِيَالْ. وَ مِثِلْ دَا، أَنَا حَجَّيْتَهْ لِلشَّدَّارَى وَ لَاكِنْ مَا فِي نَادُمْ الْقِدِرْ فَسَّرَهْ لَيِّ.»

²⁵ وَ يُوسُفْ قَالْ لِفِرْعَوْن: «حِلْمَكْ الْإِتْنَيْن دَوْل يِوَصُّفُوا شَيّءْ وَاحِدْ بَسْ. الرَّبّ وَصَّفَاكْ الشَّيّءْ الْيِسَوِّيهْ.

²⁶ السَّبْعَةْ بَقَرْ السَّمْحِينْ وَ السَّبْعَةْ قَنَادِيلْ الْمَلَانِينْ عِيَالْ هُمَّنْ سَبْعَةْ سَنَةْ. وَ دَا، حِلِمْ وَاحِدْ بَسْ.

²⁷ وَ السَّبْعَةْ بَقَرْ بَاطْلِينْ وَ شَيْنِينْ الْمَرَقَوْا وَرَاهُمْ وَ السَّبْعَةْ قَنَادِيلْ يَابْسِينْ وَ حَرْقَانِينْ مِنْ الْحَمُو، هُمَّنْ دَوْل يِوَصُّفُوا سَبْعَةْ سَنَةْ هَنَا جُوعْ.

²⁸ «مِثِلْ أَنَا أَوْرَيْتَكْ، يَا السَّيِّدْ الْمَلِكْ، الرَّبّ وَصَّفَاكْ الشَّيّءْ الْيِسَوِّيهْ.

²⁹ دَاهُو السَّبْعَةْ سِنِينْ الْجَايِينْ، يُكُونُوا سِنِينْ هَنَا مَعَاشْ كَتِيرْ فِي كُلَّ بَلَدْ مَصِرْ.

³⁰ وَ بَعَدَيْن، يَجُوا سَبْعَةْ سِنِينْ هَنَا جُوعْ. وَ النَّاسْ يَنْسَوْا الْمَعَاشْ الْأَوَّلْ لِقَوْه فِي الْبَلَدْ. وَ الْجُوعْ يِدَمِّرْ كُلَّ بَلَدْ مَصِرْ.

³¹ وَ النَّاسْ يَنْسَوْا كَدَرْ أَوَّلْ لِقَوْا مَعَاشْ كَتِيرْ. وَ دَا أَشَانْ الْجُوعْ يَبْقَى شَدِيدْ مَرَّةْ وَاحِدْ.

³² وَ حِلْمَكْ بِقِي إِتْنَيْن دَا أَشَانْ الرَّبّ شَالْ قَرَارْ كَدَرْ الشَّيّءْ دَا قَرِيبْ يُكُونْ.

³³ «يَا سَيِّدْ الْمَلِكْ، هَسَّعْ دَا فَتِّشْ نَادُمْ فَاهِمْ وَ حَكِيمْ وَ أَنْطِيهْ مَسْؤُولِيَّةْ كُلَّ بَلَدْ مَصِرْ.

³⁴ وَ خُطّ مُرَاقِبِينْ فِي الْبَلَدْ. وَ هُمَّنْ يِشِيلُوا الْخُمُسْ مِنْ الْإِنْتَاجْ فِي السَّبْعَةْ سِنِينْ هَنَا الْمَعَاشْ الْكَتِيرْ الْيَلْقَوْه فِي بَلَدْ مَصِرْ.

³⁵ وَ خَلِّي يِلِمُّوا الْأَكِلْ الْيَلْقَوْه فِي السَّبْعَةْ سِنِينْ هَنَا الْمَعَاشْ الْكَتِيرْ. وَ أَنْطِيهُمْ أَمُرْ لِيُصُبُّوهْ وَ يُضُمُّوهْ فِي الْمَخَازِنْ الْفِي الْحِلَّالْ.

³⁶ بِمِثِلْ دَا، يُضُمُّوا الْمَعَاشْ لِنَاسْ الْبَلَدْ لِسَبْعَةْ سِنِينْ هَنَا الْجُوعْ الْيَجُوا فِي بَلَدْ مَصِرْ. وَ بَيْدَا، الْجُوعْ مَا يِدَمِّرْ الْبَلَدْ.»

يُوسُف بِقي حاكِم في مَصِر

³⁷ وَكِتْ الْمَلِكْ فِرْعَوْن وَ الْمَسْؤُولِينْ سِمْعَوْا الْكَلَامْ الْيُوسُفْ قَالَهْ دَا، هُمَّنْ فِرْحَوْا.

³⁸ وَ الْمَلِكْ قَالْ لِمَسْؤُولِينَهْ: «الرَّاجِلْ دَا، رُوحْ اللّٰهْ قَاعِدْ فَوْقَهْ. مَا نَقْدَرَوْا نَلْقَوْا نَادُمْ الْعِنْدَهْ بَرَكَةْ زِيَادَةْ مِنَّهْ.»

³⁹ وَ قَالْ لِيُوسُفْ: «الرَّبّ وَصَّفْ لَيْك كُلَّ الشَّيّءْ دَا. أَشَانْ دَا بَسْ، مَا فِي نَادُمْ فَاهِمْ وَ حَكِيمْ زِيَادَةْ مِنَّكْ إِنْتَ.

⁴⁰ خَلَاصْ إِنْتَ بَسْ تَحْكِمْ فِي بَلَدِي. وَ كُلَّ الشَّعَبْ هَنَا مَصِرْ يِتَابُعُوا كَلَامَكْ. وَ إِلَّا أَنَا بَسْ نَبْقَى عَالِي مِنَّكْ أَشَانْ أَنَا الْمَلِكْ.»

⁴¹ وَ بَتَّانْ قَالْ لِيُوسُفْ: «خَلَاصْ، أَنَا أَنْطَيْتَكْ الْحُكُمْ هَنَا كُلَّ بَلَدْ مَصِرْ.»

⁴² وَ الْمَلِكْ سَلَّ الْخَاتِمْ مِنْ إِيدَهْ وَ دَسَّاهْ فِي إِيدْ يُوسُفْ وَ لَبَّسَهْ خَلَقْ هَنَا قُمَاشْ سَمَحْ وَ دَسَّ لَيَّهْ فِي رَقَبَتَهْ حَفِيضَةْ هَنَا دَهَبْ.

⁴³ وَ رَكَّبَهْ فِي عَرَبَتَهْ الْمَلَكِيَّةْ التَّانِيَةْ وَ النَّاسْ مَاشِينْ قِدَّامَهْ يُقُولُوا: «كِسُّوا مِنْ الدَّرِبْ!» وَ بِمِثِلْ دَا، فِرْعَوْن أَنْطَى لِيُوسُفْ الْحُكُمْ هَنَا كُلَّ بَلَدْ مَصِرْ.

⁴⁴ وَ قَالْ بَتَّانْ لِيُوسُفْ: «أَنَا بَسْ الْمَلِكْ وَ نُقُولْ لَيْك نَادُمْ مَا يَرْفَعْ إِيدَهْ وَ لَا رِجْلَهْ بَلَا إِذْنَكْ إِنْتَ، فِي كُلَّ بَلَدْ مَصِرْ!»

⁴⁵ وَ الْمَلِكْ سَمَّى يُوسُفْ صَفْنَتْ فَعْنِيحْ وَ جَوَّزَهْ بِنَيَّةْ فُوطِي فَارَعْ الْأُسُمْهَا أَسْنَاتْ. وَ فُوطِي فَارَعْ هُو رَاجِلْ دِينْ هَنَا الْحِلَّةْ الْأُسُمْهَا أُونْ. مِنْ دَا خَلَاصْ، يُوسُفْ بَدَا يَحْكِمْ فِي بَلَدْ مَصِرْ.

⁴⁶ وَكِتْ يُوسُفْ قَابَلْ فِرْعَوْن مَلِكْ مَصِرْ، عُمْرَهْ 30 سَنَةْ. وَ خَلَاصْ، هُو مَرَقْ مِنْ بَكَانْ الْمَلِكْ وَ مَشَى يُرُوغْ فِي كُلَّ بَلَدْ مَصِرْ.

سبْعة سِنين هنا معاش كتير

⁴⁷ فِي سَبْعَةْ سِنِينْ، الزِّرَاعَةْ وِلْدَتْ كَتِيرْ.

⁴⁸ وَ فِي كُلَّ بَلَدْ مَصِرْ، يُوسُفْ لَمَّ كُلَّ الْمَعَاشْ هَنَا السَّبْعَةْ سِنِينْ دَوْل وَ ضَمَّاهْ فِي الْمَخَازِنْ هَنَا الْحِلَّالْ. وَ فِي أَيِّ حِلَّةْ، ضَمَّ الْمَعَاشْ النَّاسْ حَرَتَوْه فِي الزِّرَاعَةْ الْحَوَالَيْهَا.

⁴⁹ وَ يُوسُفْ لَمَّ قَمَحْ كَتِيرْ مِثِلْ رَمْلَةْ هَنَا خَشُمْ الْبَحَرْ. وَ نَادُمْ مَا يَقْدَرْ يِقَاوِسَهْ مِنْ الْكَتَرَةْ.

⁵⁰ قُبَّالْ سَنْت الْجُوعْ، أَسْنَاتْ مَرِةْ يُوسُفْ جَابَتْ لَيَّهْ أَوْلَادْ إِتْنَيْن، وَ هِي بِنَيَّةْ فُوطِي فَارَعْ رَاجِلْ دِينْ هَنَا الْحِلَّةْ الْأُسُمْهَا أُونْ.

⁵¹ الْبِكِرْ، يُوسُفْ سَمَّاهْ مَنَسَّى (مَعَنَاتَهْ نَسَّانِي) أَشَانْ هُو قَالْ: «الرَّبّ نَسَّانِي كُلَّ تَعَبِي وَ الْفُرْقَةْ مَعَ أَهَلِي.»

⁵² وَ الصَّغَيَّرْ سَمَّاهْ أَفْرَايِمْ (مَعَنَاتَهْ إِنْتَاجْ) أَشَانْ هُو قَالْ: «الرَّبّ أَنْطَانِي عِيَالْ فِي الْبَلَدْ الْأَنَا تِعِبْت فَوْقهَا.»

السبْعة سِنين هنا الجوع بدوا

⁵³ خَلَاصْ فِي مَصِرْ، السَّبْعَةْ سِنِينْ هَنَا الْمَعَاشْ الْكَتِيرْ كَمَّلَوْا.

⁵⁴ وَ السَّبْعَةْ سِنِينْ هَنَا الْجُوعْ بَدَوْا مِثِلْ يُوسُفْ قَالَهْ. وَ فِي كُلَّ الْبُلْدَانْ، الْجُوعْ دَخَلْ لَيْهُمْ، إِلَّا فِي مَصِرْ بَسْ فِيَّهْ مَعَاشْ.

⁵⁵ وَ بَعَدَيْن، الْجُوعْ دَخَلْ فِي مَصِرْ كُلَ. وَ الشَّعَبْ مَشَوْا بَكَوْا لِفِرْعَوْن وَ قَالَوْا: «أَنْطِينَا مَعَاشْ!» وَ هُو قَالْ لَيْهُمْ: «أَمْشُوا لِيُوسُفْ وَ سَوُّوا الشَّيّءْ الْيُقُولَهْ لَيْكُو.»

⁵⁶ وَ الْجُوعْ بِقِي شَدِيدْ فِي كُلَّ الْبَلَدْ. وَ يُوسُفْ فَتَحْ كُلَّ الْمَخَازِنْ وَ قَمَّ يِبِيعْ الْقَمَحْ لِشَعَبْ مَصِرْ. وَ بَتَّانْ الْجُوعْ قَاعِدْ يِزِيدْ بِزِيَادَةْ فِي مَصِرْ.

⁵⁷ وَ النَّاسْ جَايِينْ مِنْ كُلَّ الْبُلْدَانْ لِيَشْرُوا قَمَحْ مِنْ يُوسُفْ فِي مَصِرْ أَشَانْ الْجُوعْ بِقِي شَدِيدْ مَرَّةْ وَاحِدْ فِي كُلَّ الْبُلْدَانْ.