خُروج 6 - الكتاب المقدس بالعربي الدارجي هنا تشاد

¹ وَ اللّٰهْ قَالْ لِمُوسَى: «هَسَّعْ دَا، إِنْتَ تِشِيفْ الشَّيّءْ النِّسَوِّيهْ لِلْمَلِكْ! بِإِيدِي الشَّدِيدَةْ، نَجْبُرَهْ وَ يِخَلِّي بَنِي إِسْرَائِيلْ يَمُرْقُوا. وَ بِقُدُرْتِي الشَّدِيدَةْ، نَجْبُرَهْ وَ يَطْرُدْهُمْ مِنْ دَارَهْ.»

اللّه قال ينجّي بني إسرائيل

² وَ بَعَدْ دَا، الرَّبّ قَالْ بَتَّانْ لِمُوسَى: «أَنَا بَسْ اللّٰهْ.

³ أَنَا بَيَّنْت نَفْسِي لِإِبْرَاهِيمْ وَ إِسْحَاقْ وَ يَعْقُوبْ وَ قُلْت لَيْهُمْ أُسْمِي اللّٰهْ الْقَادِرْ. لَاكِنْ مَا أَوْرَيْتهُمْ كَدَرْ أَنَا أُسْمِي اللّٰهْ الْحَيّ.

⁴ وَ أَنَا سَوَّيْت مَعَاهُمْ مُعَاهَدَتِي وَ قُلْت نَنْطِيهُمْ بَلَدْ كَنْعَانْ الْهُمَّنْ قَاعِدِينْ فَوْقهَا أَجَانِبْ.

⁵ وَ هَسَّعْ، أَنَا سِمِعْت قَنِيتْ بَنِي إِسْرَائِيلْ الْقَاعِدِينْ يِعَبُّدُوهُمْ الْمَصْرِيِّينْ وَ أَنَا فَكَّرْت فِي مُعَاهَدَتِي السَّوَّيْتهَا مَعَاهُمْ.

⁶ فِي شَانْ دَا، قُولْ لِبَنِي إِسْرَائِيلْ: ‹أَنَا اللّٰهْ. نَمْرُقْكُو مِنْ الْعُبُودِيَّةْ وَ نِنَجِّيكُو مِنْ الْخِدْمَةْ الْقَاسِيَةْ هَنَا الْمَصْرِيِّينْ. وَ نَفْدَاكُو بِدُرَاعْ قَوِي وَ بِعِقَابْ عَجِيبْ.

⁷ وَ تَبْقَوْا شَعَبِي وَ أَنَا نَبْقَى إِلٰـهْكُو. وَ فِي الْوَكِتْ دَا، تَعَرْفُوا كَدَرْ أَنَا بَسْ اللّٰهْ إِلٰـهْكُو الْمَرَقْتُكُو مِنْ الْعُبُودِيَّةْ هَنَا الْمَصْرِيِّينْ

⁸ وَ وَدَّيْتكُو فِي الْبَلَدْ الْحَلَفْت نَنْطِيهَا لِإِبْرَاهِيمْ وَ إِسْحَاقْ وَ يَعْقُوبْ وَ نَنْطِيهَا لَيْكُو إِنْتُو وَرَثَةْ. أَنَا بَسْ اللّٰهْ.›»

⁹ وَ مُوسَى كَلَّمْ الْكَلَامْ دَا لِبَنِي إِسْرَائِيلْ. لَاكِنْ هُمَّنْ مَا سِمْعَوْا كَلَامَهْ أَشَانْ أَيَّسَوْا مِنْ شِدَّةْ الْخِدْمَةْ الْقَاسِيَةْ.

¹⁰ وَ بَتَّانْ اللّٰهْ حَجَّى لِمُوسَى وَ قَالْ:

¹¹ «أَمْشِي لِفِرْعَوْن مَلِكْ مَصِرْ وَ قُولْ لَيَّهْ: ‹خَلِّي بَنِي إِسْرَائِيلْ يَمُرْقُوا مِنْ بَلَدَكْ!›»

¹² وَ مُوسَى قَالْ لِلّٰهْ: «بَنِي إِسْرَائِيلْ أَبَوْا مَا يَسْمَعَوْا كَلَامِي. كِكَّيْف الْمَلِكْ يَقْدَرْ يَسْمَعْ كَلَامِي، أَنَا الْخَشْمِي تَقِيلْ؟»

¹³ وَ خَلَاصْ، اللّٰهْ حَجَّى لِمُوسَى وَ هَارُونْ وَ قَالْ لَيْهُمْ يَمْشُوا لِبَنِي إِسْرَائِيلْ وَ فِرْعَوْن مَلِكْ مَصِرْ وَ يَامُرُوهُمْ أَشَانْ بَنِي إِسْرَائِيلْ يَمُرْقُوا مِنْ مَصِرْ.

خُشوم بُيوت عيال يَعْقُوب

¹⁴ دَاهُو أَسَامَيْ هَنَا كُبَارَاتْ قَبَايِلْ بَنِي إِسْرَائِيلْ. رَأُوبِينْ هُو بِكِرْ يَعْقُوبْ. وَ أَوْلَادْ رَأُوبِينْ هُمَّنْ حَنُوكْ وَ فَلُّو وَ حَصْرُونْ وَ كَرْمِي. وَ هُمَّنْ دَوْل بِقَوْا خُشُومْ بُيُوتْ رَأُوبِينْ.

¹⁵ وَ أَوْلَادْ شِمْعُونْ هُمَّنْ يَمُوِيلْ وَ يَامِينْ وَ أُهَدْ وَ يَاكِينْ وَ صُوحَرْ وَ شَاوُولْ، هُو الْأَمَّهْ مِنْ بَلَدْ كَنْعَانْ. وَ هُمَّنْ دَوْل بِقَوْا خُشُومْ بُيُوتْ شِمْعُونْ.

¹⁶ وَ دَاهُو ذُرِّيَّةْ لَاوِي. لَاوِي عِنْدَهْ تَلَاتَةْ أَوْلَادْ. وَ هُمَّنْ قِرْشُونْ وَ قَهَاتْ وَ مَرَارِي. وَ لَاوِي عَاشْ 137 سَنَةْ.

¹⁷ وَ أَوْلَادْ قِرْشُونْ هُمَّنْ لِبْنِي وَ شِمْعِي مَعَ عَايِلَاتْهُمْ.

¹⁸ وَ أَوْلَادْ قَهَاتْ هُمَّنْ عَمْرَامْ وَ يِصْهَارْ وَ حَبْرُونْ وَ عُزِّيِيلْ. وَ قَهَاتْ عَاشْ 133 سَنَةْ.

¹⁹ وَ أَوْلَادْ مَرَارِي هُمَّنْ مَحْلِي وَ مُوشِي. وَ هُمَّنْ دَوْل كُلُّهُمْ بِقَوْا خُشُومْ بُيُوتْ لَاوِي حَسَبْ ذُرِّيِّتْهُمْ.

²⁰ وَ عَمْرَامْ أَخَدْ يُوكَابَدْ عِمِّتَهْ وَ جَابَتْ لَيَّهْ أَوْلَادْ إِتْنَيْن وَ هُمَّنْ هَارُونْ وَ مُوسَى. وَ عَمْرَامْ عَاشْ 137 سَنَةْ.

²¹ وَ أَوْلَادْ يِصْهَارْ هُمَّنْ قُورَحْ وَ نَفَقْ وَ زِكْرِي.

²² وَ أَوْلَادْ عُزِّيِيلْ هُمَّنْ مِشَيِيلْ وَ أَلِصَافَنْ وَ سِتْرِي.

²³ وَ هَارُونْ أَخَدْ أَلِشَبَعْ هِي أَخُتْ نَحْشُونْ وَ بِنَيَّةْ عَمِنَدَابْ. وَ هِي جَابَتْ لَيَّهْ نَدَابْ وَ أَبِيهُو وَ أَلِعَازَرْ وَ إِتَمَارْ.

²⁴ وَ أَوْلَادْ قُورَحْ هُمَّنْ أَسِّيرْ وَ أَلِقَانَى وَ أَبِيَاسَفْ. وَ هُمَّنْ دَوْل بِقَوْا خُشُومْ بُيُوتْ الْقُورَحِيِّينْ.

²⁵ وَ أَلِعَازَرْ وِلَيْد هَارُونْ أَخَدْ وَاحِدَةْ مِنْ بَنَاتْ فُوطِيِيلْ وَ هِي وِلْدَتْ لَيَّهْ فِينْحَاسْ. وَ دَوْل كُبَارَاتْ الْعَايِلَاتْ هَنَا خُشُومْ بُيُوتْ لَاوِي.

²⁶ وَ هَارُونْ وَ مُوسَى هُمَّنْ بَسْ النَّاسَيْن الْاللّٰهْ قَالْ لَيْهُمْ: «أَمُرْقُوا بَنِي إِسْرَائِيلْ مِنْ مَصِرْ حَسَبْ مَجْمُوعَاتْهُمْ.»

²⁷ وَ مُوسَى وَ هَارُونْ هُمَّنْ بَسْ الْمَشَوْا وَ حَجَّوْا لِفِرْعَوْن مَلِكْ مَصِرْ لِيِخَلِّي بَنِي إِسْرَائِيلْ يَمُرْقُوا مِنْ مَصِرْ.

اللّه كلّف هَارُون يساعِد مُوسَى

²⁸ وَكِتْ اللّٰهْ حَجَّى لِمُوسَى فِي مَصِرْ،

²⁹ هُو قَالْ لَيَّهْ: «أَنَا بَسْ اللّٰهْ. أَمْشِي قُولْ لِفِرْعَوْن مَلِكْ مَصِرْ كُلَّ الْكَلَامْ النُّقُولَهْ لَيْك.»

³⁰ وَ مُوسَى قَالْ لَيَّهْ: «أَنَا خَشْمِي تَقِيلْ. كِكَّيْف الْمَلِكْ يَقْدَرْ يَسْمَعْ كَلَامِي؟»