أعمال الرُسُل 2 - الكتاب المقدس بالعربي الدارجي هنا تشاد

الروح نزل في التلاميذ

¹ وَ فِي يَوْم هَنَا عِيدْ الْخَمْسِينْ، كُلَّ الْأَخْوَانْ قَاعِدِينْ سَوَا لَامِّينْ فِي بَكَانْ وَاحِدْ.

² وَ فَجْأَةً مِنْ السَّمَاءْ، أَنْسَمَعْ حِسّ شَدِيدْ مِثِلْ رِيحْ شَدِيدَةْ قَاعِدَةْ تَنْفُخْ وَ مَلَا الْبَيْت الْهُمَّنْ قَاعِدِينْ فَوْقَهْ.

³ وَ شَافَوْا شَيّءْ يِشَابِهْ لِسْنَيْ النَّارْ شَتَّتَوْا وَ نَزَلَوْا فِي أَيِّ وَاحِدْ مِنْهُمْ.

⁴ وَ أَيِّ نَادُمْ أَنْمَلَى بِالرُّوحْ الْقُدُّوسْ وَ قَمَّ يِحَجِّي بِلُغَّةْ آخَرَةْ بِقُدْرَةْ الرُّوحْ دَا.

⁵ وَ فِي الْوَكِتْ دَا، مَدِينَةْ الْقُدُسْ مَلَانَةْ بِيَهُودْ تَقِيِّينْ الْجَوْا مِنْ كُلَّ بُلْدَانْ الدُّنْيَا.

⁶ وَ نَاسْ كَتِيرِينْ سِمْعَوْا الْحَرَكَةْ وَ لَمَّوْا فِي الْبَكَانْ الْأَخْوَانْ قَاعِدِينْ فَوْقَهْ. وَ أَلْعَجَّبَوْا مَرَّةْ وَاحِدْ أَشَانْ أَيِّ نَادُمْ سِمِعْ كَلَامْهُمْ بِلُغِّتَهْ.

⁷ وَ بَرْجَلَوْا بِلْحَيْن وَ أَلْعَجَّبَوْا مَرَّةْ وَاحِدْ. وَ قَمَّوْا يِحَجُّوا أَمْبَيْنَاتْهُمْ وَ يُقُولُوا: «النَّاسْ الْيِحَجُّوا دَوْل مَا مِنْ دَارْ الْجَلِيلْ وَلَّا؟

⁸ كِكَّيْف أَيِّ وَاحِدْ مِنِّنَا سِمِعْ هُمَّنْ يِكَلُّمُوا بِلُغِّتْنَا؟

⁹ وَ فِي نَاسْ أُسُطْنَا مِنْ بُلْدَانْ كَتِيرِينْ مِثِلْ الْفَرْتِيَة وَ الْمَادِي وَ عِلَامْ. وَ فِي سُكَّانْ هَنَا بَلَدْ بَيْن الْنَّهْرَيْن وَ نَاسْ مِنْ دَارْ الْيَهُودِيَّةْ وَ مِنْ كَبَّدُوكِيَّةْ وَ بُنْطُسْ وَ آسِيَا

¹⁰ وَ فِرِقِيَّةْ وَ بَمْفِيلِيَةْ وَ مَصِرْ وَ مِنْ طَرَفْ لِيبِيَا قَرِيبْ لِحِلَّةْ الْقَيْرَوَانْ. وَ فِي ضِيفَانْ كَتِيرِينْ جَوْا مِنْ مَدِينَةْ رَوْمَا

¹¹ وَ فِي نَاسْ يَهُودْ وَ فِي نَاسْ آخَرِينْ دَخَلَوْا فِي دِينْ الْيَهُودْ. وَ فِي نَاسْ وَاحِدِينْ مِنْ جَزِيرَةْ كِرِيتْ وَ مِنْ دَارْ الْعَرَبْ. وَ أَنِحْنَ كُلِّنَا قَاعِدِينْ نَسْمَعَوْهُمْ يِحَجُّوا بِلُغِّتْنَا بِالْعَجَايِبْ الْكُبَارْ الْاللّٰهْ سَوَّاهُمْ.»

¹² وَ كُلُّهُمْ أَلْعَجَّبَوْا وَ بَرْجَلَوْا وَ قَاعِدِينْ يِسَّاءَلَوْا أَمْبَيْنَاتْهُمْ وَ يُقُولُوا: «الشَّيّءْ الْقَاعِدْ يَبْقَى دَا، مَعَنَاتَهْ شُنُو؟»

¹³ وَ لَاكِنْ نَاسْ وَاحِدِينْ يِشَّمَّتَوْا لِلْمُؤمِنِينْ وَ يُقُولُوا: «هُمَّنْ سَكْرَانِينْ.»

بُطْرُس حجّى للناس

¹⁴ بُطْرُسْ قَمَّ مَعَ الرُّسُلْ الْإِحْدَى عَشَرْ. وَ هُو كَلَّمْ لِلنَّاسْ بِحِسّ شَدِيدْ وَ قَالْ: «يَا أَخْوَانِي الْيَهُودْ وَ كُلَّ الضِّيفَانْ الْقَاعِدِينْ فِي مَدِينَةْ الْقُدُسْ، أَسْمَعَوْا كَلَامِي وَ نِفَسِّرْ لَيْكُو الشَّيّءْ الْبِقِي.

¹⁵ إِنْتُو قُلْتُوا النَّاسْ دَوْل سَكْرَانِينْ. وَ دَا مَا صَحِيحْ. يَاتُو الْيَسْكَرْ فِي السَّاعَةْ تِسْعَةْ هَنَا الْفَجُرْ؟

¹⁶ وَ لَاكِنْ الشَّيّءْ السِّمِعْتُوهْ دَا، هُو الشَّيّءْ النَّبِي يُوِيلْ كَلَّمْ بَيَّهْ.

¹⁷ هُو قَالْ: <فِي الزَّمَنْ الْأَخِيرْ، أَنَا نِنَزِّلْ رُوحِي فِي كُلَّ النَّاسْ. وَ دَا بَسْ كَلَامْ اللّٰهْ. أَوْلَادْكُو وَ بَنَاتْكُو يِتْنَبَّأَوْا وَ صُبْيَانْكُو يِشِيفُوا رُؤْيَةْ وَ شِيَّابْكُو يَحْلَمَوْا بِحِلِمْ.

¹⁸ وَ فِي الزَّمَنْ دَا، عَبِيدِي وَ خَدِيمِي كُلَ نِنَزِّلْ فَوْقهُمْ رُوحِي وَ يِتْنَبَّأَوْا.

¹⁹ وَ نِسَوِّي عَجَايِبْ فَوْق فِي السَّمَاءْ وَ عَلَامَاتْ تِحِتْ فِي الْأَرْض. وَ النَّاسْ يِشِيفُوا دَمّ وَ نَارْ وَ دُخَّانْ أَزْرَقْ.

²⁰ وَ الْحَرَّايْ تَبْقَى زَرْقَةْ وَ الْقَمَرْ يَبْقَى أَحْمَرْ مِثِلْ الدَّمّ. وَ دَا قُبَّالْ يَوْم اللّٰهْ مَا يَجِي وَ هُو يَوْم عَظِيمْ وَ مَجِيدْ.

²¹ وَ أَيِّ نَادُمْ الْيَدْعِي بِأُسُمْ اللّٰهْ يَنْجَى.>

²² «يَا بَنِي إِسْرَائِيلْ، أَسْمَعَوْا كَلَامِي! اللّٰهْ وَصَّفْ لَيْكُو سُلْطَةْ عِيسَى الْمِنْ النَّاصِرَةْ. أَشَانْ بَيَّهْ هُو اللّٰهْ سَوَّى أَعْمَالْ كُبَارْ وَ عَجَايِبْ وَ عَلَامَاتْ فِي أُسُطْكُو. وَ إِنْتُو ذَاتْكُو تَعَرْفُوهْ عَدِيلْ.

²³ وَ مِنْ أَوَّلْ، اللّٰهْ عِرِفْ الشَّيّءْ الْيَبْقَى. وَ بِنِيّتَهْ الثَّابْتَةْ، اللّٰهْ سَلَّمْ لَيْكُو عِيسَى. وَ إِنْتُو أَسْتَفَقْتُوا مَعَ النَّاسْ الْفَسْلِينْ لِتَكْتُلُوهْ فِي الصَّلِيبْ.

²⁴ وَ لَاكِنْ اللّٰهْ بَعَثَهْ مِنْ أُسْط الْمَيْتِينْ وَ دَمَّرْ تَعَبْ الْمَوْت أَشَانْ مَا مُمْكِنْ الْمَوْت يِنَّصِرْ فَوْقَهْ.

²⁵ وَ النَّبِي دَاوُدْ حَجَّى بَيَّهْ فِي الْكِتَابْ وَ قَالْ: <شِفْت اللّٰهْ دَايْماً قِدَّامِي. أَشَانْ هُو قَاعِدْ بِزَيْنَايْتِي، أَنَا مَا نِتَّرْتَعْ.

²⁶ وَ فِي شَانْ دَا، قَلْبِي يَفْرَحْ وَ لِسَانِي يِغَنِّي بِفَرَحْ. وَ جِسْمِي يَرْقُدْ بِعَشَمْ

²⁷ أَشَانْ إِنْتَ مَا تِخَلِّينِي فِي أُسْط الْمَيْتِينْ. لَا، إِنْتَ مَا تِخَلِّي جَنَازَةْ عَبْدَكْ الْقُدُّوسْ تَبْقَى تُرَابْ.

²⁸ إِنْتَ عَرَّفْتِنِي دَرِبْ الْحَيَاةْ وَ تَنْطِينِي فَرَحْ بِكَتَرَةْ فِي حَضَرَتَكْ.>

²⁹ «يَا الْأَخْوَانْ، خَلِّي نِأَوْرِيكُو بِكَلَامْ وَاضِحْ كَدَرْ جِدِّنَا دَاوُدْ مَاتْ وَ دَفَنَوْه وَ قَبُرَهْ قَاعِدْ فِي حِلِّتْنَا لَحَدِّي الْيَوْم.

³⁰ دَاوُدْ كَانْ نَبِي. وَ هُو عِرِفْ كَدَرْ اللّٰهْ حَلَفْ لَيَّهْ وَ قَالْ كَدَرْ هُو يُخُطّ وَاحِدْ مِنْ ذُرِّيّتَهْ فِي كُرْسِي الْمَلِكْ.

³¹ وَ دَاوُدْ شَافْ بُعَاثْ الْمَسِيحْ مِنْ زَمَانْ وَ أَكَّدَهْ وَ قَالْ كَدَرْ اللّٰهْ مَا يِخَلِّي الْمَسِيحْ فِي أُسْط الْمَيْتِينْ وَ لَا يِخَلِّي جَنَازْتَهْ تَبْقَى تُرَابْ.

³² «وَ عِيسَى دَا، اللّٰهْ بَعَثَهْ وَ أَنِحْنَ شِفْنَاهْ وَ كُلِّنَا شُهُودْ لَيَّهْ.

³³ وَ اللّٰهْ رَفَعْ عِيسَى وَ قَعَّدَهْ فِي جَنْبَهْ فِي نُصَّهْ الزَّيْنَايْ. هَسَّعْ اللّٰهْ أَبُوهْ أَنْطَاهْ الرُّوحْ الْقُدُّوسْ الْوَاعَدَانَا بَيَّهْ مِنْ زَمَانْ وَ عِيسَى نَزَّلَهْ فَوْقنَا. وَ بِمِثِلْ دَا بَسْ، الشَّيّءْ الْإِنْتُو قَاعِدِينْ تِشِيفُوهْ وَ تَسْمَعَوْه بِقِي.

³⁴ وَ دَاوُدْ دَا، هُو مَا أَنْرَفَعْ فِي السَّمَاءْ. هُو النَّادُمْ الْقَالْ: ‹اللّٰهْ حَجَّى لِسِيدِي الْمَلِكْ وَ قَالْ: <أَقْعُدْ بِنُصِّي الزَّيْنَايْ

³⁵ لَحَدِّي نُخُطّ عُدْوَانَكْ تِحِتْ رِجِلَيْنَكْ.>›

³⁶ «خَلَاصْ، خَلِّي أَيِّ نَادُمْ مِنْ بَنِي إِسْرَائِيلْ يَعَرِفْ بَلَا شَكَكْ كَدَرْ عِيسَى الْإِنْتُو كَتَلْتُوهْ فِي الصَّلِيبْ، اللّٰهْ جَعَلَهْ سِيدْكُو الْمَسِيحْ!»

ناس كتيرين آمنوا

³⁷ وَ وَكِتْ النَّاسْ سِمْعَوْا الْكَلَامْ دَا، قَلِبْهُمْ أَنْجَرَحْ مَرَّةْ وَاحِدْ وَ سَأَلَوْا بُطْرُسْ وَ الرُّسُلْ الْآخَرِينْ وَ قَالَوْا: «يَا أَخْوَانَّا، وَاجِبْ نِسَوُّوا شُنُو؟»

³⁸ وَ بُطْرُسْ رَدَّ لَيْهُمْ وَ قَالْ: «تُوبُوا مِنْ ذُنُوبْكُو وَ أَيِّ وَاحِدْ مِنْكُو يِغَطُّسُوهْ بِأُسُمْ عِيسَى الْمَسِيحْ. وَ اللّٰهْ يَغْفِرْ لَيْكُو ذُنُوبْكُو وَ يَنْطِيكُو الرُّوحْ الْقُدُّوسْ.

³⁹ أَشَانْ اللّٰهْ قَالْ هُو يَنْطِي الْبَرَكَةْ دِي لَيْكُو وَ لِعِيَالْكُو وَ لِكُلَّ النَّاسْ الْقَاعِدِينْ فِي بَكَانْ بَعِيدْ، أَيْوَى لِأَيِّ نَادُمْ الرَّبِّنَا اللّٰهْ يِنَادِيهْ.»

⁴⁰ وَ بُطْرُسْ قَاعِدْ يَشْهَدْ لِعِيسَى قِدَّامْ النَّاسْ وَ حَجَّى لَيْهُمْ كَلَامْ كَتِيرْ أَشَانْ يِجِيبْهُمْ فِي الدَّرِبْ. هُو قَالْ: «تُوبُوا وَ تَنْجَوْا. مَا تِتَابُعُوا نَاسْ وَكِتْنَا الْمُوَدِّرِينْ دَوْل.»

⁴¹ وَ النَّاسْ الْآمَنَوْا بِكَلَامَهْ غَطَّسَوْهُمْ. وَ فِي الْيَوْم دَا، عَدَدْ النَّاسْ الْآمَنَوْا وَ اللَّمَّوْا مَعَ الْمُؤمِنِينْ 3 000 نَادُمْ.

⁴² وَ بِنِيَّةْ وَاحِدَةْ كُلَّ الْمُؤمِنِينْ قَمَّوْا يِنْكَرْبُوا فِي تَعْلِيمْ الرُّسُلْ وَ الْحَيَاةْ الْأَخَوِيَّةْ وَ عَشَاءْ الْمَسِيحْ وَ الصَّلَاوَاتْ.

⁴³ وَ اللّٰهْ أَنْطَى عَجَايِبْ وَ عَلَامَاتْ كَتِيرِينْ لِلرُّسُلْ وَ خَوْف دَخَلْ فِي قُلُوبْ النَّاسْ كُلُّهُمْ.

⁴⁴ وَ كُلَّ الْمُؤمِنِينْ عِنْدُهُمْ نِيَّةْ وَاحِدَةْ وَ أَيِّ نَادُمْ يَجْعَلْ مَالَهْ مِثِلْ مَالْ الْأَخْوَانْ.

⁴⁵ وَ قَاعِدِينْ يِبِيعُوا أَرْضُهُمْ وَ خُمَامْهُمْ لِيَنْطُوا قُرُسْ لِأَيِّ نَادُمْ حَسَبْ الْهُو حَوْجَانْ لَيَّهْ.

⁴⁶ وَ كُلَّ يَوْم، قَاعِدِينْ يِلِمُّوا فِي بَيْت اللّٰهْ وَ يِلْعَشَّوْا سَوَا فِي بُيُوتْهُمْ بِفَرَحْ وَ قَلِبْ مُخْلِصْ.

⁴⁷ وَ قَاعِدِينْ يَشْكُرُوا اللّٰهْ وَ كُلَّ النَّاسْ رَضْيَانِينْ بَيْهُمْ. وَ كُلَّ يَوْم، الرَّبّ قَاعِدْ يِزِيدْ عَدَدْ الْمُؤمِنِينْ وَ يِنَجِّي نَاسْ زِيَادَةْ.