غَلاطِية 5 - الكتاب المقدس بالعربي الدارجي هنا تشاد

أقْعُدوا ثابْتين في الحُرّيّة

¹ الْمَسِيحْ سَوَّانَا نَاسْ حُرِّينْ أَشَانْ نِعِيشُوا فِي الْحُرِّيَّةْ. أَقْعُدُوا ثَابْتِينْ فِي الْحُرِّيَّةْ وَ آبَوْا مَا تَبْقَوْا بَتَّانْ عَبِيدْ.

² فُكُّوا أَدَانْكُو. أَنَا بُولُسْ نُقُولْ لَيْكُو كَنْ تِخَلُّوهُمْ يِطَهُّرُوكُو، بَرَكَةْ الْمَسِيحْ مَا تَنْفَعْ لَيْكُو أَبَداً.

³ نَشْهَدْ لَيْكُو بَتَّانْ كَدَرْ أَيِّ نَادُمْ الْيِخَلِّي نَفْسَهْ يِطَهُّرُوهْ بِطَهُورَةْ التَّوْرَاةْ، وَاجِبْ لَيَّهْ يِطَبِّقْ شُرُوطْ التَّوْرَاةْ كُلُّهُمْ كَيْ.

⁴ إِنْتُو التِّدَوْرُوا تَبْقَوْا صَالِحِينْ بِطَبِّقِينْ شُرُوطْ التَّوْرَاةْ دَوْل، أَنْفَرَقْتُوا مَرَّةْ وَاحِدْ مِنْ الْمَسِيحْ وَ خَلَّيْتُوا مِنْكُو نِعْمَةْ اللّٰهْ.

⁵ لَاكِنْ بِقُدْرَةْ الرُّوحْ الْقُدُّوسْ، أَنِحْنَ نُخُطُّوا عَشَمْنَا فِي اللّٰهْ الْيِسَوِّينَا صَالِحِينْ بِسَبَبْ إِيمَانَّا الْقَاعِدِينْ نِتْمَنَّوْه بِزِيَادَةْ.

⁶ أَشَانْ فِي دَرِبْ الْمَسِيحْ عِيسَى، كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، هُو الْإِيمَانْ بِالْمَسِيحْ وَ الْمَحَبَّةْ الْجَايَةْ مِنْ الْإِيمَانْ دَا.

⁷ بَدَيْتُوا عَدِيلْ فِي دَرِبْ الْمَسِيحْ. كِكَّيْف خَلَّيْتُوا نَادُمْ يَمْرُقْكُو مِنْ الدَّرِبْ الصَّحِيحْ دَا؟

⁸ الْكَلَامْ دَا مَا جَايِ مِنْ اللّٰهْ الْقَاعِدْ يِنَادِيكُو.

⁹ أَنْقَرْعُوا! تَوَّارَةْ شِيَّةْ بَسْ تَكْفِي لِتِقَوِّمْ الْعَجِينَةْ كُلَّهَا كَيْ.

¹⁰ لَاكِنْ الرَّبّ أَنْطَانِي ضَمَانْ لَيْكُو وَ نَعَرِفْ كَدَرْ إِنْتُو مَا تَقْبَلَوْا فِكِرْ شِقْ مِنْ فِكِرْنَا. وَ النَّادُمْ الْقَاعِدْ يِبَرْجِلْكُو دَا، الْحُكُمْ يَجِي فَوْقَهْ كَنْ يَبْقَى يَاتُو كُلَ.

¹¹ يَا أَخْوَانِي، كَنْ أَنَا ذَاتِي قَاعِدْ نِعَلِّمْ النَّاسْ كَدَرْ الطَّهُورَةْ وَاجْبَةْ، مَالَا الْيَهُودْ قَاعِدِينْ يِتَعُّبُونِي؟ كَنْ أَوَّلْ أَنَا نِعَلِّمْ بِالطَّهُورَةْ وَ مَا نِبَشِّرْ بِالصَّلِيبْ، نَادُمْ مَا يَلْقَى مُشْكِلَةْ.

¹² وَ هَسَّعْ لِلنَّاسْ الْقَاعِدِينْ يِبَرْجُلُوكُو بِالطَّهُورَةْ دَوْل، خَلِّي يِخَصُّوا نُفُوسْهُمْ مَرَّةْ وَاحِدْ!

درِب الروح القُدّوس

¹³ يَا أَخْوَانِي، اللّٰهْ نَادَاكُو أَشَانْ يِدَوْر إِنْتُو تِعِيشُوا فِي الْحُرِّيَّةْ. لَاكِنْ مَا تِسَوُّوا الْحُرِّيَّةْ دِي فُرْصَةْ لِتِتَابُعُوا شَهْوَاتْكُو الْفَسْلِينْ. أَخَيْر تَخْدُمُوا لِأَخْوَانْكُو بِمَحَبَّةْ.

¹⁴ أَشَانْ كُلَّ شُرُوطْ التَّوْرَاةْ، زِبْدِتْهُمْ تِنْلَقِي فِي وَصِيَّةْ وَاحِدَةْ وَ هِي: <حِبّ أَخُوكْ مِثِلْ تِحِبّ نَفْسَكْ.>

¹⁵ لَاكِنْ كَنْ تِلْخَالَفَوْا أَمْبَيْنَاتْكُو وَ تِدَّاوَسَوْا مِثِلْ كُلابْ، خَلَاصْ فِي الأَخِيرْ تِلْآكَلَوْا مَرَّةْ وَاحِدْ.

¹⁶ نُقُولْ لَيْكُو تَابُعُوا اللّٰهْ بِدَرِبْ الرُّوحْ الْقُدُّوسْ وَ مِثِلْ دَا، مَا تِتَابُعُوا شَهْوَاتْكُو الْفَسْلِينْ.

¹⁷ أَشَانْ الشَّيّءْ الْيِرِيدَهْ قَلِبْ الْإِنْسَانْ شِقْ مِنْ الْيِرِيدَهْ الرُّوحْ الْقُدُّوسْ. وَ الشَّيّءْ الْيِرِيدَهْ الرُّوحْ الْقُدُّوسْ شِقْ مِنْ الْيِرِيدَهْ قَلِبْ الْإِنْسَانْ. الْإِتْنَيْن دَوْل يِدَّاوَسَوْا أَمْبَيْنَاتْهُمْ أَشَانْ يَدْحَرَوْكُو مِنْ الشَّيّءْ التِّدَوْرُوا تِسَوُّوهْ.

¹⁸ وَ كَنْ الرُّوحْ الْقُدُّوسْ قَاعِدْ يُقُودْكُو، إِنْتُو مَا قَاعِدِينْ تِحِتْ شُرُوطْ التَّوْرَاةْ.

¹⁹ وَ خَلَاصْ، الذُّنُوبْ الْيَجُوا مِنْ قَلِبْ الْإِنْسَانْ مَعْرُوفِينْ. هُمَّنْ الزِّنَى وَ الْخَبَاثَةْ وَ الْفَسَادْ

²⁰ وَ عِبَادَةْ الْأَصْنَامْ وَ السِّحِرْ وَ الْهُرَاجْ وَ الدُّوَاسْ وَ الْحُسُدْ وَ الْغَبِينَةْ وَ الْخِلَافْ وَ الْمُخَاصَمَاتْ وَ التَّفْرِقَةْ

²¹ وَ الطَّمَعْ وَ السَّكَرْ وَ السَّفَاهَةْ وَ شَيّءْ آخَرْ الْمِثِلْهُمْ. نُقُولْ لَيْكُو مِثِلْ أَوَّلْ قُلْتَهْ لَيْكُو، النَّاسْ الْيِسَوُّوا الْأَشْيَاءْ دَوْل مَا يَوْرُثُوا شَيّءْ فِي مَمْلَكَةْ اللّٰهْ.

²² لَاكِنْ مِثِلْ الشَّدَرْ يَلْدَ عِيَالْ، دَاهُو عِيَالْ الرُّوحْ الْقُدُّوسْ هُمَّنْ الْمَحَبَّةْ وَ الْفَرَحْ وَ السَّلَامْ وَ الصَّبُرْ وَ الْقَلِبْ الْأَبْيَضْ وَ الْخَيْر وَ الْأَمَانْ

²³ وَ النَّفَسْ الْبَارِدْ وَ ثَبِّتِينْ النَّفْس. الْأَشْيَاءْ دَوْل، مَا فِي شَرْط وَاحِدْ ضِدُّهُمْ.

²⁴ وَ النَّاسْ الْبِقَوْا نَاسْ هَنَا الْمَسِيحْ عِيسَى خَطَّوْا شَهْوَاتْهُمْ الْفَسْلِينْ فِي الصَّلِيبْ وَ كَتَلَوْهُمْ.

²⁵ وَ كَنْ نِعِيشُوا بِقُدْرَةْ الرُّوحْ الْقُدُّوسْ، وَاجِبْ نُرُوغُوا بِقُدْرَةْ الرُّوحْ الْقُدُّوسْ.

²⁶ خَلِّي مَا نِسْتَكْبَرَوْا وَ لَا نِزَّاعَلَوْا أَمْبَيْنَاتْنَا وَ لَا نِلْحَاسَدَوْا.