أسْتِير 3 - الكتاب المقدس بالعربي الدارجي هنا تشاد

هَمَان و مَرْدَكَاي ألْخاصموا

¹ وَ بَعَدْ دَا، الْمَلِكْ أَشَوِرُوشْ أَنْطَاهْ لِهَمَانْ وِلَيْد هَمْدَاتَا الْمِنْ ذُرِّيَّةْ أَقَاقْ شَرَفْ زِيَادَةْ مِنْ كُلَّ الْمَسَائِيلْ الْقَاعِدِينْ مَعَايَهْ.

² وَ كُلَّ خَدَّامِينْ الْمَلِكْ الْقَاعِدِينْ فِي خَشُمْ بَابْ قَصِرْ الْمَلِكْ يِدَنْقُرُوا وَ يَسْجُدُوا قِدَّامْ هَمَانْ وَ دَا مِثِلْ الْمَلِكْ أَمَرْ بَيَّهْ. وَ لَاكِنْ مَرْدَكَايْ وَ لَا يِدَنْقِرْ وَ لَا يَسْجُدْ قِدَّامَهْ.

³ وَ خَدَّامِينْ الْمَلِكْ الْقَاعِدِينْ فِي خَشُمْ بَابْ قَصْرَهْ قَالَوْا لِمَرْدَكَايْ: «مَالَا مَا تِطَبِّقْ أَمُرْ الْمَلِكْ؟»

⁴ وَ دَايْماً قَاعِدِينْ يِحَجُّوا لَيَّهْ وَ لَاكِنْ هُو مَا يَسْمَعْ كَلَامْهُمْ. وَ خَلَاصْ، هُمَّنْ خَبَّرَوْا هَمَانْ أَشَانْ يِشِيفْ كَنْ كَلَامْ مَرْدَكَايْ دَا صَحِيحْ أَشَانْ هُو قَالْ هُو يَهُودِي.

⁵ وَ وَكِتْ هَمَانْ شَافْ كَدَرْ مَرْدَكَايْ مَا دَنْقَرْ وَ مَا سَجَدْ، هُو زِعِلْ زَعَلْ شَدِيدْ.

⁶ وَ هَمَانْ مَا دَوَّرْ يُخُطّ إِيدَهْ فَوْق مَرْدَكَايْ وِحَيْدَهْ بَسْ أَشَانْ خَبَّرَوْه كَدَرْ هُو يَهُودِي. وَ بِمِثِلْ دَا، هَمَانْ قَاعِدْ يِفَتِّشْ طَرِيقَةْ الْيِدَمِّرْ بَيْهَا كُلَّ الْيَهُودْ شَعَبْ مَرْدَكَايْ الْقَاعِدِينْ فِي كُلَّ مَمْلَكَةْ أَشَوِرُوشْ.

⁷ وَ فِي الشَّهَرْ الْأَوَّلْ الْأُسْمَهْ نِيسَانْ فِي سَنِةْ 12 هَنَا حُكُمْ أَشَوِرُوشْ، سَوَّوْا أَمْ عِيَيْدَاتْ الْأُسُمْهَا فُورِيمْ قِدَّامْ هَمَانْ. وَ هُو يِدَوْر يِحَدِّدْ الْيَوْم وَ الشَّهَرْ الْعَدِيلْ لِخِطِّتَهْ وَ خَلَاصْ، أَمْ عِيَيْدَاتْ وَقَعَتْ فِي شَهَرْ 12 الْأُسْمَهْ أَدَارْ.

هَمَان يجهِّز دمار اليَهُود

⁸ وَ خَلَاصْ، هَمَانْ قَالْ لِلْمَلِكْ أَشَوِرُوشْ: «فِيَّهْ شَعَبْ مُشَتَّتْ وَ مُفَرَّقْ فِي لُبّ الشُّعُوبْ هَنَا كُلَّ وُلَايَاتْ مَمْلَكَتَكْ. وَ قَوَانِينْهُمْ شِقْ مِنْ قَوَانِينْ كُلَّ الشُّعُوبْ الْآخَرِينْ وَ هُمَّنْ مَا قَاعِدِينْ يِطَبُّقُوا قَانُونَكْ، يَا الْمَلِكْ. وَ دَا مَا وَاجِبْ الْمَلِكْ يِخَلِّيهُمْ فِي رَاحَةْ.

⁹ وَ كَنْ بِقِي لَيْك عَدِيلْ، يَا الْمَلِكْ، خَلِّي تَمْرُقْ قَرَارْ لِدَمَارْهُمْ. وَ بَيْدَا، أَنَا نَنْطِي 34 000 كِيلَوْ هَنَا فُضَّةْ لِخَدَّامِينْ الْمَمْلَكَةْ وَ يُصُبُّوهَا فِي مَخَازِنْ الْمَلِكْ.»

¹⁰ وَ خَلَاصْ، الْمَلِكْ سَلَّ خَاتْمَهْ الْيَخْتِمْ بَيَّهْ مِنْ أُصْبَعَهْ وَ أَنْطَاهْ لِهَمَانْ وِلَيْد هَمْدَاتَا الْمِنْ ذُرِّيَّةْ أَقَاقْ عَدُو الْيَهُودْ.

¹¹ وَ الْمَلِكْ قَالْ لِهَمَانْ: «الْفُضَّةْ دِي، سَامَحْنَاهَا لَيْك وَ الشَّعَبْ دَا كُلَ، سَوِّي فَوْقهُمْ مِثِلْ إِنْتَ تِدَوْرَهْ.»

¹² وَ فِي يَوْم 13 هَنَا الشَّهَرْ الْأَوَّلْ، نَادَوْا كُلَّ كُتَّابْ الْمَلِكْ وَ كَتَبَوْا كُلَّ أَمُرْ هَمَانْ فِي مَكْتُوبْ لِمُحَافِظِينْ الْمَمْلَكَةْ وَ لِلْحُكَّامْ هَنَا أَيِّ وُلَايَةْ وَ لِلْمَسَائِيلْ هَنَا أَيِّ شَعَبْ وَ كَتَبَوْا لِأَيِّ وُلَايَةْ حَسَبْ كِتَابِتْهَا وَ لُغِّتَهْ. وَ هُمَّنْ كَتَبَوْا الْجَوَابَاتْ دَوْل بِأُسُمْ الْمَلِكْ أَشَوِرُوشْ وَ خَتَمَوْهُمْ بِخِتِمْ الْمَلِكْ.

¹³ وَ الْجَوَابَاتْ دَوْل رَسَّلَوْهُمْ بِمُرَسَّلِينْ فِي كُلَّ وُلَايَاتْ الْمَمْلَكَةْ أَشَانْ يِدَمُّرُوا وَ يَكْتُلُوا وَ يِكَمُّلُوا كُلَّ الْيَهُودْ، مِنْ الصُّبْيَانْ لَحَدِّي الشِّيَّابْ، حَتَّى الْعَوِينْ وَ الْأَطْفَالْ كُلَ. وَ يَنْهَبَوْهُمْ وَ يَكْسَبَوْا كُلَّ شَيّءْ الْعِنْدُهُمْ. وَ دَا يَبْقَى فِي يَوْم وَاحِدْ بَسْ يَعْنِي فِي يَوْم 13 هَنَا شَهْرِي 12 فِي الشَّهَرْ الْأُسْمَهْ أَدَارْ.

¹⁴ وَ نُسْخَةْ الْجَوَابْ دَا، يَنْشُرُوهَا مِثِلْ قَانُونْ فِي أَيِّ وُلَايَةْ وَ يِبَلُّغُوهَا لِكُلَّ الشُّعُوبْ أَشَانْ يُكُونُوا جَاهِزِينْ فِي الْيَوْم دَا.

¹⁵ وَ بِأَمُرْ الْمَلِكْ، الْمُرَسَّلِينْ مَشَوْا بِسُرْعَةْ وَ بَلَّغَوْا الْقَانُونْ دَا فِي مَدِينَةْ شُوشَةْ الْقَوِيَّةْ. الْمَلِكْ وَ هَمَانْ قَعَدَوْا لِيَشَرْبَوْا وَ لَاكِنْ نَاسْ مَدِينَةْ شُوشَةْ بَرْجَلَوْا مَرَّةْ وَاحِدْ.