خُروج 40 - الكتاب المقدس بالعربي الدارجي هنا تشاداللّه أمر يبْنوا خَيْمة الْعِبادة 1 وَ اللّٰهْ حَجَّى لِمُوسَى وَ قَالْ: 2 «فِي الْيَوْم الْأَوَّلْ هَنَا الشَّهَرْ الْأَوَّلْ، أَبْنِي لَيِّ خَيْمَةْ الْعِبَادَةْ وَ هِي خَيْمَةْ الْإِجْتِمَاعْ. 3 وَ فِي لُبّ الْخَيْمَةْ دِي، دِسّ الصَّنْدُوقْ الْفَوْقَهْ لِيحَانْ الْمُعَاهَدَةْ وَ دَارِقَهْ بِسِتَارْ. 4 وَ دِسّ الطَّرَبَيْزَةْ وَ جَهِّزْهَا. وَ بَتَّانْ دِسّ الْفَانُوسْ وَ وَلِّعْ نِيرَانَهْ. 5 وَ بَعَدْ دَا، الْمُخْبَرْ هَنَا الدَّهَبْ الْيِحَرُّقُوا فَوْقَهْ الْبَخُورْ خُطَّهْ قِدَّامْ الصَّنْدُوقْ. وَ بَابْ الْخَيْمَةْ سِدَّهْ بِسِتَارْ. 6 «وَ بَتَّانْ خُطّ الْمَدْبَحْ هَنَا الضَّحَايَا الْمُحَرَّقِينْ قِدَّامْ مَدَخَلْ خَيْمَةْ الْعِبَادَةْ وَ هِي خَيْمَةْ الْإِجْتِمَاعْ. 7 وَ الْحَوْط لِلْوَضُوءْ كَمَانْ، خُطَّهْ أَمْبَيْن خَيْمَةْ الْإِجْتِمَاعْ وَ الْمَدْبَحْ. وَ صُبّ فَوْقَهْ أَلْمِي. 8 وَ حَوِّقْ الْفَضَايْ هَنَا خَيْمَةْ الْإِجْتِمَاعْ بِسَتَايِرْ وَ سَوِّي لَيْهَا بَابْ. وَ بَابْهَا دَا كُلَ سِدَّهْ بِسِتَارْ. 9 «وَ شِيلْ دِهِنْ الْمَسَحَانْ وَ أَمْسَحْ بَيَّهْ الْخَيْمَةْ وَ كُلَّ الْأَشْيَاءْ الْقَاعِدِينْ فِي لُبَّهَا وَ خَصِّصْهُمْ. وَ بَيْدَا، هِي تَبْقَى مُقَدَّسَةْ وَ كُلَّ مُعِدَّاتْهَا كُلَ يَبْقَوْا مُقَدَّسِينْ. 10 وَ بَتَّانْ أَمْسَحْ الْمَدْبَحْ هَنَا الضَّحَايَا الْمُحَرَّقِينْ وَ مُعِدَّاتَهْ لِتِخَصِّصَهْ وَ هُو يَبْقَى مُقَدَّسْ مَرَّةْ وَاحِدْ. 11 وَ أَمْسَحْ الْحَوْط لِلْوَضُوءْ وَ قَعَرَهْ لِتِخَصِّصَهْ. 12 «وَ جِيبْ هَارُونْ وَ أَوْلَادَهْ فِي مَدَخَلْ خَيْمَةْ الْإِجْتِمَاعْ. وَ بَرِّدْهُمْ بِأَلْمِي الْحَوْط دَا. 13 وَ بَعَدْ دَا، لَبِّسْ هَارُونْ الْخُلْقَانْ الْخَاصِّينْ وَ أَمْسَحَهْ وَ خَصِّصَهْ لِيَبْقَى لَيِّ رَاجِلْ دِينْ. 14 وَ جِيبْ أَوْلَادْ هَارُونْ وَ لَبِّسْهُمْ الْخُلْقَانْ. 15 وَ أَمْسَحْهُمْ مِثِلْ مَسَحْت أَبُوهُمْ لِيَبْقَوْا لَيِّ رُجَالْ دِينْ. وَ بِالْمَسَحَانْ دَا، هُمَّنْ يَبْقَوْا خَاصِّينْ لِخِدْمَةْ بَيْتِي دَايْماً وَ ذُرِّيِّتْهُمْ كُلَ.» 16 وَ مُوسَى سَوَّى كُلَّ شَيّءْ مِثِلْ اللّٰهْ أَمَرَهْ بَيَّهْ. وَ دَا بَسْ الْهُو سَوَّاهْ. بنوا و خصّصوا خَيْمة الْعِبادة 17 وَ خَلَاصْ، بَنَوْا الْخَيْمَةْ دِي فِي الْيَوْم الْأَوَّلْ هَنَا الشَّهَرْ الْأَوَّلْ فِي السَّنَةْ التَّانِيَةْ مِنْ مَرِقِينْهُمْ مِنْ بَلَدْ مَصِرْ. 18 وَ وَكِتْ مُوسَى بَنَى خَيْمَةْ الْعِبَادَةْ، هُو خَطَّ أَسَاسْهَا وَ غَزَّ عَمَدْهَا وَ رَكَّبْ الْخَشَبْ وَ الْمَرَادِيسْ. 19 وَ بَنَى الْخَيْمَةْ وَ غَطَّاهَا بِغِطَاءْ آخَرْ مِنْ فَوْق مِثِلْ اللّٰهْ أَمَرَهْ بَيَّهْ. 20 وَ مُوسَى شَالْ لِيحَانْ الْمُعَاهَدَةْ وَ دَسَّاهُمْ فِي الصَّنْدُوقْ. وَ دَسَّ الْعِيدَانْ الْيِشِيلُوا بَيْهُمْ الصَّنْدُوقْ وَ سَدَّ الصَّنْدُوقْ بِسِدَادْتَهْ. 21 وَ خَلَاصْ، شَالْ الصَّنْدُوقْ الْفَوْقَهْ لِيحَانْ الْمُعَاهَدَةْ وَ دَسَّاهْ فِي الْخَيْمَةْ وَ دَارَقَهْ بِسِتَارْ مِثِلْ اللّٰهْ أَمَرَهْ بَيَّهْ. 22 وَ مُوسَى دَسَّ الطَّرَبَيْزَةْ فِي لُبّ خَيْمَةْ الْإِجْتِمَاعْ فِي نُصَّهَا الْمُنْشَاقِي بَرَّا مِنْ السِّتَارْ. 23 وَ خَطَّ فَوْقهَا الْخُبْزَةْ الْيِقَدُّمُوهَا لِلّٰهْ مِثِلْ هُو أَمَرَهْ بَيَّهْ. 24 وَ دَسَّ الْفَانُوسْ فِي لُبّ خَيْمَةْ الْإِجْتِمَاعْ فِي نُصَّهَا الْجُنُوبِي مُقَابِلْ الطَّرَبَيْزَةْ. 25 وَ وَلَّعْ نِيرَانْ الْفَانُوسْ قِدَّامْ اللّٰهْ مِثِلْ هُو أَمَرَهْ بَيَّهْ. 26 وَ مُوسَى دَسَّ مُخْبَرْ الْبَخُورْ هَنَا الدَّهَبْ فِي لُبّ خَيْمَةْ الْإِجْتِمَاعْ قِدَّامْ السِّتَارْ. 27 وَ حَرَّقْ فَوْقَهْ الْبَخُورْ الْمُعَطَّرْ مِثِلْ اللّٰهْ أَمَرَهْ بَيَّهْ. 28 وَ سَدَّ بَابْ الْخَيْمَةْ بِسِتَارْ. 29 وَ خَطَّ الْمَدْبَحْ هَنَا الضَّحَايَا الْمُحَرَّقِينْ قِدَّامْ مَدَخَلْ خَيْمَةْ الْعِبَادَةْ وَ هِي خَيْمَةْ الْإِجْتِمَاعْ. وَ قَدَّمْ فَوْقَهْ ضَحِيَّةْ مُحَرَّقَةْ وَ هَدِيَّةْ هَنَا دَقِيقْ مِثِلْ اللّٰهْ أَمَرَهْ بَيَّهْ. 30 وَ خَطَّ الْحَوْط لِلْوَضُوءْ بَيْن خَيْمَةْ الْإِجْتِمَاعْ وَ الْمَدْبَحْ. وَ صَبَّ فَوْقَهْ أَلْمِي لِلْوَضُوءْ. 31 وَ بِأَلْمِي الْحَوْط دَا، مُوسَى وَ هَارُونْ وَ أَوْلَادَهْ يِلْوَضَّوْا. 32 وَ هُمَّنْ يِلْوَضَّوْا قُبَّالْ مَا يَدْخُلُوا فِي خَيْمَةْ الْإِجْتِمَاعْ وَ قُبَّالْ مَا يَجُوا قَرِيبْ لِلْمَدْبَحْ مِثِلْ اللّٰهْ أَمَرْ بَيَّهْ مُوسَى. 33 وَ مُوسَى حَوَّقْ الْفَضَايْ الْفَوْقهَا الْخَيْمَةْ بِسَتَايِرْ وَ سَدَّ بَابْهَا بِسِتَارْ. وَ بِمِثِلْ دَا، خَلَاصْ مُوسَى كَمَّلْ الْخِدْمَةْ. مجْد اللّه ملا الخَيْمة 34 وَ بَعَدْ دَا، السَّحَابَايْ غَطَّتْ خَيْمَةْ الْإِجْتِمَاعْ وَ مَجْد اللّٰهْ مَلَا الْخَيْمَةْ. 35 وَ مُوسَى مَا قِدِرْ يَدْخُلْ فِي خَيْمَةْ الْإِجْتِمَاعْ أَشَانْ السَّحَابَايْ مُغَطِّيَةْ الْخَيْمَةْ وَ مَجْد اللّٰهْ مَلَاهَا. 36 وَ كَنْ السَّحَابَايْ قَمَّتْ مِنْ الْخَيْمَةْ، بَنِي إِسْرَائِيلْ يِسِيرُوا. 37 وَ لَاكِنْ كَنْ هِي مَا قَمَّتْ مِنْ الْخَيْمَةْ، هُمَّنْ يَقْعُدُوا فِي بَكَانْهُمْ لَحَدِّي يَوْم هِي تُقُمّ. 38 وَ سَحَابَايِةْ مَجْد اللّٰهْ قَاعِدَةْ فَوْق الْخَيْمَةْ بِنَهَارْ. وَ بِلَيْل، السَّحَابَايْ عِنْدَهَا نُورْ. وَ كُلَّ بَنِي إِسْرَائِيلْ شَافَوْا السَّحَابَايْ دِي فِي كُلَّ مَسَارْهُمْ. |
La Bible en arabe tchadien © Alliance biblique du Tchad, 2019
Bible Society of Chad