أعمال الرُسُل 10 - الكتاب المقدس بالعربي الدارجي هنا تشاد

رُؤية كَرْنِيلِي

¹ وَ فِي حِلَّةْ قَيْصَرِيَّةْ، فِيَّهْ نَادُمْ وَاحِدْ أُسْمَهْ كَرْنِيلِي. هُو عَسْكَرِي رَوْمَانِي وَ كَبِيرْ فِي 100 عَسْكَرْ مِنْ الْفِرْقَةْ الْإِيطَالِيَّةْ.

² هُو نَادُمْ تَقِي وَ هُو وَ كُلَّ نَاسْ بَيْتَهْ خَايْفِينْ مِنْ اللّٰهْ. هُو يَنْطِي صَدَقَةْ كَتِيرْ لِلْمَسَاكِينْ وَ دَايْماً قَاعِدْ يَسْأَلْ اللّٰهْ.

³ وَ يَوْم وَاحِدْ مِثِلْ السَّاعَةْ تَلَاتَةْ بَعَدْ الضُّهُرْ، رُؤْيَةْ جَاتْ لِكَرْنِيلِي. وَ فِي الرُّؤْيَةْ دِي، هُو شَافْ وَاحِدْ مِنْ مَلَائِكَةْ اللّٰهْ جَايِ لَيَّهْ فِي بَيْتَهْ. وَ الْمَلَكْ كَلَّمْ لَيَّهْ وَ قَالْ: «يَا كَرْنِيلِي!»

⁴ وَ وَكِتْ شَافْ الْمَلَكْ، هُو خَافْ بِلْحَيْن وَ سَأَلَهْ وَ قَالْ: «شُنُو، يَا سَيِّدْنَا؟» وَ الْمَلَكْ رَدَّ لَيَّهْ وَ قَالْ: «اللّٰهْ قِبِلْ صَلَاوَاتَكْ وَ الصَّدَقَةْ الْأَنْطَيْتهَا. وَ هُو جَاهِزْ لِيُرُدّ لَيْك.

⁵ وَ هَسَّعْ بَسْ رَسِّلْ رُجَالْ فِي حِلَّةْ يَافَا أَشَانْ يِنَادُوا سِمْعَانْ الْبِنَادُوهْ بُطْرُسْ أَشَانْ يَجِي لَيْك.

⁶ هُو ضَيْف هَنَا سِمْعَانْ الدَّبَّاغِي الْبَيْتَهْ جَنْب الْبَحَرْ.»

⁷ وَ وَكِتْ الْمَلَكْ الْكَلَّمْ لَيَّهْ فَاتْ، كَرْنِيلِي نَادَى خَدَّامِينْ إِتْنَيْن وَ نَادَى نَادُمْ تَقِي مِنْ الْعَسْكَرْ الْقَاعِدِينْ دَايْماً مَعَايَهْ.

⁸ وَ أَوْرَاهُمْ بِالشَّيّءْ الْبِقِي وَ رَسَّلَاهُمْ لِيَافَا.

رُؤية بُطْرُس

⁹ وَ أَمْبَاكِرْ بِضُهُرْ وَكِتْ الرُّجَالْ التَّلَاتَةْ دَوْل مَاشِينْ فِي الدَّرِبْ قَرَّبَوْا لِحِلَّةْ يَافَا، بُطْرُسْ طَلَعْ فِي رَاسْ الْبَيْت أَشَانْ يِصَلِّي.

¹⁰ وَ جُوعْ شَدِيدْ سَوَّاهْ وَ دَوَّرْ يَاكُلْ. وَ وَكِتْ قَاعِدِينْ يِجَهُّزُوا لَيَّهْ أَكِلْ، شَيّءْ مِثِلْ رُؤْيَةْ جَاءْ لَيَّهْ.

¹¹ وَ فِي الرُّؤْيَةْ دِي، شَافْ السَّمَاءْ فَاتِحْ وَ شَيّءْ مِثِلْ قِطْعَةْ كَبِيرَةْ مَفْلُولَةْ وَ مَكْرُوبَةْ مِنْ جَوَانِبْهَا الْأَرْبَعَةْ نَازْلَةْ فِي الْأَرْض.

¹² وَ الْقِطْعَةْ دِي مَلَانَةْ بِكُلَّ نَفَرْ الْحَيْوَانَاتْ الْفِي الْأَرْض وَ الزَّوَاحِفْ وَ الطُّيُورْ.

¹³ وَ بُطْرُسْ سِمِعْ حِسّ قَاعِدْ يِنَادِيهْ وَ يُقُولْ: «يَا بُطْرُسْ، قُمّ! أَدْبَحْ وَ آكُلْ!»

¹⁴ وَ لَاكِنْ بُطْرُسْ رَدَّ لَيَّهْ وَ قَالْ: «لَا، يَا رَبِّي! أَبَداً مَا أَكَلْت شَيّءْ حَرَامْ وَ لَا شَيّءْ نِجِسْ.»

¹⁵ وَ الْحِسّ كَلَّمْ لَيَّهْ بَتَّانْ وَ قَالْ: «الشَّيّءْ الْاللّٰهْ طَهَّرَهْ، مَا تُقُولْ نِجِسْ.»

¹⁶ وَ الشَّيّءْ دَا بِقِي تَلَاتَةْ مَرَّاتْ وَ طَوَّالِي الْقِطْعَةْ أَنْرَفَعَتْ فِي السَّمَاءْ.

¹⁷ وَ بُطْرُسْ أَلْعَجَّبْ وَ بَدَا يَسْأَلْ فِي نَفْسَهْ شُنُو مَعَنَى الرُّؤْيَةْ الشَّافَاهَا. وَ فِي الْوَكِتْ دَا بَسْ، الرُّجَالْ الْكَرْنِيلِي رَسَّلَاهُمْ لِقَوْا بَيْت سِمْعَانْ الدَّبَّاغِي وَ جَوْا وَقَفَوْا فِي خَشُمْ الْبَيْت.

¹⁸ وَ قَاعِدِينْ يَسْأَلَوْا نَاسْ الْبَيْت وَ يُقُولُوا: «سِمْعَانْ الْيِنَادُوهْ بُطْرُسْ دَا، هُو ضَيْف فِي بَكَانْكُو وَلَّا؟»

¹⁹ وَكِتْ بُطْرُسْ قَاعِدْ يِفَكِّرْ فِي مَعَنَى الرُّؤْيَةْ دِي بَسْ، الرُّوحْ الْقُدُّوسْ كَلَّمْ لَيَّهْ وَ قَالْ: «أَسْمَعْ، فِي تَلَاتَةْ رُجَالْ قَاعِدِينْ فِي خَشُمْ الْبَيْت. يَسْأَلَوْا مِنَّكْ.

²⁰ دَلِّي تِحِتْ وَ لَاقِيهُمْ وَ أَمْشِي مَعَاهُمْ وَ مَا تِشَكِّكْ فَوْقهُمْ. أَنَا بَسْ رَسَّلْتُهُمْ لَيْك.»

²¹ وَ أَدَّلَّ تِحِتْ وَ مَشَى لَيْهُمْ وَ قَالْ: «أَنَا بَسْ النَّادُمْ التِّدَوْرُوهْ. جِيتُوا لِشُنُو؟»

²² وَ رَدَّوْا لَيَّهْ وَ قَالَوْا: «كَرْنِيلِي رَسَّلَانَا. وَ كَرْنِيلِي دَا هُو كَبِيرْ عَسْكَرْ وَ رَاجِلْ صَالِحْ وَ خَايِفْ مِنْ اللّٰهْ. وَ كُلَّ الْيَهُودْ يَشْهَدَوْا لَيَّهْ هُو نَادُمْ عَدِيلْ. وَ وَاحِدْ مِنْ مَلَائِكَةْ اللّٰهْ جَاءْ لَيَّهْ وَ قَالْ وَاجِبْ كَرْنِيلِي يِنَادِيكْ تَمْشِي بَيْتَهْ أَشَانْ يَسْمَعْ كَلَامَكْ.»

²³ وَ بُطْرُسْ ضَيَّفَاهُمْ وَ رَقَدَوْا فِي الْبَيْت. وَ بِفَجُرْ، بُطْرُسْ قَمَّ وَ مَشَى مَعَاهُمْ. وَ وَاحِدِينْ مِنْ الْأَخْوَانْ مِنْ يَافَا كُلَ مَشَوْا مَعَ بُطْرُسْ.

بُطْرُس في بيت كَرْنِيلِي

²⁴ وَ أَمْبَاكِرْ، وِصْلَوْا فِي قَيْصَرِيَّةْ وَ كَرْنِيلِي قَاعِدْ يَرْجَاهُمْ مَعَ أَخْوَانَهْ وَ رُفْقَانَهْ الْمَرَّةْ وَاحِدْ.

²⁵ وَ وَكِتْ بُطْرُسْ قَاعِدْ يَدْخُلْ فِي الْبَيْت، كَرْنِيلِي قَابَلَهْ وَ سَجَدْ لَيَّهْ.

²⁶ وَ بُطْرُسْ رَفَعَهْ وَ قَالْ: «قُمّ فَوْق! أَنَا إِنْسَانْ مِثْلَكْ إِنْتَ بَسْ.»

²⁷ وَ بُطْرُسْ دَخَلْ فِي الْبَيْت وَ قَاعِدْ يِحَجِّي مَعَايَهْ وَ مَشَى دَاخَلْ وَ لِقِي نَاسْ كَتِيرِينْ لَامِّينْ.

²⁸ وَ قَالْ لَيْهُمْ: «إِنْتُو تَعَرْفُوا فِي دِينْ الْيَهُودْ حَرَامْ لِيَهُودِي يِلِمّ مَعَ نَادُمْ مَا يَهُودِي. وَ لَا يِسَلِّمَهْ فِي بَيْتَهْ كُلَ. وَ لَاكِنْ اللّٰهْ أَوْرَانِي مَا وَاجِبْ نُقُولْ أَيِّ نَادُمْ نِجِسْ وَلَّا مَا طَاهِرْ بِسَبَبْ قَبِيلْتَهْ.

²⁹ وَ أَشَانْ دَا، وَكِتْ نَادَيْتُونِي، أَنَا مَا قُلْت كَلَامْ وَ جِيتْ لَيْكُو. وَ هَسَّعْ أَوْرُونِي نَادَيْتُونِي لِشُنُو؟»

³⁰ وَ كَرْنِيلِي رَدَّ لَيَّهْ وَ قَالْ: «عِنْدِنَا أَرْبَعَةْ يَوْم، السَّاعَةْ مِثِلْ الْوَكِتْ دَا، أَنَا فِي بَيْتِي وَ قَاعِدْ نِصَلِّي صَلَاةْ هَنَا السَّاعَةْ تَلَاتَةْ. وَ فَجْأَةً، رَاجِلْ لَابِسْ خَلَقْ أَبْيَضْ مِثِلْ الْبَرَّاقَةْ بَانْ قِدَّامِي.

³¹ وَ قَالْ لَيِّ: ‹يَا كَرْنِيلِي، اللّٰهْ سِمِعْ صَلَاوَاتَكْ وَ فَكَّرْ فِي الصَّدَقَةْ الْإِنْتَ أَنْطَيْتهَا.

³² وَ هَسَّعْ رَسِّلْ رُجَالْ فِي يَافَا أَشَانْ يِنَادُوا سِمْعَانْ الْبِنَادُوهْ بُطْرُسْ أَشَانْ يَجِي لَيْك. هُو ضَيْف هَنَا سِمْعَانْ الدَّبَّاغِي الْبَيْتَهْ جَنْب الْبَحَرْ.›

³³ وَ طَوَّالِي، أَنَا رَسَّلْتُهُمْ أَشَانْ يِنَادُوكْ وَ شُكْراً بِجَيْتَكْ. وَ خَلَاصْ، كُلِّنَا قَاعِدِينْ هِنِي قِدَّامْ اللّٰهْ أَشَانْ نَسْمَعَوْا كُلَّ الْكَلَامْ الْاللّٰهْ أَمَرَكْ بَيَّهْ.»

³⁴ وَ بُطْرُسْ قَمَّ يِكَلِّمْ لَيْهُمْ وَ قَالْ: «خَلَاصْ دَهَابَ أَنَا فِهِمْت كَدَرْ صَحِيحْ كَيْ، اللّٰهْ مَا يِشِيفْ قَبِيلَةْ وَاحِدَةْ أَخَيْر مِنْ قَبَايِلْ آخَرِينْ.

³⁵ وَ اللّٰهْ يَقْبَلْ نَادُمْ مِنْ أَيِّ قَبِيلَةْ كَنْ يَخَافْ مِنَّهْ وَ عَمَلَهْ صَالِحْ.

³⁶ وَ أَكِيدْ، اللّٰهْ رَسَّلْ لِبَنِي إِسْرَائِيلْ بِشَارَةْ السَّلَامْ الْيَنْطِيهَا بِعِيسَى الْمَسِيحْ، رَبّ هَنَا كُلَّ النَّاسْ.

³⁷ وَ إِنْتُو تَعَرْفُوا كُلَّ شَيّءْ الْبِقِي فِي دَارْ الْيَهُودِيَّةْ. الشَّيّءْ الْبِقِي دَا بَدَا فِي دَارْ الْجَلِيلْ بَعَدْ يَحْيَى نَادَى النَّاسْ أَشَانْ يِغَطِّسْهُمْ.

³⁸ وَ تَعَرْفُوا كَدَرْ اللّٰهْ نَزَّلْ الرُّوحْ الْقُدُّوسْ فِي عِيسَى الْمِنْ النَّاصِرَةْ وَ دَرَّجَهْ مَسِيحْ وَ أَنْطَاهْ قُدْرَةْ. وَ عِيسَى سَوَّى الْخَيْر فِي أَيِّ بَكَانْ وَ شَفَى كُلَّ النَّاسْ الْإِبْلِيسْ عَذَّبَاهُمْ أَشَانْ اللّٰهْ كَانْ مَعَايَهْ.

³⁹ «وَ أَنِحْنَ شُهُودْ فِي كُلَّ شَيّءْ الْعِيسَى سَوَّاهْ فِي دَارْ الْيَهُودْ وَ فِي مَدِينَةْ الْقُدُسْ. وَ خَلَاصْ، عَلَّقَوْه فِي الصَّلِيبْ وَ كَتَلَوْه.

⁴⁰ وَ بَعَدْ تَلَاتَةْ يَوْم، اللّٰهْ قَوَّمَهْ مِنْ الْمَوْت وَ بَيَّنَهْ لِلنَّاسْ.

⁴¹ وَ لَاكِنْ مَا بَيَّنَهْ لِكُلَّ النَّاسْ، إِلَّا لِلشُّهُودْ الْهُو عَزَلَاهُمْ مِنْ أَوَّلْ. وَ دَا لَيْنَا أَنِحْنَ الْأَكَلْنَا وَ شِرِبْنَا مَعَايَهْ بَعَدْ هُو بَعَثْ مِنْ أُسْط الْمَيْتِينْ.

⁴² وَ عِيسَى أَمَرَانَا أَشَانْ نِبَلُّغُوا الْبِشَارَةْ لِلشَّعَبْ وَ نَشْهَدَوْا لَيَّهْ وَ نُقُولُوا عِيسَى بَسْ النَّادُمْ الْاللّٰهْ جَعَلَهْ لِيِحَاسِبْ النَّاسْ الْحَيِّينْ وَ الْمَيْتِينْ.

⁴³ وَ كُلَّ الْأَنْبِيَاء يَشْهَدَوْا لِعِيسَى وَ يُقُولُوا أَيِّ نَادُمْ الْيِآمِنْ بَيَّهْ، يَلْقَى غُفْرَانْ الذُّنُوبْ بِأُسْمَهْ.»

⁴⁴ وَ وَكِتْ بُطْرُسْ لِسَّاعْ قَاعِدْ يِكَلِّمْ لَيْهُمْ كَيْ بَسْ، الرُّوحْ الْقُدُّوسْ نَزَلْ فِي كُلَّ النَّاسْ الْقَاعِدِينْ يَسْمَعَوْا كَلَامَهْ.

⁴⁵ وَ الْمُؤمِنِينْ الْمِنْ الْيَهُودْ الْجَوْا مَعَ بُطْرُسْ أَلْعَجَّبَوْا مَرَّةْ وَاحِدْ أَشَانْ شَافَوْا اللّٰهْ أَنْطَى الرُّوحْ الْقُدُّوسْ لِلنَّاسْ الْمَا يَهُودْ كُلَ.

⁴⁶ وَ سِمْعَوْهُمْ وَ هُمَّنْ قَاعِدِينْ يِكَلُّمُوا بِلُغَّاتْ آخَرِينْ وَ يَحْمُدُوا اللّٰهْ بِفَرْحَةْ. وَ بُطْرُسْ قَالْ:

⁴⁷ «فِي نَادُمْ يَدْحَرْنَا مِنْ الْأَلْمِي أَشَانْ مَا نِغَطُّسُوا النَّاسْ دَوْل وَلَّا؟ اللّٰهْ أَنْطَاهُمْ هُمَّنْ الرُّوحْ الْقُدُّوسْ مِثِلْ أَنْطَاهْ لَيْنَا.»

⁴⁸ وَ بُطْرُسْ أَمَرَاهُمْ لِأَخْوَانَهْ أَشَانْ يِغَطُّسُوهُمْ بِأُسُمْ عِيسَى الْمَسِيحْ. وَ بَعَدْ غَطَّسَوْهُمْ خَلَاصْ، كَرْنِيلِي وَ أَخْوَانَهْ طَلَبَوْا مِنْ بُطْرُسْ يَقْعُدْ مَعَاهُمْ أَيَّامْ.