تكوين 23 - الكتاب المقدس بالعربي الدارجي هنا تشادإِبْرَاهِيم يشْري قبُر لسَارَة 1 وَ سَارَةْ عَاشَتْ 127 سَنَةْ. 2 وَ مَاتَتْ فِي قَرْيَةْ أَرْبَعَةْ الْمَعْرُوفَةْ بِحِبْرُونْ، فِي بَلَدْ كَنْعَانْ. وَ إِبْرَاهِيمْ سَوَّى فُرَاشْ لِمَرْتَهْ وَ بَكَى لَيْهَا. 3 وَ خَلَاصْ، إِبْرَاهِيمْ قَمَّ مِنْ بَكَانْ الْجَنَازَةْ وَ حَجَّى لِلْحِتِّيِّينْ وَ قَالْ لَيْهُمْ: 4 «أَنَا أَجْنَبِي وَ غَرِيبْ وَ عَايِشْ فِي أُسُطْكُو. مِنْ إِذِنْكُو، أَنْطُونِي بَكَانْ النَّدْفِنْ فَوْقَهْ مَرْتِي.» 5 وَ الْحِتِّيِّينْ رَدَّوْا لِإِبْرَاهِيمْ وَ قَالَوْا: 6 «يَا سَيِّدْنَا، أَسْمَعْ كَلَامْنَا. الرَّبّ سَوَّاكْ كَبِيرْ فِي أُسُطْنَا. أَدْفِنْ مَرْتَكْ فِي أَيِّ بَكَانْ التِّدَوْرَهْ. مَا فِي نَادُمْ يَقْدَرْ يَدْحَرَكْ مَا تَدْفِنْ مَرْتَكْ.» 7 وَ إِبْرَاهِيمْ قَمَّ دَنْقَرْ قِدَّامْ الْحِتِّيِّينْ، نَاسْ الْبَلَدْ. 8 وَ قَالْ لَيْهُمْ: «كَنْ إِنْتُو قَصَّدْتُوا وَ عِنْدُكُو نِيَّةْ نَدْفِنْ مَرْتِي هِنِي دَا، أَسْأَلَوْه لِعَفْرُونْ وِلَيْد صُوحَرْ 9 أَشَانْ يَنْطِينِي الْكَرْكُورْ الْفِي مَكْفِيلَةْ الْقَاعِدْ جَنْب زَرْعَهْ. وَ نَشْرِيهْ مِنَّهْ قِدَّامْكُو بِتَمَنْ هَنَا الْبَكَانْ دَا. وَ الْبَكَانْ دَا يَبْقَى لَيِّ بَكَانْ هَنَا دَفِنْ.» 10 وَ عَفْرُونْ قَاعِدْ فِي لُبّ الْحِتِّيِّينْ وَ رَدَّ لِإِبْرَاهِيمْ قِدَّامْ كُلَّ الْحِتِّيِّينْ الْجَوْا قَاعِدِينْ فِي خَشُمْ بَابْ الْحِلَّةْ وَ قَالْ: 11 «لَا، يَا سَيِّدِي. أَسْمَعْنِي. خَلَاصْ، نَنْطِيكْ الزَّرَعْ وَ الْكَرْكُورْ الْقَاعِدْ فِي الزَّرَعْ كُلَ. نَنْطِيهُمْ لَيْك قِدَّامْ كُلَّ نَاسْ بَلَدِي. أَمْشِي أَدْفِنْ مَرْتَكْ!» 12 وَ إِبْرَاهِيمْ قَمَّ دَنْقَرْ بَتَّانْ قِدَّامْ كُلَّ نَاسْ الْبَلَدْ 13 وَ قَالْ لِعَفْرُونْ قِدَّامْ كُلَّ الْحَاضْرِينْ: «أَسْمَعْ كَلَامِي. أَنَا نَنْطِيكْ تَمَنْ الزَّرَعْ وَ أَقْبَلْ مِنِّي التَّمَنْ دَا. وَ نَدْفِنْ مَرْتِي فَوْقَهْ.» 14 وَ عَفْرُونْ رَدَّ لِإِبْرَاهِيمْ وَ قَالْ: 15 «يَا سَيِّدِي، أَسْمَعْ كَلَامِي. تَمَنْ الزَّرَعْ دَا 400 حَجَرْ فُضَّةْ بَسْ. لَاكِنْ بَيْنِي وَ بَيْنَكْ، دَا شَيّءْ هَيِّنْ سَاكِتْ. أَمْشِي أَدْفِنْ مَرْتَكْ!» 16 وَ خَلَاصْ، إِبْرَاهِيمْ وَ عَفْرُونْ وَافَقَوْا فِي التَّمَنْ دَا. وَ وَزَنْ لَيَّهْ قِدَّامْ كُلَّ الْحِتِّيِّينْ الْأُرْبُعْمِيَةْ حَجَرْ فُضَّةْ بِالْوَزِنْ الْقَاعِدِينْ يِسَاوُقُوا بَيَّهْ. 17 وَ بِمِثِلْ دَا، الزَّرَعْ هَنَا عَفْرُونْ الْقَاعِدْ فِي مَكْفِيلَةْ صَبَاحْ لِحِلَّةْ مَمْرَا وَ الْكَرْكُورْ الْقَاعِدْ فَوْقَهْ وَ كُلَّ الشَّدَرْ الْفِي لُبّ الزَّرَعْ 18 بِقَوْا هَنَا إِبْرَاهِيمْ قِدَّامْ كُلَّ الْحِتِّيِّينْ الْحَاضْرِينْ فِي مَدَخَلْ الْحِلَّةْ. 19 وَ بَعَدْ دَا، إِبْرَاهِيمْ دَفَنْ مَرْتَهْ سَارَةْ فِي الْكَرْكُورْ الْفِي الزَّرَعْ الْقَاعِدْ فِي مَكْفِيلَةْ صَبَاحْ لِمَمْرَا فِي حِبْرُونْ فِي بَلَدْ كَنْعَانْ. 20 وَ بِمِثِلْ دَا، الزَّرَعْ وَ الْكَرْكُورْ الْقَاعِدْ فَوْقَهْ دَا بِقَوْا هَنَا إِبْرَاهِيمْ. أَشَانْ شَرَاهْ مِنْ الْحِتِّيِّينْ وَ بِقِي لَيَّهْ بَكَانْ هَنَا دَفِنْ. |
La Bible en arabe tchadien © Alliance biblique du Tchad, 2019
Bible Society of Chad