جامِعة 10 - الكتاب المقدس بالعربي الدارجي هنا تشاد

الحكمة و الطماسة

¹ الدُّبَّانْ الْمَيِّتْ يِحَمِّضْ وَ يِعَفِّنْ الدِّهِنْ هَنَا سِيدْ الْعِطِرْ. وَ مِثِلْ دَا، شِيَّةْ مِنْ الطَّمَاسَةْ تِتَلِّفْ الْحِكْمَةْ وَ الشَّرَفْ.

² قَلْب الْحَكِيمْ يِمَيِّلْ عَلَيْ الطَّرِيقْ الْعَدِيلْ وَ قَلْب الْمَطْمُوسْ يِمَيِّلْ عَلَيْ الطَّرِيقْ الْأَعْوَجْ.

³ وَ وَكِتْ الْمَطْمُوسْ يَمْشِي فِي الدَّرِبْ، يِنْعَرِفْ كَدَرْ هُو مَا عِنْدَهْ فِهِمْ وَ يِوَصِّفْ لِلنَّاسْ كَدَرْ فِكْرَهْ مَحْدُودْ.

⁴ وَكِتْ الْمَلِكْ يَزْعَلْ ضِدَّكْ، أَنْقَرِعْ، مَا تِخَلِّي بَكَانَكْ. أَقْعُدْ هَادِي وَ دَا يِنَجِّيكْ مِنْ ذُنُوبْ كَتِيرْ.

⁵ فِيَّهْ فَسَالَةْ أَنَا شِفْتَهَا فِي الْأَرْض وَ الْفَسَالَةْ دِي، هِي خَطَا جَايِ مِنْ الْمَلِكْ.

⁶ الْمَطَامِيسْ يُخُطُّوهُمْ فِي بَكَانْ عَالِي زِيَادَةْ وَ الْغَنِيِّينْ يُخُطُّوهُمْ فِي بَكَانْ تِحِتْ.

⁷ أَنَا شِفْت بَتَّانْ عَبِيدْ رَاكْبِينْ فِي خَيْل وَ مَسَائِيلْ مَاشِينْ بِرِجْلَيْهُمْ مِثِلْ عَبِيدْ.

أيِّ عمل عِنْده خُطورة

⁸ الْيَنْكُتْ نُقْرَةْ، أَكُونْ يَقَعْ فَوْقهَا وَ الْيِسَوِّي خُرْمَةْ، أَكُونْ دَابِي يِعَضِّيهْ.

⁹ الْيَقْطَعْ الْحَجَرْ، أَكُونْ يِنْجَرِحْ وَ الْيِشَقِّقْ الْحَطَبْ، يَدْخُلْ فِي الْخَطَرْ.

¹⁰ الْفَاسْ كَنْ كَالَّةْ وَ مَا طَرَّقَوْهَا، وَاجِبْ قُدْرَةْ زِيَادَةْ فِي إِسْتِعْمَالْهَا. خَلَاصْ، فَايْدَةْ الْحِكْمَةْ هِي النَّجَاحْ.

¹¹ كَنْ نَادُمْ يَعَرِفْ يِهَدِّي الدَّابِي وَ الدَّابِي يِعَضِّيهْ، شُنُو الْفَايْدَةْ الْيَلْقَاهَا؟

ما تِكلِّم كتير

¹² وَكِتْ الْحَكِيمْ يِحَجِّي، كَلَامَهْ يَعَجِبْ النَّاسْ وَ لَاكِنْ لِسَانْ الْمَطْمُوسْ يِوَدِّرَهْ.

¹³ كَلَامَهْ فِي الْبِدَايَةْ هُو طَمَاسَةْ وَ فِي النِّهَايَةْ هُو جَهَالَةْ وَ شَرّ.

¹⁴ النَّادُمْ الْفِكْرَهْ مَحْدُودْ، يِكَتِّرْ كَلَامَهْ. وَ الْإِنْسَانْ مَا يَعَرِفْ الْيُكُونْ وَ يَاتُو الْيِخَبِّرَهْ بِالْيُكُونْ بَعَدْ مَوْتَهْ؟

¹⁵ خِدْمَةْ الْمَطْمُوسْ تِعَيِّيهْ لَحَدِّي مَا يَعَرِفْ دَرِبْ الْيِوَدِّيهْ لِلْمَدِينَةْ!

¹⁶ الْعَذَابْ لِلْبَلَدْ الْمَلِكْهَا صَبِي وَ كُبَارَاتْهَا يَاكُلُوا طُولْ الْيَوْم!

¹⁷ مَبْرُوكْ لِلْبَلَدْ الْمَلِكْهَا مِنْ عِيَالْ الشُّيُوخْ وَ كُبَارَاتْهَا يَاكُلُوا فِي وَكِتْ مُنَاسِبْ لِيَلْقَوْا قُدْرَةْ بَلَا سَكَرْ!

¹⁸ فِي وَكْت الْكَسَلْ، رَاسْ الْبَيْت يَقَعْ وَ وَكْت الْإِيدَيْ يِنْرَخُوا، الْبَيْت يِنَقِّطْ.

¹⁹ النَّاسْ يِسَوُّوا أَكِلْ لِيَضْحَكَوْا وَ الْخَمَرْ لِيِفَرُّحُوا حَيَاتْهُمْ. وَ لَاكِنْ بِالْقُرُسْ، يَلْقَوْا كُلَّ شَيّءْ.

²⁰ مَا تَلْعَنْ الْمَلِكْ حَتَّى فِي دَاخَلْ قَلْبَكْ كُلَ وَ فِي بَيْتَكْ وِحَيْدَكْ، مَا تَلْعَنْ الْغَنِيْ. أَشَانْ الطَّيْرَايْ تِوَدِّي الْخَبَرْ وَ تِحَجِّي بِالشَّيّءْ الْإِنْتَ قُلْتَهْ.