تكوين 25 - الكتاب المقدس بالعربي الدارجي هنا تشاد

إِبْرَاهِيم و عياله الآخرين

¹ إِبْرَاهِيمْ أَخَدْ مَرَةْ آخَرَةْ أُسُمْهَا قَطُورَةْ.

² وَ هِي جَابَتْ لَيَّهْ عِيَالْ وَ هُمَّنْ زِمْرَانْ وَ يَقْشَانْ وَ مَدَانْ وَ مِدْيَانْ وَ يَشْبَاقْ وَ شُوَحْ.

³ وَ يَقْشَانْ وِلِدْ شَبَا وَ دَدَانْ. وَ ذُرِّيَّةْ دَدَانْ، هُمَّنْ الْأَشُورِينْ وَ اللَّطُوشِينْ وَ اللُّمِينْ.

⁴ وَ عِيَالْ مِدْيَانْ، هُمَّنْ عِيفَا وَ عِفِرْ وَ حَنُوكْ وَ أَبِيدَعْ وَ أَلِدَاعَا. وَ دَوْل كُلُّهُمْ عِيَالْ قَطُورَةْ.

⁵ وَ إِبْرَاهِيمْ قُبَّالْ مَا يُمُوتْ أَنْطَى كُلَّ مَالَهْ لِوِلَيْدَهْ إِسْحَاقْ.

⁶ وَ لِعِيَالَهْ هَنَا الْعَوِينْ الْآخَرِينْ كَمَانْ، أَنْطَاهُمْ هَدِيَّةْ وَ سَفَّرَاهُمْ بَعِيدْ مِنْ وِلَيْدَهْ إِسْحَاقْ فِي تُرَابْ الصَّبَاحْ.

مَوْت إِبْرَاهِيم

⁷ وَ إِبْرَاهِيمْ عَاشْ 175 سَنَةْ.

⁸ وَ وَكِتْ شَيَّبْ وَ شِبِعْ مِنْ الدُّنْيَا، هُو مَاتْ وَ لِحِقْ أَبَّهَاتَهْ بِفَرْحَةْ وَ سَلَامْ.

⁹ وَ أَوْلَادَهْ إِسْحَاقْ وَ إِسْمَاعِيلْ دَفَنَوْه فِي كَرْكُورْ الْقَاعِدْ فِي زَرَعْ عَفْرُونْ وِلَيْد صُوحَرْ الْحِتِّي الْفِي مَكْفِيلَةْ. وَ الزَّرَعْ دَا صَبَاحْ لِحِلَّةْ مَمْرَا.

¹⁰ وَ الزَّرَعْ دَا، إِبْرَاهِيمْ شَرَاهْ مِنْ الْحِتِّيِّينْ. وَ دَا الْبَكَانْ الدَّفَنَوْهُمْ فَوْقَهْ هُو وَ مَرْتَهْ سَارَةْ.

¹¹ وَ بَعَدْ مَوْت إِبْرَاهِيمْ، الرَّبّ بَارَكْ وِلَيْدَهْ إِسْحَاقْ. وَ إِسْحَاقْ سَكَنْ جَنْب الْبِيرْ الْأُسُمْهَا بِيرْ اللّٰهْ الْحَيّ الْقَاعِدْ يِشِيفْنِي.

ذُرّية إِسْمَاعِيل

¹² دَاهُو ذُرِّيَّةْ إِسْمَاعِيلْ وِلَيْد إِبْرَاهِيمْ. أَمَّهْ هَاجَرْ الْمَصْرِيَّةْ خَادِمْ سَارَةْ.

¹³ وَ دَاهُو أَسَامَيْ أَوْلَادْ إِسْمَاعِيلْ حَسَبْ ذُرِّيِّتْهُمْ. هُمَّنْ نَبَيُوتْ الْبِكِرْ وَ قِدَارْ وَ أَدَبِيلْ وَ مِبْسَامْ

¹⁴ وَ مِشْمَعْ وَ دُومَا وَ مَسَّا

¹⁵ وَ حَدَدْ وَ تِيمَا وَ يَطُورْ وَ نَفِيشْ وَ قِدْمَا.

¹⁶ وَ دَوْل أَوْلَادْ إِسْمَاعِيلْ الْأَتْنَا عَشَرْ. وَ أَيِّ وَاحِدْ مِنْهُمْ بِقِي شَيْخ هَنَا خَشُمْ بَيْت وَاحِدْ وَ سَمَّوْا حِلَّالْهُمْ وَ فُرْقَانْهُمْ بِأَسَامَيْهُمْ.

¹⁷ وَ إِسْمَاعِيلْ عَاشْ 137 سَنَةْ وَ مَاتْ وَ لِحِقْ أَبَّهَاتَهْ.

¹⁸ وَ ذُرِّيَّةْ إِسْمَاعِيلْ سَكَنَتْ مِنْ بَلَدْ حَوِيلَةْ لَحَدِّي بَلَدْ شُورْ الْمُقَابِلْ بَلَدْ مَصِرْ عَلَيْ بَلَدْ أَشُورْ. وَ هُمَّنْ قَعَدَوْا ضِدّ كُلَّ أَخْوَانْهُمْ مِنْ ذُرِّيَّةْ إِبْرَاهِيمْ.

والودة عِيسُو و يَعْقُوب

¹⁹ دَاهُو تَارِيخْ إِسْحَاقْ وِلَيْد إِبْرَاهِيمْ. إِبْرَاهِيمْ وِلِدْ إِسْحَاقْ.

²⁰ وَ إِسْحَاقْ عِنْدَهْ 40 سَنَةْ وَكِتْ أَخَدْ رِفْقَةْ بِنَيَّةْ بَتُوِيلْ الْأَرَامِي مِنْ بَلَدْ فَدَّانْ أَرَامْ. وَ رِفْقَةْ هِي أَخُتْ لَابَانْ الْأَرَامِي.

²¹ وَ إِسْحَاقْ شَحَدْ اللّٰهْ أَشَانْ مَرْتَهْ رِفْقَةْ عَاقْرَةْ وَ اللّٰهْ قِبِلْ سُؤَالَهْ وَ هِي بِقَتْ غَلْبَانَةْ.

²² لَاكِنْ الْعِيَالْ قَاعِدِينْ يِدَّاوَسَوْا فِي بَطُنْهَا وَ هِي قَالَتْ: «شُنُو الْجَانِي؟» وَ مَشَتْ سَأَلَتْ اللّٰهْ.

²³ وَ اللّٰهْ قَالْ لَيْهَا: «فِي أُمَّتَيْن فِي بَطُنْكِ، شُعُوبْ إِتْنَيْن يِنْفَرْقُوا. وَكِتْ تَلْدَيْهُمْ، الْوَاحِدْ يَبْقَى شَدِيدْ مِنْ الْآخَرْ وَ الْكَبِيرْ يَخْدِمْ لِلصَّغَيَّرْ.»

²⁴ وَ وَكِتْ رِفْقَةْ وَكِتْهَا تَمَّ، هِي وِلْدَتْ وَ جَابَتْ تِيمَانْ.

²⁵ الْأَوَّلَانِي مَرَقْ وَ جِلْدَهْ كُلَّ مَكْسِي بِصُوفْ. أَشَانْ دَا، سَمَّوْه عِيسُو (مَعَنَاتَهْ أَبُو صُوفْ).

²⁶ وَ بَعَدْ دَا، التَّانِي كُلَ مَرَقْ وَ كَارِبْ كَعَبْ أَخُوهْ عِيسُو. أَشَانْ دَا، سَمَّوْه يَعْقُوبْ (مَعَنَاتَهْ كَارِبْ كَعَبْ وَلَّا النَّجِيضْ). وَ إِسْحَاقْ عِنْدَهْ 60 سَنَةْ وَكِتْ وِلِدْ الْعِيَالْ دَوْل.

²⁷ وَ الْأَوْلَادْ كِبْرَوْا وَ عِيسُو بِقِي قَنَّاصِي نَشِيطْ وَ يَعَرِفْ الْخَلَاءْ. لَاكِنْ يَعْقُوبْ هُو نَادُمْ هَادِي وَ قَاعِدْ دَايْماً فِي الْبَيْت.

²⁸ وَ إِسْحَاقْ يِرِيدْ عِيسُو أَشَانْ هُو يِجِيبْ لَيَّهْ لَحَمْ الصَّيْد. وَ لَاكِنْ رِفْقَةْ تِرِيدْ يَعْقُوبْ.

²⁹ يَوْم وَاحِدْ، يَعْقُوبْ قَاعِدْ يِسَوِّي أَكِلْ وَ عِيسُو جَاءْ مِنْ الْقَنِيصْ جِيعَانْ مَرَّةْ وَاحِدْ.

³⁰ وَ قَالْ لِيَعْقُوبْ: «مِنْ فَضْلَكْ، أَنْطِينِي الْأَكِلْ الْأَحْمَرْ دَا نَاكُلْ أَشَانْ أَنَا جِيعَانْ.» وَ أَشَانْ دَا بَسْ، لِعِيسُو سَمَّوْه أَدَوْم (مَعَنَاتَهْ أَحْمَرْ).

³¹ وَ يَعْقُوبْ قَالْ لَيَّهْ: «كَنْ تِدَوْر الْأَكِلْ دَا، بِيعْ لَيِّ حَقّ بُكُورِيّتَكْ حَتَّى نَنْطِيكْ تَاكُلْ.»

³² وَ عِيسُو قَالْ: «أَنَا مُتّْ مِنْ الْجُوعْ. نِسَوِّي شُنُو بِحَقّ الْبُكُورِيَّةْ؟»

³³ وَ يَعْقُوبْ قَالْ لَيَّهْ: «أَحْلِفْ لَيِّ قَبُلْ!» وَ خَلَاصْ، عِيسُو حَلَفْ وَ بَاعْ لَيَّهْ حَقّ بُكُورِيّتَهْ.

³⁴ وَ خَلَاصْ، يَعْقُوبْ أَنْطَى مُلَاحْ هَنَا عَدَسْ وَ خُبْزَةْ لِعِيسُو وَ هُو أَكَلْ وَ شِرِبْ وَ قَمَّ مَشَى. وَ بِمِثِلْ دَا، مَا لَمَّاهْ بِحَقّ الْبُكُورِيَّةْ.