خُروج 7 - الكتاب المقدس بالعربي الدارجي هنا تشاد

¹ خَلَاصْ، اللّٰهْ قَالْ لِمُوسَى: «أَسْمَعْ عَدِيلْ. أَنَا نِسَوِّي كَلَامَكْ مِثِلْ كَلَامْ إِلٰـهْ قِدَّامْ الْمَلِكْ وَ هَارُونْ أَخُوكْ يَبْقَى لَيْك مِثِلْ رَسُولَكْ.

² إِنْتَ تِحَجِّي لِهَارُونْ بِكُلَّ شَيّءْ الْأَنَا أَمَرْتَكْ بَيَّهْ. وَ هَارُونْ كَمَانْ يِحَجِّي لِلْمَلِكْ لِيِخَلِّي بَنِي إِسْرَائِيلْ يَمُرْقُوا مِنْ بَلَدَهْ.

³ وَ أَنَا نِقَوِّي رَاسْ الْمَلِكْ وَ نِكَتِّرْ عَلَامَاتِي وَ عَجَايْبِي فِي بَلَدْ مَصِرْ.

⁴ وَ لَاكِنْ الْمَلِكْ يَابَى مَا يَسْمَعْكُو. وَ بِإِيدِي أَنَا، نِنَزِّلْ غَضَبِي فِي مَصِرْ. وَ بِعِقَابِي الْعَجِيبْ، نَمْرُقْ شَعَبِي بَنِي إِسْرَائِيلْ مِنْ مَصِرْ حَسَبْ مَجْمُوعَاتْهُمْ.

⁵ وَ وَكِتْ أَنَا نِمِدّ إِيدِي وَ نَضْرُبْ مَصِرْ وَ نَمْرُقْ بَنِي إِسْرَائِيلْ مِنْهَا، خَلَاصْ الْمَصْرِيِّينْ يَعَرْفُوا كَدَرْ أَنَا بَسْ اللّٰهْ.»

⁶ وَ خَلَاصْ، مُوسَى وَ هَارُونْ سَوَّوْا كُلَّ شَيّءْ مِثِلْ اللّٰهْ أَمَرَاهُمْ بَيَّهْ.

⁷ مُوسَى عُمْرَهْ 80 سَنَةْ وَ هَارُونْ عُمْرَهْ 83 سَنَةْ وَكِتْ مَشَوْا حَجَّوْا لِمَلِكْ مَصِرْ.

الملك راسه بِقي قوي

⁸ وَ اللّٰهْ قَالْ لِمُوسَى وَ هَارُونْ:

⁹ «أَكُونْ الْمَلِكْ يُقُولْ لَيْكُو: ‹سَوُّوا قِدَّامِي شَيّءْ وَاحِدْ عَجِيبْ.› خَلَاصْ، إِنْتَ تُقُولْ لِهَارُونْ: ‹شِيلْ عَصَاتَكْ وَ أَزْقُلْهَا قِدَّامْ الْمَلِكْ.› وَ الْعَصَاةْ تَبْقَى دَابِي.»

¹⁰ وَ خَلَاصْ مُوسَى وَ هَارُونْ مَشَوْا لِلْمَلِكْ وَ سَوَّوْا مِثِلْ اللّٰهْ أَمَرَاهُمْ بَيَّهْ. هَارُونْ زَقَلْ عَصَاتَهْ قِدَّامْ الْمَلِكْ مَعَ خَدَّامِينَهْ وَ الْعَصَاةْ بِقَتْ دَابِي.

¹¹ وَ الْمَلِكْ نَادَى الْعُلَمَاءْ وَ السَّحَّارِينْ هَنَا مَصِرْ. هُمَّنْ كُلَ بِسِحِرْهُمْ سَوَّوْا نَفْس الشَّيّءْ

¹² وَ أَيِّ وَاحِدْ مِنْهُمْ زَقَلْ عَصَاتَهْ وَ عِصَيْهُمْ بِقَوْا دَبِيبْ. وَ لَاكِنْ عَصَاةْ هَارُونْ زَرَطَتْ عِصَيْهُمْ.

¹³ وَ بَيْدَا كُلَ، الْمَلِكْ رَاسَهْ بِقِي قَوِي وَ أَبَى مَا سِمِعْ كَلَامْ مُوسَى وَ هَارُونْ مِثِلْ اللّٰهْ قَالَهْ.

الوباء هنا ألْمي البِقي دمّ

¹⁴ وَ اللّٰهْ قَالْ لِمُوسَى: «الْمَلِكْ هُو رَاسَهْ قَوِي مَا يِدَوْر يِخَلِّي بَنِي إِسْرَائِيلْ يَمُرْقُوا.

¹⁵ قُمّ أَمْشِي لَيَّهْ بِفَجُرْ وَ تَلْقَاهْ مَارِقْ مَاشِي عَلَيْ بَحَرْ النِّيلْ. وَ إِنْتَ أَمْشِي قَابِلَهْ فِي خَشُمْ الْبَحَرْ. وَ شِيلْ فِي إِيدَكْ الْعَصَاةْ الْأَوَّلْ بِقَتْ دَابِي.

¹⁶ وَ قُولْ لِلْمَلِكْ: ‹اللّٰهْ رَبّ الْعِبْرَانِيِّينْ رَسَّلَانِي وَ هُو يُقُولْ لَيْك: ”خَلِّي شَعَبِي يَمُرْقُوا مِنْ بَلَدَكْ لِيَعَبُدُونِي فِي الصَّحَرَاء. لَاكِنْ دَاهُو يَا هَسَّعْ كُلَ، إِنْتَ أَبَيْت.“

¹⁷ خَلَاصْ، دَاهُو اللّٰهْ قَالْ: ”بِمِثِلْ دَا، إِنْتَ تَعَرِفْ كَدَرْ أَنَا بَسْ اللّٰهْ.“ وَ دَا، وَكِتْ أَنَا مُوسَى نَضْرُبْ أَلْمِي بَحَرْ النِّيلْ بِالْعَصَاةْ الْفِي إِيدِي وَ الْأَلْمِي يَبْقَى دَمّ.

¹⁸ وَ حُوتْ الْبَحَرْ يُمُوتُوا وَ الْبَحَرْ يَبْقَى عَفِنْ وَ الْمَصْرِيِّينْ مَا يَقْدَرَوْا يَشَرْبَوْا الْأَلْمِي دَا.›»

¹⁹ وَ بَتَّانْ اللّٰهْ قَالْ لِمُوسَى: «قُولْ لِهَارُونْ يِشِيلْ عَصَاتَهْ وَ يِمِدَّهَا عَلَيْ كُلَّ الْأَلْمِي هَنَا مَصِرْ، أَلْمِي الْفِي الْبُحُورْ وَ الرُّجُولْ وَ الرُّهُودْ وَ فِي كُلَّ بَكَانْ الْعِنْدَهْ أَلْمِي. وَ كُلَّ الْأَلْمِي دَا يَبْقَى دَمّ. وَ الدَّمّ يُكُونْ فِي كُلَّ بَلَدْ مَصِرْ لَحَدِّي الْأَلْمِي الْقَاعِدْ فِي مَوَاعِينْ هَنَا حَطَبْ وَ حَجَرْ.»

²⁰ وَ خَلَاصْ، مُوسَى وَ هَارُونْ سَوَّوْا كُلَّ شَيّءْ مِثِلْ اللّٰهْ أَمَرَاهُمْ بَيَّهْ. وَ هَارُونْ رَفَعْ الْعَصَاةْ وَ ضَرَبْ أَلْمِي بَحَرْ النِّيلْ قِدَّامْ الْمَلِكْ وَ خَدَّامِينَهْ. وَ كُلَّ أَلْمِي الْبَحَرْ بِقِي دَمّ.

²¹ وَ حُوتْ الْبَحَرْ مَاتَوْا وَ الْبَحَرْ بِقِي عَفِنْ. وَ الْمَصْرِيِّينْ مَا قِدْرَوْا شِرْبَوْا الْأَلْمِي دَا. وَ أَلْمِي فِي كُلَّ بَلَدْ مَصِرْ بِقِي دَمّ.

²² وَ لَاكِنْ السَّحَّارِينْ هَنَا مَصِرْ سَوَّوْا نَفْس الشَّيّءْ بِسِحِرْهُمْ. وَ رَاسْ الْمَلِكْ بِقِي قَوِي وَ أَبَى مَا سِمِعْ كَلَامْ مُوسَى وَ هَارُونْ مِثِلْ اللّٰهْ قَالَهْ.

²³ وَ الْمَلِكْ قَبَّلْ مَشَى بَيْتَهْ وَ مَا هَمَّ بِالشَّيّءْ دَا.

²⁴ وَ كُلَّ الْمَصْرِيِّينْ نَكَتَوْا نُقَارْ جَنْب الْبَحَرْ لِيَلْقَوْا أَلْمِي يَشَرْبَوْه أَشَانْ أَلْمِي الْبَحَرْ مَا بِنْشَرِبْ.

²⁵ وَ تَمَّ سَبْعَةْ يَوْم مِنْ اللّٰهْ ضَرَبْ الْبَحَرْ بِالْوَبَاءْ دَا.