أسْتِير 5 - الكتاب المقدس بالعربي الدارجي هنا تشاد

أسْتِير مشت بكان الملك

¹ وَ وَكِتْ التَّلَاتَةْ يَوْم كَمَّلَوْا خَلَاصْ، أَسْتِيرْ لِبْسَتْ خُلْقَانْهَا هَنَا الْمَمْلَكَةْ وَ مَشَتْ وَقَفَتْ فِي الْفَضَايْ الدَّخْلَانِيَّةْ هَنَا قَصِرْ الْمَلِكْ الْمُقَابِلْ الْبَيْت. وَ الْمَلِكْ قَاعِدْ فِي كُرْسِيهْ هَنَا الْمُلُكْ فِي الْقَصِرْ مُقَابِلْ مَدَخَلْ الْبَيْت.

² وَ وَكِتْ الْمَلِكْ شَافْ أَسْتِيرْ الْمَلِكَةْ وَاقْفَةْ فِي الْفَضَايْ، هِي لِقَتْ رِضَايَهْ. وَ هُو مَدَّ لِأَسْتِيرْ عَصَاتَهْ الدَّهْبِيَّةْ الْفِي إِيدَهْ وَ أَسْتِيرْ قَرَّبَتْ وَ لِمْسَتْ رَاسْ الْعَصَاةْ.

³ وَ الْمَلِكْ قَالْ لَيْهَا: «مَالْكِ، يَا أَسْتِيرْ الْمَلِكَةْ؟ شُنُو مُنَاكِ؟ لَحَدِّي كَنْ نُصّ مَمْلَكَتِي كُلَ، نَنْطِيهْ لَيْكِ.»

⁴ وَ أَسْتِيرْ قَالَتْ لَيَّهْ: «كَنْ بِقِي لَيْك عَدِيلْ، يَا الْمَلِكْ، خَلِّي تَجِي مَعَ هَمَانْ فِي الْعَازُومَةْ الْأَنَا جَهَّزْتَهَا لَيَّهْ الْيَوْم.»

⁵ وَ خَلَاصْ، الْمَلِكْ قَالْ: «أَمْشُوا عَجَلَةْ خَبُّرُوا هَمَانْ كَدَرْ نَمْشُوا نَحْضَرَوْا فِي عَازُومَةْ أَسْتِيرْ.» وَ الْمَلِكْ مَشَى مَعَ هَمَانْ لِلْعَازُومَةْ السَّوَّتْهَا أَسْتِيرْ.

⁶ وَ فِي الْعَازُومَةْ، الْمَلِكْ قَالْ لِأَسْتِيرْ: «شُنُو طَلَبْكِ؟ نَنْطِيهْ لَيْكِ. وَ شُنُو مُنَاكِ؟ لَحَدِّي كَنْ نُصّ مَمْلَكَتِي كُلَ، نَنْطِيهْ لَيْكِ.»

⁷ وَ أَسْتِيرْ رَدَّتْ وَ قَالَتْ: «طَلَبِي وَ مُنَايِ،

⁸ يَا الْمَلِكْ، دَاهُو. كَنْ نَلْقَى مِنَّكْ الرِّضَى وَ كَنْ بِقِي لَيْك عَدِيلْ، أَقْبَلْ طَلَبِي وَ حَقِّقْ مُنَايِ. خَلِّي تَجِي مَعَ هَمَانْ أَمْبَاكِرْ فِي الْعَازُومَةْ النِّسَوِّيهَا لَيْكُو. وَ بَيْدَا، أَمْبَاكِرْ نِسَوِّي حَسَبْ كَلَامَكْ، يَا الْمَلِكْ، وَ نُرُدّ لِسُؤَالَكْ.»

هَمَان جهّز ليكْتُل مَرْدَكَاي

⁹ وَ فِي الْيَوْم دَا، هَمَانْ مَرَقْ مَبْسُوطْ وَ فَرْحَانْ. وَ لَاكِنْ وَكِتْ هُو شَافْ فِي خَشُمْ بَابْ قَصِرْ الْمَلِكْ كَدَرْ مَرْدَكَايْ مَا يُقُمّ وَ لَا يَرْجِفْ قِدَّامَهْ، خَلَاصْ هَمَانْ زِعِلْ زَعَلْ شَدِيدْ ضِدّ مَرْدَكَايْ.

¹⁰ وَ هَمَانْ ثَبَّتْ نَفْسَهْ وَ مَشَى بَيْتَهْ. وَ رَسَّلْ نَادَاهُمْ لِرُفْقَانَهْ وَ مَرْتَهْ زَرَشْ.

¹¹ وَ هَمَانْ حَجَّى لَيْهُمْ بِغُنَايَهْ الْكَتِيرْ وَ كَتَرَةْ أَوْلَادَهْ وَ بِكِكَّيْف الْمَلِكْ شَرَّفَهْ وَ دَرَّجَهْ كَبِيرْ فِي رَاسْ كُلَّ مَسَائِيلَهْ وَ خَدَّامِينَهْ.

¹² وَ هَمَانْ قَالْ بَتَّانْ: «وَ زِيَادَةْ مِنْ دَا، أَسْتِيرْ الْمَلِكَةْ نَادَتْنِي إِلَّا أَنَا مَعَ الْمَلِكْ فِي الْعَازُومَةْ الْهِي جَهَّزَتْهَا. وَ بَتَّانْ أَمْبَاكِرْ كُلَ، أَنَا بَسْ الْمَعْزُومْ مَعَ الْمَلِكْ.

¹³ وَ لَاكِنْ كُلَّ الشَّيّءْ دَا مَا يِتِمّ لَيِّ وَكِتْ دَايْماً نِشِيفْ مَرْدَكَايْ الْيَهُودِي قَاعِدْ فِي خَشُمْ بَابْ قَصِرْ الْمَلِكْ!»

¹⁴ وَ خَلَاصْ، مَرْتَهْ زَرَشْ وَ كُلَّ رُفْقَانَهْ قَالَوْا لَيَّهْ: «سَوِّي لَيْك عُودْ طُولَهْ 50 دُرَاعْ وَ أَمْبَاكِرْ فَجُرْ، أَطْلُبْ مِنْ الْمَلِكْ خَلِّي يِعَلُّقُوا فَوْقَهْ مَرْدَكَايْ. وَ بَعَدْ دَا، إِنْتَ تَمْشِي فَرْحَانْ فِي الْعَازُومَةْ مَعَ الْمَلِكْ.» وَ الْكَلَامْ دَا بِقِي حَلُو لِهَمَانْ وَ قَمَّ جَهَّزْ لَيَّهْ الْعُودْ.