عَزْرا 3 - الكتاب المقدس بالعربي الدارجي هنا تشاديَشُوع و زَرُبَابِل بنوا مدْبح 1 وَ وَكِتْ الشَّهَرْ السَّابِعْ جَاءْ، كُلَّ بَنِي إِسْرَائِيلْ جَوْا مِنْ مُدُنْهُمْ وَ لَمَّوْا فِي مَدِينَةْ الْقُدُسْ بِقَلِبْ وَاحِدْ. 2 وَ يَشُوعْ وِلَيْد يُوصَادِقْ مَعَ أَخْوَانَهْ رُجَالْ الدِّينْ وَ زَرُبَابِلْ وِلَيْد شَلْتِيِيلْ مَعَ أَخْوَانَهْ، هُمَّنْ بَنَوْا مَدْبَحْ لِلّٰهْ إِلٰـهْ بَنِي إِسْرَائِيلْ أَشَانْ يِقَدُّمُوا فَوْقَهْ ضَحَايَا مُحَرَّقِينْ مِثِلْ مَكْتُوبْ فِي تَوْرَاةْ مُوسَى عَبْد اللّٰهْ. 3 وَ هُمَّنْ خَايْفِينْ مِنْ الْقَبَايِلْ الْمُحَوِّقِينْهُمْ وَ لَاكِنْ بِخَوْفهُمْ دَا كُلَ، بَنَوْا الْمَدْبَحْ فِي أَسَاسَهْ الْأَوَّلْ. وَ قَدَّمَوْا فَوْقَهْ ضَحَايَا مُحَرَّقِينْ لِلّٰهْ. وَ دَوْل ضَحَايَا هَنَا الْفَجُرْ وَ هَنَا الْعَشِيَّةْ. 4 وَ عَيَّدَوْا عِيدْ اللَّقَادِيبْ مِثِلْ مَكْتُوبْ فِي كِتَابْ التَّوْرَاةْ. وَ فِي طُولْ أَيَّامْ الْعِيدْ، كُلَّ يَوْم يِقَدُّمُوا ضَحَايَا عَدَدْ الْوَاجِبْ حَسَبْ الشُّرُوطْ. 5 وَ بَعَدْ الْعِيدْ، قَدَّمَوْا ضَحِيَّةْ مُحَرَّقَةْ دَايْمَةْ وَ ضَحِيَّةْ هَنَا أَوَّلْ يَوْم فِي كُلِّ شَهَرْ وَ ضَحِيَّةْ هَنَا كُلِّ يَوْم عِيدْ مُقَدَّسْ لِلّٰهْ وَ ضَحَايَا هَنَا النَّاسْ الْأَنْطَوْهُمْ بِنِيِّتْهُمْ. 6 وَ قَبُلْ أَسَاسْ بَيْت اللّٰهْ مَا خَطَّوْه، هُمَّنْ بَدَوْا يِقَدُّمُوا ضَحَايَا مُحَرَّقِينْ لِلّٰهْ مِنْ الْيَوْم الْأَوَّلْ هَنَا الشَّهَرْ السَّابِعْ. بِداية بُنى بيت اللّه 7 وَ أَنْطَوْا فُضَّةْ لِلنَّاسْ الْقَطَعَوْا حُجَارْ الْبُنَى وَ لِلْخَشَّابِينْ. وَ رَسَّلَوْا مَعَاشْ وَ شَرَابْ وَ دِهِنْ لِنَاسْ مُدُنْ صَيْدَا وَ صُورْ أَشَانْ يِجِيبُوا لَيْهُمْ خَشَبْ هَنَا شَدَرْ الْأَرْز مِنْ بَلَدْ لُبْنَانْ وَ يِوَدُّوهْ بِالْبَحَرْ لَحَدِّي حِلَّةْ يَافَا. وَ دَا كُلَّ سَوَّوْه بِإِذِنْ كُورَشْ مَلِكْ بَلَدْ فَارِسْ. 8 وَ فِي الشَّهَرْ التَّانِي هَنَا السَّنَةْ التَّانِيَةْ بَعَدْ قَبَّلَوْا مِنْ الْغُرْبَةْ، زَرُبَابِلْ وِلَيْد شَلْتِيِيلْ وَ يَشُوعْ وِلَيْد يُوصَادِقْ وَ أَخْوَانْهُمْ رُجَالْ الدِّينْ الْآخَرِينْ وَ اللَّاوِيِّينْ وَ كُلَّ النَّاسْ الْقَبَّلَوْا مِنْ الْغُرْبَةْ، كُلُّهُمْ جَوْا فِي مَدِينَةْ الْقُدُسْ وَ بَدَوْا الْخِدْمَةْ. وَ وَكَّلَوْا اللَّاوِيِّينْ الْعُمُرْهُمْ مِنْ 20 سَنَةْ وَ فَوْق أَشَانْ يِرَاقُبُوا بُنَى بَيْت اللّٰهْ. 9 وَ يَشُوعْ الْمِنْ اللَّاوِيِّينْ مَعَ عِيَالَهْ وَ أَخْوَانَهْ وَ قَدْمِيِيلْ مَعَ عِيَالَهْ الْمِنْ قَبِيلَةْ يَهُوذَا، هُمَّنْ كُلُّهُمْ يِرَاقُبُوا بَنَّايِينْ بَيْت اللّٰهْ. وَ حِنَدَادْ الْمِنْ اللَّاوِيِّينْ مَعَ عِيَالَهْ وَ أَخْوَانَهْ كُلَ مَعَاهُمْ. 10 وَ وَكِتْ الْبَنَّايِينْ خَطَّوْا أَسَاسْ بَيْت اللّٰهْ، رُجَالْ الدِّينْ قَعَدَوْا أَيِّ وَاحِدْ فِي بَكَانَهْ بِخُلْقَانَهْ الْخَاصِّيْن وَ بِبُرُنْجِي فِي إِيدَهْ. وَ اللَّاوِيِّينْ مِنْ ذُرِّيَّةْ أَسَافْ قَعَدَوْا بِنَقَاقِيرْ أَشَانْ يَحْمُدُوا اللّٰهْ مِثِلْ دَاوُدْ مَلِكْ إِسْرَائِيلْ زَمَانْ أَمَرَاهُمْ بَيَّهْ. 11 وَ مَجْمُوعَةْ وَاحِدَةْ مِنْهُمْ حَمَدَتْ وَ شَكَرَتْ اللّٰهْ بِغِنَيْ وَ الْآخَرِينْ رَفَعَوْا وَ قَالَوْا: «إِنْتَ رَحِيمْ وَ رَحْمَتَكْ دَايْمَةْ فِي إِسْرَائِيلْ إِلَى الْأَبَدْ!» وَ كُلَّ الشَّعَبْ قَمَّوْا فِرْحَوْا بِزِيَادَةْ وَ حَمَدَوْا اللّٰهْ أَشَانْ خَطَّوْا أَسَاسْ بَيْت اللّٰهْ. 12 وَ لَاكِنْ كَتِيرِينْ مِنْ الشِّيَّابْ وَ رُجَالْ الدِّينْ وَ اللَّاوِيِّينْ وَ كُبَارَاتْ الْعَايِلَاتْ، وَكِتْ خَطَّوْا أَسَاسْ بَيْت اللّٰهْ قِدَّامْهُمْ، بَكَوْا بِحِسّ عَالِي أَشَانْ هُمَّنْ شَافَوْا بَيْت اللّٰهْ الزَّمَانِي. وَ نَاسْ آخَرِينْ كَمَانْ عَاطَوْا بِفَرْحَةْ. 13 وَ النَّاسْ مَا قِدْرَوْا مَيَّزَوْا مِنْ عَايِطْ الْفَرْحَةْ وَ مِنْ الْبَكِي أَشَانْ كُلَّ الشَّعَبْ قَاعِدِينْ يِعِيطُوا بِلْحَيْن وَ حَرَكَتْهُمْ قَاعِدَةْ تِنْسَمِعْ مِنْ بَعِيدْ. |
La Bible en arabe tchadien © Alliance biblique du Tchad, 2019
Bible Society of Chad