كُلُوسِي 1 - الكتاب المقدس بالعربي الدارجي هنا تشاد1 جَوَابْ مِنِّي أَنَا بُولُسْ رَسُولْ عِيسَى الْمَسِيحْ بِإِذِنْ اللّٰهْ وَ دَاهُو نَكْتِبْ مَعَ أَخُونَا تِمُوتَاوُسْ 2 لَيْكُو إِنْتُو أَخْوَانَّا فِي الْمَسِيحْ الصَّالِحِينْ وَ أَمِينِينْ السَّاكْنِينْ فِي حِلَّةْ كُلُوسِي. عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا. دُعا بُولُس و شُكْره 3 نَشْكُرُوا اللّٰهْ أَبُو رَبِّنَا عِيسَى الْمَسِيحْ. وَ فِي أَيِّ وَكِتْ، نَسْأَلَوْه لَيْكُو 4 أَشَانْ سِمِعْنَا بِإِيمَانْكُو فِي الْمَسِيحْ عِيسَى وَ سِمِعْنَا بِحُبُّكُو لِكُلَّ الصَّالِحِينْ. 5 وَ إِنْتُو ثَابْتِينْ فِي إِيمَانْكُو وَ مَحَبِّتْكُو أَشَانْ إِنْتُو قَاعِدِينْ تَرْجَوْا بِعَشَمْ الْبَرَكَةْ الْاللّٰهْ حَفَضَاهَا لَيْكُو فِي السَّمَاءْ. وَ سِمِعْتُوا بَيْهَا فِي كَلَامْ الْحَقّ وَ هُو بِشَارَةْ الْمَسِيحْ الْبَلَّغَوْهَا لَيْكُو مِنْ أَوَّلْ. 6 وَ بِشَارَةْ الْمَسِيحْ قَاعِدَةْ تِجِيبْ نَتِيجَةْ وَ تِلْوَزَّعْ فِي الدُّنْيَا. وَ دَا مِثِلْ هِي قَاعِدَةْ تِسَوِّيهْ فِي أُسُطْكُو مِنْ يَوْم إِنْتُو سِمِعْتُوا بِنِعْمَةْ اللّٰهْ وَ عِرِفْتُوهَا بِصَحِيحْ. 7 وَ إِنْتُو سِمِعْتُوا بِشَارَةْ الْمَسِيحْ مِنْ خَشُمْ حَبِيبْنَا أَبْفُرَاسْ الْهُو عَبْد الْمَسِيحْ مِثِلْنَا. هُو قَاعِدْ يَخْدِمْ لِلْمَسِيحْ بِأَمَانْ وَ يِمَثِّلْنَا فِي أُسُطْكُو. 8 وَ هُو أَوْرَانَا بِالْمَحَبَّةْ اللِّقِيتُوهَا مِنْ الرُّوحْ الْقُدُّوسْ. 9 وَ أَشَانْ دَا مِنْ يَوْم سِمِعْنَا خَبَرْ إِيمَانْكُو، أَنِحْنَ قَاعِدِينْ نَسْأَلَوْا لَيْكُو اللّٰهْ. وَ نَسْأَلَوْا لَيْكُو اللّٰهْ أَشَانْ تَعَرْفُوا الْهُو يِدَوْرَهْ وَ تَلْقَوْا حِكْمَةْ وَ فِهِمْ مِنْ الرُّوحْ الْقُدُّوسْ. 10 وَ مِثِلْ دَا، تَعَرْفُوا كِكَّيْف تِعِيشُوا بِحَالْ الْوَاجْبَةْ لِنَاسْ الرَّبّ وَ تِسَوُّوا دَايْماً الشَّيّءْ الْهُو يَرْضَى بَيَّهْ وَ تِسَوُّوا كُلَّ عَمَلْ الْخَيْر وَ تَعَرْفُوا اللّٰهْ بِزِيَادَةْ. 11 وَ فِي كُلِّ وَكِتْ، خَلِّي اللّٰهْ يِقَوِّيكُو بِقُدُرْتَهْ الْمَجِيدَةْ أَشَانْ تَحْمَلَوْا التَّعَبْ وَ تَصْبُرُوا فَوْقَهْ بِفَرَحْ 12 وَ تَشْكُرُوا دَايْماً اللّٰهْ أَبُوكُو الْجَعَلَاكُو جَاهِزِينْ لِتِشَارُكُوا فِي وَرَثَةْ الصَّالِحِينْ فِي مَمْلَكَةْ النُّورْ. 13 أَيْوَى، اللّٰهْ فَزَعَانَا وَ مَرَقَانَا مِنْ مُلُكْ الضَّلَامْ وَ وَدَّانَا فِي مَمْلَكَةْ إِبْنَهْ الْيِرِيدَهْ. 14 وَ هُو بَسْ الْفَدَانَا وَ جَابْ لَيْنَا غُفْرَانْ الذُّنُوبْ. كُبوريّة المسيح 15 الْمَسِيحْ هُو صُورَةْ اللّٰهْ الْمَا بِنْشَافْ. هُو إِبْن اللّٰهْ قَاعِدْ قَبُلْ الْخَلِيقَةْ وَ مُكَلَّفْ بِكُلَّ شَيّءْ الْاللّٰهْ خَلَقَهْ. 16 أَشَانْ بَيَّهْ هُو، اللّٰهْ خَلَقْ كُلَّ شَيّءْ الْفِي السَّمَاوَاتْ وَ فِي الْأَرْض، الْبِنْشَافْ وَ الْمَا بِنْشَافْ، وَ أَيِّ مَخْلُوقْ الْعِنْدَهْ عَرْش أَوْ مُلُكْ وَ كَنْ هُو حَاكِمْ أَوْ كَبِيرْ. اللّٰهْ خَلَقْ كُلَّ شَيّءْ بِوَاسِطَةْ إِبْنَهْ وَ فِي شَانَهْ هُو. 17 إِبْن اللّٰهْ هُو قُبَّالْ كُلَّ شَيّءْ وَ بِقُدُرْتَهْ كُلَّ شَيّءْ قَاعِدْ ثَابِتْ. 18 هُو بَسْ رَاسْ الْجِسِمْ وَ الْجِسِمْ هُو أُمَّةْ الْمَسِيحْ. وَ هُو الْبِدَايَةْ وَ أَوَّلْ نَادُمْ الْبَعَثْ مِنْ أُسْط الْمَيْتِينْ. وَ اللّٰهْ سَوَّى مِثِلْ دَا أَشَانْ إِبْنَهْ يَبْقَى الْأَوَّلْ فِي كُلِّ شَيّءْ. 19 وَ الْمَسِيحْ هُو مِثِلْ دَا أَشَانْ اللّٰهْ رَضْيَانْ كَدَرْ كُلَّ صِفَاتَهْ يَقْعُدُوا فَوْقَهْ كَامِلِينْ. 20 وَ بِوَاسِطَةْ الْمَسِيحْ، اللّٰهْ دَوَّرْ يِصَالِحْ كُلِّ شَيّءْ مَعَايَهْ، الْقَاعِدِينْ فِي الْأَرْض أَوْ فِي السَّمَاوَاتْ. هُو سَوَّى الصُّلُحْ دَا بِدَمّ إِبْنَهْ الْمَاتْ فِي الصَّلِيبْ. 21 وَ فِي الْوَكِتْ الْفَاتْ، إِنْتُو مَا عِنْدُكُو عَلَاقَةْ مَعَ اللّٰهْ وَ بِقِيتُوا عُدْوَانَهْ بِفِكِرْكُو وَ قَاعِدِينْ تِسَوُّوا الْفَسَالَةْ. 22 وَ لَاكِنْ هَسَّعْ، اللّٰهْ سَوَّى صُلُحْ مَعَاكُو بِوَاسِطَةْ إِبْنَهْ الْجَاءْ بِجِسِمْ إِنْسَانِي. وَ إِبْنَهْ مَاتْ لِيِسَوِّيكُو نَاسْ خَاصِّينْ وَ يِقَدِّمْكُو لِلّٰهْ بَلَا خَطَا وَ بَلَا عَيْب. 23 وَ دَا كُلَ يَبْقَى لَيْكُو كَنْ تَقْعُدُوا ثَابْتِينْ وَ قَوِيِّينْ فِي الْإِيمَانْ وَ مَا خَلَّيْتُوا عَشَمْكُو الْأَوَّلْ لِقِيتُوهْ وَكِتْ سِمِعْتُوا بِشَارَةْ الْمَسِيحْ. وَ الْبِشَارَةْ دِي، بَلَّغَوْهَا لِكُلَّ مَخْلُوقْ فِي الْأَرْض وَ أَنَا بُولُسْ بِقِيتْ خَدَّامَهْ أَشَانْ نِبَلِّغْ الْبِشَارَةْ لِلنَّاسْ. خِدْمة الرسول بُولُس 24 وَ أَنَا فَرْحَانْ بِتَعَبِي أَشَانْ أَنَا قَاعِدْ نَتْعَبْ فِي شَانْكُو. وَ فِي جِسْمِي، نَحْمَلْ كُلَّ التَّعَبْ الْيِقَصِّرْ لِلْمَسِيحْ فِي شَانْ أُمَّتَه الْهِي جِسْمَهْ. 25 أَنَا بِقِيتْ خَدَّامْ لِجَمَاعَةْ الْمُؤمِنِينْ أَشَانْ اللّٰهْ كَلَّفَانِي بِالْخِدْمَةْ دِي وَ نَخْدِمْ فِي شَانْكُو. وَ خِدِمْتِي هِي نِبَلِّغْ كَلَامْ اللّٰهْ الْكَامِلْ. 26 وَ نِبَلِّغْ السِّرّ الْاللّٰهْ أَبَداً مَا بَيَّنَهْ لِنَاسْ هَنَا أَيِّ زَمَنْ الْفَاتْ وَ لَاكِنْ هَسَّعْ هُو بَيَّنَهْ لِنَاسَهْ الصَّالِحِينْ. 27 وَ اللّٰهْ شَالْ نِيَّةْ أَشَانْ يِأَوْرِيهُمْ كَدَرْ السِّرّ دَا يِجِيبْ بَرَكَةْ كَبِيرَةْ وَ مَجِيدَةْ بِلْحَيْن لِكُلَّ الْأُمَمْ. وَ سِرّ اللّٰهْ، هُو الْمَسِيحْ ذَاتَهْ يَقْعُدْ فِيكُو وَ دَا يَنْطِيكُو عَشَمْ تَدْخُلُوا فِي مَجْدَهْ. 28 وَ نِبَلُّغُوا النَّاسْ بِالْمَسِيحْ. وَ نِخَبُّرُوا أَيِّ نَادُمْ وَ نِعَلُّمُوا أَيِّ نَادُمْ بِكُلِّ حِكْمَةْ أَشَانْ أَيِّ إِنْسَانْ يُكُونْ كَامِلْ فِي الْمَسِيحْ. 29 وَ أَنَا قَاعِدْ نَتْعَبْ وَ نِجَاهِدْ فِي الْخِدْمَةْ دِي بِالْقُدْرَةْ الْهُو يَنْطِينِي مِنْ قُدُرْتَهْ الْعَظِيمَةْ. |
La Bible en arabe tchadien © Alliance biblique du Tchad, 2019
Bible Society of Chad