خُروج 29 - الكتاب المقدس بالعربي الدارجي هنا تشادخصِّصين رجال الدين 1 «‹دَاهُو كِكَّيْف تِسَوِّي لِتِخَصِّصْ هَارُونْ وَ أَوْلَادَهْ لِيَبْقَوْا لَيِّ رُجَالْ دِينْ. شِيلْ تَوْر وَ كُبْشَانْ إِتْنَيْن الْمَا عِنْدُهُمْ أَيِّ عَيْب. 2 وَ شِيلْ دَقِيقْ هَنَا قَمَحْ وَ سَوِّي بَيَّهْ خُبْزَةْ بَلَا تَوَّارَةْ وَ كَعَكْ بَلَا تَوَّارَةْ التِّسَوِّيهْ بِدِهِنْ وَ كِسَارْ مَمْسُوحْ بِدِهِنْ. 3 وَ كُلَّ الْخُمَامْ دَا، صُبَّهْ فِي صَوْصَلْ وَ قَدِّمَهْ بِالصَّوْصَلْ دَا مَعَ التَّوْر وَ الْكُبْشَانْ الْإِتْنَيْن. 4 وَ نَادِي هَارُونْ وَ أَوْلَادَهْ يَجُوا فِي مَدَخَلْ خَيْمَةْ الْإِجْتِمَاعْ وَ بَرِّدْهُمْ. 5 وَ شِيلْ الْخُلْقَانْ وَ لَبِّسْ هَارُونْ الْجَوَّانِيَّةْ وَ الْجَلَّابِيَّةْ وَ الْفَرْمَلَةْ وَ الصِّدَيْرِيَّةْ. وَ أَرْبُطْ الْفَرْمَلَةْ بِالْحِزَامْ. 6 وَ خُطّ الْكَدْمُولْ فِي رَاسَهْ وَ ثَبِّتْ فَوْقَهْ الْحَفِيضَةْ الْمُخَصَّصَةْ. 7 وَ شِيلْ دِهِنْ الْمَسَحَانْ وَ صُبَّهْ فِي رَاسَهْ وَ أَمْسَحَهْ. 8 وَ بَعَدْ دَا، جِيبْ أَوْلَادَهْ وَ لَبِّسْهُمْ جَوَّانِيَّاتْ. 9 وَ أَيِّ وَاحِدْ، أَرْبُطْ صُلْبَهْ بِحِزَامْ وَ خُطّ لَيَّهْ كَدْمُولْ. وَ مِثِلْ دَا، دَرِّجْ لَيِّ هَارُونْ وَ أَوْلَادَهْ. وَ خِدْمَةْ رُجَالْ الدِّينْ تُكُونْ لَيْهُمْ مِثِلْ شَرْط دَايِمْ. ضحيّة التَوْر 10 «‹وَ بَتَّانْ جِيبْ التَّوْر قِدَّامْ خَيْمَةْ الْإِجْتِمَاعْ وَ خَلِّي هَارُونْ وَ أَوْلَادَهْ يُخُطُّوا إِيدَيْهُمْ فِي رَاسْ التَّوْر دَا. 11 وَ أَدْبَحْ التَّوْر قِدَّامْ اللّٰهْ فِي مَدَخَلْ خَيْمَةْ الْإِجْتِمَاعْ. 12 وَ شِيلْ مِنْ دَمّ التَّوْر بِأُصْبَعَكْ وَ خُطَّهْ فِي قُرُونْ الْمَدْبَحْ. وَ الْبَاقِي مِنْ الدَّمّ كَمَانْ صُبَّهْ فِي قَعَرْ الْمَدْبَحْ. 13 وَ شِيلْ كُلَّ الشَّحَمْ الْمُغَطَّي الْبُطُونْ وَ نُصّ الْكِبْدَةْ وَ الْكِلَاوَةْ بِشَحَمْهُمْ وَ حَرِّقْهُمْ فِي الْمَدْبَحْ. 14 وَ لَاكِنْ لَحَمْ التَّوْر وَ فَرْوِتَهْ وَ بَعَرَهْ، حَرِّقْهُمْ بَرَّا مِنْ الْفَرِيقْ أَشَانْ دِي ضَحِيَّةْ لِكَفَّارَةْ الذَّنِبْ. ضحيّة الكبِش الأوّلاني 15 «‹وَ شِيلْ وَاحِدْ مِنْ الْكُبْشَانْ الْإِتْنَيْن وَ خَلِّي هَارُونْ وَ أَوْلَادَهْ يُخُطُّوا إِيدَيْهُمْ فِي رَاسَهْ. 16 أَدْبَحْ الْكَبِشْ وَ شِيلْ دَمَّهْ وَ رُشَّهْ فِي كُلَّ نَوَايِطْ الْمَدْبَحْ. 17 وَ قَطِّعْ لَحَمْ الْكَبِشْ دَا دُقَاقْ دُقَاقْ وَ غَسِّلْ بُطُونَهْ وَ ضَلَافَيْه وَ خُطُّهُمْ مَعَ الرَّاسْ وَ الْقِطَعْ الْآخَرِينْ. 18 وَ حَرِّقْ كُلَّ الْكَبِشْ دَا فِي الْمَدْبَحْ أَشَانْ دِي ضَحِيَّةْ مُحَرَّقَةْ لِلّٰهْ الْهُو يَرْضَى بِرِيحِتْهَا أَشَانْ هِي هَدِيَّةْ لِلّٰهْ. ضحيّة الكبِش التاني 19 «‹وَ شِيلْ الْكَبِشْ التَّانِي وَ خَلِّي هَارُونْ وَ أَوْلَادَهْ يُخُطُّوا إِيدَيْهُمْ فِي رَاسَهْ. 20 أَدْبَحْ الْكَبِشْ وَ شِيلْ مِنْ دَمَّهْ وَ خُطَّهْ فِي حَلَمَةْ الْأَدَانْ الزَّيْنَةْ هَنَا هَارُونْ وَ أَوْلَادَهْ. وَ خُطَّهْ فِي أَصَابِعْهُمْ الْكُبَارْ هَنَا إِيدَيْهُمْ وَ رِجْلَيْهُمْ الزَّيْنَايَاتْ. وَ رُشّ بَاقِي الدَّمّ فِي نَوَايِطْ الْمَدْبَحْ. 21 وَ شِيلْ مِنْ الدَّمّ الصَّبَّيْتَهْ فِي الْمَدْبَحْ وَ دِهِنْ الْمَسَحَانْ وَ رُشَّهْ فِي هَارُونْ وَ لُبَاسَهْ وَ فِي أَوْلَادَهْ وَ لُبَاسْهُمْ. وَ بَيْدَا، هَارُونْ وَ أَوْلَادَهْ وَ خُلْقَانْهُمْ يَبْقَوْا مُخَصَّصِينْ لِلّٰهْ. 22 «‹وَ شِيلْ مِنْ الْكَبِشْ دَا شَحَمْ الدَّنَبْ وَ الشَّحَمْ الْمُغَطَّي الْبُطُونْ وَ نُصّ الْكِبْدَةْ وَ الْكِلَاوَةْ بِشَحَمْهُمْ وَ الْقَايْمَةْ الزَّيْنَةْ. وَ دَا كَبِشْ هَنَا دَرِّجِينْ. 23 وَ شِيلْ مِنْ الصَّوْصَلْ الْقَاعِدْ قِدَّامْ اللّٰهْ خُبْزَةْ وَاحِدَةْ وَ كَعَكَايْ السَّوَّوْهَا بِدِهِنْ وَ كِسَارَايْ. 24 وَ خُطُّهُمْ فِي إِيدَيْن هَارُونْ وَ أَوْلَادَهْ لِيِقَدُّمُوهُمْ هَدَايَا مَرْفُوعِينْ لِلّٰهْ. 25 وَ بَتَّانْ شِيلْ الْهَدَايَا دَوْل مِنْ إِيدَيْهُمْ وَ حَرِّقْهُمْ فِي الْمَدْبَحْ مَعَ الضَّحِيَّةْ الْمُحَرَّقَةْ لِلّٰهْ الْهُو يَرْضَى بِرِيحِتْهَا أَشَانْ هِي هَدِيَّةْ لِلّٰهْ. 26 وَ شِيلْ زَوْر الْكَبِشْ هَنَا دَرِّجِينْ هَارُونْ وَ قَدِّمَهْ هَدِيَّةْ مَرْفُوعَةْ لِلّٰهْ. وَ دَا يَبْقَى هَنَاكْ إِنْتَ. الواجِب لرجال الدين 27 «‹وَ مِنْ كَبِشْ الدَّرِّجِينْ هَنَا هَارُونْ وَ أَوْلَادَهْ، خَصِّصْ الزَّوْر وَ الْقَايْمَةْ الْقَدَّمْتُهُمْ هَدِيَّةْ مَرْفُوعَةْ. دَوْل يُكُونُوا لِهَارُونْ وَ أَوْلَادَهْ. 28 اللَّحَمْ دَا يَبْقَى حَقّ دَايِمْ لِهَارُونْ وَ أَوْلَادَهْ مِنْ كُلَّ ضَحَايَا السَّلَامَةْ الْيَدْبَحَوْهُمْ بَنِي إِسْرَائِيلْ وَ يِقَدُّمُوهُمْ هَدِيَّةْ لِلّٰهْ. 29 «‹وَ أَحْفَضَوْا الْخُلْقَانْ الْخَاصِّينْ هَنَا هَارُونْ أَشَانْ أَيِّ وَاحِدْ مِنْ أَوْلَادَهْ الْيَجِي بَعَدَهْ يَلْبَسْهُمْ وَكِتْ يَمْسَحَوْه وَ يِدَرُّجُوهْ. 30 وَ الْوِلَيْد الْيَبْقَى كَبِيرْ رُجَالْ الدِّينْ بَعَدْ هَارُونْ يَلْبَسْهُمْ سَبْعَةْ أَيَّامْ قَبُلْ مَا يَدْخُلْ فِي خَيْمَةْ الْإِجْتِمَاعْ وَ يَخْدِمْ فِي الْبَكَانْ الْمُقَدَّسْ. ككيف ياكُلوا لحم الضحيّة 31 «‹وَ لَاكِنْ اللَّحَمْ الْيِفَضِّلْ مِنْ كَبِشْ الدَّرِّجِينْ، تِشِيلَهْ وَ تِرَكِّبَهْ فِي بَكَانْ مُقَدَّسْ. 32 هَارُونْ وَ أَوْلَادَهْ يَاكُلُوا لَحَمْ الْكَبِشْ دَا وَ الْخُبْزَةْ الْقَاعِدَةْ فِي الصَّوْصَلْ فِي مَدَخَلْ خَيْمَةْ الْإِجْتِمَاعْ. 33 هُمَّنْ يَاكُلُوا هَدَايَا الْكَفَّارَةْ دَوْل وَكِتْ يِدَرُّجُوهُمْ وَ يِخَصُّصُوهُمْ. نَادُمْ آخَرْ كَيْ مَا يَاكُلْ مِنْهُمْ أَشَانْ الْهَدَايَا دَوْل مُقَدَّسِينْ. 34 وَ كَنْ يِفَضِّلْ شَيّءْ مِنْ لَحَمْ كَبِشْ الدَّرِّجِينْ أَوْ مِنْ الْخُبْزَةْ لَحَدِّي أَمْبَاكِرْ، مَا يَاكُلُوهْ أَشَانْ دَا مُقَدَّسْ. خَلِّي يِحَرُّقُوهْ فِي النَّارْ. سبْعة يوم هنا درِّجين و خصِّصين 35 «‹سَوِّي لِهَارُونْ وَ أَوْلَادَهْ مِثِلْ أَنَا أَمَرْتَكْ بَيَّهْ. وَ مُدَّةْ دَرِّجِينْهُمْ تُكُونْ سَبْعَةْ يَوْم. 36 وَ قَدِّمْ كُلَّ يَوْم تَوْر ضَحِيَّةْ لِكَفَّارَةْ الذَّنِبْ. وَ خَصِّصْ الْمَدْبَحْ كُلَ بِضَحِيَّةْ الْكَفَّارَةْ وَ أَمْسَحَهْ لِيُكُونْ مُقَدَّسْ. 37 فِي مُدَّةْ سَبْعَةْ يَوْم، تَدْبَحْ ضَحِيَّةْ الْكَفَّارَةْ فِي الْمَدْبَحْ وَ تِخَصِّصَهْ. وَ بَيْدَا، يُكُونْ مُقَدَّسْ مَرَّةْ وَاحِدْ. وَ كُلَّ شَيّءْ الْيِلَمِّسْ الْمَدْبَحْ يُكُونْ مُقَدَّسْ. الضحيّة اليَوْميّة 38 «‹دَايْماً وَ كُلَّ يَوْم، قَدِّمْ فِي الْمَدْبَحْ خُرْفَانْ إِتْنَيْن أَوْلَادْ سَنَةْ. 39 الْخَرُوفْ الْوَاحِدْ، قَدِّمَهْ بِفَجُرْ وَ الْآخَرْ بِعَشِيَّةْ. 40 وَ مَعَ الْخَرُوفْ الْأَوَّلْ، قَدِّمْ كَوْرَوْ هَنَا دَقِيقْ مُخَلْبَطْ بِلِيتِرْ هَنَا دِهِنْ زَيْتُونْ مَعْصُورْ. وَ قَدِّمْ مَعَايَهْ لِيتِرْ هَنَا خَمَرْ الْعِنَبْ هَدِيَّةْ شَرَابْ. 41 وَ الْخَرُوفْ التَّانِي، قَدِّمَهْ بِعَشِيَّةْ. وَ قَدِّمْ مَعَايَهْ هَدِيَّةْ هَنَا دَقِيقْ وَ هَدِيَّةْ شَرَابْ مِثِلْ إِنْتَ سَوَّيْتَهْ بِفَجُرْ. وَ هِي هَدِيَّةْ مُحَرَّقَةْ لِلّٰهْ الْهُو يَرْضَى بِرِيحِتْهَا. 42 مِنْ ذُرِّيَّةْ لِذُرِّيَّةْ، قَدُّمُوا دَايْماً الضَّحَايَا الْمُحَرَّقِينْ دَوْل فِي مَدَخَلْ خَيْمَةْ الْإِجْتِمَاعْ قِدَّامْ اللّٰهْ. وَ دَا الْبَكَانْ الْأَنَا نِقَابِلَكْ فَوْقَهْ لِنِكَلِّمَكْ. 43 وَ هِنَاكْ نِقَابِلْ بَنِي إِسْرَائِيلْ وَ بِقُدْرَةْ مَجْدِي، الْبَكَانْ دَا يَبْقَى مُقَدَّسْ. 44 وَ بَيْدَا، نِقَدِّسْ خَيْمَةْ الْإِجْتِمَاعْ وَ الْمَدْبَحْ. وَ نِخَصِّصْ هَارُونْ وَ أَوْلَادَهْ لِيَبْقَوْا لَيِّ رُجَالْ دِينْ. 45 وَ نَسْكُنْ مَعَ بَنِي إِسْرَائِيلْ وَ نَبْقَى إِلٰـهُّمْ. 46 وَ بَيْدَا، يَعَرْفُوا كَدَرْ أَنَا بَسْ اللّٰهْ إِلٰـهُّمْ الْمَرَقْتُهُمْ مِنْ بَلَدْ مَصِرْ لِنَسْكُنْ مَعَاهُمْ. أَنَا اللّٰهْ إِلٰـهُّمْ. |
La Bible en arabe tchadien © Alliance biblique du Tchad, 2019
Bible Society of Chad