أعمال الرُسُل 7 - الكتاب المقدس بالعربي الدارجي هنا تشاد

إِسْتِفَان حجّى للمجْلس

¹ وَ كَبِيرْ رُجَالْ الدِّينْ سَأَلْ إِسْتِفَانْ وَ قَالْ: «كَلَامْهُمْ دَا صَحِيحْ وَلَّا؟»

² وَ إِسْتِفَانْ رَدَّ لَيَّهْ وَ قَالْ: «يَا الْأَخْوَانْ وَ الْأَبَّهَاتْ، أَسْمَعَوْا كَلَامِي. اللّٰهْ الْمَجِيدْ بَانْ لِجِدِّنَا إِبْرَاهِيمْ وَكِتْ هُو قَاعِدْ فِي بَلَدْ بَيْن الْنَّهْرَيْن قُبَّالْ مَا مَشَى فِي حِلَّةْ حَارَانْ.

³ وَ اللّٰهْ قَالْ لَيَّهْ: ‹أَمْرُقْ مِنْ بَلَدَكْ وَ مِنْ أَهَلَكْ وَ أَمْشِي فِي الْبَلَدْ النِّوَصِّفْهَا لَيْك.›

⁴ «وَ إِبْرَاهِيمْ مَرَقْ مِنْ دَارْ الْكَلْدَانِيِّينْ وَ سَكَنْ فِي حَارَانْ وَ قَعَدْ هِنَاكْ لَحَدِّي أَبُوهْ مَاتْ. وَ اللّٰهْ جَابَهْ فِي الْبَلَدْ دِي الْإِنْتُو هَسَّعْ سَاكْنِينْ فَوْقهَا.

⁵ وَ فِي الْبَلَدْ دِي، اللّٰهْ مَا أَنْطَاهْ أَرْض وَرَثَةْ وَ لَا بَكَانْ صَغَيَّرْ يُخُطّ فَوْقَهْ رِجِلَيْنَهْ كُلَ. وَ لَاكِنْ اللّٰهْ وَاعَدَهْ وَ قَالْ يَنْطِي الْبَلَدْ دِي وَرَثَةْ لَيَّهْ هُو وَ لِعِيَالَهْ. وَ فِي الْوَكِتْ دَا، إِبْرَاهِيمْ مَا عِنْدَهْ وِلَيْد وَاحِدْ كُلَ.

⁶ وَ اللّٰهْ كَلَّمْ لِإِبْرَاهِيمْ وَ قَالْ لَيَّهْ كَدَرْ ذُرِّيّتَهْ يَبْقَوْا أَجَانِبْ وَ يَسْكُنُوا فِي بَلَدْ الْمَا هِنْتُهُمْ. وَ سِيَادْ الْبَلَدْ دِي يِعَبُّدُوهُمْ وَ يِضَايُقُوهُمْ مُدَّةْ 400 سَنَةْ.

⁷ وَ اللّٰهْ قَالْ: <أَنَا نِعَاقِبْ الْأُمَّةْ التِّعَبِّدْهُمْ وَ بَعَدْ دَا، ذُرِّيّتَكْ يَمُرْقُوا وَ يَعَبُدُونِي فِي الْبَكَانْ دَا.>

⁸ «وَ اللّٰهْ سَوَّى مُعَاهَدَةْ هَنَا طَهُورَةْ مَعَ إِبْرَاهِيمْ. وَ بِسَبَبْ دَا، إِبْرَاهِيمْ طَهَّرْ إِسْحَاقْ بَعَدْ تَمَانَةْ يَوْم مِنْ وَالُودْتَهْ. وَ إِسْحَاقْ طَهَّرْ وِلَيْدَهْ يَعْقُوبْ وَ يَعْقُوبْ طَهَّرْ أَوْلَادَهْ الْأَتْنَا عَشَرْ الْبِقَوْا جُدُودْنَا.

⁹ وَ جُدُودْنَا أَنْحَسَدَوْا فِي أَخُوهُمْ يُوسُفْ وَ بَاعَوْه وَ هُو بِقِي عَبِدْ فِي مَصِرْ. وَ لَاكِنْ اللّٰهْ قَاعِدْ مَعَايَهْ

¹⁰ وَ نَجَّاهْ مِنْ كُلَّ التَّعَبْ الْجَاءْ فَوْقَهْ. وَ اللّٰهْ أَنْطَاهْ رَحْمَةْ وَ حِكْمَةْ أَشَانْ لِقِي رِضَى مِنْ فِرْعَوْن مَلِكْ مَصِرْ. وَ بَيْدَا، فِرْعَوْن دَرَّجْ يُوسُفْ حَاكِمْ فِي مَصِرْ وَ كَلَّفَهْ بِمَسْؤُولِيَّةْ كُلَّ بَيْتَهْ.

¹¹ «وَ بَعَدْ دَا، الْجُوعْ دَخَلْ فِي مَصِرْ وَ بَلَدْ كَنْعَانْ وَ جُدُودْنَا تَعْبَانِينْ بِلْحَيْن وَ الْمَعَاشْ بِقِي مَا فِيهْ.

¹² وَ يَعْقُوبْ سِمِعْ خَبَرْ يُقُولُوا الْمَصْرِيِّينْ عِنْدُهُمْ قَمَحْ وَ رَسَّلْ جُدُودْنَا أَوَّلْ مَرَّةْ هِنَاكْ.

¹³ وَ وَكِتْ مَشَوْا تَانِي مَرَّةْ، يُوسُفْ أَوْرَاهُمْ هُو أَخُوهُمْ. وَ فِي الْوَكِتْ دَا بَسْ، يُوسُفْ قَدَّمْ أَخْوَانَهْ لِفِرْعَوْن.

¹⁴ وَ بَعَدْ دَا، يُوسُفْ نَادَى أَبُوهْ يَعْقُوبْ وَ أَخْوَانَهْ وَ عِيَالْهُمْ أَشَانْ يَجُوا فِي مَصِرْ وَ هُمَّنْ 75 نَاسْ.

¹⁵ وَ بِمِثِلْ دَا، يَعْقُوبْ وَ جُدُودْنَا جَوْا فِي مَصِرْ وَ سَكَنَوْا فَوْقهَا لَحَدِّي مَاتَوْا.

¹⁶ وَ خَلَاصْ، وَدَّوْا عُضَامْهُمْ فِي حِلَّةْ شَكِيمْ وَ دَفَنَوْهُمْ فِي الْقَبُرْ الْإِبْرَاهِيمْ شَرَاهْ بِفُضَّةْ مِنْ بَنِي حَمُورْ فِي شَكِيمْ.

¹⁷ «وَ الْوَكِتْ الْاللّٰهْ يِدَوْر يِتِمّ فَوْقَهْ الْوَعَدْ الْأَنْطَاهْ لِإِبْرَاهِيمْ قَرَّبْ. وَ بَنِي إِسْرَائِيلْ قَاعِدِينْ يِزِيدُوا فِي مَصِرْ وَ عَدَدْهُمْ بِقِي كَتِيرْ زِيَادَةْ.

¹⁸ وَ فِي الْوَكِتْ دَاكْ، مَلِكْ جَدِيدْ رِكِبْ فِي مَصِرْ وَ هُو مَا عِرِفْ شَيّءْ فِي يُوسُفْ.

¹⁹ وَ غَشَّاهُمْ لِقَبِيلِتْنَا وَ ظَلَمَاهُمْ لِجُدُودْنَا وَ جَبَرَاهُمْ أَشَانْ يِخَلُّوا أَطْفَالْهُمْ بَرَّا لِيُمُوتُوا.

²⁰ وَ فِي الْوَكِتْ دَا بَسْ، وِلْدَوْا مُوسَى وَ هُو وِلَيْد جَمِيلْ مَرَّةْ وَاحِدْ قِدَّامْ اللّٰهْ. وَ أَمَّهْ وَ أَبُوهْ رَبَّوْه فِي بَيْتهُمْ تَلَاتَةْ شَهَرْ.

²¹ وَ فِي الأَخِيرْ، وَاجِبْ يَمُرْقُوهْ مِنْ بَيْتهُمْ وَ بِنَيَّةْ فِرْعَوْن شَالَتَهْ أَشَانْ يَبْقَى وِلَيْدهَا وَ رَبَّتَهْ مِثِلْ وِلَيْدهَا.

²² وَ هُو عَلَّمْ كُلَّ عِلِمْ الْمَصْرِيِّينْ لَحَدِّي بِقِي نَادُمْ شَدِيدْ فِي كَلَامَهْ وَ فِي خِدِمْتَهْ.

²³ «وَ وَكِتْ مُوسَى عُمْرَهْ تَمَّ 40 سَنَةْ، شَالْ نِيَّةْ أَشَانْ يَمْشِي يِشِيفْ أَخْوَانَهْ بَنِي إِسْرَائِيلْ.

²⁴ وَ شَافْ مَصْرِي وَاحِدْ قَاعِدْ يِتَعِّبْ وَاحِدْ مِنْهُمْ. وَ مُوسَى دَافَعْ لِأَخُوهْ الْمَظْلُومْ أَشَانْ يَنْصُرَهْ وَ كَتَلْ الْمَصْرِي.

²⁵ وَ فِي فِكْرَهْ أَخْوَانَهْ يَفْهَمَوْا كَدَرْ اللّٰهْ رَسَّلَهْ أَشَانْ يِنَجِّيهُمْ بِإِيدَهْ. وَ لَاكِنْ هُمَّنْ مَا فِهْمَوْا.

²⁶ «وَ أَمْبَاكِرْ، هُو لِقِي نَاسَيْن مِنْ أَخْوَانَهْ قَاعِدِينْ يِدَّاوَسَوْا. وَ هُو دَوَّرْ هُمَّنْ يِسَّامَحَوْا أَمْبَيْنَاتْهُمْ وَ قَالْ: ‹إِنْتُو أَخْوَانْ وَ مَالْكُو تِدَّاوَسَوْا؟›

²⁷ لَاكِنْ النَّادُمْ الْيِتَعِّبْ الْآخَرْ لَزَّ مُوسَى وَ قَالْ: ‹يَاتُو خَطَّاكْ فَوْقنَا حَاكِمْ وَ قَاضِي؟

²⁸ وَلَّا تِدَوْر تَكْتُلْنِي مِثِلْ أَمِسْ كَتَلْت الْمَصْرِي دَا؟›

²⁹ وَ وَكِتْ مُوسَى سِمِعْ الْكَلَامْ دَا، هُو جَرَى مِنْ مَصِرْ وَ مَشَى بِقِي أَجْنَبِي فِي بَلَدْ مِدْيَانْ. وَ وَكِتْ سَاكِنْ هِنَاكْ، وِلِدْ أَوْلَادْ إِتْنَيْن.

³⁰ «وَ بَعَدْ 40 سَنَةْ، مُوسَى قَمَّ مَشَى فِي صَحَرَاءْ هَنَا جَبَلْ سِينَاء وَ وَاحِدْ مِنْ الْمَلَائِكَةْ بَانْ لَيَّهْ فِي نَارْ فِي لُبّ شِدَيْرَةْ.

³¹ وَ وَكِتْ مُوسَى شَافَهْ، هُو عَجَّبْ بِلْحَيْن وَ قَرَّبْ لِلشِّدَيْرَةْ أَشَانْ يِشِيفَهْ عَدِيلْ. وَ خَلَاصْ، حِسّ اللّٰهْ أَنْسَمَعْ.

³² وَ اللّٰهْ قَالْ: ‹أَنَا اللّٰهْ رَبّ جُدُودْكُو إِبْرَاهِيمْ وَ إِسْحَاقْ وَ يَعْقُوبْ.› وَ مُوسَى رَجَفْ وَ خَافْ خَوْف شَدِيدْ وَ مَا دَوَّرْ يِشِيفَهْ.

³³ وَ اللّٰهْ كَلَّمْ لَيَّهْ وَ قَالْ: ‹سِلّ نِعْلَيْك مِنْ رِجِلَيْنَكْ أَشَانْ الْبَكَانْ الْإِنْتَ وَاقِفْ فَوْقَهْ دَا أَرْض مُقَدَّسَةْ.

³⁴ أَنَا شِفْت التَّعَبْ الشَّدِيدْ هَنَا شَعَبِي الْقَاعِدِينْ فِي مَصِرْ وَ أَنَا سِمِعْت صِرَاخْهُمْ وَ نَزَلْت أَشَانْ نِنَجِّيهُمْ. وَ هَسَّعْ تَعَالْ، نِرَسِّلَكْ إِنْتَ فِي مَصِرْ.›»

³⁵ وَ إِسْتِفَانْ قَالْ: «مُوسَى دَا، هُو النَّادُمْ الْأَخْوَانَهْ أَبَوْه مَا قِبْلَوْه وَ الْقَالَوْا لَيَّهْ: ‹يَاتُو خَطَّاكْ فَوْقنَا حَاكِمْ وَ قَاضِي.› وَ لَاكِنْ هُو بَسْ النَّادُمْ الْاللّٰهْ رَسَّلَهْ أَشَانْ يَبْقَى حَاكِمْهُمْ وَ مُنَجِّيهُمْ مِنْ الْمَصْرِيِّينْ بِمُسَاعَدَةْ الْمَلَكْ الْبَانْ لَيَّهْ فِي الشِّدَيْرَةْ.

³⁶ وَ هُو مَرَقَاهُمْ مِنْ مَصِرْ. وَ فِي مُدَّةْ 40 سَنَةْ، سَوَّى عَجَايِبْ وَ عَلَامَاتْ كُبَارْ فِي بَلَدْ مَصِرْ وَ فِي الْبَحَرْ الْأَحْمَرْ وَ فِي الصَّحَرَاءْ.

³⁷ «وَ مُوسَى دَا، هُو الْكَلَّمْ لِبَنِي إِسْرَائِيلْ وَ قَالْ: <بَعَدَيْن اللّٰهْ يِقَوِّمْ لَيْكُو مِنْ أَخْوَانْكُو نَبِي مِثْلِي أَنَا.>

³⁸ وَ وَكِتْ جَمَاعَةْ بَنِي إِسْرَائِيلْ لَامِّينْ فِي الصَّحَرَاءْ، مُوسَى بَسْ الْوَسِيطْ أَمْبَيْن جُدُودْنَا وَ الْمَلَكْ الْكَلَّمْ مَعَايَهْ فِي جَبَلْ سِينَاء. لَيَّهْ هُو بَسْ، اللّٰهْ نَزَّلْ كَلَامْ الْحَيَاةْ أَشَانْ يَنْطِيهْ لَيْنَا.

³⁹ «وَ لَاكِنْ جُدُودْنَا أَبَوْا مَا سِمْعَوْه. هُمَّنْ مَا دَوَّرَوْا يِتَابُعُوهْ. وَ فِي قُلُوبْهُمْ دَوَّرَوْا يِقَبُّلُوا فِي مَصِرْ.

⁴⁰ وَ حَجَّوْا لِهَارُونْ وَ قَالَوْا: ‹أَصْنَعْ لَيْنَا أَصْنَامْ وَ خَلِّيهُمْ يُقُودُونَا فِي الدَّرِبْ، أَشَانْ مَا نَعَرْفُوا الشَّيّءْ الْبِقِي لِمُوسَى الْمَرَقَانَا مِنْ بَلَدْ مَصِرْ.›

⁴¹ وَ فِي الْوَكِتْ دَا، صَنَعَوْا الصَّنَمْ الْيِشَابِهْ عِجِلْ. وَ قَدَّمَوْا لَيَّهْ ضَحِيَّةْ وَ عَيَّدَوْا بِفَرْحَةْ قِدَّامْ الشَّيّءْ الْهُمَّنْ بَسْ سَوَّوْه.

⁴² وَ اللّٰهْ كَسَّ مِنْهُمْ وَ خَلَّاهُمْ يَعَبُدُوا قُوَّاتْ السَّمَاءْ. وَ دَا مَكْتُوبْ فِي كِتَابْ الْأَنْبِيَاء الْبُقُولْ: <يَا بَنِي إِسْرَائِيلْ، فِي مُدَّةْ 40 سَنَةْ فِي الصَّحَرَاءْ، قَدَّمْتُوا ضَحَايَا وَ هَدَايَا لَيِّ أَنَا وَلَّا؟

⁴³ لَا، أَبَداً! فِي الصَّحَرَاءْ، إِنْتُو شَايْلِينْ خَيْمَةْ الْعِبَادَةْ هَنَا مُولَكْ وَ شَايْلِينْ إِلٰـهْكُو نَجْمَةْ رَفَانْ. دَوْل الْأَصْنَامْ الصَّنَعْتُوهُمْ أَشَانْ تَسْجُدُوا لَيْهُمْ. وَ بِسَبَبْ دَا، نِوَدِّيكُو فِي الْغُرْبَةْ غَادِي لِبَلَدْ بَابِلْ.>

⁴⁴ «وَ فِي الصَّحَرَاءْ، جُدُودْنَا شَالَوْا مَعَاهُمْ الْخَيْمَةْ الْفَوْقهَا لِيحَانْ الْمُعَاهَدَةْ. دِي الْخَيْمَةْ الْمُوسَى بَنَاهَا مِثِلْ اللّٰهْ أَمَرَهْ بَيَّهْ. وَ هُو بَنَاهَا مِثِلْ النِّظَامْ الْاللّٰهْ وَصَّفَهْ.

⁴⁵ وَ بَعَدْ دَا، يَشُوعْ وَ جُدُودْنَا جَابَوْا خَيْمَةْ الْعِبَادَةْ الْفَوْقهَا الصَّنْدُوقْ فِي الْبَلَدْ دِي وَكِتْ دَخَلَوْا فَوْقهَا وَ مَلَكَوْهَا. وَ اللّٰهْ طَرَدْ كُلَّ الْقَبَايِلْ السَّاكْنِينْ فَوْقهَا مِنْ قِدَّامْهُمْ. وَ الْخَيْمَةْ دِي قَاعِدَةْ لَحَدِّي زَمَنْ دَاوُدْ.

⁴⁶ «وَ اللّٰهْ رِضِي بِدَاوُدْ وَ دَاوُدْ طَلَبْ إِذِنْ أَشَانْ يَبْنِي بَيْت قَوِي لِلّٰهْ رَبّ بَنِي يَعْقُوبْ.

⁴⁷ وَ فِي الأَخِيرْ، وِلَيْدَهْ سُلَيْمَانْ بَنَى بَيْت اللّٰهْ.

⁴⁸ وَ لَاكِنْ اللّٰهْ الْعَالِي مَا سَاكِنْ فِي بُيُوتْ الْبَنَوْهُمْ النَّاسْ. أَشَانْ دَا، كِتَابْ النَّبِي بُقُولْ:

⁴⁹ <دَاهُو اللّٰهْ قَالْ: السَّمَاءْ عَرْشِي وَ الْأَرْض بَكَانْ نُخُطّ رِجِلَيْنِي. هَلْ تَقْدَرَوْا تَبْنُوا بَيْت الْيِشِيلْنِي؟ وَلَّا تَقْدَرَوْا تَبْنُوا لَيِّ بَكَانْ لِلرَّاحَةْ؟

⁵⁰ كُلَّ شَيّءْ الْقَاعِدْ، أَنَا بَسْ الْخَلَقْتَهْ.>»

⁵¹ وَ إِسْتِفَانْ قَالْ: «يَا النَّاسْ الْعَاصِيِينْ! قُلُوبْكُو قَوِيِّينْ وَ مَا تِدَوْرُوا تَسْمَعَوْا كَلَامْ اللّٰهْ! إِنْتُو دَايْماً تَعَصَوْا الرُّوحْ الْقُدُّوسْ. إِنْتُو تِسَوُّوا نَفْس الشَّيّءْ مِثِلْ جُدُودْكُو سَوَّوْه.

⁵² وَيْن النَّبِي الْجُدُودْكُو مَا تَعَّبَوْه؟ هُمَّنْ كَتَلَوْا الْأَنْبِيَاء الْبَلَّغَوْا لَيْهُمْ بِجَيَّةْ عَبْدَهْ الصَّالِحْ الْمَسِيحْ وَ وَكِتْ الْمَسِيحْ جَاءْ خَلَاصْ، إِنْتُو خُنْتُوهْ وَ كَتَلْتُوهْ!

⁵³ إِنْتُو بَسْ النَّاسْ الْاللّٰهْ نَزَّلْ لَيْكُو التَّوْرَاةْ بِوَاسِطَةْ الْمَلَائِكَةْ وَ لَاكِنْ مَا تَابَعْتُوا كَلَامَهْ!»

مَوْت إِسْتِفَان

⁵⁴ وَ وَكِتْ نَاسْ الْمَجْلَسْ سِمْعَوْا كَلَامْ إِسْتِفَانْ، غِضْبَوْا غَضَبْ شَدِيدْ وَ عَضَّوْا سُنُونْهُمْ مِنْ الزَّعَلْ ضِدَّهْ.

⁵⁵ وَ إِسْتِفَانْ أَنْمَلَى بِالرُّوحْ الْقُدُّوسْ وَ رَفَعْ رَاسَهْ وَ قَاعِدْ يِشِيفْ فَوْق فِي السَّمَاءْ. وَ هُو شَافْ مَجْد اللّٰهْ وَ عِيسَى وَاقِفْ جَنْب اللّٰهْ فِي نُصَّهْ الزَّيْنَايْ.

⁵⁶ وَ إِسْتِفَانْ قَالْ: «أَنَا شَايِفْ السَّمَاءْ فَاتِحْ وَ شَايِفْ إِبْن الْإِنْسَانْ وَاقِفْ جَنْب اللّٰهْ فِي نُصَّهْ الزَّيْنَايْ!»

⁵⁷ وَ النَّاسْ عَوَّوْا بِحِسّ شَدِيدْ وَ أَيِّ وَاحِدْ مِنْهُمْ سَدَّ أَدَانَهْ بِإِيدَيْنَهْ وَ كُلُّهُمْ قَمَّوْا هَجَمَوْه.

⁵⁸ وَ مَرَقَوْه بَرَّا مِنْ الْمَدِينَةْ وَ قَمَّوْا يَرْجُمُوهْ. وَ الشُّهُودْ الْقَاعِدِينْ يَرْجُمُوهْ سَلَّوْا خُلْقَانْهُمْ الْبَرَّانِيِّينْ وَ خَلَّوْهُمْ مَعَ صَبِي أُسْمَهْ شَاوُولْ لِيَحْرِسْهُمْ.

⁵⁹ وَ وَكِتْ قَاعِدِينْ يَرْجُمُوهْ، إِسْتِفَانْ دَعَى وَ قَالْ: «يَا رَبِّنَا عِيسَى، شِيلْ رُوحِي.»

⁶⁰ وَ بَرَكْ وَ صَرَخْ بِحِسّ شَدِيدْ وَ قَالْ: «يَا رَبّ، مَا تَحْسِبْ خَطَاهُمْ دَا فَوْقهُمْ.» وَ وَكِتْ قَالْ الْكَلَامْ دَا، خَلَاصْ هُو مَاتْ.