خُروج 2 - الكتاب المقدس بالعربي الدارجي هنا تشادوالودة مُوسَى 1 فِي الْوَكِتْ دَا، فِيَّهْ رَاجِلْ وَاحِدْ مِنْ قَبِيلَةْ لَاوِي أَخَدْ مَرَةْ مِنْ قَبِيلْتَهْ. 2 وَ بَعَدَيْن، هِي بِقَتْ غَلْبَانَةْ وَ وِلْدَتْ لَيَّهْ وِلَيْد. وَ شَافَتْ الصَّغِيرْ دَا جَمِيلْ وَ لَبَّدَتَهْ مُدَّةْ تَلَاتَةْ شَهَرْ. 3 بَعَدَيْن شَافَتْ كَيْ، الصَّغِيرْ دَا مَا بِلَّبَّدْ لَيْهَا. خَلَاصْ، شَالَتْ قُفَّةْ هِنْت تِبِنْ وَ طَلَسَتْهَا بِزِفْت وَ قُطْرَانْ. وَ دَسَّتْ الصَّغِيرْ فِي الْقُفَّةْ وَ مَشَتْ خَطَّتَهْ فِي لُبّ الْبِرْدِي فِي خَشُمْ بَحَرْ النِّيلْ. 4 وَ أَخُتْ الصَّغِيرْ وَقَفَتْ بَعِيدْ شِيَّةْ أَشَانْ تِشِيفْ الشَّيّءْ الْيَبْقَى لَيَّهْ. 5 بَعَدْ شِيَّةْ كَيْ، بِنَيَّةْ الْمَلِكْ جَاتْ تِلْبَرَّدْ فِي بَحَرْ النِّيلْ وَ خَدَّامَاتْهَا قَاعِدَاتْ يُرُوغَنْ فِي خَشُمْ الْبَحَرْ. وَ خَلَاصْ، هِي شَافَتْ الْقُفَّةْ فِي لُبّ الْبِرْدِي. مِنْ شَافَتْهَا، قَمَّتْ رَسَّلَتْ خَدَّامِتْهَا لِتَمْشِي تِجِيبْهَا لَيْهَا. 6 وَ وَكِتْ جَابَتْهَا، هِي فَتَحَتْ الْقُفَّةْ وَ لِقَتْ فَوْقهَا صَغِيرْ. وَ الْوِلَيْد دَا قَاعِدْ يَبْكِي وَ هِي حَنَّتْ فَوْقَهْ وَ قَالَتْ: «الصَّغِيرْ دَا هَنَا الْعِبْرَانِيِّينْ.» 7 خَلَاصْ، أَخُتْ الصَّغِيرْ جَاتْ وَ سَأَلَتْهَا لِبِنَيَّةْ الْمَلِكْ وَ قَالَتْ: «تِدَوْرِي نَمْشِي نِفَتِّشْ لَيْكِ مَرَةْ رَضَّاعَةْ مِنْ عَوِينْ الْعِبْرَانِيِّينْ لِتِرَضِّعْ لَيْكِ الصَّغِيرْ دَا وَلَّا؟» 8 وَ هِي قَالَتْ لَيْهَا: «أَيْوَى، أَمْشِي.» خَلَاصْ، هِي قَمَّتْ مَشَتْ نَادَتْ أَمّ الصَّغِيرْ دَا وَ هِي جَاتْ. 9 وَ بِنَيَّةْ الْمَلِكْ قَالَتْ لِلْمَرَةْ دِي: «شِيلِي الصَّغِيرْ دَا. رَضِّعِيهْ لَيِّ وَ نِكَفِّيكِ مَاحِيِّتْكِ.» خَلَاصْ، أَمَّهْ شَالَتَهْ وَ قَاعِدَةْ تِرَضِّعَهْ. 10 وَكِتْ الصَّغِيرْ كِبِرْ، أَمَّهْ وَدَّتَهْ لِبِنَيَّةْ الْمَلِكْ وَ هُو بِقِي لَيْهَا مِثِلْ وِلَيْدهَا. وَ هِي قَالَتْ: «نِسَمِّيهْ مُوسَى أَشَانْ أَنَا شِلْتَهْ مِنْ لُبّ الْأَلْمِي.» مُوسَى جرى في بلد مِدْيَان 11 وَ بَعَدْ مُوسَى تَمَّ رَاجِلْ خَلَاصْ، يَوْم وَاحِدْ قَمَّ مَشَى لِأَهَلَهْ الْعِبْرَانِيِّينْ وَ شَافْ خِدْمِتْهُمْ هَنَا الْعُبُودِيَّةْ. وَ فِي الْبَكَانْ دَا، مُوسَى شَافْ مَصْرِي وَاحِدْ قَاعِدْ يُدُقّ عِبْرَانِي وَاحِدْ مِنْ أَهَلَهْ. 12 وَ وَكِتْ مُوسَى شَافْ جَايْ وَ جَايْ وَ مَا فِي نَادُمْ جَنْبَهْ، خَلَاصْ قَمَّ كَتَلْ الْمَصْرِي وَ دَفَنَهْ فِي الرَّمْلَةْ. 13 وَ أَمْبَاكِرْ كُلَ، مُوسَى مَرَقْ وَ شَافْ عِبْرَانِيِّينْ إِتْنَيْن قَاعِدِينْ يِدَّاوَسَوْا أَمْبَيْنَاتْهُمْ. وَ قَالْ لِلْخَاطِي: «مَالَا تُدُقّ أَخُوكْ مِثِلْ دَا؟» 14 وَ الرَّاجِلْ دَا قَالْ لَيَّهْ: «يَاتُو خَطَّاكْ فَوْقنَا حَاكِمْ وَ قَاضِي لِتِحِلّ مَشَاكِلْنَا؟ وَلَّا تِدَوْر تَكْتُلْنِي مِثِلْ كَتَلْت الْمَصْرِي دَا؟» وَ وَكِتْ سِمِعْ الْكَلَامْ دَا، مُوسَى خَافْ وَ قَالْ فِي نَفْسَهْ: «أَكِيدْ النَّاسْ سِمْعَوْا بِالشَّيّءْ الْأَنَا سَوَّيْتَهْ دَا.» 15 وَ الْمَلِكْ فِرْعَوْن ذَاتَهْ سِمِعْ بِالشَّيّءْ دَا وَ يِدَوْر يَكْتُلْ مُوسَى. وَ لَاكِنْ مُوسَى جَرَى مِنْ الْمَلِكْ وَ مَشَى فِي بَلَدْ مِدْيَانْ. وَكِتْ وِصِلْ فِي بَلَدْ مِدْيَانْ، قَعَدْ جَنْب بِيرْ وَاحِدَةْ. أخيدة مُوسَى 16 وَ فِيَّهْ رَاجِلْ دِينْ وَاحِدْ أُسْمَهْ رَعُوِيلْ فِي بَلَدْ مِدْيَانْ عِنْدَهْ سَبْعَةْ بَنَاتْ. وَ هِنَّ جِنْ لِيِسِلَّنْ أَلْمِي مِنْ الْبِيرْ وَ يَمْلَنْ الْحِيطَانْ لِيَزْقَنْ غَنَمْ أَبُوهِنْ. 17 وَ لَاكِنْ رُعْيَانْ وَاحِدِينْ جَوْا طَرَدَوْا الْبَنَاتْ دَيْل وَ مُوسَى قَمَّ دَافَعْ لَيْهِنْ. وَ بَعَدْ دَا، زَقَى غَنَمْهِنْ. 18 وَكِتْ الْبَنَاتْ قَبَّلَنْ فِي بَيْت أَبُوهِنْ رَعُوِيلْ، هُو سَأَلَاهِنْ: «مَالَا الْيَوْم قَبَّلْتَنْ عَجَلَةْ كَيْ؟» 19 وَ هِنَّ قَالَنْ لَيَّهْ: «مَصْرِي وَاحِدْ دَافَعْ لَيْنَا مِنْ الرُّعْيَانْ وَ سَلَّ أَلْمِي مِنْ الْبِيرْ وَ زَقَى لَيْنَا غَنَمْنَا.» 20 وَ هُو قَالْ لَيْهِنْ: «وَيْن الرَّاجِلْ دَا؟ مَالَا جِيتَنْ خَلَّيْتَنَّهْ؟ أَمْشَنْ نَّادَنَّهْ لِيَجِي يَاكُلْ مَعَانَا.» وَ هِنَّ مَشَنْ نَّادَنَّهْ. 21 وَ مُوسَى قَصَّدْ يَقْعُدْ فِي بَيْت الرَّاجِلْ دَا. وَ الرَّاجِلْ دَا جَوَّزْ بِنَيِّتَهْ صِفُّورَةْ لِمُوسَى. 22 وَ بَعَدَيْن، هِي جَابَتْ لَيَّهْ وِلَيْد وَ هُو سَمَّاهْ قِرْشُومْ (مَعَنَاتَهْ أَجْنَبِي) وَ قَالْ: «أَنَا بِقِيتْ أَجْنَبِي فِي بَلَدْ الْغُرْبَةْ.» 23 وَ بَعَدْ مُدَّةْ طَوِيلَةْ، مَلِكْ مَصِرْ مَاتْ. وَ بَنِي إِسْرَائِيلْ قَاعِدِينْ يَقُنْتُوا مِنْ التَّعَبْ هَنَا الْعُبُودِيَّةْ وَ قَاعِدِينْ يَصْرَخَوْا لَحَدِّي صِرَاخْهُمْ لِحِقْ الرَّبّ. 24 وَ الرَّبّ ذَاتَهْ سِمِعْ قَنِيتْهُمْ وَ فَكَّرْ لِلْمُعَاهَدَةْ السَّوَّاهَا مَعَ جُدُودْهُمْ إِبْرَاهِيمْ وَ إِسْحَاقْ وَ يَعْقُوبْ. 25 وَ الرَّبّ شَافْ بَنِي إِسْرَائِيلْ وَ عِرِفْ حَالِتْهُمْ. |
La Bible en arabe tchadien © Alliance biblique du Tchad, 2019
Bible Society of Chad