كُلُوسِي 4 - الكتاب المقدس بالعربي الدارجي هنا تشاد

¹ يَا سِيَادْ الْعَبِيدْ، سَوُّوا دَايْماً لِعَبِيدْكُو الْعَدِلْ وَ الْمُسَاوَةْ. مَا تَنْسَوْا كَدَرْ إِنْتُو كُلَ عَبِيدْ وَ سِيدْكُو هُو الْقَاعِدْ فِي السَّمَاءْ.

الصلاة و البِشارة

² يَا أَخْوَانِي، أَنْكَرْبُوا فِي الصَّلَاةْ وَ أَقْعُدُوا فَوْقهَا وَاعِيِّينْ وَ أَسْأَلَوْا اللّٰهْ بِشُكُرْ.

³ وَ أَسْأَلَوْا اللّٰهْ لَيْنَا كُلَ. أَسْأَلَوْه أَشَانْ يَفْتَحْ لَيْنَا دَرِبْ لِلْبِشَارَةْ أَشَانْ نِبَلُّغُوا النَّاسْ بِسِرّ اللّٰهْ هُو الْمَسِيحْ. وَ بِسَبَبْ الْبِشَارَةْ دِي، أَنَا قَاعِدْ فِي السِّجِنْ.

⁴ أَسْأَلَوْا اللّٰهْ لَيِّ أَشَانْ نِبَلِّغْهَا لِلنَّاسْ بِكَلَامْ وَاضِحْ مِثِلْ وَاجِبْ.

⁵ عِيشُوا بِحِكْمَةْ فِي أُسْط النَّاسْ الْمَا مُؤمِنِينْ. أَيِّ فُرْصَةْ اللِّقِيتُوهَا، أَشْهَدَوْا لِلْمَسِيحْ.

⁶ شِيلُوا نِيَّةْ أَشَانْ تِحَجُّوا دَايْماً بِكَلَامْ طَاعِمْ وَ عِنْدَهْ رَحْمَةْ. وَ مِثِلْ دَا، تَعَرْفُوا كِكَّيْف وَاجِبْ تُرُدُّوا لِأَيِّ نَادُمْ.

الخبر و السلام

⁷ وَ خَلَاصْ، أَخُونَا تِشِيكُسْ يِأَوْرِيكُو بِكُلَّ خَبَرِي. هُو أَخُونَا النِّحِبُّوهْ وَ يَخْدِمْ مَعَانَا لِرَبِّنَا بِأَمَانْ.

⁸ وَ هُو يِخَبِّرْكُو بِحَالِتْنَا وَ يِشَجِّعْكُو وَ بِسَبَبْ دَا بَسْ رَسَّلْتَهْ لَيْكُو.

⁹ وَ رَسَّلْت مَعَايَهْ الْفَايِدْ وَ هُو أَخُونَا الْأَمِينْ النِّرِيدُوهْ وَ هُو نَادُمْ مِنْ حِلِّتْكُو. النَّاسَيْن دَوْل يِأَوْرُوكُو بِكُلَّ شَيّءْ الْبِقِي فَوْقنَا هِنِي.

¹⁰ أَخُونَا أَرِسْتَارْكُسْ الْقَاعِدْ مَعَايِ فِي السِّجِنْ يِسَلِّمْكُو وَ مَعَايَهْ مَرْخُوسْ أَخُو بَرْنَابَا. وَ مَرْخُوسْ دَا، كَنْ جَاءْ لَيْكُو، أَكُرْبُوهْ قَوِي مِثِلْ وَصَّوْكُو بَيَّهْ أَوَّلْ.

¹¹ وَ يَشُوعْ الْمَعْرُوفْ بِيُسْتُسْ يِسَلِّمْكُو. التَّلَاتَةْ دَوْل بَسْ مِنْ الْيَهُودْ بَيْن الْأَخْوَانْ الْيَخْدُمُوا مَعَايِ فِي شَانْ مَمْلَكَةْ اللّٰهْ وَ هُمَّنْ شَجَّعَوْنِي كَتِيرْ.

¹² وَ أَخُونَا أَبْفُرَاسْ الْهُو خَدَّامْ الْمَسِيحْ عِيسَى مِنْ حِلِّتْكُو، هُو كُلَ يِسَلِّمْكُو. هُو قَاعِدْ يَسْأَلْ اللّٰهْ دَايْماً لَيْكُو بِشِدَّةْ أَشَانْ تَقْعُدُوا بِثَبَاتْ كَامِلْ وَ مُؤَكِّدِينْ مِنْ نِيَّةْ اللّٰهْ.

¹³ وَ أَنَا نَشْهَدْ لَيَّهْ هُو قَاعِدْ يَخْدِمْ كَتِيرْ فِي شَانْكُو وَ فِي شَانْ الْأَخْوَانْ الْفِي حِلَّالْ لَاوْدِكِيَّةْ وَ هِرَابُلُسْ.

¹⁴ وَ أَخُونَا لُوقَا الدَّكْتَوْر النِّحِبُّوهْ وَ أَخُونَا دِيمَاسْ، هُمَّنْ يِسَلُّمُوكُو.

¹⁵ وَ سَلُّمُوا الْأَخْوَانْ الْفِي لَاوْدِكِيَّةْ وَ أَخُتْنَا نِيمْفَةْ وَ جَمَاعَةْ الْمُؤمِنِينْ الْيِلِمُّوا فِي بَيْتهَا.

¹⁶ وَ وَكِتْ قَرَوْا لَيْكُو الْجَوَابْ دَا خَلَاصْ، خَلِّي يَقْرُوهْ لِجَمَاعَةْ الْمُؤمِنِينْ الْفِي لَاوْدِكِيَّةْ كُلَ. وَ الْجَوَابْ الرَّسَّلْتَهْ لِلَاوْدِكِيَّةْ، خَلِّي يَقْرُوهْ لَيْكُو كُلَ.

¹⁷ وَ كَلُّمُوا لِأَرْخِبَّا وَ قُولُوا لَيَّهْ: «خُطّ بَالَكْ أَشَانْ تِتَمِّمْ الْخِدْمَةْ الرَّبِّنَا أَنْطَاهَا لَيْك.»

¹⁸ وَ خَلَاصْ، أَنَا ذَاتِي شِلْت الْقَلَمْ وَ نَكْتِبْ: «أَنَا بُولُسْ نِسَلِّمْكُو.» مَا تَنْسَوْا كَدَرْ أَنَا قَاعِدْ فِي السِّجِنْ وَ مُجَنْزَرْ. وَ عَلَيْكُمْ رَحْمَةْ الرَّبّ.