جامِعة 11 - الكتاب المقدس بالعربي الدارجي هنا تشاد

قسِّم مالك لتحْفضه

¹ أَرْمِي خُبْزِتَكْ فِي الْأَلْمِي أَشَانْ يَوْم وَاحِدْ تَلْقَاهَا.

² قَسِّمْ مَالَكْ عَلَيْ سَبْعَةْ أَوْ تَمَانَةْ بَكَانْ أَشَانْ إِنْتَ مَا تَعَرِفْ الْفَسَالَةْ التَّجِي فِي الْأَرْض.

³ وَكِتْ السَّحَابْ يِشِيلْ أَلْمِي، الْمَطَرَةْ تُصُبّ فِي الْأَرْض. وَ كَنْ شَدَرَةْ وَقَعَتْ عَلَيْ الْوَطِي أَوْ عَلَيْ الْمُنْشَاقْ، فِي بَكَانْهَا الْوَقَعَتْ فَوْقَهْ دَا بَسْ، هِي تَقْعُدْ.

⁴ الْحَرَّاتِي الْيِشِيفْ الرِّيحْ يَعَرِفْ الْوَكِتْ الْمَا وَاجِبْ يِتَيْرِبْ. وَ الْحَرَّاتِي الْيِشِيفْ السَّحَابْ يَعَرِفْ الْوَكِتْ الْمَا وَاجِبْ يَقْطَعْ.

⁵ مِثِلْ إِنْتَ مَا تَعَرِفْ وِجْه الرِّيحْ وَ كِكَّيْف يِلْكَوَّنَوْا عُضَامْ الصَّغِيرْ فِي بَطُنْ أَمَّهْ، خَلَاصْ مَا تَقْدَرْ تَفْهَمْ كِكَّيْف الرَّبّ يِسَوِّي كُلَّ شَيّءْ.

⁶ بِفَجُرْ، تَيْرِبْ وَ بِعَشِيَّةْ، مَا تِنْجَمَّ. أَشَانْ إِنْتَ مَا تَعَرِفْ وَيْنُو الْيَنْجَحْ، دَا وَلَّا دَاكْ، وَلَّا كَنْ الْإِتْنَيْن كُلُّهُمْ عَدِيلِينْ.

⁷ نُورْ الصَّبَاحْ حَلُو وَ عَدِيلْ لِلْعُيُونْ يِشِيفُوا الْحَرَّايْ.

⁸ كَنْ نَادُمْ يِعِيشْ سِنِينْ كَتِيرِينْ، خَلِّي يَفْرَحْ بِأَيِّ وَاحِدْ مِنْهُمْ. وَ لَاكِنْ خَلِّي يِذَّكَّرْ كَدَرْ أَيَّامْ الْمَوْت أَكْتَرْ. وَ كُلَّ شَيّءْ الْيَجِي زَايِلْ سَاكِتْ.

أفْرح و فكِّر في الحِساب

⁹ يَا الصَّبِي! أَفْرَحْ بِأَيَّامْ صُبَاكْ وَ خَلِّي قَلْبَكْ يَفْرَحْ بِأَيَّامْ شَبَابَكْ. تَابِعْ كَلَامْ قَلْبَكْ وَ الْيِشِيفُوهْ عُيُونَكْ. لَاكِنْ أَعَرِفْ كَدَرْ فِي كُلَّ الشَّيّءْ دَا، الرَّبّ يِحَاسِبَكْ.

¹⁰ بَعِّدْ الْحِزِنْ مِنْ قَلْبَكْ وَ بَعِّدْ التَّعَبْ مِنْ جِسْمَكْ. أَشَانْ الصُّبَى وَ الْقُدْرَةْ زَايْلِينْ سَاكِتْ.