تكوين 22 - الكتاب المقدس بالعربي الدارجي هنا تشاداللّه جرّب إيمان إِبْرَاهِيم 1 وَ بَعَدْ دَا، اللّٰهْ نَادَاهْ لِإِبْرَاهِيمْ لِيِجَرِّبَهْ وَ قَالْ لَيَّهْ: «يَا إِبْرَاهِيمْ!» وَ إِبْرَاهِيمْ قَالْ: «نَعَمْ.» 2 وَ الرَّبّ قَالْ لَيَّهْ: «قُمّ، شِيلْ وِلَيْدَكْ إِسْحَاقْ الْوَحِيدْ التِّرِيدَهْ بِلْحَيْن. وَدِّيهْ فِي بَلَدْ مُرِيَّا فِي رَاسْ الْحَجَرْ النِّوَصِّفَهْ لَيْك. وَ قَدِّمَهْ لَيِّ ضَحِيَّةْ مُحَرَّقَةْ.» 3 وَ خَلَاصْ بِفَجُرْ بَدْرِي، إِبْرَاهِيمْ قَمَّ وَ شَقَّقْ حَطَبْ هَنَا الضَّحِيَّةْ. هُو شَالْ حُمَارَهْ وَ نَاسَيْن مِنْ خَدَّامِينَهْ وَ وِلَيْدَهْ إِسْحَاقْ. وَ مَشَوْا عَلَيْ الْبَكَانْ الْوَصَّفَهْ لَيَّهْ الرَّبّ. 4 وَ فِي الْيَوْم التَّالِتْ، إِبْرَاهِيمْ رَفَعْ رَاسَهْ وَ شَافْ مِنْ بَعِيدْ الْبَكَانْ دَا. 5 وَ خَلَاصْ، قَالْ لِخَدَّامِينَهْ: «أَقْعُدُوا هِنِي مَعَ الْحُمَارْ. أَنَا وَ الْوِلَيْد نَمْشُوا فَوْق هِنَاكْ نَعَبُدُوا الرَّبّ وَ نِقَبُّلُوا لَيْكُو.» 6 وَ إِبْرَاهِيمْ شَالْ حَطَبْ الضَّحِيَّةْ وَ أَنْطَاهْ لِوِلَيْدَهْ إِسْحَاقْ يِشِيلَهْ. وَ هُو شَالْ فِي إِيدَهْ نَارْ وَ سَكِّينْ. وَ مَشَوْا تِنَيْنِتْهُمْ سَوَا. 7 خَلَاصْ إِسْحَاقْ قَالْ لِأَبُوهْ: «يَا أَبُويِ.» وَ أَبُوهْ قَالْ: «نَعَمْ، يَا وِلَيْدِي.» وَ إِسْحَاقْ قَالْ: «دَاهُو النَّارْ وَ الْحَطَبْ. وَ وَيْن غَنَمَايِةْ الضَّحِيَّةْ؟» 8 وَ إِبْرَاهِيمْ قَالْ: «الرَّبّ بَسْ يَرْزُقْنَا بِغَنَمَايِةْ الضَّحِيَّةْ، يَا وِلَيْدِي.» وَ هُمَّنْ الْإِتْنَيْن مَشَوْا سَوَا. 9 وَ وَكِتْ وَصَّلَوْا فِي الْبَكَانْ الْوَصَّفَهْ لَيَّهْ الرَّبّ، إِبْرَاهِيمْ بَنَى مَدْبَحْ وَ صَبَّ فَوْقَهْ حَطَبْ وَ رَبَّطْ وِلَيْدَهْ إِسْحَاقْ وَ خَطَّاهْ فِي رَاسْ الْحَطَبْ دَا. 10 وَ خَلَاصْ، إِبْرَاهِيمْ شَالْ السَّكِّينْ فِي إِيدَهْ لِيَدْبَحْ وِلَيْدَهْ. 11 طَوَّالِي مَلَكْ اللّٰهْ نَادَاهْ لِإِبْرَاهِيمْ مِنْ السَّمَاءْ وَ قَالْ: «يَا إِبْرَاهِيمْ! يَا إِبْرَاهِيمْ!» وَ إِبْرَاهِيمْ قَالْ: «نَعَمْ.» 12 وَ الْمَلَكْ قَالْ لَيَّهْ: «مَا تُخُطّ إِيدَكْ فَوْق الْوِلَيْد! وَ مَا تِسَوِّي لَيَّهْ شَيّءْ! أَشَانْ هَسَّعْ دَا أَنَا نَعَرِفْ كَدَرْ إِنْتَ خَايِفْ مِنِّي أَنَا الرَّبّ. وَ مَا أَبَيْت لَيِّ وِلَيْدَكْ الْوَحِيدْ.» 13 وَ إِبْرَاهِيمْ رَفَعْ رَاسَهْ وَ شَافْ كَبِشْ فِي قَعَرْ شِدَيْرَةْ وَ قُرُونَهْ شَابْكَاتْ فِي الشِّدَيْرَةْ دِي. وَ شَالَهْ وَ قَدَّمَهْ ضَحِيَّةْ مُحَرَّقَةْ فِي بَدَلْ وِلَيْدَهْ. 14 وَ سَمَّى الْبَكَانْ دَا يَهْوَهْ يِرْأَهْ (مَعَنَاتَهْ اللّٰهْ يَرْزُقْ). أَشَانْ دَا بَسْ، لَحَدِّي الْيَوْم يُقُولُوا: «فِي حَجَرْ اللّٰهْ، الرَّبّ يَرْزُقْ.» 15 وَ مَلَكْ اللّٰهْ نَادَاهْ بَتَّانْ لِإِبْرَاهِيمْ مِنْ السَّمَاءْ 16 وَ قَالْ لَيَّهْ: «دَاهُو كَلَامْ اللّٰهْ: ‹أَشَانْ إِنْتَ سَوَّيْت مِثِلْ دَا مَا أَبَيْت لَيِّ لِوِلَيْدَكْ الْوَحِيدْ، أَنَا اللّٰهْ نَحْلِفْ لَيْك بِأُسْمِي. 17 أَكِيدْ أَنَا نِبَارِكَكْ وَ نِكَتِّرْ ذُرِّيّتَكْ مِثِلْ نُجُومْ السَّمَاءْ وَ مِثِلْ رَمْلَةْ هَنَا خَشُمْ الْبَحَرْ. وَ ذُرِّيّتَكْ تِشِيلْ أَرْض عُدْوَانْهَا. 18 وَ بَيْهُمْ هُمَّنْ نِبَارِكْ كُلَّ أُمَمْ الْأَرْض أَشَانْ إِنْتَ تَابَعْت كَلَامِي.›» 19 وَ إِبْرَاهِيمْ قَبَّلْ مَشَى لِقَاهُمْ لِخَدَّامِينَهْ وَ قَمَّوْا مَشَوْا سَوَا فِي بِيرْ سَبْعَةْ. وَ إِبْرَاهِيمْ سَكَنْ فِي بِيرْ سَبْعَةْ. أوْلاد نَاحُور 20 وَ بَعَدْ دَا، خَبَّرَوْا إِبْرَاهِيمْ كَدَرْ مِلْكَةْ مَرِةْ أَخُوهْ نَاحُورْ جَابَتْ لَيَّهْ أَوْلَادْ. 21 وَ هُمَّنْ عُوصْ الْبِكِرْ وَ أَخُوهْ بُوزْ وَ قَمُوِيلْ أَبُو أَرَامْ 22 وَ كَاسَدْ وَ حَزُو وَ فِلْدَاشْ وَ يِدْلَافْ وَ بَتُوِيلْ. 23 وَ بَتُوِيلْ وِلِدْ رِفْقَةْ. وَ دَوْل أَوْلَادْ التَّمَانَةْ الْمِلْكَةْ وِلْدَتْهُمْ لِنَاحُورْ أَخُو إِبْرَاهِيمْ. 24 وَ نَاحُورْ عِنْدَهْ عِيَالْ آخَرِينْ كُلَ الْوِلْدَتْهُمْ لَيَّهْ سِرِّيتَهْ الْأُسُمْهَا رَوُومَةْ. وَ هُمَّنْ طَابَحْ وَ قَاحَمْ وَ تَاحَشْ وَ مَعَاكَةْ. |
La Bible en arabe tchadien © Alliance biblique du Tchad, 2019
Bible Society of Chad