خُروج 34 - الكتاب المقدس بالعربي الدارجي هنا تشاد

مُوسَى جهّز ليحان آخرين

¹ وَ بَتَّانْ اللّٰهْ قَالْ لِمُوسَى: «سَوِّي لِيحَانْ إِتْنَيْن هَنَا حَجَرْ مِثِلْ اللِّيحَانْ الْأَوَّلْ. وَ أَنَا نَكْتِبْ فَوْقهُمْ الْوَصَايَا الْأَوَّلْ كَتَبْتُهُمْ فِي اللِّيحَانْ الْإِتْنَيْن الْإِنْتَ كَسَّرْتُهُمْ.

² وَ جَهِّزْ نَفْسَكْ. أَمْبَاكِرْ فَجُرْ، أَطْلَعْ فِي جَبَلْ سِينَاء وَ تَعَالْ لَيِّ فِي رَاسْ الْجَبَلْ.

³ خَلِّي نَادُمْ مَا يَطْلَعْ مَعَاكْ وَ لَا يِنْشَافْ فِي أَيِّ بَكَانْ فِي الْجَبَلْ. وَ الْغَنَمْ وَ الْبَقَرْ كُلَ مَا يَسْرَحَوْا عَلَيْ الْجَبَلْ دَا.»

⁴ وَ مُوسَى سَوَّى لِيحَانْ إِتْنَيْن هَنَا حَجَرْ مِثِلْ اللِّيحَانْ الْأَوَّلْ. وَ أَمْبَاكِرْ فَجُرْ، رِكِبْ فِي جَبَلْ سِينَاء. وَ شَالْ اللِّيحَانْ دَوْل فِي إِيدَهْ مِثِلْ اللّٰهْ أَمَرَهْ بَيَّهْ.

اللّه بان لمُوسَى

⁵ وَ خَلَاصْ، اللّٰهْ نَزَلْ فِي عَمُودْ السَّحَابْ فِي الْبَكَانْ الْمُوسَى وَاقِفْ فَوْقَهْ. وَ عَالَنْ أُسْمَهْ هُو اللّٰهْ.

⁶ وَ فَاتْ قِدَّامْ مُوسَى وَ عَالَنْ وَ قَالْ: «أَنَا اللّٰهْ! أَنَا اللّٰهْ الرَّحْمـٰنْ الرَّحِيمْ وَ الصَّبُورْ وَ الْمُحِبّ وَ الْأَمِينْ.

⁷ نِوَصِّفْ خَيْرِي الدَّايِمْ لِآلَافْ الذُّرِّيَّاتْ وَ نَغْفِرْ الْخَطَا وَ الْعِصْيَانْ وَ الذُّنُوبْ. وَ لَاكِنْ الْمُذْنِبْ مَا نَجْعَلَهْ بَرِي. نِعَاقِبْ الْعِيَالْ وَ عِيَالْ الْعِيَالْ بِذُنُوبْ أَبَّهَاتْهُمْ لَحَدِّي الذُّرِّيَّةْ التَّالْتَةْ وَ الرَّابْعَةْ.»

⁸ وَ طَوَّالِي، مُوسَى دَنْقَرْ فِي الْأَرْض وَ سَجَدْ لِلّٰهْ

⁹ وَ قَالْ: «يَا رَبّ، كَنْ إِنْتَ رِضِيتْ لَيِّ، أَمْشِي مَعَانَا. يَا رَبّ، حَتَّى كَانْ أَنِحْنَ شَعَبَكْ رَاسْنَا قَوِي كُلَ، أَغْفِرْ لَيْنَا خَطَايَانَا وَ ذُنُوبْنَا. وَ أَجْعَلْنَا شَعَبَكْ الْحَلَالَكْ.»

اللّه جدّد المُعاهدة

¹⁰ وَ اللّٰهْ قَالْ لِمُوسَى: «دَاهُو أَنَا نِسَوِّي مَعَاكُو مُعَاهَدَةْ. نِسَوِّي عَجَايِبْ قِدَّامْ كُلَّ شَعَبَكْ الْأَبَداً مَا بِقَوْا فِي أُمَمْ الْأَرْض. وَ الشَّعَبْ الْإِنْتَ قَاعِدْ فِي أُسُطْهُمْ يِشِيفُوا كُلَّ الْفِعِلْ الْعَجِيبْ الْبِخَوِّفْ الْأَنَا اللّٰهْ نِسَوِّيهْ بَيْك إِنْتَ.

¹¹ خَلِّي يِطَبُّقُوا دَايْماً كَلَامِي النُّقُولَهْ لَيْك الْيَوْم. وَ بَيْدَا، أَنَا نَطْرُدْ مِنْ قِدَّامْكُو الْأَمُورِيِّينْ وَ الْكَنْعَانِيِّينْ وَ الْحِتِّيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ.

¹² «أَنْقَرْعُوا مَا تِسَوُّوا عَلَاقَةْ مَعَ سُكَّانْ الْبَلَدْ الْإِنْتُو مَاشِينْ لَيْهَا أَشَانْ هُمَّنْ مَا يَبْقَوْا لَيْكُو شَرَكْ.

¹³ وَ لَاكِنْ هَدُّمُوا مَدَابِحْهُمْ وَ أَرْمُوا حُجَارْهُمْ الْغَزَّوْهُمْ وَ كَسُّرُوا عِيدَانْهُمْ الْغَزَّوْهُمْ لِعِبَادَةْ أَشِيرَةْ.

¹⁴ مَا تَعَبُدُوا إِلٰـهْ آخَرْ بَلَايِ أَنَا اللّٰهْ أَشَانْ أَنَا غَيُّورْ يَعْنِي مَا نِدَوْر يَعَبُدُوا إِلٰـهْ آخَرْ.

¹⁵ «أَنْقَرْعُوا مَا تِسَوُّوا عَلَاقَةْ مَعَ سُكَّانْ الْبَلَدْ دِي أَشَانْ وَكِتْ يِشَّرْمَطَوْا مَعَ إِلٰـهَاتْهُمْ وَ يَعَبُدُوهُمْ وَ يِقَدُّمُوا لَيْهُمْ ضَحَايَا، يَعَزُمُوكُو لِتَاكُلُوا مَعَاهُمْ ضَحَايَاهُمْ.

¹⁶ وَ أَكُونْ تَاخُدُوا بَنَاتْهُمْ لِأَوْلَادْكُو. وَ كَنْ بَنَاتْهُمْ يِشَّرْمَطَوْا مَعَ أَصْنَامْهُمْ وَ يَعَبُدُوهُمْ، أَوْلَادْكُو كُلَ يِسَوُّوا نَفْس الشَّيّءْ.

¹⁷ «مَا تَصْنَعَوْا لَيْكُو أَصْنَامْ هَنَا حَدِيدْ.

¹⁸ «عَيُّدُوا عِيدْ الْخُبْزَةْ بَلَا تَوَّارَةْ. فِي سَبْعَةْ يَوْم، آكُلُوا خُبْزَةْ بَلَا تَوَّارَةْ مِثِلْ أَنَا أَمَرْتُكُو بَيَّهْ. وَ دَا فِي الْوَكِتْ الْمُحَدَّدْ فِي شَهَرْ الْقَنَادِيلْ. وَ دَا بَسْ الشَّهَرْ الْإِنْتُو مَرَقْتُوا بَيَّهْ مِنْ بَلَدْ مَصِرْ.

¹⁹ «كُلَّ أَوْلَادْ الْبِكِرْ يَبْقَوْا هِنَيّ أَنَا اللّٰهْ حَتَّى أَوْلَادْ الْبِكِرْ مِنْ الْبَهَايِمْ كَنْ مِنْ الْبَقَرْ وَلَّا مِنْ الْغَنَمْ كُلَ.

²⁰ وَ أَيِّ وَلْد بِكِرْ هَنَا حَمِيرْ، شِيلُوا فِي بَدَلَهْ خَرُوفْ. وَ كَنْ مَا بَدَّلْتُوهْ كَمَانْ، أَكْسُرُوا رَقَبَتَهْ. وَ لَاكِنْ أَيِّ وَلْد بِكِرْ مِنْ عِيَالْكُو إِنْتُو الْإِنْسَانْ، أَفْدَوْه. «مَا تَجُوا قِدَّامِي إِيدَيْكُو يَابْسِينْ.

²¹ «أَخْدُمُوا لِمُدَّةْ سِتَّةْ يَوْم وَ الْيَوْم السَّابِعْ كَمَانْ، أَنْجَمَّوْا. حَتَّى فِي الْحِرَاتَةْ أَوْ فِي الْقَطِعْ كُلَ، فِي الْيَوْم السَّابِعْ دَا، وَاجِبْ تِنْجَمَّوْا.

²² «عَيُّدُوا عِيدْ الْقَطِعْ وَ قَدُّمُوا لَيِّ أَوَّلْ إِنْتَاجْ الْقَمَحْ الْإِنْتُو قَطَعْتُوهْ مِنْ الزَّرَعْ. وَ بَعَدْ دَا، عَيُّدُوا عِيدْ اللَّمِّينْ وَ دَا يَبْقَى فِي آخِرْ خِدْمَةْ الزِّرَاعَةْ.

²³ تَلَاتَةْ مَرَّاتْ فِي السَّنَةْ، أَيِّ دَكَرْ مِنْكُو يَجِي قِدَّامِي لِيَعَبُدْنِي أَنَا اللّٰهْ الرَّبّ إِلٰـهْ بَنِي إِسْرَائِيلْ.

²⁴ وَ أَنَا نَطْرُدْ الْأُمَمْ مِنْ قِدَّامْكُو وَ نِوَسِّعْ بَلَدْكُو. وَ نَادُمْ وَاحِدْ كُلَ مَا يَطْمَعْ فِي أَرْضُكُو وَكِتْ تَجُوا قِدَّامِي أَنَا اللّٰهْ إِلٰـهْكُو تَلَاتَةْ مَرَّاتْ فِي السَّنَةْ.

²⁵ «مَا تِقَدُّمُوا لَيِّ دَمّ الضَّحِيَّةْ مَعَ أَيِّ شَيّءْ الْعِنْدَهْ تَوَّارَةْ. وَ مَا تِخَلُّوا شَحَمْ ضَحِيَّةْ عِيدْ الْفِصْحَ يَرْقُدْ لَحَدِّي فَجُرْ.

²⁶ وَ قَدُّمُوا أَوَّلْ إِنْتَاجْ زِرَاعِتْكُو لِبَيْت اللّٰهْ إِلٰـهْكُو. «وَ مَا تِرَكُّبُوا لَحَمْ السَّخَلْ فِي لَبَنْ أَمَّهْ.»

²⁷ وَ بَتَّانْ اللّٰهْ قَالْ لِمُوسَى: «أَكْتِبْ الْكَلَامْ دَا وَ دَا يَبْقَى أَسَاسْ الْمُعَاهَدَةْ السَّوَّيْتهَا مَعَاكْ إِنْتَ وَ بَنِي إِسْرَائِيلْ.»

²⁸ وَ مُوسَى قَعَدْ مَعَ اللّٰهْ 40 نَهَارْ وَ 40 لَيْلَةْ. وَ لَا أَكَلْ خُبْزَةْ وَ لَا شِرِبْ أَلْمِي. وَ كَتَبْ فِي اللِّيحَانْ كَلَامْ الْمُعَاهَدَةْ وَ هُو الْوَصَايَا الْعَشَرَةْ.

وِجِه مُوسَى رارى

²⁹ وَ خَلَاصْ وَكِتْ مُوسَى نَزَلْ مِنْ جَبَلْ سِينَاء وَ لِيحَانْ الْمُعَاهَدَةْ فِي إِيدَيْنَهْ، هُو مَا عِرِفْ كَدَرْ وِجْهَهْ قَاعِدْ يِرَارِي بِسَبَبْ هُو كَلَّمْ مَعَ اللّٰهْ.

³⁰ وَ وَكِتْ هَارُونْ وَ كُلَّ بَنِي إِسْرَائِيلْ شَافَوْا وِجِهْ مُوسَى قَاعِدْ يِرَارِي، خَافَوْا مَا قَرَّبَوْا لَيَّهْ.

³¹ وَ لَاكِنْ هُو نَادَاهُمْ وَ فِي الْبَكَانْ دَا، هَارُونْ وَ كُلَّ شُيُوخْ الْمُجْتَمَعْ جَوْا لَيَّهْ. وَ هُو كَلَّمْ مَعَاهُمْ.

³² وَ بَعَدْ دَا، كُلَّ بَنِي إِسْرَائِيلْ جَوْا لَيَّهْ قَرِيبْ. وَ هُو وَصَّاهُمْ بِكُلَّ الْوَصَايَا الْاللّٰهْ قَالَاهُمْ لَيَّهْ فِي جَبَلْ سِينَاء.

³³ وَكِتْ مُوسَى كَمَّلْ كَلَامَهْ مَعَاهُمْ، غَطَّى مِنْهُمْ وِجْهَهْ بِمِنْدِيلْ.

³⁴ وَ أَيِّ وَكِتْ كَنْ مُوسَى يِدَوْر يَقِيفْ قِدَّامْ اللّٰهْ لِيِكَلِّمْ مَعَايَهْ، يَرْفَعْ الْمِنْدِيلْ مِنْ وِجْهَهْ لَحَدِّي يَمْرُقْ مِنْ حَضَرَةْ اللّٰهْ. وَ هُو يِكَلِّمْ لِبَنِي إِسْرَائِيلْ بِالْوَصَايَا الْاللّٰهْ أَمَرَهْ بَيْهُمْ.

³⁵ وَ فِي الْبَكَانْ دَا، بَنِي إِسْرَائِيلْ يِشِيفُوا وِجْهَهْ الْقَاعِدْ يِرَارِي. وَ بَعَدْ دَا، هُو يُخُطّ الْمِنْدِيلْ فِي وِجْهَهْ لَحَدِّي يَجِي يِكَلِّمْ مَعَ اللّٰهْ بَتَّانْ.