تكوين 11 - الكتاب المقدس بالعربي الدارجي هنا تشاد

بُنى قصِر بَابِل

¹ زَمَانْ، كُلَّ النَّاسْ قَاعِدِينْ يِحَجُّوا بِلُغَّةْ وَاحِدَةْ وَ بِلِسَانْ وَاحِدْ.

² وَ النَّاسْ حَوَّلَوْا مِنْ صَبَاحْ وَ لِقَوْا سَهَلَةْ وَسِيعَةْ فِي بَلَدْ شِنْعَارْ وَ سَكَنَوْا فَوْقهَا.

³ وَ قَالَوْا أَمْبَيْنَاتْهُمْ: «تَعَالُوا! نَخْدُمُوا وَ نِسَلُّلُوا دِرِنْقَيْل وَ نُتُشُّوهُمْ.» وَ خَلَاصْ، فِي بَدَلْ الْحَجَرْ أَسْتَعْمَلَوْا الدِّرِنْقَيْل وَ أَمْبَيْنَاتْ الدِّرِنْقَيْل صَبَّوْا الزِّفْت بَدَلْ الطِّينَةْ.

⁴ خَلَاصْ قَالَوْا: «تَعَالُوا نِسَوُّوا لَيْنَا مَدِينَةْ وَ نَبْنُوا قَصِرْ طَوِيلْ الرَّاسَهْ يَلْحَقْ السَّمَاءْ أَشَانْ أُسُمْنَا يَبْقَى طَالِعْ وَ مَا نِشِتُّوا فِي الْأَرْض.»

⁵ وَ وَكِتْ النَّاسْ يِدَوْرُوا يَلْحَقَوْا السَّمَاءْ، مِنْ فَوْق اللّٰهْ شَافَاهُمْ وَ شَافْ الْمَدِينَةْ وَ الْقَصِرْ الْبَنِي آدَم قَاعِدِينْ يَبْنُوهْ.

⁶ وَ اللّٰهْ قَالْ: «دَاهُو هُمَّنْ شَعَبْ وَاحِدْ وَ لُغِّتْهُمْ كُلَ وَاحِدَةْ. وَ دِي بِدَايَةْ خِدْمِتْهُمْ. كَنْ دَوَّرَوْا يِسَوُّوا خِدْمَةْ آخَرَةْ كُلَ، مَا فِي شَيّءْ يَدْحَرْهُمْ!

⁷ خَلِّي نِبَرْجُلُوا لُغِّتْهُمْ أَشَانْ مَا يِلْفَاهَمَوْا أَمْبَيْنَاتْهُمْ.»

⁸ بِمِثِلْ دَا، اللّٰهْ شَتَّتَاهُمْ فِي كُلَّ الْأَرْض وَ هُمَّنْ خَلَّوْا مِنْهُمْ بُنَى هَنَا الْمَدِينَةْ.

⁹ وَ بَيْدَا بَسْ، الْمَدِينَةْ سَمَّوْهَا بَابِلْ (مَعَنَاتَهْ بَرْجَلَةْ) أَشَانْ اللّٰهْ بَرْجَلْ لُغَّةْ كُلَّ النَّاسْ وَ شَتَّتَاهُمْ فِي كُلَّ الْأَرْض.

الذُرّية من سَام لأَبْرَام

¹⁰ دَاهُو ذُرِّيَّةْ سَامْ. وَكِتْ سَامْ عِنْدَهْ 100 سَنَةْ، هُو وِلِدْ أَرْفَكْشَادْ بِسَنْتَيْن بَعَدْ الْغَرَقْ.

¹¹ وَ بَعَدْ وَالُودَةْ أَرْفَكْشَادْ، سَامْ عَاشْ بَتَّانْ 500 سَنَةْ وَ وِلِدْ أَوْلَادْ وَ بَنَاتْ آخَرِينْ.

¹² وَكِتْ أَرْفَكْشَادْ عِنْدَهْ 35 سَنَةْ، هُو وِلِدْ شَالَحْ.

¹³ وَ بَعَدْ وَالُودَةْ شَالَحْ، أَرْفَكْشَادْ عَاشْ بَتَّانْ 403 سَنَةْ وَ وِلِدْ أَوْلَادْ وَ بَنَاتْ آخَرِينْ.

¹⁴ وَكِتْ شَالَحْ عِنْدَهْ 30 سَنَةْ، هُو وِلِدْ عِبَارْ.

¹⁵ وَ بَعَدْ وَالُودَةْ عِبَارْ، شَالَحْ عَاشْ بَتَّانْ 403 سَنَةْ وَ وِلِدْ أَوْلَادْ وَ بَنَاتْ آخَرِينْ.

¹⁶ وَكِتْ عِبَارْ عِنْدَهْ 34 سَنَةْ، هُو وِلِدْ فَالَقْ.

¹⁷ وَ بَعَدْ وَالُودَةْ فَالَقْ، عِبَارْ عَاشْ بَتَّانْ 430 سَنَةْ وَ وِلِدْ أَوْلَادْ وَ بَنَاتْ آخَرِينْ.

¹⁸ وَكِتْ فَالَقْ عِنْدَهْ 30 سَنَةْ، هُو وِلِدْ رَعُوْ.

¹⁹ وَ بَعَدْ وَالُودَةْ رَعُوْ، فَالَقْ عَاشْ بَتَّانْ 209 سَنَةْ وَ وِلِدْ أَوْلَادْ وَ بَنَاتْ آخَرِينْ.

²⁰ وَكِتْ رَعُوْ عِنْدَهْ 32 سَنَةْ، هُو وِلِدْ سَرُوقْ.

²¹ وَ بَعَدْ وَالُودَةْ سَرُوقْ، رَعُوْ عَاشْ بَتَّانْ 207 سَنَةْ وَ وِلِدْ أَوْلَادْ وَ بَنَاتْ آخَرِينْ.

²² وَكِتْ سَرُوقْ عِنْدَهْ 30 سَنَةْ، هُو وِلِدْ نَاحُورْ.

²³ وَ بَعَدْ وَالُودَةْ نَاحُورْ، سَرُوقْ عَاشْ بَتَّانْ 200 سَنَةْ وَ وِلِدْ أَوْلَادْ وَ بَنَاتْ آخَرِينْ.

²⁴ وَكِتْ نَاحُورْ عِنْدَهْ 29 سَنَةْ، هُو وِلِدْ تَارَحْ.

²⁵ وَ بَعَدْ وَالُودَةْ تَارَحْ، نَاحُورْ عَاشْ 119 سَنَةْ وَ وِلِدْ أَوْلَادْ وَ بَنَاتْ آخَرِينْ.

²⁶ وَكِتْ تَارَحْ عِنْدَهْ 70 سَنَةْ، هُو وِلِدْ أَبْرَامْ وَ نَاحُورْ وَ هَرَّانْ.

ذُرّية تَارَح

²⁷ دَاهُو ذُرِّيَّةْ تَارَحْ. تَارَحْ وِلِدْ أَبْرَامْ وَ نَاحُورْ وَ هَرَّانْ. وَ هَرَّانْ وِلِدْ لُوطْ.

²⁸ وَ هَرَّانْ مَاتْ فِي الْبَلَدْ الْوِلْدَوْه فَوْقهَا فِي أُورْ الْكَلْدَانِيِّينْ وَكِتْ أَبُوهْ لِسَّاعْ قَاعِدْ حَيّ.

²⁹ أَبْرَامْ وَ نَاحُورْ أَخَدَوْا. مَرِةْ أَبْرَامْ أُسُمْهَا سَارَايْ وَ مَرِةْ نَاحُورْ أُسُمْهَا مِلْكَةْ بِنَيَّةْ هَرَّانْ. وَ هَرَّانْ دَا، هُو أَبُو مِلْكَةْ وَ أَبُو يِسْكَةْ كُلَ.

³⁰ وَ سَارَايْ هِي عَاقْرَةْ مَا وِلْدَتْ.

³¹ وَ فِي الْوَكِتْ دَا، تَارَحْ شَالْ مَعَايَهْ وِلَيْدَهْ أَبْرَامْ وَ لُوطْ وِلَيْد وِلَيْدَهْ هَرَّانْ وَ سَارَايْ مَرِةْ وِلَيْدَهْ أَبْرَامْ. وَ مَرَقَوْا سَوَا مِنْ أُورْ الْكَلْدَانِيِّينْ وَ مَشَوْا عَلَيْ دَارْ كَنْعَانْ. وَ وَصَّلَوْا فِي حِلَّةْ حَارَانْ الْقَاعِدَةْ فِي دَرِبْ كَنْعَانْ وَ سَكَنَوْا فَوْقهَا.

³² وَ فِي الْبَكَانْ دَا، تَارَحْ مَاتْ فِي حِلَّةْ حَارَانْ وَ عِنْدَهْ 205 سَنَةْ.